“Mon ava mars dan ou laverite”
“[Zeova!] Montre mwan ou semen e mon ava mars dan ou laverite.”—PSONM 86:11.
1-3. (a) Ki mannyer nou devret santi konsernan laverite ki dan Labib? Donn legzanp. (Vwar portre o konmansman sa lartik.) (b) Ki nou pou diskite dan sa lartik?
OZORDI, en kantite dimoun i aste en keksoz dan laboutik e apre zot al rann sa keksoz. Ler dimoun i aste en keksoz lo Enternet, i annan plis sans ankor ki zot rann sa keksoz. Petet zot pa sitan kontan sa ki zot in aste parey zot ti krwar oubyen i annan en keksoz ki mal avek. Alor zot deside pour fer en lesanz oubyen pour repran zot larzan.
2 Nou pa ti pou zanmen fer sa avek laverite ki dan Labib. Enn fwa ki nou’n “aste” li nou pa zanmen anvi “vann” li, andotmo, enn fwa ki nou’n aprann laverite nou pa zanmen anvi kit li. (Lir Proverb 23:23; * 1 Timote 2:4) (Vwar not.) Parey nou’n diskite dan sa lartik avan, nou’n pas bokou nou letan pour aprann laverite. Osi, petet nou’n sakrifye en karyer ki ti’n kapab fer nou ris. Deplis, petet nou relasyon avek lezot in bezwen sanze, nou’n bezwen sanz nou fason panse ek aksyon oubyen aret partisip dan bann koutim ek tradisyon ki pa fer plezir Zeova. Me nou konvenki ki napa nanryen ki nou’n sakrifye ki annan plis valer ki bann benediksyon ki nou’n gannyen ler nou’n aprann laverite.
3 Zezi ti donn legzanp lo en marsan ki pe vwayaze pour rod bann zoli perl. Ler sa zonm ti vwar enn ki annan en gran valer, deswit i ti vann tou sa ki i ti annan pour li kapab aste sa perl. Sa perl ti reprezant laverite konsernan Rwayonm Bondye. Dan sa fason, Zezi ti montre ki kantite valer laverite ti pou annan pour bann dimoun ki pe rod laverite. (Matye 13:45, 46) Ler nou ti fek aprann laverite, setadir, laverite lo Rwayonm Bondye ek tou lezot laverite presye ki dan Labib, nou osi nou ti pare pour sakrifye tou keksoz pour ganny li. Si nou kontinyen apresye laverite, nou pa pou zanmen kit li. Me malerezman, serten parmi pep Bondye in perdi lapresyasyon pour laverite e zot in menm kit laverite. Nou pa zanmen anvi fer sa! Nou bezwen swiv sa konsey Labib ki dir: “Kontinyen viv an armoni avek laverite.” (Lir 3 Zan 2-4.) Sa i vedir ki nou met laverite premye dan nou lavi e nou montre sa par nou fason viv. Me akoz e ki mannyer en dimoun i kapab “vann,” setadir kit laverite? Ki mannyer nou kapab fer sir ki nou pa zanmen fer sa? Osi, ki mannyer nou kapab vin pli determinen pour “kontinyen viv an armoni avek laverite”?
AKOZ E KI MANNYER SERTEN I “VANN” LAVERITE?
4. Akoz serten pa ti kontinyen viv an armoni avek laverite ler Zezi ti lo later?
4 Ler Zezi ti lo later, serten ki premye kou ti aksepte laverite, pa ti kontinyen viv an armoni avek laverite. Par egzanp, apre ki Zezi ti fer en mirak e donn manze en gran lafoul, sa lafoul ti swiv li ziska lot kote Lanmer Galile. Me apre Zezi ti dir en keksoz ki ti sok zot: “Si zot pa manz laser Garson zonm e bwar son disan, zot pa pou ganny lavi.” Olye demann Zezi ki sa ti vedir, zot ti dir: “Sa lansennyman i sokan, lekel ki kapab ekout sa?” Akoz sa, “en kantite son disip ti retourn kot bann keksoz ki zot ti’n kit deryer e aret swiv li.”—Zan 6:53-66.
5, 6. (a) Akoz serten in elwannyen avek laverite dan nou letan? (b) Ki mannyer en dimoun i kapab drive avek laverite?
5 Malerezman, serten dan nou letan in osi kit laverite. Akoz? Serten in kit laverite akoz en nouvo leksplikasyon lo en verse Labib oubyen akoz en keksoz ki en frer byen koni in dir oubyen fer. Lezot pa ti kontan ler en dimoun ti donn zot konsey sorti dan Labib oubyen zot ti annan en gro dezakor avek en dimoun dan kongregasyon. Lezot ankor in swiv fo lansennyman bann aposta ek lezot ki dir bann mansonz lo nou. Sa i zis detrwa parmi bann rezon akoz serten in volonterman elwanny zot avek Zeova ek kongregasyon. (Ebre 3:12-14) Pa i ti pou’n bokou pli bon si zot ti’n met konfyans dan Zezi parey Pyer ti fer! Ler parol Zezi ti sok serten dan lafoul, Zezi ti demann son bann zapot si zot osi zot ti anvi kit li. Pyer ti reponn: “Senyer, kot lekel nou pou ale? Ou annan parol lavi eternel.”—Zan 6:67-69.
6 Lezot in drive avek laverite ptitapti, petet san ki zot realize sa pe arive. En dimoun ki kit laverite ptitapti, i parey en bato ki dousman dousman i drive lwen avek lasose. Labib i averti nou pour fer atansyon ki nou “pa zanmen drive.” (Ebre 2:1) Normalman en dimoun ki drive avek laverite pa ti annan sa lentansyon. Me i les son lanmitye avek Zeova afebli e avek letan i kapab perdi sa relasyon. Ki mannyer nou kapab fer sir ki sa pa zanmen arive avek nou?
KI MANNYER NOU KAPAB FER SIR KI NOU PA ZANMEN VANN LAVERITE?
7. Kwa ki pou ed nou pour pa zanmen vann laverite?
Nou pa kapab swazir ki laverite dan Labib ki nou pou aksepte e kwa ki nou pa pou aksepte
7 Pour kontinyen viv an armoni avek laverite, nou bezwen aksepte e obei tou keksoz ki Zeova i dir. Nou bezwen fer laverite sa keksoz pli enportan dan nou lavi e swiv bann prensip Labib dan tou sa ki nou fer. Lerwa David ti promet Zeova dan en lapriyer: “Mon ava mars dan ou laverite.” (Psonm 86:11) David ti determinen pour kontinyen mars, setadir viv an armoni avek laverite e nou osi nou bezwen fer parey. Si non, nou kapab konmans mazin bann keksoz ki nou’n sakrifye pour laverite e nou menm kapab anvi reganny serten sa bann keksoz. Me nou pa kapab swazir ki laverite dan Labib ki nou pou aksepte e kwa ki nou pa pou aksepte. Nou bezwen viv an armoni avek “tou sa ki vre.” (Zan 16:13) Dan sa lartik avan, nou ti diskit lo senk keksoz ki nou ti bezwen sakrifye pour nou kapab aprann e aplik laverite. Aprezan, nou pou vwar ki mannyer nou kapab fer sir ki nou pa zanmen retourn kot sa bann keksoz ki nou’n kit deryer.—Matye 6:19.
8. Ki mannyer lafason ki en Kretyen i servi son letan i kapab fer li drive avek laverite? Donn legzanp.
8 Letan. Pour fer sir ki nou pa zanmen drive avek laverite, nou bezwen kontinyen servi byen nou letan. Si nou pa fer atansyon, nou kapab pas tro bokou letan lo divertisman, pastan, get lenformasyon lo Enternet ouswa televizyon. Menm si sa bann keksoz pa neseserman mal, i kapab ki nou pe servi sa letan ki nou ti abitye servi pour etidye e al predikasyon. Sanmenm sa ki ti arive avek Emma. * (Vwar not.) Depi ki i ti ankor en pti fiy, i ti kontan seval e tou loportinite ki i ti gannyen i ti mont seval. Me i ti konmans santi li mal pour sa kantite letan ki i ti pe pase dan son pastan e i ti deside pour sanz son priyorite. Emma ti osi aprann avek leksperyans en ser ki apel Cory Wells, ki ti abitye mont seval dan bann spektak. * (Vwar not.) Aprezan Emma i pas plis letan dan servis Zeova e i annan plis letan pour pas avek son fanmir ek zanmi ki osi servi Zeova. I santi li pli pros avek Bondye e i kontan pour konnen ki i pe byen servi son letan.
9. Ki mannyer bann keksoz materyel i kapab vin tro enportan pour nou?
9 Keksoz materyel. Pour kontinyen viv an armoni avek laverite, nou pa kapab les bann keksoz materyel vin tro enportan pour nou. Ler nou ti aprann laverite, nou ti realize ki servi Zeova i bokou pli enportan ki bann keksoz materyel e nou ti kontan pour sakrifye nenport keksoz pour laverite. Me avek letan, nou kapab vwar lezot pe aste bann dernyen lekipman elektronik oubyen pe profit lezot keksoz ki larzan i kapab aste. Nou kapab konmans santi ki nou pe mank serten keksoz. Petet nou nepli satisfe avek sa ki nou annan e nou kapab konmans konsantre plis lo ganny bann keksoz materyel e fer mwens dan nou servis pour Zeova. Sa i fer nou rapel sa ki ti arive avek Demas. I ti telman kontan “sa lemonn konmela” ki i ti kit sa responsabilite ki i ti annan pour travay avek zapot Pol. (2 Timote 4:10) Petet Demas ti kontan bann keksoz materyel plis ki i ti kontan pour servi Bondye. Oubyen petet i ti nepli anvi fer bann sakrifis pour li kapab servi ansanm avek Pol. Ki leson nou aprann? I kapab ki dan lepase nou ti vreman kontan bann keksoz materyel. Si nou pa fer atansyon, sa lanmour i kapab redevlope e vin sitan for ki nou perdi nou lanmour pour laverite.
10. Lenfliyans lekel nou bezwen reziste?
10 Nou relasyon avek lezot. Pour kontinyen viv an armoni avek laverite, nou bezwen fer sir ki nou pa les bann dimoun ki pa servi Zeova enfliyans nou. Ler nou ti aprann laverite, nou relasyon avek nou fanmir ek zanmi ki pa Temwen ti sanze. Petet serten ti respekte nou nouvo krwayans, tandis ki lezot ti opoz nou. (1 Pyer 4:4) Byensir, nou esey nou mye pour annan en bon relasyon avek nou fanmir e pour tret zot avek labonte. Me nou pa kapab inyor bann standar Zeova zis pour fer zot plezir. Deplis, parey nou aprann dan 1 Korentyen 15:33, nou bann zanmi pros i devret bann dimoun ki kontan Zeova.
11. Ki mannyer nou kapab evit bann panse ek aksyon enpir?
11 Bann panse ek aksyon enpir. Pour kontinyen viv an armoni avek laverite, nou bezwen sen oubyen pir dan lizye Zeova. (Izai 35:8; lir 1 Pyer 1:14-16.) Ler nou ti aprann laverite, nou ti fer bann sanzman dan nou lavi pour nou kapab swiv bann standar Labib. Serten ti fer bann gran sanzman. Me nou ankor bezwen fer atansyon ki nou pa zanmen fer lesanz nou lavi pir pour en lavi imoral. Kwa ki kapab ed nou reziste ler nou ganny tante pour fer en keksoz imoral? Mazin lo sa ki Zeova in fer pour ou kapab vin sen. I ti donn lavi son Garson byenneme, Zezi Kri! (1 Pyer 1:18, 19) Pour ed nou reste pir dan lizye Zeova, nou bezwen toultan rapel ki kantite valer ranson Zezi i annan.
12, 13. (a) Akoz nou bezwen annan menm pwennvi avek Zeova lo bann lafet? (b) Ki nou pou diskite aprezan?
12 Bann koutim ek tradisyon ki pa fer plezir Bondye. Nou fanmir, koleg travay ek kanmarad lekol i kapab esey fer nou partisip dan zot bann selebrasyon. Kwa ki kapab ed nou pour reziste presyon pour partisip dan bann koutim ek lafet ki pa fer plezir Zeova? Nou bezwen gard antet bann rezon akoz Zeova pa aksepte sa bann lafet. Nou kapab fer resers dan nou bann piblikasyon pour nou rapel ki mannyer serten sa bann lafet ti konmanse. Ler nou medit lo bann rezon ki Labib i donnen pour nou pa selebre sa bann lafet, nou asire ki nou pe viv an armoni avek sa ki “akseptab pour Senyer.” (Efezyen 5:10) Si nou annan konfyans dan Zeova ek son Parol, nou pa pou trakas nou avek sa ki lezot i mazinen.—Proverb 29:25.
13 Nou anvi viv an armoni avek laverite pour touzour. Kwa ki kapab ed nou pour pli determinen pour kontinyen viv an armoni avek laverite? Annou vwar trwa keksoz ki nou kapab fer.
VIN PLI DETERMINEN POUR VIV AN ARMONI AVEK LAVERITE
14. (a) Ler nou kontinyen etidye Labib, ki mannyer sa pou ed nou vin determinen pour pa zanmen kit laverite? (b) Akoz nou bezwen lasazes, disiplin ek konprenezon?
14 Premyerman, kontinyen etidye Labib e reflesi o profon lo sa ki ou aprann. Fer sir ki sa i form parti ou progranm. Pli ou etidye, pli ou pou kontan laverite e vin determinen pour pa zanmen kit laverite. Proverb 23:23, (NWT) i dir nou “aste laverite” e osi “aste lasazes, disiplin ek konprenezon.” I pa ase pour zis konn laverite ki dan Labib. Nou bezwen aplik li dan nou lavi. Ler nou ganny konprenezon, nou azout bann keksoz ki nou’n aprann avek bann keksoz ki nou deza konnen. Lasazes i pous nou pour aplik sa ki nou konnen. Par ler, laverite i disiplin nou par montre nou bann sanzman ki nou bezwen fer. Nou bezwen vitman aksepte sa disiplin ki Labib i dir i vo plis ki larzan.—Proverb 8:10.
15. Ki mannyer laverite i kapab protez nou parey en sang?
15 Dezyenmman, vin determinen pour aplik laverite dan ou lavi toulezour. Labib i konpar laverite avek sang en solda. (Efezyen 6:14) Dan letan Labib, sang en solda ti siport e protez li dan lager, tan ki son sang ti byen sere. Si non, i pa ti pou ed li. Ki mannyer laverite i protez nou parey en sang? Si nou toultan gard laverite ki dan Labib pros avek nou, i pou protez nou kont bann move panse e ed nou fer bann bon desizyon. Ler nou annan en gro problenm oubyen nou ganny tante pour fer en keksoz mal, laverite ki dan Labib pou fer nou pli determinen pour fer sa ki byen. Zis parey en solda pa ti pou zanmen al lager san son sang, nou pa pou zanmen kit laverite. Nou fer sir ki nou aplik laverite ki dan Labib dan tou laspe nou lavi. En solda ti osi met son lepe anpandan avek son sang. Annou vwar ki mannyer nou kapab fer parey.
16. Ler nou ansenny laverite, ki mannyer sa i ed nou pour kontinyen viv an armoni avek laverite?
16 Trwazyenmman, fer ou maksimonm pour ansenny laverite ki dan Labib avek lezot. Labib i ganny konpare avek en lepe. Zis parey en bon solda ti tyonbo for son lepe, nou osi nou bezwen tyonbo for Parol Bondye. (Efezyen 6:17) Nou tou nou kapab vin bann pli bon ansenyan, “ki servi byen parol laverite.” (2 Timote 2:15) Ler nou servi Labib pour ansenny lezot, nou aprann e kontan laverite plis ankor. Nou vin pli determinen ankor pour kontinyen viv an armoni avek laverite.
Laverite i en kado presye sorti kot Zeova
17. Akoz laverite i presye pour ou?
17 Laverite i en kado presye sorti kot Zeova. I fer li posib pour nou annan en relasyon pros avek nou Papa ki dan lesyel. Sa i sa keksoz pli presye ki nou kapab annan. Zeova in deza ansenny nou en kantite, me sa i zis konmansman! I’n promet ki i pou kontinyen ansenny nou pour touzour. Alor, apresye sa laverite parey ou ti pou apresye en perl ki annan gran valer. Kontinyen “aste laverite e pa zanmen vann li.” Koumsa, parey David, ou pou gard sa promes avek Zeova: “Mon ava mars dan ou laverite.”—Psonm 86:11.
^ par. 2 Proverb 23:23 (NWT): “Aste laverite e pa zanmen vann li. Aste lasazes, disiplin ek konprenezon.”
^ par. 8 Non in sanze.
^ par. 8 Al lo Televizyon JW, sanz langaz sa sit pour Angle e get anba INTERVIEWS AND EXPERIENCES > TRUTH TRANSFORMS LIVES.