1-2. Dapre 1 Pyer 4:7, 8, kwa ki pou ed nou fer fas avek letan difisil?

ANMEZIR ki nou vin pli pros avek lafen “bann dernyen zour,” nou kapab fer fas avek bann problenm vreman difisil. (2 Tim. 3:1) Par egzanp, apre en eleksyon dan en pei Was Lafrik, i ti annan en kantite vyolans. Pour plis ki sis mwan, lavi nou bann frer ek ser ti an danze akoz i ti annan lager partou. Kwa ki ti ed zot fer fas avek sa bann difikilte? Serten ti kapab al reste avek bann frer ek ser kot i pli an sekirite. En frer ti dir: “Dan sa bann moman, mon ti kontan ki mon ti avek mon bann zanmi. Nou ti kapab ankouraz kanmarad.”

² Ler “gran ladetres” i konmanse, nou pou kontan pour annan bann bon zanmi ki kontan nou. (Rev. 7:14) Alor, i enportan ki nou fer bann bon zanmi depi konmela menm. (Lir 1 Pyer 4:7, 8.) Nou kapab aprann bokou avek legzanp Zeremi. Son bann zanmi ti ed li pandan sa letan zis avan Zerizalenm i ganny detrir. * Ki mannyer nou kapab imit legzanp Zeremi?

3. (a) Petet akoz Zeremi ti’n kapab anvi izol son lekor? (b) Ki Zeremi ti dir son sekreter Barouk e ki ti arive?

³ Pour apepre 40 an, Zeremi ti reste dan lavil Anatot parmi bann dimoun ki pa ti fidel. Sa ti enkli bann vwazen e petet serten son bann fanmir pros. (Zer. 11:21; 12:6) Par kont, i pa ti izol son lekor. Anfet, i ti koz lo son bann santiman avek son sekreter fidel Barouk e nou osi nou konnen ki mannyer i ti santi parski son bann parol in ganny ekrir dan Labib. (Zer. 8:21; 9:1; 20:14-18; 45:1)  Anmezir ki Barouk ti ekri tou sa ki ti arive avek Zeremi, nou kapab mazin sa lanmour ek respe ki ti devlope ant zot.​—Zer. 20:1, 2; 26:7-11.

4. Ki Zeova ti demann Zeremi pour fer e ki mannyer sa ti ranforsi lanmitye ant Zeremi ek Barouk?

⁴ Pour plizyer lannen, Zeremi ti demontre kouraz e i ti averti bann Izraelit konsernan sa ki ti pou arive avek Zerizalenm. (Zer. 25:3) Dan en lesey pour ankouraz bann Izraelit pour repantir, Zeova ti demann Zeremi pour ekri Son lavertisman dan en roulo. (Zer. 36:1-4) I kapab ki pour plizyer mwan Zeremi ek Barouk ti travay ansanm pour fer sa ki Zeova ti’n demann zot pour fer. Pandan sa letan, zot ti fer bann konversasyon ki ti ranforsi zot lafwa.

5. Ki mannyer nou konnen ki Barouk ti en bon zanmi pour Zeremi?

⁵ Apre ki Zeremi ek Barouk ti’n fini ekri sa roulo, Zeremi ti bezwen depan lo son zanmi Barouk pour delivre sa mesaz. (Zer. 36:5, 6) Avek kouraz, Barouk ti riske son lavi pour fer sa travay. I tre probab ki Zeremi ti vreman fyer ler Barouk ti al dan lakour tanp e lir sa ki ti’n ganny ekrir dan sa roulo devan tou dimoun. (Zer. 36:8-10) Bann prens Zida ti tande sa ki Barouk ti’n fer e zot ti donn li lord pour lir avek zot sa ki ti dan sa roulo. (Zer. 36:14, 15) Bann prens ti deside pour rakont Lerwa Zeoyakim sa ki Zeremi ti’n dir. Alor, zot ti pran konsiderasyon pour Barouk e dir li: “Ou avek Zeremi, zot devre al kasyet. Pa les personn konnen kote zot ete.” (Zer. 36:16-19) Sa ti en bon konsey!

6. Ki Zeremi ek Barouk ti fer ler zot ti rankontre lopozisyon?

⁶ Ler Lerwa Zeoyakim ti tann sa parol ki Zeremi ti’n ekri, i ti sitan ankoler ki i ti  bril sa roulo e donn lord pour aret Zeremi ek Barouk. Par kont Zeremi pa ti per. I ti pran en lot roulo, donn Barouk e ler Zeremi ti dir mesaz Zeova, Barouk ti ekri “tou sa ki ti lo premye roulo e ki [Zeoyakim], lerwa Zida ti’n brile.”​—Zer. 36:26-28, 32.

7. Petet ki ti arive ler Zeremi ek Barouk ti travay ansanm?

⁷ Souvan, bann dimoun ki pas dan problenm ansanm i vin pli pros avek kanmarad. Alor, i tre probab ki ler Zeremi ek Barouk ti pe travay ansanm pour ranplas sa roulo ki ti’n ganny detrir par move Lerwa Zeoyakim, zot ti aprann konn kanmarad pli byen e vin de bon zanmi. Ki leson nou aprann avek legzanp Zeremi ek Barouk?

8. Kwa ki kapab anpes nou fer bann bon zanmi e akoz nou devret kontinyen esey fer bann bon zanmi?

⁸ Nou kapab vwar li difisil pour eksprim nou santiman akoz nou’n ganny ofanse dan lepase. (Prov. 18:19, 24, NWT) Oubyen nou kapab santi ki nou napa ase letan ek lenerzi pour fer bann bon zanmi. Me nou pa devret krwar ki i enposib pour fer zanmi. Si nou oule ki nou bann frer ek ser i ed nou ler nou dan problenm, nou bezwen devlop en bon lanmitye avek zot depi la konmela. En fason enportan nou kapab fer sa, i ler nou dir zot nou bann panse ek santiman.​—1 Pyer 1:22.

9. (a) Ki mannyer Zezi ti montre ki i annan konfyans dan son bann zanmi? (b) Akoz ler ou koz lo ou bann panse ek santiman sa i kapab ed ou fer bann bon zanmi? Donn en legzanp.

⁹ Zezi ti montre ki i annan konfyans dan son bann zanmi ler i ti koz fran avek zot e i pa ti kasyet zot nanryen. (Zan 15:15) Nou kapab swiv legzanp Zezi par dir nou bann zanmi konsernan bann keksoz ki fer nou kontan, sa ki fer nou enkyet e sa ki dezapwent nou. Ekout atantivman ler en dimoun i koz avek ou parski ou kapab aprann ki sa dimoun i annan menm fason panse, santiman ek lobzektif parey ou. Annou vwar legzanp Cindy, en ser ki annan 29 an. I ti fer zanmi avek en pionye ki apel Marie-Louise ki annan 67 an. Cindy ek Marie-Louise ti travay ansanm dan predikasyon tou le Zedi bomaten e zot ti santi zot alez pour koz lo plizyer topik avek kanmarad. Cindy i dir: “Mon kontan koz lo bann keksoz enportan avek mon bann zanmi parski sa i ed mwan konn e konpran zot pli byen.” Zis  parey Cindy, ler ou koz lo ou bann panse ek santiman avek ou bann zanmi e ou ekout zot ler zot koze, ou lanmitye avek zot i vin pli for.​—Prov. 27:9, NWT.

10. Dapre Ebre 10:24, ki i kapab arive ler nou travay ansanm avek nou bann frer ek ser?

¹⁰ Parey sa ki ti arive avek Zeremi ek Barouk, ler nou travay ansanm avek nou bann frer ek ser e nou vwar zot bon kalite, sa i fer nou aprann avek zot e nou vin pli pros avek zot. (Lir Ebre 10:24.) Par egzanp, ki mannyer ou santi ler ou dan predikasyon e ou tann ou zanmi pe defann son krwayans avek lardyes oubyen ler i koz avek konviksyon lo Zeova ek son plan? I tre probab ki ou pou vin pli pros avek li.

11-12. Donn en legzanp ki montre ki travay ansanm dan predikasyon i kapab ed nou ranforsi nou lanmitye.

¹¹ Annou vwar de legzanp ki montre ki mannyer travay ansanm dan predikasyon i fer nou vin pli pros avek kanmarad. Adeline, en ser 23 an, ti demann enn son zanmi ki apel Candice pour al predikasyon avek li dan en teritwar ki pa souvan ganny prese. I dir: “Nou ti anvi anons sa bon nouvel avek plis devouman e pour ganny plis lazwa dan predikasyon. Nou ti osi bezwen lankourazman pour kapab kontinyen donn Zeova nou meyer.” Ki byenfe zot ti gannyen ler zot ti travay ansanm? Adeline i dir: “A lafen sak lazournen, nou ti koz lo nou bann santiman, lo bann konversasyon ki’n ankouraz nou e lo lafason ki nou’n vwar Zeova pe diriz nou travay predikasyon. Nou ti kontan sa bann konversasyon e nou ti aprann konn kanmarad pli byen.”

¹² De ser selibater sorti Lafrans ki apel Laïla ek Marianne, ti al prese pour senk semenn Bangui, kapital Repiblik Lafrik Santral, en landrwa ki vreman bizi. Laïla i dir: “Mwan ek Marianne ti ganny difikilte pour adapte avek kanmarad, me gras a en bon kominikasyon e lanmour senser, nou lanmitye ti vin pli for. Ler mon  ti vwar ki mannyer Marianne ti pe adapte avek sa nouvo sirkonstans, son lanmour pour dimoun dan sa landrwa ek son devouman dan predikasyon, mon ti apresye li plis ankor.” Ou pa bezwen al dan en lot pei pour apresye ou bann frer ek ser. Sak fwa ou travay ansanm dan predikasyon avek en frer oubyen ser dan ou kongregasyon, ou annan sa loportinite pour aprann konn li pli byen e ranforsi zot lanmitye.

13. Ki i kapab arive ler nou travay ansanm avek nou zanmi?

¹³ Parfwa ler nou travay pros avek nou bann zanmi, nou pa zis vwar zot bann zoli kalite me nou osi vwar zot bann febles. Kwa ki kapab ed nou reste pros avek nou zanmi malgre bann febles ki zot annan? Annou vwar legzanp Zeremi ankor enn fwa. Kwa ki ti ed li vwar bann zoli kalite son bann zanmi e pa konsantre lo zot febles?

14. Ki Zeremi ti aprann lo Zeova e ki mannyer sa ti ed li?

¹⁴ Zeremi ti ekri sa liv ki port son non dan Labib. I tre probab ki i ti osi ekri liv 1 Lerwa ek 2 Lerwa, ki form parti bann liv dan Labib. San dout, sa travay ti fer Zeremi vwar ki mannyer Zeova ti demontre konpasyon anver bann imen enparfe. Par egzanp, i ti konnen ki ler Lerwa Aab ti repantir pour bann move keksoz ki i ti fer, Zeova ti dir ki I pa pou detri fanmir Aab pandan letan ki Aab i ankor vivan. (1 Rwa. 21:27-29) Pareyman, Zeremi ti konnen ki Manase ti fer plis move keksoz pour ofans Zeova ki Aab. Kantmenm sa, Zeova ti pardonn Manase ler i ti repantir. (2 Rwa. 21:16, 17; 2 Kron. 33:10-13) Sa bann resi ti’n bezwen ed Zeremi pour demontre pasyans ek konpasyon pour son bann zanmi, zis parey Bondye i fer anver son bann serviter.​—Ps. 103:8, 9.

15. Ki mannyer Zeremi ti swiv legzanp Zeova ler Barouk ti ganny distrer dan son travay?

¹⁵ Reflesir lo lafason ki Zeremi ti ed Barouk ler Barouk ti ganny distrer dan son travay. Zeremi pa ti vitman mazinen ki Barouk pa ti pou sanze. O kontrer, Zeremi ti ed Barouk e dir li sa mesaz fran ki Zeova ti’n donn li avek lanmour. (Zer. 45:1-5) Ki leson nou kapab aprann avek sa resi?

16. Dapre Proverb 17:9, ki nou bezwen fer pour nou reste zanmi avek lezot?

¹⁶ Nou pa ekspekte ki nou bann frer ek ser i parfe. Alor, ler nou’n fer bann bon zanmi, nou bezwen fer zefor pour gard sa lanmitye. Si nou zanmi i fer en fot, petet nou pou bezwen zantiman donn li en konsey fran ki sorti dan Parol Bondye. (Ps. 141:5, NWT) Si zot ofans nou, nou bezwen pardonn zot. Ler nou’n pardonn zot, nou devret evite koz lo sa keksoz ki’n ofans nou, ki swa avek sa dimoun oubyen avek lezot. (Lir Proverb 17:9.) Dan sa letan difisil, i vreman enportan ki nou konsantre lo bann zoli kalite ki nou bann frer ek ser i annan olye lo zot febles! Si nou fer sa, nou pou ranforsi nou lanmitye avek zot. I enportan ki nou fer sa depi la konmela, parski nou pou bezwen bann zanmi pros pandan gran ladetres.

17. Akoz nou kapab dir ki Zeremi ti en vre zanmi dan letan difisil?

¹⁷ Sa ki profet Zeremi ti fer i montre ki i ti en vre zanmi dan letan difisil. Par  egzanp, apre ki Ebed-Melek, en zofisye dan lakour lerwa ti’n sov Zeremi dan en pwi labou, Ebed-Melek ti per ki bann prens ti pou fer li ditor. Ler Zeremi ti tann sa, i pa ti reste trankil e espere ki son zanmi i fer fas avek son problenm li menm. Menm si Zeremi ti dan prizon, i ti dir son zanmi Ebed-Melek sa promes rekonfortan sorti kot Zeova pour ankouraz li.​—Zer. 38:7-13; 39:15-18.

18. Dapre Proverb 17:17, ki nou devret fer ler en zanmi pe soufer?

¹⁸ Ozordi, nou bann frer ek ser i fer fas avek diferan kalite problenm. Par egzanp, en kantite zot pe soufer akoz dezas natirel oubyen akoz lager, polisyon ek terorizm. Ler sa i arive, serten parmi nou i kapab envit sa bann frer ek ser pour vin reste kot nou. Lezot i kapab ede finansyerman. Me nou tou nou kapab demann Zeova pour ed nou bann frer ek ser. Si nou konnen ki en frer oubyen ser i dekouraze, nou kapab pa konnen ki pour dir e ki pour fer. Me nou tou nou kapab ede. Par egzanp, nou kapab fer letan pour vizit nou zanmi. Nou kapab esey konpran son santiman anmezir ki nou ekout li koze. Nou osi kapab montre li nou verse prefere pour rekonfort li. (Iza. 50:4) Sa ki pli enportan, i ki ou la pour ou bann zanmi ler zot bezwen ou.​—Lir Proverb 17:17, NWT. *

19. Si nou fer bann bon zanmi depi la konmela, ki mannyer sa pou ed nou a lavenir?

¹⁹ Nou bezwen determinen pour annan bann bon lanmitye e pour gard sa lanmitye avek nou bann frer ek ser depi la konmela. Akoz? Parski nou bann lennmi pou esey diviz nou par servi bann mansonz. Zot pou esey fer nou napa konfyans e pa siport nou bann frer ek ser. Me zot pa pou reisi. Zot pa pou kapab anpes nou kontan nou bann frer ek ser. Napa nanryen ki zot pou fer ki pou gat sa lanmitye ki nou annan antre nou. Anfet, nou pou reste zanmi pour touzour e pa zis pandan lafen sa lemonn!