1-2. Ki mannyer nou kapab swiv sa konsey ki dan Proverb 4:25? Donn en legzanp.

MAZIN sa trwa legzanp swivan. En ser aze i mazin bann bon keksoz ki’n arive dan son lavi. Menm si lavi i difisil aprezan, i kontinyen fer tou sa ki i kapab pour Zeova. (1 Kor. 15:58) Toulezour i imazin li ansanm avek son fanmir ek zanmi pe viv dan Paradi. En lot ser i mazin en dimoun dan kongregasyon ki’n fer en keksoz ki’n bles li en kantite. Me i deside pour aret mazin sa sityasyon. (Kol. 3:13) En frer i mazin bann fot ki i’n fer dan lepase me i konsantre lo fer tou sa ki i kapab pour reste fidel avek Zeova depi la konmela.​—Ps. 51:10, NWT.

² Kwa ki sa trwa Kretyen i annan an komen? Zot tou zot rapel bann keksoz ki’n arive dan lepase me zot pa pe kontinyen mazin sa bann keksoz. O kontrer, zot fikse zot regar lo lavenir.​—Lir Proverb 4:25, NWT. *

3. Akoz nou bezwen fikse nou regar lo lavenir?

³ Akoz i enportan pour nou fikse nou regar lo lavenir? Zis parey en dimoun pa kapab mars drwat si i pe kontinyen get deryer, nou pa pou kapab kontinyen donn nou meyer dan servis Zeova si nou pe kontinyen mazin lepase.​—Lik 9:62.

4. Ki nou pou vwar dan sa lartik?

⁴ Dan sa lartik, nou pou vwar trwa keksoz ki kapab fer nou kontinyen mazin sa ki’n arive dan lepase. * Sa bann keksoz i: (1) ler nou anvi ki nou lavi i parey i ti ete dan  lepase, (2) ler nou gard rankin e (3) ler nou santi nou tro koupab. Dan sak sa bann sityasyon, nou pou vwar ki mannyer bann prensip Labib i kapab ed nou pour pa konsantre lo “sa ki deryer” me pour nou donn tou pour tou pour “bann keksoz ki devan [nou].”​—Fili. 3:13.

5. Dapre Eklezyast 7:10, ki nou pa devret fer?

⁵ Lir Eklezyast 7:10. Remarke ki sa verse pa dir ki i mal pour dir: “Letan lontan ti bon!” Parski apre tou, bann bon souvenir i en kado sorti kot Zeova. O kontrer sa verse i dir: “Pa dir: Lontan ti pli bon ki konmela!” Alor, nou bezwen fer atansyon ki nou pa konpar lafason nou lavi ti ete dan lepase avek lafason i ete la konmela e dir ki tou keksoz i pli move ozordi. En lot tradiksyon Labib i tradwi sa verse koumsa: “Pa zanmen demande, ‘Akoz keksoz ti pli bon dan lepase?’ I pa saz pour demann sa kestyon.”

6. Akoz i pa saz pour kontinyen mazinen ki nou lavi ti pli gou dan lepase? Donn en legzanp.

⁶ Akoz i pa saz pour kontinyen mazinen ki nou lavi ti pli gou dan lepase? Sa kalite fason panse i kapab fer nou rapel zis bann bon keksoz me oubliy bann move keksoz ki nou’n pas atraver. Par egzanp, annou vwar legzanp bann Izraelit dan letan lontan. Apre ki bann Izraelit ti’n kit Lezip, zot pa ti tarde pour oubliye ki zot lavi ti vreman difisil ler zot ti Lezip. O kontrer, zot ti konsantre zis lo manze ki zot ti gannyen laba. Zot ti dir: “Ler nou mazin sa pwason ki nou ti manze pour nanryen Lezip, sa bann kokonm, melon, pwaro, zonnyon ek lay!” (Nom. 11:5, NWT) Me eski sa bann manze ti vreman “pour nanryen”? Non. Bann Izraelit ti pey ser pour sa manze parski sa letan, zot ti pe soufer konman lesklav Lezip. (Egz. 1:13, 14; 3:6-9) Malerezman, zot ti oubliy tou sa bann soufrans e zot ti anvi reviv lepase. Zot ti swazir pour konsantre lo bann bon moman dan lepase dan plas konsantre lo  bann bon keksoz ki Zeova ti’n fek fer pour zot. Zeova ti vreman pa kontan zot latitid.​—Nom. 11:10.

7. Kwa ki ti ed en ser pour evite kontinyen mazin bann keksoz dan lepase?

⁷ Ki mannyer nou kapab evite kontinyen mazin bann keksoz dan lepase? Annou vwar legzanp en ser ki ti konmans servi dan Betel Brooklyn an 1945. Detrwa lannen apre, i ti marye avek en frer dan Betel e ansanm zot ti kontinyen servi dan Betel pour plizyer lannen. Par kont, an 1976, son msye ti tonm malad. I dir ki ler son msye ti realize ki i ti pros pour mor, son msye ti donn bann bon konsey pour ed li apre son lanmor. Son msye ti dir li: “Nou’n annan en bon lavi maryaz. En kantite dimoun pa’n zanmen eksperyans sa.” I ti osi ankouraz li e dir: “Ou pa pou oubliy bann bon keksoz ki nou’n fer ansanm me pa konsantre lo sa bann moman. Anmezir letan i pase, ou sagrinasyon pou diminyen. Pa bezwen tro dekouraze e tro sagren akoz mon’n mor. O kontrer, apresye bann bon moman ki nou’n pase ansanm dan servis Zeova. . . . Bann souvenir i en kado sorti kot Zeova.” Pa sa ti en bon konsey!

8. Ki byenfe nou ser in gannyen ler i’n ekout konsey son msye?

⁸ Nou ser ti ekout konsey son msye. I ti servi Zeova fidelman ziska son lanmor a laz 92 an. Detrwa lannen avan i ti mor, i ti dir: “Mon kapab dir ki pandan sa 63 an ki mon’n servi Zeova a plen tan, mon’n annan en lavi ki vreman ere.” Akoz i ti kapab dir sa? I ti dir: “Nou kapab annan en lavi ere parski nou form parti en fanmir frer ek ser e nou tou nou annan sa lespwar pour viv dan Paradi lo later, pour servi nou Gran Kreater sa sel vre Bondye, Zeova pour touzour.” * Nou kapab aprann bokou avek legzanp sa ser ki ti fikse son regar lo lavenir.

9. Dapre Levitik 19:18, kan ki nou kapab vwar li difisil pour pardonn en dimoun ki’n ofans nou?

⁹ Lir Levitik 19:18. Parfwa nou vwar li difisil pour pardonn en dimoun dan kongregasyon, en bon zanmi oubyen en manm fanmir ki’n ofans nou. Par egzanp, en ser ti akiz en lot ser konmkwa in vol son larzan me pli tar i ti realize ki i ti’n fer en fo lakizasyon e i ti al demann leskiz. Sa ser ki ti’n ganny akize ti vreman ofanse e i pa ti kapab aret mazin sa ki ti’n arive. Eski ou’n deza santi koumsa? Menm si nou pa’n pas dan sa menm sityasyon, i tre probab ki laplipar nou in deza santi ki nou pa pou zanmen pardonn en dimoun ki’n ofans nou.

10. Kwa ki kapab ed nou ler nou santi ki nou pa pou zanmen pardonn en dimoun?

¹⁰ Kwa ki kapab ed nou ler nou santi ki nou pa pou zanmen pardonn en dimoun? Nou devret rapel ki Zeova i vwar tou keksoz. I konn tou sa ki nou pas ladan par egzanp, ler dimoun i tret nou dan en fason enzis. (Ebr. 4:13) I pa kontan ler i vwar nou pe soufer. (Iza. 63:9, NWT) Osi, i’n promet ki en zour i pou retir tou bann soufrans ki nou’n gannyen akoz bann lenzistis ki’n arive avek nou.​—Rev. 21:3, 4.

11. Ki byenfe nou gannyen ler nou pardonn lezot?

¹¹ Nou osi anvi rapel ki nou pou santi nou pli byen ler nou pardonn lezot. Sa ser ki ti ganny akize konmkwa in vol larzan ti aprann sa leson. Avek letan, i ti pardonn sa ser ki ti’n akiz li. I ti rekonnet ki ler nou pardonn lezot, Zeova osi i pardonn nou. (Mat. 6:14) I pa ti esey zistifye sa ki sa lot ser ti’n fer avek li me i ti swazir pour pardonn li. Apre sa, nou ser ti pli ere e i ti kapab konsantre lo son servis pour Zeova.

12. Ki nou aprann dan 1 Zan 3:19, 20?

¹² Lir 1 Zan 3:19, 20. Parfwa nou tou nou santi nou koupab. Par egzanp, serten i santi zot koupab akoz bann keksoz ki zot in fer avan zot konn laverite. Lezot i santi zot koupab akoz serten fot ki zot in fer apre ki zot in batize. (Rom. 3:23) Byensir, nou anvi fer sa ki byen me “nou tou nou souvan fer fot.” (Zak 3:2; Rom. 7:21-23) Menm si nou pa kontan ler nou santi nou koupab, parfwa i kapab bon pour nou. Akoz? Parski ler nou santi nou koupab, sa i kapab pous nou pour fer bann sanzman dan nou lavi e pour fer tou pour pa repet menm fot.​—Ebr. 12:12, 13.

13. Akoz nou pa devret kontinyen santi nou tro koupab?

¹³ Par kont, nou kapab kontinyen santi nou koupab menm apre ki nou’n repantir e Zeova in montre ki i’n pardonn nou. Sa kalite santiman i kapab fer nou ditor. (Ps. 31:10; 38:3, 4) Ki mannyer? Annou vwar legzanp en ser ki ti kontinyen santi li koupab pour bann fot ki i’n fer dan lepase. I ti dir: “Mon ti santi ki i pa vo lapenn pour mwan travay dir dan servis Zeova parski i tre probab ki mon pa pou ganny sove.” I kapab ki en kantite nou i santi parey sa ser. Alor, nou bezwen veye ki nou pa santi nou tro koupab. Akoz? Parski Satan ti pou vreman kontan si nou aret servi Zeova menm si Zeova in pardonn nou.​—Konpar 2 Korentyen 2:5-7, 11.

14. Ki mannyer nou kapab asire ki Zeova in pardonn nou?

¹⁴ Kantmenm sa, nou kapab demann nou lekor: ‘Ki mannyer mon kapab asire ki Zeova in pardonn mwan?’ Si ou demann sa kestyon, sa i montre ki Zeova i kapab pardonn ou. Plizyer lannen  pase, Latour Veyer ti dir: “I kapab ki nou kontinyen repet menm fot plizyer fwa parski nou pa’n reisi aret en move labitid ki nou ti annan avan ki nou’n servi Zeova. . . . Pa dekouraze. Pa bezwen krwar ki ou’n fer en pese ki Zeova pa pou zanmen pardonnen. Sanmenm ki Satan i anvi ou krwar. Ou sagren e ou fristre avek ou lekor ler ou fer sa fot. Sa i montre ki ou pa en move dimoun e ki Zeova i kapab pardonn ou. Kontinyen demontre limilite e kontinyen demann Bondye pour pardonn ou. Kontinyen demann li pour ed ou annan en konsyans kler ankor e pour ed ou aret fer sa fot. Menm si en zanfan i ganny menm problenm plizyer fwa, i toultan demann son papa led. Alor kontinyen demann Zeova led e i pou ed ou parski i annan en kantite labonte ekstraordiner.” *

15-16. Ki mannyer serten frer ek ser in santi ler zot in realize ki Zeova in pardonn zot?

¹⁵ Bokou serviter Zeova in ganny rekonforte ler zot in realize ki Zeova in pardonn zot. Par egzanp, detrwa lannen pase, en frer ti ganny ankouraze par sa ki i ti lir dan en lartik dan sa seri “Labib i sanz lavi.” Dan sa lartik, en ser i dir ki i ti difisil pour krwar ki Zeova i kontan li akoz bann move keksoz ki’n arive dan son lavi. I ti kontinyen annan sa bann santiman plizyer lannen apre ki i ti’n batize. Me ler i ti reflesir byen lo ranson, sa ti ed li pour krwar ki Zeova i kontan li. *

¹⁶ Ki mannyer son leksperyans ti ed sa frer? Sa frer ti ekri: “Ler mon ti ankor zenn, mon ti abitye get pornografi e i ti vreman difisil pour mwan aret fer sa. Resaman, mon ti fer li ankor. Mon ti demann bann ansyen pour ed mwan e sa in ed mwan pour lager avek mon problenm. Bann ansyen in ed mwan pour krwar ki Bondye i kontan mwan e ki i anvi pardonn mwan. Me parfwa mon santi konmsi mon pa vo nanryen e ki Zeova pa kapab kontan mwan. Ler mon’n lir leksperyans sa ser, sa in ed mwan. Aprezan mon konpran  ki ler mon dir ki Bondye pa pou pardonn mwan, sa i vedir ki mon krwar ki sakrifis son Garson pa ase pour kouver mon bann pese. Mon’n anmas sa lartik pour mwan kapab lir e medit lo la sak fwa mon ganny bann santiman ki mon pa vo nanryen.”

17. Akoz zapot Pol pa ti kontinyen santi li tro koupab?

¹⁷ Bann leksperyans koumsa i fer nou mazin zapot Pol. Avan ki i ti vin en Kretyen, i ti fer bann move keksoz. Pol ti rapel sa ki i ti’n fer me i pa ti kontinyen mazin lo la. (1 Tim. 1:12-15) I ti krwar ki sakrifis Zezi ti en kado ki Bondye ti’n donn li personnelman. (Gal. 2:20) Alor Pol pa ti kontinyen santi li tro koupab me i ti konsantre lo donn Zeova son meyer.

18. Ki nou’n aprann apre ki nou’n etidye sa lartik?

¹⁸ Ki nou’n aprann apre ki nou’n etidye sa lartik? (1) Bann bon souvenir i en kado sorti kot Zeova me menm si nou lavi ti gou dan lepase, nou lavi pou pli meyer dan nouvo lemonn. (2) Lezot i kapab bles nou me ler nou swazir pour pardonnen, nou kapab konsantre lo nou servis pour Zeova. (3) Ler nou santi nou tro koupab, sa i kapab anpes nou servi Zeova avek lazwa. Alor, parey Pol, nou bezwen annan konfyans ki Zeova in pardonn nou.

19. Ki mannyer nou konnen ki dan nouvo lemonn nou pa pou mazin okenn keksoz ki fer nou sagren?

¹⁹ Nou annan lespwar pour viv pour touzour. Ler nou pou dan nouvo lemonn, nou pa pou mazin okenn keksoz ki fer nou sagren. Konsernan sa letan, Labib i dir: “Zot souvenir pa pou zanmen retourn dan lespri.” (Iza. 65:17) Zis mazinen: Serten parmi nou ki’n servi Zeova pour plizyer lannen i aprezan aze me dan nouvo lemonn zot pou vin zenn. (Zob 33:25) Alor annou reste determinen pour pa kontinyen mazin sa ki’n arive dan lepase. O kontrer nou anvi konsantre lo lavenir e fer tou sa ki nou kapab la konmela pour ariv dan sa nouvo lemonn!