Mon ti ne an 1983. Mon ti en zanfan an bonn sante me ler mon ti annan di-z-an, mon ti konmans santi bann douler for partou dan mon lekor. Apepre de-z-an pli tar, mon ti leve en zour bomaten e mon pa ti kapab marse. Malgre tou zefor ki mon ti fer, mon pa ti kapab bouz mon lipye. Depi sa zour, mon pa’n zanmen mars ankor. Sa maladi ti fer ki mon ti aret grandi. Ozordi, mon ankor pti parey en zanfan.

Detrwa mwan apre ki mon ti’n tonm malad e mon ti nepli kapab kit lakaz, de Temwen Zeova ti vizit nou lakour. Normalman ler dimoun ti vin kot nou, mon ti esey kasyet me sa zour mon ti les sa de madanm koz avek mwan. Anmezir ki zot ti pe koz lo Paradi, mon ti mazin sa ki mon ti’n tande ler mon ti annan senk an. Sa letan, en misyonner ki ti apel Jethro e ki ti reste Suriname, ti vizit nou vilaz en fwa par mwan e i ti fer letid Labib avek mon papa. Jethro ti tret mwan byen. Mon ti byen kontan li. Osi, mon bann granparan ti anmenn mwan serten renyon Temwen Zeova ki ti ganny fer dan nou vilaz. Alor ler enn sa bann madanm ki ti apel Florence, ti demann mwan si mon ti a kontan aprann plis lo Labib, mon ti dir wi.

Florence ti retournen avek son msye ki ti apel Justus e zot ti konmans fer letid Labib avek mwan. Ler zot ti remarke ki mon pa ti konn lir, zot ti montre mwan ki mannyer pour lir. Apre en pe letan, mon ti kapab lir lo mwan menm. En zour, sa koup ti dir mwan ki zot ti pe al servi Suriname. Malerezman, i ti napa personn Orealla ki ti pou kapab kontinyen fer letid Labib avek mwan. Me erezman, Zeova pa ti’n oubliy mwan.

Pa bokou letan apre, en pionye ki ti apel Floyd ti vin dan mon vilaz e i ti zwenn mwan ler i ti pe anons sa bon nouvel kazankaz. Ler i ti demann mwan si mon ti anvi etidye Labib, mon ti sourir. I ti demann mwan: “Akoz ou pe sourir?” Mon ti dir li ki mon ti’n deza etidye sa brosir Sa ki Bondye i ekspekte nou fer e ki mon ti’n konmans fer letid dan Konnesans Ki Anmenn ver Lavi Eternel. * Mon ti osi eksplik li akoz mon ti’n aret fer letid. Floyd ti kontinyen fer letid dan sa liv Konnesans avek mwan me apre li osi i ti ganny anvoye en lot landrwa. Ankor enn fwa, mon ti nepli annan en ansenyan Labib.

 Par kont, an 2004, de pionye spesyal ti ganny anvoye Orealla. Zot ti apel Granville ek Joshua. Zot ti zwenn mwan ler zot ti pe anons sa bon nouvel kazankaz. Ler zot ti demann mwan si mon anvi etidye Labib, mon ti fer en sourir. Mon ti demann zot pour rekonmans sa liv Konnesans avek mwan. Mon ti anvi vwar si zot ti pou ansenny mwan menm keksoz ki mon bann ansenyan avan ti ansenny mwan. Granville ti dir mwan ki i ti annan renyon ki ganny fer dan vilaz. Menm si pour apepre di-z-an mon pa ti’n kit mon lakaz, mon ti anvi asiste renyon. Alor Granville ti vin sers mwan kot mon lakour e i ti anmenn mwan kot Lasal Rwayonm dan en wiltyer.

Pli tar, Granville ti ankouraz mwan pour zwenn Lekol Minister Teokratik. I ti dir: “Ou annan dezabilite me ou kapab koze. En zour ou pou fer diskour piblik. Mon asire ki ou pou fer li.” Son bann parol ti vreman ankouraz mwan.

Mon ti konmans al dan predikasyon avek Granville. Me laplipar semen dan mon vilaz ti bann semen later ki ti annan trou e i ti difisil pour al dan wiltyer. Alor, mon ti demann Granville pour anmenn mwan dan en bouret e sa ti rezourd nou problenm. Mon ti batize an Avril 2005. Pa bokou letan apre, bann frer ti form mwan pour mwan kapab okip piblikasyon dan kongregasyon ek sistenm sonorizasyon kot Lasal Rwayonm.

Malerezman an 2007, mon papa ti mor dan en aksidan bato. Sa ti en sok pour nou fanmir. Granville ti fer lapriyer ansanm avek nou e i ti lir bann verse ankourazan. De-z-an pli tar, nou ti ganny en lot sok ler Granville ti mor dan en aksidan bato li osi.

Nou pti kongregasyon ti sagren. Aprezan, nou ti napa en ansyen e nou ti annan zis en serviter kongregasyon. Mon ti vreman sagren akoz mon bon zanmi ti’n mor. I ti’n toultan ed mwan pour vin pros avek Zeova e pour ganny plizyer lezot keksoz ki mon ti bezwen. Dan renyon ki ti ganny fer apre son lanmor, mon ti ganny demande pour lir bann paragraf dan Letid Latour Veyer. Mon ti zis kapab lir sa de premye paragraf me apre sa mon ti konmans plere e mon pa ti kapab kontrol mon larm. Mon ti bezwen sorti lo platform.

Mon ti konmans santi mwan pli byen ler bann frer sorti dan en lot kongregasyon ti vin ede Orealla. Osi, biro brans ti anvoy en pionye spesyal ki apel Kojo. Mon ti kontan pour vwar mon manman ek mon pti frer etidye Labib e batize. Apre, an Mars 2015, mon ti ganny apwente konman serviter kongregasyon. Apre en pe letan, mon ti fer mon premye diskour piblik. Sa zour, mon ti sourir e an menm tan plere ler mon ti mazin sa ki Granville ti’n dir mwan plizyer lannen oparavan: “En zour ou pou fer diskour piblik. Mon asire ki ou pou fer li.”

Ler mon’n get bann progranm Televizyon JW^®, mon vwar leksperyans bann frer ek ser ki dan bann sityasyon parey pour mwan. Menm si sa bann frer ek ser i annan dezabilite, zot kapab fer bokou keksoz e zot ere. Mwan osi, mon kapab fer serten keksoz. Mon ti anvi donn Zeova tou sa ki mon ti kapab. I pour sa rezon ki mon ti konmans fer pionye ordiner. An Septanm 2019, mon ti ganny en nouvel ki mon pa ti pe ekspekte! Mon ti ganny dir ki mon ti’n ganny apwente konman en ansyen dan mon kongregasyon ki annan 40 proklanmater.

Mon vreman rekonesan pour bann frer ek ser ki’n fer letid avek mwan e ki’n ed mwan pour akonpli mon minister. Pli enportan ankor, mon vreman rekonesan ki Zeova pa’n oubliy mwan.