1. Kwa ki pou rekonfort nou ler nou santi nou tousel oubyen nou pa kapab fer fas avek nou problenm? (Psonm 118:5-7)

ESKI ou’n deza santi ou tousel e ki i napa personn pour ed ou fer fas avek ou problenm? Bokou dimoun in santi koumsa, enkli bann serviter Zeova. (1 Rwa. 19:14) Si sa i arive avek ou, rapel sa promes Zeova: “Mon pa pou zanmen kit ou e mon pa pou zanmen abandonn ou.” Alor, nou kapab annan konfyans e dir: “Zeova i mon led, mon pa pou per.” (Ebr. 13:5, 6) Zapot Pol ti ekri sa bann parol ver lannen 61 pour bann Kretyen ki ti reste Zide. Son bann parol i fer nou mazin sa ki en psalmis ti dir dan Psonm 118:5-7 (NWT). *​—Lir.

2. Ki nou pou diskite dan sa lartik e akoz?

² Parey sa psalmis, Pol ti konnen ki Zeova i son Led parski Zeova in ed li plizyer fwa. Par egzanp, apepre de-z-an avan ki Pol i ekri son let pour bann Ebre, i ti pas dan en tanpet terib ler i ti pe vwayaze lo lanmer. (Akt 27:4, 15, 20) Pandan bann lannen avan sa vwayaz e tou dilon sa vwayaz, Zeova ti ed Pol dan diferan fason. Annou vwar trwa fason ki Zeova ti ed li. Zeova ti servi Zezi ek bann lanz, bann dimoun ki ti annan lotorite ek bann frer ek ser  pour ed Pol. Ler nou etidye sa ki ti arive avek Pol, sa pou ranforsi nou konfyans dan promes Bondye ki I pou reponn nou lapriyer ler nou demann led.

3. Ki Pol ti’n kapab demann son lekor e akoz?

³ Pol ti bezwen led. Ver lannen 56, en lafoul ti trenn li an deor tanp Zerizalenm e zot ti esey touy li. Son lannmen, ler Pol ti ganny anmennen devan Sannedren, son bann lennmi ti pros pour touy li. (Akt 21:30-32; 22:30; 23:6-10) I kapab ki dan sa moman Pol ti demann son lekor: ‘Konbyen letan mon pou kapab siport sa kalite labi?’

4. Ki mannyer Zeova ti servi Zezi pour ed Pol?

⁴ Ki led Pol ti gannyen? Sa zour swar apre ki Pol ti’n ganny arete, “Senyer,” setadir Zezi, ti vin dir li: “Pran kouraz! Parski zis parey ou’n rann temwannyaz afon Zerizalenm konsernan mwan, ou osi devret rann temwannyaz Ronm.” (Akt 23:11) Sa promes ti sirman ankouraz Pol! Zezi ti felisit Pol pour sa travay ki Pol ti’n fer Zerizalenm e i ti promet ki Pol ti pou ariv Ronm sen e sof, kot i ti pou kontinyen rann temwannyaz. Pol ti’n bezwen santi li sen e sof, parey en zanfan ki dan lebra son papa.

5. Ki mannyer Zeova ti servi bann lanz pour ed Pol? (Vwar portre lo kouvertir.)

⁵ Ki lezot difikilte Pol ti fer fas avek? Apepre de-z-an apre sa ki ti arive Zerizalenm, Pol ti dan en bato pe al Itali ler i ti annan en gro tanpet. Sa tanpet ti sitan terib ki manm lekipaz ek pasaze ti krwar ki zot ti pe al mor. Me Pol pa ti per. Akoz? I ti dir tou sa ki ti abor: “Yer swar, en lanz mon Bondye ki mon servi e adore ti vin kot mwan e dir: ‘Pol, pa bezwen per. Ou bezwen al devan Sezar. Deplis, akoz ou, Bondye pou sov lavi tou bann ki pe vwayaz avek ou.’” Zeova ti’n servi en lanz pour repet sa menm promes ki i ti’n fer atraver Zezi. Zis parey Zeova ti’n promet, Pol ti ariv Ronm.​—Akt 27:20-25; 28:16.

6. Ki promes Zezi ti fer ki kapab ankouraz nou e akoz?

⁶ Ki led nou gannyen? Zezi pou siport nou parey i ti fer avek Pol. Par egzanp, Zezi i promet son bann disip: “Mon avek zot tou le zour ziska lafen sa lemonn.” (Mat. 28:20) Sa ki Zezi ti dir i kapab ankouraz nou. Akoz? Parski i annan bann zour ki difisil pour nou andire. Par egzanp, ler en dimoun ki nou kontan i mor, sa i fer nou sagren pa zis pour detrwa zour me i tre probab ki nou pou sagren  pour detrwa lannen. Serten i annan bann zour ki difisil parski laz in antre. I annan lezot dimoun ki fer fas avek bann zour difisil parski zot ganny depresyon. Kantmenm sa, nou ganny lafors pour andire parski nou konnen ki Zezi i avek nou “tou le zour,” enkli bann zour pli difisil dan nou lavi.​—Mat. 11:28-30.

7. Dapre Revelasyon 14:6, ki mannyer Zeova i ed nou ozordi?

⁷ Parol Bondye i asir nou ki Zeova pou servi son bann lanz pour ed nou. (Ebr. 1:7, 14) Par egzanp, bann lanz i ed e gid nou ler nou pe anons “sa bon nouvel Rwayonm” avek dimoun sorti dan “tou nasyon, tribi [ek] langaz.”​—Mat. 24:13, 14; lir Revelasyon 14:6.

8. Ki mannyer Zeova ti servi en komandan Romen pour ed Pol?

⁸ Ki led Pol ti gannyen? Ler Zezi ti koz avek Pol lannen 56, i ti asir Pol ki i ti pou ariv Ronm. Par kont, serten Zwif ki ti Zerizalenm ti pe fer plan pour atak Pol e touy li. Ler komandan Romen Klod Lisyas ti aprann konsernan zot plan, i ti ed Pol. San tarde, Klod ti donn lord en group larme pour protez Pol e anmenn li Sezare, ki apepre 105 kilomet avek Zerizalenm. Ler zot ti ariv Sezare, Gouverner Feliks ti donn lord pour Pol “ganny veye par bann gard dan pale Erod.” Koumsa bann Zwif ki ti anvi touy Pol pa ti kapab ganny li.​—Akt 23:12-35.

9. Ki mannyer Gouverner Festis ti ed Pol?

⁹ De-z-an pli tar, Pol ti ankor dan prizon Sezare. Festis ti’n ranplas Feliks konman gouverner. Bann Zwif ti sipliy Festis pour fer Pol vin Zerizalenm pour li ganny zize me Festis ti refize. I kapab ki sa gouverner ti konnen ki bann Zwif ti pe “fer plan pour atak [Pol] e touy li dan semen.”​—Akt 24:27–25:5.

10. Ki Gouverner Festis ti fer ler Pol ti demande pour ganny zize par Sezar?

¹⁰ Pli tar, Pol ti ganny zize Sezare. Vi ki Festis ti anvi “fer plezir bann Zwif, i ti dir Pol: ‘Eski ou anvi mont Zerizalenm e ganny zize laba devan mwan konsernan sa bann zafer?’” Pol ti konnen ki ler i ti pou ariv Zerizalenm, i tre probab ki bann Zwif ti pou touy li. I ti osi konnen ki i ti bezwen fer pour sov son lavi, ariv Ronm e kontinyen son minister. I ti dir: “Mon fer apel avek Sezar!” Apre ki Festis ti’n koz avek son bann konseye, i ti dir Pol: “Ou’n fer apel avek Sezar, ou pou al devan Sezar.” Desizyon Festis ti sov lavi Pol. Byento Pol ti pou dan lavil Ronm, lwen avek sa bann Zwif ki ti pe esey touy li.​—Akt 25:6-12.

11. Ki parol ankourazan ki profet Izai ti ekri, ki petet Pol ti reflesi lo la?

¹¹ Ler Pol ti pe espere pour al Itali, i kapab ki i ti reflesi lo sa lavertisman ki profet Izai ti donn bann dimoun ki ti opoz Zeova. Zeova ti fer Izai ekri: “Pran konsey avek kanmarad; fer plan ansanm; i pa pour marse. Diskit lo zot plan; i pa pou reisi akoz Bondye, i avek nou.” (Iza. 8:10) Pol ti konnen ki Bondye ti pou ed li e sa ti’n bezwen donn li lafors pour fer fas avek bann problenm ki i ti pe al pas ladan.

12. Ki mannyer Zilyis ti tret Pol e ki sa ti’n kapab fer Pol realize?

¹² Lannen 58, Pol ti konmans son vwayaz pour al Itali. Vi ki i ti en prizonnyen, i ti anba responsabilite en zofisye larme Romen ki ti apel Zilyis. Zilyis ti’n kapab  tret Pol dan en move fason oubyen dan en bon fason. Ki mannyer i ti pou servi son lotorite? Son lannmen, ler zot ti ariv kot premye por, “Zilyis ti tret Pol avek labonte, i ti les li al kot son bann zanmi.” Pli tar, i ti menm sov lavi Pol. Ki mannyer i ti fer sa? Bann solda ti anvi touy tou bann prizonnyen ki ti lo bato me Zilyis ti anpes zot. Akoz? I “ti determinen pour anmenn Pol sen e sof.” I tre probab ki Pol ti realize ki Zeova ti pe servi sa zofisye pour ed e protez li.​—Akt 27:1-3, 42-44.

13. Ki mannyer Zeova i kapab servi bann dimoun ki annan lotorite?

¹³ Ki led nou gannyen? Ler i an armoni avek Son lavolonte, Zeova i kapab servi son lespri sen pour fer bann dimoun ki annan lotorite fer sa ki I anvi. Lerwa Salomon ti dir: “Leker lerwa i en pti larivyer dan lanmen [Zeova]. I diriz li partou kot i oule.” (Prov. 21:1) Ki Lerwa Salomon ti pe esey dir? Bann imen i kapab fouy en transe pour fer delo dan en larivyer al kot zot oule i ale. Pareyman, Zeova i kapab servi son lespri sen pour enfliyans bann dirizan pour fer bann keksoz dapre son plan. Ler sa i arive, bann dimoun ki annan lotorite i ganny motive pour fer bann desizyon ki benefisye pep Bondye.​—Konpar Ezra 7:21, 25, 26.

14. Anliny avek Akt 12:5, pour lekel nou kapab priye?

¹⁴ Ki ou kapab fer? Nou kapab priy “pour bann lerwa ek tou bann ki annan en o pozisyon” ler zot pe fer bann desizyon ki annan pour fer avek nou ladorasyon. (1 Tim. 2:1, 2; Nee. 1:11) Parey bann Kretyen dan premye syek ti fer, nou osi nou priy Bondye pour nou bann frer ek ser ki dan prizon. (Lir Akt 12:5; Ebr. 13:3) Nou kapab osi priy pour bann gard prizonnyen ki ansarz sa bann frer ek ser ki dan prizon. Nou kapab sipliy Zeova pour motiv sa bann dimoun pour zot azir parey Zilyis e tret nou bann frer ek ser ki dan prizon “avek labonte.”​—Vwar not letid dan nwtsty dan Akt 27:3.

15-16. Ki mannyer Zeova ti servi Aristark ek Lik pour ed Pol?

¹⁵ Ki led Pol ti gannyen? Ler Pol ti pe al Ronm, Zeova ti souvan servi bann frer ek ser pour ed li. Annou vwar serten legzanp.

¹⁶ Aristark ek Lik ti de bon zanmi pour  Pol. Zot ti deside al avek Pol Ronm. * Labib pa dir ki Zezi ti’n promet ki Aristark ek Lik ti pou ariv Ronm sen e sof. Me kantmenm sa, zot ti pare pour met zot lavi an danze pour ed Pol. I ti pli tar, pandan sa vwayaz, ki zot ti konnen ki zot ti pou ariv Ronm sen e sof. Alor, ler Aristark ek Lik ti pran bato Sezare, Pol ti’n bezwen remersye Zeova pour sa led ki I ti’n donn li atraver sa de Kretyen kouraze.​—Akt 27:1, 2, 20-25.

17. Ki mannyer Zeova ti servi bann frer ek ser pour ed Pol?

¹⁷ Bann frer ek ser ti ed Pol plizyer fwa pandan son vwayaz. Par egzanp, ler zot ti ariv d an por Sidon, Zilyis ti les Pol “al kot son bann zanmi pour zot pran swen avek li.” Pli tar, ler zot ti dan lavil Piteoli, Pol ek son bann zanmi ti zwenn bann frer. Sa bann frer ti demann Pol ek son bann zanmi pour reste avek zot pour set zour. Pandan ki bann Kretyen dan sa landrwa ti pe pran swen avek Pol ek son bann zanmi, nou kapab asire ki Pol ti’n rakont zot bann leksperyans e sa ti fer sa bann Kretyen kontan en kantite. (Konpar Akt 15:2, 3) Apre sa vizit ankourazan, Pol ek son bann zanmi ti kontinyen zot vwayaz.​—Akt 27:3; 28:13, 14.

18. Kwa ki ti fer Pol remersye Bondye e pran kouraz?

¹⁸ Anmezir ki Pol ti pe marse pour al Ronm, i bezwen ki i ti mazin sa let ki i ti’n ekri pour kongregasyon Ronm trwa-z-an pli boner. Dan sa let, i ti dir: “Mon’n anvi vin kot zot.” (Rom. 15:23) Me i pa ti pe ekspekte ki i ti pou vin kot zot konman en prizonnyen. Sirman, Pol ti’n bezwen ganny ankouraze ler i ti vwar bann frer ek ser sorti Ronm pe esper li o bor semen pour akeyir li! “Ler i ti vwar zot, Pol ti remersye Bondye e pran kouraz.” (Akt 28:15) Parey nou vwar, Pol ti remersye Bondye pour lefet ki son bann frer ek ser ti’n vin vwar li. Akoz i ti fer sa? Parski Pol  ti realize ki Zeova ti pe servi sa bann frer ek ser pour ed li.

19. Dapre 1 Pyer 4:10, ki mannyer Zeova i kapab servi nou pour ed bann ki dan bezwen?

¹⁹ Ki ou kapab fer? Eski ou konn bann frer oubyen ser dan ou kongregasyon ki pe soufer akoz zot malad oubyen zot annan lezot problenm? Oubyen, petet en dimoun ki zot kontan in mor. Si nou tande ki en dimoun i bezwen led, nou kapab demann Zeova pour ed nou dir oubyen fer en bon keksoz. Nou bann parol ek aksyon i kapab sa lankourazman ki sa frer oubyen ser i bezwen. (Lir 1 Pyer 4:10.) * Si nou ed zot, i kapab ki zot pou reganny konfyans dan sa promes Zeova ki dir: “Mon pa pou zanmen kit ou e mon pa pou zanmen abandonn ou.” Zot pou annan konfyans ki sa promes i aplik pour zot. Pa sa pou fer ou zwaye!

20. Akoz nou kapab dir avek konfyans: “Zeova i mon led”?

²⁰ Parey Pol ek son bann zanmi, nou osi nou fer fas avek problenm. Me nou konnen ki nou kapab annan kouraz parski Zeova i avek nou. Zeova i servi Zezi ek bann lanz pour ed nou. Si i an armoni avek son plan, Zeova i osi kapab servi bann dimoun ki annan lotorite pour ed nou. Osi, parey bokou nou in eksperyanse, Zeova i servi son lespri sen pour motiv bann frer ek ser pour ed nou. Alor, parey Pol, nou annan bon rezon pour dir avek konfyans: “Zeova i mon led, mon pa pou per. Ki dimoun i kapab fer mwan?”​—Ebr. 13:6.