1-2. (a) Ki nou pou vwar dan sa lartik? (b) Kwa ki montre ki Zeova i anvi ed nou?

 ZEOVA i kapab ed nou pour fer fas avek nou bann difikilte e pour trouv lazwa dan Son servis. Ki mannyer Zeova i ed nou? Ki byenfe nou gannyen avek led ki Zeova i donnen? Dan sa lartik, nou pou vwar larepons sa bann kestyon. Me avan nou reponn sa bann kestyon, annou reponn sa kestyon swivan: Eski Zeova i vreman anvi ed nou?

² Dan let ki zapot Pol ti ekri pour bann Kretyen Ebre i ti servi en mo ki kapab ed nou ganny larepons sa kestyon. Pol ti dir: “Zeova i mon led, mon pa pou per. Ki dimoun i kapab fer mwan?” (Ebr. 13:6) Dapre bann referans Labib, sa mo “led” ki dan sa verse i refer avek en dimoun ki pa tarde pour ed en dimoun ki pe rod led. Imazin Zeova pe degaze pour al sov en dimoun ki bezwen led. Sirman sa i montre ki Zeova i vreman anvi ed nou. Ler Zeova i ed nou, nou kapab andire avek lazwa.

3. Ki sa trwa fason ki Zeova i ed nou pour andire avek lazwa?

³ Ki mannyer Zeova i ed nou andire avek lazwa? Pour reponn sa kestyon, annou vwar serten verse dan liv Izai. Akoz? Parski laplipar profesi ki Zeova ti enspir Izai pour ekri i aplik pour bann serviter Bondye ozordi. Osi, Izai i souvan dekri Zeova avek bann mo ki fasil pour konpran. Annou pran par egzanp dan Izai sapit 30. Dan sa sapit, Izai i servi bann zoli legzanp pour dekri lafason ki Zeova i ed Son pep. I ti ekri ki Zeova i ed nou (1) par ekout nou atantivman e par reponn nou lapriyer, (2) par donn nou gidans e (3) par donn nou son benediksyon la konmela e dan lavenir. Aprezan  nou pou diskit lo sa trwa fason ki Zeova i ed nou.

4. (a) Ki mannyer Zeova i dekri bann Zwif dan letan Izai e ki I ti les arive avek zot? (b) Ki lespwar Zeova ti donn bann Zwif ki ti fidel? (Izai 30:18, 19)

⁴ Dan premye verse Izai sapit 30, Zeova i dekri bann Zwif konman “bann garson antete,” ki “azout pese avek plis pese.” I osi dir: “Zot en pep rebel, . . . ki refize ekout lalwa Zeova.” (Iza. 30:1, 9) Izai ti predir ki Zeova ti pou les zot soufer. (Iza. 30:5, 17; Zer. 25:8-11) I sanmenm ki ti arive ler zot ti ganny anmennen Babilonn konman bann prizonnyen. Me parmi sa bann prizonnyen, i ti annan bann Zwif fidel e Izai ti annan en mesaz lespwar pour zot. Izai ti dir zot ki en zour Zeova ti pou fer zot retourn Zerizalenm. (Lir Izai 30:18, 19.) Sanmenm sa ki ti arive. Zeova ti liber zot Babilonn me sa pa ti ariv deswit. Sa parol ki dir “Zeova pe esper avek pasyans pour donn zot son laprouvasyon” i montre ki en pe letan ti pou pase avan ki bann Zwif fidel i ganny libere. Anfet bann Izraelit ti pas 70 an, an egzil Babilonn avan ki serten Zwif fidel ti ganny drwa retourn Zerizalenm. (Iza. 10:21; Zer. 29:10) Ler bann Izraelit ti prizonnyen Babilonn, zot ti plere akoz zot ti vreman sagren. Me ler zot ti retourn dan zot pei, zot ti plere akoz zot ti vreman kontan.

5. Ki Izai 30:19 i asir nou?

⁵ Ozordi nou kapab ganny rekonforte avek sa bann parol: “Ler i tann ou pe kriy osekour, i pou demontre labonte anver ou.” (Iza. 30:19) Izai i asir nou ki Zeova pou ekout atantivman ler nou kriy Li e I pou reponn nou lapriyer vitman. Izai i osi dir: “I pou reponn ou dek ki i pou tann ou.” Sa bann parol i montre nou ki nou Papa i vreman anvi ed bann ki demann li led. Ler nou konn sa, sa i ed nou pour andire avek lazwa.

6. Ki mannyer sa ki Izai ti dir i montre ki Zeova i ekout lapriyer sak son bann serviter?

⁶ Kwa ankor ki sa verse i ansenny nou konsernan lapriyer? Zeova i ekout atantivman lapriyer sakenn parmi nou. Akoz nou kapab dir sa? Dan premye parti Izai sapit 30, sa mo “zot” i ganny servi ler Zeova pe koz avek son pep konman en group. Me dan verse 19, Zeova i servi sa mo “ou” parski i pe koz avek en dimoun. Izai ti ekri: “Ou pa pou plere”; “i pou demontre labonte anver ou”; “i pou reponn ou.” Vi ki Zeova i en Papa ki kontan nou, i pa pou dir avek son garson oubyen fiy ki dekouraze: “Ou devret for parey ou frer oubyen ou ser.” O kontrer Zeova i enterese avek sakenn parmi nou e i ekout nou lapriyer.​—Ps. 116:1; Iza. 57:15.

7. Ki mannyer Izai ek Zezi i montre ki i enportan pour nou kontinyen priye?

⁷ Ler nou priy Bondye konsernan en keksoz ki pe fatig nou, i kapab ki sa premye keksoz ki Zeova pou fer, i pour donn nou lafors pour andire. Si sa problenm i kontinyen, petet nou pou bezwen kontinyen demann Zeova lafors pour andire. Zeova pe demann nou pour fer sanmenm. Izai ti dir en keksoz en pe parey. I ti dir: “Pa les [Zeova] repoze.” (Iza. 62:7) Ki sa i vedir? Nou devret pe sitan priy Zeova ki i konmsi nou pa pe les Zeova repoze. Sa ki Izai ti  dir i fer nou mazin sa legzanp ki Zezi ti servi konsernan lapriyer ki dan Lik 11:8-10, 13. Dan sa verse, Zezi i ankouraz nou pour “vreman persiste” ler nou pe priye e pour “kontinyen demande” pour ganny lespri sen. Nou osi kapab sipliy Zeova pour gid nou pour nou kapab fer bann bon desizyon.

8. Ki mannyer sa parol dan Izai 30:20, 21 ti ganny akonplir dan letan bann Izraelit?

⁸ Lir Izai 30:20, 21. Ler larme Babilonnyen ti anserkle Zerizalenm pour enn an edmi, bann dimoun ti telman soufer ki sa ti vin en keksoz normal dan lavi toulezour parey dipen ek delo. Me dapre verse 20 ek 21, Zeova ti promet bann Zwif ki si zot repantir e sanz zot konportman, i pou sov zot. Izai ti refer avek Zeova konman zot “Gran Ansenyan” e i ti promet zot ki Zeova ti pou ansenny zot lafason ki zot devret ador li. Sa ti arive ler bann Zwif ti sorti an egzil. Zeova ti montre ki i ti zot Gran Ansenyan e avek son gidans, zot ti reisi reetablir ladorasyon pir. Ozordi nou vreman kontan ki Zeova i nou Gran Ansenyan.

9. Ki en fason ki Zeova i gid nou ozordi?

⁹ Dan sa bann verse, Izai i dir ki nou parey bann etidyan ki pe ganny ansennyen par Zeova e Zeova pe ansenny nou dan de fason. Premyerman, Izai i dir: “Zot pou vwar zot Gran Ansenyan avek zot prop lizye.” Dan sa legzanp, Izai i dir ki sa Ansenyan pe debout devan son bann etidyan. Nou annan en gran privilez parski Bondye pe ansenny nou ozordi. Ki mannyer Zeova i ansenny nou? I fer sa atraver son lorganizasyon. Nou vreman rekonesan pour gidans ki nou gannyen avek lorganizasyon Zeova. Zot donn nou bann lenstriksyon ki ed nou andire e reste zwaye ler nou annan problenm. Nou ganny sa bann lenstriksyon pandan renyon, dan bann lasanble, dan bann piblikasyon, atraver bann progranm Televizyon JW e dan lezot fason.

10. Dan ki fason nou tann “en parol deryer [nou]”?

¹⁰ Izai i dir en dezyenm fason ki Zeova i ansenny nou. I dir: “Ou zorey pou tann en parol deryer ou.” Safwasi sa profet i dir ki Zeova i en ansenyan ki pe vey lo son bann etidyan. I par deryer son bann etidyan pour gid zot. Ozordi, nou osi nou tann lavwa Bondye par deryer  nou. Ki mannyer sa? Parol Bondye ti ganny ekrir dan Labib en kantite letan pase. Alor ler nou lir Labib, i konmsi nou pe tann lavwa Bondye par deryer nou.​—Iza. 51:4.

11. Ki nou bezwen fer pour nou andire avek lazwa e akoz?

¹¹ Ki nou kapab fer pour ganny bann byenfe avek gidans ki Zeova i donnen atraver son lorganizasyon ek son Parol? Izai i dir de keksoz. Premyerman, i dir, “la sa semen.” Dezyenmman, i dir, “mars lo la.” (Iza. 30:21) I pa ase pour zis konn “sa semen.” Nou osi bezwen “mars lo la.” Parol Zeova ek bann leksplikasyon ki nou gannyen atraver son lorganizasyon, i ansenny nou sa ki Zeova i ekspekte nou fer. Nou osi aprann ki mannyer pour aplik sa ki nou pe aprann. Pour andire avek lazwa dan nou servis pour Zeova, nou bezwen fer sa de keksoz. Zis ler nou fer sa, ki nou kapab asire ki Zeova pou rekonpans nou.

12. Dapre Izai 30:23-26, ki mannyer Zeova ti pou beni son pep?

¹² Lir Izai 30:23-26. Ki mannyer sa profesi ti ganny akonplir pour bann Zwif ki ti retourn Izrael apre ki zot ti’n sorti an egzil Babilonn? Zeova ti beni son pep. I ti donn zot en kantite manze pour viv e pli enportan ankor, i ti donn zot tou sa ki zot ti bezwen pour vin pli pros avek li e pour rekonmans ador li dan sa bon fason. Bann benediksyon ki pep Bondye ti gannyen sa letan, ti bokou plis ki zot ti’n deza gannyen oparavan. Verse 26 i dir ki Zeova ti donn zot bokou plis lalimyer, setadir i ti ed zot pour konpran son Parol. (Iza. 60:2) Tou sa bann benediksyon ki Zeova ti donn son bann serviter ti ed zot pour kontinyen servi li avek lazwa e avek kouraz “akoz zot annan lakontantman dan zot leker.”​—Iza. 65:14.

13. Ki mannyer sa profesi konsernan lafason ki ladorasyon pir i ganny reetablir in ganny akonplir dan nou letan?

¹³ Eski sa profesi konsernan lafason ki ladorasyon pir i ganny reetablir i aplik pour nou ozordi? Byensir! Dan ki fason? Depi 1919, plizyer milyon dimoun i nepli lesklav Gran Babilonn, setadir tou bann fo larelizyon. Zot in ganny anmennen dan en landrwa ki pli meyer ki Later Promiz. Zot in ganny  anmennen dan en paradi spirityel. (Iza. 51:3; 66:8) Kisisa sa paradi spirityel?

14. Kisisa sa paradi spirityel e lekel ki dan sa paradi spirityel ozordi? (Vwar Ki sa i vedir?)

¹⁴ Depi 1919, bann Kretyen swazir i dan en paradi spirityel. b Anmezir letan in pase, bann ki annan lespwar pour viv pour touzour lo later, setadir “lezot mouton,” in osi antre dan sa paradi spirityel e zot in ganny en kantite benediksyon avek Zeova.​—Zan 10:16; Iza. 25:6; 65:13.

15. Kote sa paradi spirityel i ete?

¹⁵ Kote sa paradi spirityel i ete ozordi? Bann serviter Zeova i partou dan lemonn. Alor sa paradi spirityel i partou dan lemonn. Nenport landrwa kot nou reste, nou kapab form parti sa paradi spirityel tan ki nou fer nou mye pour siport vre ladorasyon.

16. Ki mannyer nou kapab kontinyen vwar labote sa paradi spirityel?

¹⁶ Enn bann keksoz ki nou devret fer pour reste dan sa paradi spirityel i pour demontre lapresyasyon pour lasosyasyon nou bann frer ek ser partou dan lemonn. Ki mannyer nou kapab fer sa? Nou fer sa ler nou konsantre lo bann zoli kalite ki nou bann frer ek ser i annan olye lo zot bann defo. (Zan 17:20, 21) Akoz i enportan pour fer sa? Annou vwar en legzanp. Dan en zoli zarden nou ekspekte pour vwar bann diferan kalite pye dibwa. Pareyman, dan nou bann kongregasyon ozordi, i annan diferan kalite dimoun ki ganny konpare avek bann pye dibwa dan en zarden. (Iza. 44:4; 61:3) Nou bezwen fer sir ki nou kontinyen konsantre lo labote sa lafore me pa lo bann pti defo bann “pye dibwa” ki pli pros avek nou. Nou pa kapab les nou prop lenperfeksyon oubyen lenperfeksyon lezot dan kongregasyon anpes nou vwar labote  lasosyasyon nou bann frer ek ser partou dan lemonn.

17. Ki sakenn parmi nou i kapab fer pour ede fer ki i annan lape dan kongregasyon?

¹⁷ Ki sakenn parmi nou i kapab fer pour fer ki kongregasyon i reste ini? Nou kapab vin en dimoun ki kontan fer lape. (Mat. 5:9; Rom. 12:18) Sak fwa nou pran linisyativ pour fer lape avek lezot dan kongregasyon, nou ede pour fer sa paradi spirityel vin pli zoli. Nou bezwen gard antet ki Zeova ki’n atir sak dimoun ki dan sa paradi spirityel ver ladorasyon pir. (Zan 6:44) Imazinen ki mannyer Zeova i kontan ler i vwar nou pe fer zefor pour gard lape ek linite parmi son bann serviter ki presye pour li.​—Iza. 26:3; Aga. 2:7.

18. Ki nou devret kontinyen medit lo la e akoz?

¹⁸ Zeova i donn son bann serviter en kantite bon keksoz. Ki byenfe nou kapab gannyen avek sa bann keksoz? Nou kapab reflesir lo sa ki nou etidye dan Parol Bondye e dan nou bann piblikasyon ki baze lo Labib. Ler nou fer sa, sa pou ed nou pour devlop bann kalite ki pou motiv nou pour “kontan kanmarad parey bann frer ek ser” e pour demontre “tandres ek lafeksyon” pour kanmarad. (Rom. 12:10) Anmezir ki nou medit lo bann benediksyon ki nou pe gannyen la konmela, sa pou fer nou vin pli pros avek Zeova. Ler nou reflesir lo bann bon keksoz ki Zeova in promet pour donn nou dan lavenir, sa lespwar ki nou annan pour servi Zeova pour touzour, i vin pli reel. Tousala pou ed nou pour servi Zeova avek plis lazwa la konmela.

19. (a) Dapre Izai 30:18, ki nou kapab asire? (b) Kwa ki pou ed nou pour andire avek lazwa?

¹⁹ Zeova “pou azir” e i pou detri sa move lemonn. (Iza. 30:18) Nou konnen ki Zeova i “en Bondye lazistis” e i pa pou les lemonn Satan egziste pour plis letan ki neseser. (Iza. 25:9) Parey Zeova nou pe esper sa zour arive. Antretan nou determinen pour apresye sa privilez ki nou annan pour fer lapriyer, pour etidye e aplik Parol Bondye e pour medit lo nou bann benediksyon. Ler nou fer sa, Zeova pou ed nou pour andire avek lazwa anmezir nou kontinyen ador li.