LARTIK LETID 48
Kontinyen rezonn byen ler ou fidelite i ganny teste
“Kontinyen rezonn byen dan tou sirkonstans.”—2 TIM. 4:5.
KANTIK 123 Soumet avek Zeova
SA KI NOU POU ETIDYE a
1. Ki i vedir pour kontinyen rezonn byen? (2 Timote 4:5)
I KAPAB difisil pour nou reste fidel avek Zeova ek son lorganizasyon ler en keksoz i arive dan kongregasyon ki fatig nou. Ki mannyer nou kapab sirmont sa bann difikilte. Nou bezwen kontinyen rezonn byen, reste eveye e ferm dan lafwa. (Lir 2 Timote 4:5.) Pour nou kapab kontinyen rezonn byen, nou bezwen reste kalm, reflesir byen e esey fer zefor pour vwar keksoz parey Zeova i vwar. Ler nou fer sa, nou pa pou les nou santiman kontrol sa ki nou mazinen.
2. Ki nou pou vwar dan sa lartik?
2 Dan sa lartik avan, nou ti vwar trwa problenm ki nou kapab fer fas avek ki sorti an deor kongregasyon. Dan sa lartik, nou pou vwar trwa sityasyon ki nou kapab fer fas avek dan kongregasyon ki kapab fer li difisil pour reste fidel avek Zeova. Sa i (1) ler nou santi ki en frer oubyen en ser pa’n tret nou byen, (2) ler nou ganny disiplinen e (3) ler nou vwar li difisil pour aksepte bann sanzman ki lorganizasyon Zeova i fer. Ki mannyer nou kapab kontinyen rezonn byen e reste fidel avek Zeova ek son lorganizasyon ler nou fer fas avek bann sityasyon koumsa?
LER NOU SANTI KI EN FRER OUBYEN EN SER PA’N TRET NOU BYEN
3. Ki mannyer nou kapab reazir si nou santi ki en frer oubyen en ser pa’n tret nou byen?
3 Eski ou’n deza santi ki en frer oubyen en ser pa’n tret ou byen, petet menm en frer ki annan responsabilite dan kongregasyon? I tre probab ki sa frer pa ti anvi bles ou santiman. (Rom. 3:23; Zak 3:2) Me kantmenm sa, sa ki i’n fer in fatig ou. Sa i kapab sitan fatig ou ki ou perdi sonmey. Petet ou kapab mazinen, ‘Si en frer i kapab fer en keksoz koumsa, eski sa i vreman lorganizasyon Bondye?’ Sanmenm sa ki Satan i anvi nou mazinen. (2 Kor. 2:11) Si nou mazin koumsa, sa i kapab fer nou aret servi Zeova e kit son lorganizasyon. Alor si nou santi ki en frer oubyen en ser pa’n tret nou byen, ki mannyer nou kapab kontinyen rezonn byen e evite mazin parey Satan i anvi nou mazinen?
4. Ki mannyer Zozef ti kontinyen rezonn byen ler lezot pa ti tret li byen e ki leson nou aprann avek son legzanp? (Zenez 50:19-21)
4 Pa gard rankin. Ler Zozef ti en adolesan, son bann gran frer pa ti tret li byen. Zot ti ay li e serten ti anvi touy li. (Zen. 37:4, 18-22) Pli tar, zot ti vann li konman en lesklav. Sa ti fer ki pour apepre 13 an, Zozef ti fer fas avek bann gro problenm. Zozef ti’n kapab mazinen ki Zeova pa kontan li e petet i ti’n kapab mazinen ki Zeova ti’n abandonn li ler i ti bezwen led. Me Zozef pa ti gard rankin. O kontrer, i ti reste kalm e sa ti ed li pour kontinyen rezonn byen. Ler i ti annan loportinite pour pran revanz lo son bann frer, i pa ti fer. O kontrer i ti demontre lanmour anver zot e pardonn zot. (Zen. 45:4, 5) Zozef ti azir dan sa fason parski i ti pe reflesir byen. Olye konsantre lo son bann problenm, Zozef ti vwar keksoz parey Zeova i vwar. (Lir Zenez 50:19-21.) Ki leson nou aprann? Si en frer oubyen en ser pa tret ou byen, pa bezwen ankoler avek Zeova oubyen mazinen ki i’n abandonn ou. O kontrer, medit lo lafason ki Zeova pe ed ou fer fas avek sa sityasyon. Osi ler lezot pa tret ou byen, pardonn zot e mazinen ki lanmour i kouver en kantite pese.—1 Pyer 4:8.
5. Kwa ki ti ed Miqueas pour kontinyen rezonn byen ler i ti santi ki lezot pa’n tret li byen?
5 Annou vwar leksperyans en ansyen ki apel Miqueas, ki sorti Sid Lanmerik. b I rapel en fwa ler i ti santi ki serten frer ki annan responsabilite dan lorganizasyon Zeova pa ti’n tret li byen. I dir: “Mon pa’n zanmen santi mwan sitan strese koumsa. Mon ti enkyet. Mon pa ti kapab dormi aswar e mon ti plere parski mon ti santi ki i napa nanryen ki mon ti kapab fer.” Kantmenm sa, Miqueas ti kontinyen rezonn byen e i ti fer bokou zefor pour kontrol son bann santiman. I ti koz avek Zeova souvan dan lapriyer e demann li pour donn li son lespri sen ek lafors pour andire. I ti osi rod bann lenformasyon dan nou bann piblikasyon ki kapab ed li. Ki leson nou aprann? Si ou santi ki en frer oubyen en ser pa’n tret ou byen, reste kalm e esey kontrol ou bann santiman. Petet ou pa konnen kwa ki’n fer sa frer oubyen sa ser koz ouswa azir dan sa fason. Alor koz avek Zeova dan lapriyer e demann li pour ed ou vwar keksoz parey sa frer oubyen sa ser i vwar. Sa pou ed ou vwar ki sa frer oubyen ser pa’n fer par ekspre pour bles ou santiman e ou pou pardonn li. (Prov. 19:11) Rapel ki Zeova i vwar ou sityasyon e i pou donn ou sa lafors ki ou bezwen pour andire.—2 Kron. 16:9; Ekle. 5:8.
LER NOU GANNY DISIPLINEN
6. Akoz i enportan pour nou konpran ki Zeova i disiplin nou akoz i kontan nou? (Ebre 12:5, 6, 11)
6 Nou kapab vreman sagren ler Zeova i disiplin nou. Me si nou konsantre lo nou santiman, nou kapab konmans mazinen ki napa rezon pour nou ganny disiplinen oubyen ki sa disiplin i tro sever. Sa i kapab anpes nou konpran en keksoz enportan, setadir ki Zeova i disiplin nou parski i kontan nou. (Lir Ebre 12:5, 6, 11.) Si nou les nou bann santiman kontrol nou, nou pou donn Satan sa loportinite pour atak nou. I anvi ki nou rezet sa disiplin e pli pir ankor, i anvi ki nou elwannyen avek Zeova e kit kongregasyon. Ler ou ganny disiplinen, ki mannyer ou kapab kontinyen rezonn byen?
Vi ki Pyer ti annan limilite, i ti aksepte konsey ek disiplin e sa ti fer li pli itil pour Zeova (Vwar paragraf 7)
7. (a) Parey nou’n vwar dan portre, ki mannyer Zeova ti servi Pyer apre ki Pyer ti’n aksepte disiplin? (b) Ki nou aprann avek legzanp Pyer?
7 Aksepte disiplin e fer bann sanzman neseser. Plizyer fwa, Zezi ti disiplin Pyer devan lezot zapot. (Mark 8:33; Lik 22:31-34) I tre probab ki Pyer ti santi li anbarase. Me kantmenm sa, Pyer ti reste fidel avek Zezi. I ti aksepte disiplin e i ti aprann avek son fot. Zeova ti rekonpans Pyer pour son fidelite e i ti donn li bann responsabilite enportan dan kongregasyon. (Zan 21:15-17; Akt 10:24-33; 1 Pyer 1:1) Ki nou kapab aprann avek legzanp Pyer? Ler nou ganny en disiplin e nou santi nou anbarase, pa konsantre lo nou santiman. O kontrer, aksepte sa disiplin e fer bann sanzman neseser. Sa pou anmenn bann byenfe pour nou e pour lezot e nou pou vin pli itil pour Zeova ek nou bann frer ek ser.
8-9. Ki mannyer Bernardo ti santi ler i ti ganny disiplinen me kwa ki ti ed li pour sanz son fason panse?
8 Annou vwar sa ki ti arive avek en frer ki apel Bernardo ki reste Mozanbik. I ti perdi son privilez konman en ansyen. O konmansman ki mannyer Bernardo ti santi? I dir: “Mon ti ankoler parski mon pa ti kontan sa disiplin ki mon ti’n gannyen.” Bernardo ti enkyet ki lezot dan kongregasyon ti pou mazin an mal lo li. I dir: “I ti pran mwan detrwa mwan pour vwar sa disiplin dan sa bon fason e pour annan konfyans dan Zeova ek son lorganizasyon ankor.” Kwa ki ti ed Bernardo pour annan sa bon pwennvi?
9 Bernardo ti sanz son fason panse. I dir: “Ler mon ti en ansyen, mon ti servi Ebre 12:7 pour ed lezot pour annan sa bon pwennvi konsernan disiplin Zeova. Aprezan i ti mon tour pour demann mon lekor: ‘Lekel ki bezwen aplik sa verse?’ Tou bann serviter Zeova, enkli mwan.” Bernardo ti fer bann lezot keksoz pour li kapab annan konfyans dan Zeova ek Son lorganizasyon ankor. I ti lir Labib plis e pas plis letan pour medit lo sa ki i lir. Menm si i ti ankor enkyet konsernan lafason ki son bann frer ek ser i vwar li, i ti travay avek zot dan predikasyon e partisipe dan renyon. Avek letan, Bernardo ti reganny apwente konman ansyen. Parey Bernardo, si ou ganny disiplinen e ou santi ou anbarase, pa konsantre lo ou bann santiman, aksepte sa konsey e fer bann sanzman neseser. c (Prov. 8:33; 22:4) Si ou fer sa, ou kapab asire ki Zeova pou rekonpans ou pour ou fidelite anver li e anver son lorganizasyon.
LER NOU VWAR LI DIFISIL POUR AKSEPTE BANN SANZMAN KI LORGANIZASYON ZEOVA I FER
10. Ki sanzman ki ti’n kapab fer li difisil pour serten zonm Izraelit reste fidel avek Zeova?
10 I kapab difisil pour reste fidel avek Zeova ler i annan bann sanzman dan son lorganizasyon. Si nou pa fer atansyon, nou kapab les sa sanzman fer nou aret servi Zeova. Par egzanp, mazin lo ki mannyer keksoz ti sanze pour bann Izraelit apre ki zot ti’n ganny Lalwa Moiz. Avan ki Zeova ti donn Lalwa, bann sef fanmir ki ti fer bann keksoz ki bann pret ki fer. Zot ti fer bann lotel e ofer Zeova bann sakrifis pour zot fanmir. (Zen. 8:20, 21; 12:7; 26:25; 35:1, 6, 7; Zob 1:5) Ler Zeova ti donn bann Izraelit Lalwa Moiz, bann sef fanmir ti nepli annan drwa fer sa bann keksoz. Zeova ti apwent bann pret sorti dan fanmir Aaron pour ofer bann sakrifis. Apre sa, si en sef fanmir ki pa ti en desandans Aaron, ti konmans fer bann keksoz ki zis bann pret ki ganny drwa fer, i ti kapab ganny met amor. d (Lev. 17:3-6, 8, 9) Eski petet sa i en rezon akoz Kora, Datann, Abiram ek sa 250 sef ti rebel kont Moiz ek Aaron? (Nom. 16:1-3) Nou pa asire. Me sa ki nou konnen i ki Kora ek sa bann lezot zonm pa ti reste fidel avek Zeova. Ki ou kapab fer si ou vwar li difisil pour reste fidel avek Zeova ler i annan en sanzman dan son lorganizasyon?
Ler bann Koatit ti ganny en nouvo servis, zot ti pare pour servi konman bann santer, bann gardyen baro oubyen pour travay dan bann stor (Vwar paragraf 11)
11. Ki nou aprann avek legzanp serten Koatit?
11 Siport sanzman ki lorganizasyon Zeova i fer. Pandan ki bann Izraelit ti dan dezer, bann Koatit ti annan en servis spesyal. Sak fwa bann Izraelit ti bouz zot kan pour al en lot landrwa, serten bann Koatit ti al par devan tou dimoun pour anmenn lars lalyans. (Nom. 3:29, 31; 10:33; Zoz. 3:2-4) Sa ti en gran privilez! Me ler bann Izraelit ti etabli zot dan Later Promiz, keksoz ti sanze pour zot. Lars lalyans pa ti bezwen ganny deplase regilyerman. Alor ler Salomon ti vin Lerwa, serten Koatit ti bann santer, serten ti bann gardyen baro e lezot ti travay dan bann stor. (1 Kron. 6:31-33; 26:1, 24) Labib pa dir ki bann Koatit ti konplent oubyen demande ki zot ganny bann responsabilite pli enportan vi ki zot ti annan en responsabilite spesyal avan. Ki leson nou aprann? Siport bann sanzman ki lorganizasyon Zeova i fer, enkli okenn sanzman ki annan en lefe lo ou servis. Trouv lazwa dan nenport responsabilite ki ou gannyen. Gard antet ki i pa ou responsabilite ki fer ou presye pour Zeova. Zeova i apresye ou parski ou obei li.—1 Sam. 15:22.
12. Ki mannyer Zaina ti santi ler i ti ganny demande pour kit Betel e pour al servi konman pionye spesyal?
12 Annou vwar legzanp en ser ki apel Zaina ki sorti Mwayenn Oriyan. Zaina ti ganny demande pour kit en servis ki i ti kontan pour li al fer en lot servis. I ti ganny demande pour al servi konman en pionye spesyal apre ki i ti’n servi dan Betel pour plis ki 23 an. I dir: “Sa sanzman ti en sok pour mwan. Mon ti santi ki mon pa itil e mon ti kontinyen demann mon lekor, ‘Ki mon’n fer mal?’” Malerezman serten frer ek ser dan kongregasyon ti dir li serten keksoz ki ti fer son leker pli fermal. Zot ti dir li: “Si ou ti pe byen fer, lorganizasyon pa ti pou’n fer ou ale.” Pour en serten letan, Zaina ti sitan dekouraze ki i ti plere tou le swar. Me i ti dir: “Mon pa ti zanmen doute ki Zeova ek son lorganizasyon i kontan mwan.” Ki mannyer Zaina ti kapab kontinyen rezonn byen?
13. Ki Zaina ti fer pour li reisi lager avek son bann move santiman?
13 Zaina ti reisi lager avek son bann move santiman. Ki mannyer i ti fer sa? I ti lir bann lartik dan nou bann piblikasyon ki ti koz lo sa ki i ti pe pas ladan. Sa lartik ki annan pour tit “You Can Cope With Discouragement!” dan Latour Veyer le 1 Fevriye 2001 an Angle, ti ed li en kantite. Sa lartik i koz lo Mark ki ti en ekriven Labib e i ti eksplike ki mannyer Mark ti’n kapab santi ler i ti bezwen sanz servis. Zaina i dir: “Legzanp Mark ti egzakteman sa ki mon ti bezwen pour mwan aret santi mwan dekouraze.” Zaina ti osi reste pros avek son bann zanmi. I pa ti aret frekant bann frer ek ser oubyen aret al predikasyon avek zot e i pa ti pran lapenn pour son prop lekor. I ti realize ki lespri sen Zeova ki pe gid lorganizasyon Zeova e ki bann frer ki pe dirize dan lorganizasyon i kontan li en kantite. I ti osi realize ki lorganizasyon Zeova i bezwen fer sa ki pli meyer pour ki travay Zeova i ganny fer.
14. Ki sanzman ki Vlado ti vwar li difisil pour li adapte avek e kwa ki ti ed li?
14 Annou vwar leksperyans Vlado, en ansyen ki annan 73 an e ki sorti Sloveni. I ti vwar li difisil pour adapte ler son kongregasyon ti zwenn avek en lot kongregasyon e sa Lasal Rwayonm ki son kongregasyon ti servi ti fermen. I dir: “Mon pa ti konpran akoz en Lasal Rwayonm sitan zoli koumsa, ti bezwen ganny fermen. Mon leker ti fermal parski nou ti’n fek fer renovasyon lo Lasal Rwayonm. Mon en sarpantye e mon ti’n fer serten nouvo meb pour sa Lasal Rwayonm. Osi, sa nouvo laranzman ti enplik bann sanzman ki ti difisil pour bann proklanmater aze parey mwan.” Kwa ki ti ed Vlado pour siport sa nouvo laranzman? I dir: “Ler nou adapte avek bann sanzman ki lorganizasyon Zeova i fer, nou toultan ganny bann benediksyon. Sa bann sanzman i prepar nou pour bann pli gran sanzman ki pou annan dan lavenir.” Eski ou kongregasyon in zwenn avek en lot kongregasyon ouswa ou’n sanz servis e ou vwar li difisil pour adapte avek sa sanzman? Ou kapab asire ki Zeova i konpran ou santiman. Ler ou siport bann sanzman koumsa e ou reste fidel avek Zeova ek sa lorganizasyon ki i pe servi, Zeova pou beni ou.—Ps. 18:25.
KONTINYEN REZONN BYEN DAN TOU SIRKONSTANS
15. Ki mannyer nou kapab kontinyen rezonn byen ler i annan bann sityasyon dan kongregasyon ki difisil pour fer fas avek?
15 Anmezir ki lafen sa lemonn i aprose, nou ekspekte ki i pou annan bann sityasyon dan kongregasyon ki pou difisil pour nou fer fas avek. Sa bann sityasyon pou kapab fer li difisil pour nou reste fidel avek Zeova. Alor nou bezwen kontinyen rezonn byen. Si ou santi ki en frer oubyen en ser pa’n tret ou byen, pa bezwen gard rankin. Si ou ganny en disiplin ki fer ou santi ou anbarase, pa konsantre lo ou santiman. Aksepte konsey e fer bann sanzman neseser. Ler lorganizasyon Zeova i fer bann sanzman ki annan en lefe lo ou personnelman, aksepte sa bann sanzman e obei lenstriksyon.
16. Ki mannyer ou kapab kontinyen annan konfyans dan Zeova ek son lorganizasyon?
16 Ou kapab kontinyen annan konfyans dan Zeova ek son lorganizasyon ler ou fidelite i ganny teste. Me pour ou kapab fer sa, ou bezwen kontinyen rezonn byen, setadir reste kalm, reflesir byen e vwar keksoz parey Zeova i vwar. Annou determinen pour etidye konsernan bann personnaz dan Labib ki ti reisi fer fas avek bann problenm en pe parey e medit lo zot legzanp. Demann Zeova son led dan lapriyer. Toultan reste pros avek kongregasyon. Koumsa nenport keksoz ki arive, Satan pa pou kapab fer ou aret servi Zeova oubyen kit Son lorganizasyon.—Zak 4:7.
KANTIK 126 Reste vizilan, ferm e solid
a Parfwa i kapab difisil pour nou reste fidel avek Zeova ek son lorganizasyon, sirtou ler en keksoz i arive dan kongregasyon ki fatig nou. Dan sa lartik, nou pou vwar trwa parmi sa bann keksoz e ki nou kapab fer pour reste fidel avek Zeova ek son lorganizasyon.
b Serten non in sanze.
c Ou kapab trouv lezot sizesyon, dan sa lartik “Did You Once Serve? Can You Serve Again?” dan Latour Veyer le 15 Out 2009, paz 30 an Angle.
d Dapre Lalwa Moiz, si en sef fanmir ti anvi touy en zannimo domestik pour manze, i ti bezwen anmenn sa zannimo kot tabernak. Leksepsyon ti ganny fer pour bann sef fanmir ki ti reste tro lwen avek tabernak.—Det. 12:21.