1. Ki nou ekspekte i arive avek nou e ki nou kapab asire?

 NOU ekspekte ki serten dimoun pou opoz nou ler nou pe fer sa travay predikasyon. I tre probab ki nou pou fer fas avek plis lopozisyon dan lavenir. (Dan. 11:44; 2 Tim. 3:12; Rev. 16:21) Me nou kapab asire ki Zeova pou donn nou sa led ki nou bezwen. Akoz nou asire ki Zeova pou ed nou? Zeova in toultan ed son bann serviter pour fer sa ki i’n demann zot pour fer menm si i bann keksoz difisil pour fer. Annou vwar serten keksoz ki ti arive avek profet Ezekyel, ki ti pe anons mesaz Zeova avek bann Zwif ki ti an egzil Babilonn.

2. Ki mannyer Zeova ti dekrir bann dimoun ki Ezekyel ti bezwen koz avek e ki nou pou vwar dan sa lartik? (Ezekyel 2:3-6)

² Ki kalite dimoun Ezekyel ti bezwen koz avek? Zeova i dekrir zot konman bann dimoun ki “antete,” ki “leker i dir” e “ki rebel.” Zot ti kapab fer ou dimal parey pye pikan e zot ti danzere parey bann skorpyon. I pour sa rezon ki plizyer fwa, Zeova ti dir Ezekyel: “Pa bezwen per.” (Lir Ezekyel 2:3-6.) Ezekyel ti kapab fer son travay predikasyon parski (1) Zeova ki ti’n anvoy li, (2) lespri sen Bondye ti donn li lafors ki i ti bezwen e (3) sa ki Bondye ti dir li ti fer son lafwa vin pli for. Ki mannyer sa trwa keksoz ti ed Ezekyel e ki mannyer zot ed nou ozordi?

3. Ki parol ki ti’n sirman ankouraz Ezekyel e ki mannyer Zeova ti asir Ezekyel ki i ti pou ed li?

³ Zeova ti dir Ezekyel: “Mon pe anvoy ou.” (Ezek.  2:3, 4) Sirman sa bann parol ti ankouraz Ezekyel. Akoz sa? Parski i tre probab ki Ezekyel ti rapel ki Zeova ti’n dir Moiz ek Izai en keksoz en pe parey ler i ti swazir zot pour vin son bann profet. (Egz. 3:10; Iza. 6:8) Ezekyel ti osi konnen ki mannyer Zeova ti ed sa de profet pour sirmont zot bann difikilte. Alor, ler Zeova ti dir Ezekyel de fwa: “Mon pe anvoy ou,” sa profet ti annan bon rezon pour annan konfyans ki Zeova ti pou ed li. Osi, plizyer fwa Ezekyel ti ekri: “Zeova ti dir mwan.” (Ezek. 3:16) Plizyer fwa i ti osi ekri: “Zeova ti koz avek mwan ankor enn fwa.” (Ezek. 6:1) Sirman Ezekyel ti asire ki Zeova ki ti’n anvoy li. An plis ki sa, papa Ezekyel ti en pret. I tre probab ki i ti ansenny Ezekyel ki Zeova i toultan asir son bann profet ki i pou ed zot. Par egzanp, Zeova ti’n dir avek Izaak, Zakob ek Zeremi: “Mon avek ou.”​—Zen. 26:24; 28:15; Zer. 1:8.

4. Ki bann parol rekonfortan ki ti’n bezwen ankouraz Ezekyel?

⁴ Ki mannyer laplipar Izraelit ti pou reazir anver sa travay predikasyon ki Ezekyel ti pou fer? Zeova ti dir: “Pep Izrael pa pou ekout ou parski zot pa anvi ekout mwan.” (Ezek. 3:7) Ler bann dimoun ti refize ekout Ezekyel, zot ti pe rezet Zeova. Sa parol ti asir Ezekyel ki menm si dimoun pa ti ekout li, sa pa vedir ki i ti’n mal fer son louvraz konman en profet. Zeova ti osi asir Ezekyel ki ler sa mesaz zizman ki i ti pe anonse ti pou vin vre, bann dimoun ti pou “konnen ki i ti annan en profet parmi zot.” (Ezek. 2:5; 33:33) San dout sa bann parol rekonfortan ti donn Ezekyel sa kouraz ki i ti bezwen pour fer son travay predikasyon.

5. Dapre Izai 44:8, kwa ki pou donn nou kouraz?

⁵ Nou osi nou annan kouraz parski nou konnen ki Zeova ki’n anvoy nou pour anons sa bon nouvel. I onor nou par apel nou son “bann temwen.” (Iza. 43:10) Sa i en gran loner! Zis parey Zeova ti dir Ezekyel: “Pa bezwen per,” Zeova i dir nou osi: “Pa bezwen per.” Akoz nou pa bezwen per bann ki opoz nou? Parski parey Ezekyel, Zeova ki’n anvoy nou e i pou ed nou.​—Lir Izai 44:8.

6. (a) Akoz nou asire ki Zeova pou ed nou? (b) Kwa ki ankouraz nou?

⁶ Zeova i promet ki i pou ed nou. Par egzanp, zis avan ki Zeova ti dir: “Zot mon bann temwen,” i ti dir: “Ler ou travers delo, mon pou avek ou, bann larivyer pa pou kouver ou. Ler ou mars atraver dife, ou pa pou ganny brile, bann laflanm pa pou fer ou ditor.” (Iza. 43:2) Ler nou anons sa bon nouvel, parfwa nou fer fas avek en kantite lobstak ki parey en larivyer ek bann gro difikilte ki parey dife. Me Zeova pou ed nou pour kontinyen anons sa bon nouvel. (Iza. 41:13) Parey dan letan Ezekyel, laplipar dimoun ozordi pa aksepte sa mesaz. Me sa pa vedir ki nou pa’n fer byen sa travay predikasyon. Nou ganny rekonforte parski nou konnen ki Zeova i kontan ler nou kontinyen anons son mesaz. Zapot Pol ti dir: “Sakenn pou ganny son rekonpans dapre son travay.” (1 Kor. 3:8; 4:1, 2) En ser ki’n en pionye pour en kantite lannen, i dir: “Mon kontan pour konnen ki Zeova i rekonpans nou pour nou zefor.”

7. Ler Ezekyel ti reflesir lo sa vizyon, ki lefe sa ti annan lo li? (Vwar portre lo kouvertir.)

⁷ Ezekyel ti vwar ki kantite lespri sen Zeova i pwisan. Sa ki Ezekyel ti vwar dan en vizyon ti ed li pour realize ki lespri sen ti pe ed bann lanz pwisan e pe fer bouze bann gro larou sa saret ki dan lesyel. (Ezek. 1:20, 21) Ki ti reaksyon Ezekyel? I ti ekri sa ki ti arive e i ti dir: “Ler mon ti vwar sa, mon ti tonm lafas anba.” Ezekyel ti sitan enpresyonnen ki i ti tonm lafas anba. (Ezek. 1:28) Pli tar ler Ezekyel ti reflesir lo sa vizyon ekstraordiner, sa ti fer li asire ki avek led lespri sen Bondye, i ti pou kapab fini son minister.

8-9. (a) Ki ti arive avek Ezekyel ler Zeova ti dir li debout? (b) Ki en lot fason Zeova ti donn Ezekyel sa lafors pour li koz avek bann dimoun antete?

⁸ Zeova ti dir Ezekyel: “Garson zonm, debout pour mon kapab koz avek ou.” Ler Zeova ti donn Ezekyel sa lord, i ti osi donn li son lespri sen. Sa ti fer Ezekyel ganny sa lafors ki i ti bezwen pour debout. Ezekyel ti ekri: “Mon ti ganny lespri sen e lespri sen ti fer mwan debout.” (Ezek. 2:1, 2) Pli tar e tou dilon son minister, Ezekyel ti ganny gide par “lanmen” Bondye setadir lespri sen Bondye. (Ezek. 3:22; 8:1; 33:22; 37:1; 40:1) Lespri sen Bondye ti donn Ezekyel lafors pour fer sa ki Zeova ti’n demann li pour fer setadir pour koz avek bann dimoun ki ‘zot latet ti dir e zot leker ti dir.’ (Ezek. 3:7) Zeova ti dir Ezekyel: “Mon’n fer ou vin antete parey zot zot antete e mon’n fer ou fron vin dir parey zot fron. Mon’n fer ou fron vin parey en dyanman, pli dir ki ros. Pa bezwen per zot e pa bezwen per zot figir.” (Ezek. 3:8, 9) I ti konmsi Zeova ti pe dir Ezekyel: ‘Pa  bezwen les sa bann dimoun antete fer ou dekouraze. Mon pou fer ou for.’

⁹ Apre sa, lespri sen Bondye ti anmenn Ezekyel dan sa landrwa kot i ti pou koz avek bann dimoun. Ezekyel ti ekri: “Zeova ti avek mwan.” I ti pran en semenn pour sa profet konn e konpran byen sa mesaz ki i ti pou anonse, pour li kapab koz avek lasirans. (Ezek. 3:14, 15) Apre Zeova ti dir li al dan en vale e “lespri sen ti vin dan [li].” (Ezek. 3:23, 24) Ezekyel ti’n pare pour konmans son minister.

10. Ki led ki nou bezwen pour fer sa travay predikasyon e akoz?

¹⁰ Ki led ki nou bezwen pour fer sa travay predikasyon? Pour reponn sa kestyon, mazin sa ki ti arive avek Ezekyel. Avan i ti konmans son minister, lespri sen Bondye ti donn li sa lafors ki i ti bezwen. Parey Ezekyel, lespri sen Bondye i ed nou ozordi pour nou kapab fer sa travay predikasyon parski Satan pe lager avek nou, pour li fer nou aret fer sa travay predikasyon. (Rev. 12:17) En kantite dimoun i krwar ki Satan i telman for ki nou pa kapab ranport laviktwar lo li. Me atraver nou travay predikasyon, nou pe ranport laviktwar lo li. (Rev. 12:9-11) Ki mannyer sa? Ler nou anons sa bon nouvel, nou montre ki nou pa per bann latak Satan. Vi ki nou kapab fer sa travay predikasyon malgre nou ganny opoze, ki sa i montre nou? Sa i montre nou ki Zeova i donn nou lafors atraver son lespri sen e ki nou annan laprouvasyon Zeova.​—Mat. 5:10-12; 1 Pyer 4:14.

11. Ki lespri sen Bondye pou fer pour nou e ki mannyer nou kapab kontinyen ganny lespri sen?

¹¹ Ki nou aprann ankor ler nou reflesir lo lafason ki Zeova ti donn Ezekyel sa lafors ki i ti bezwen pour anons Son mesaz? Lespri sen Bondye i kapab donn nou sa lafors ki nou bezwen pour fer fas avek nenport problenm ki nou gannyen  dan sa travay predikasyon. (2 Kor. 4:7-9) Alor ki nou kapab fer pour fer sir ki nou kontinyen ganny lespri sen Bondye? Nou bezwen kontinyen demann Zeova son lespri sen e asire ki i pou reponn nou lapriyer. Zezi ti dir son bann disip: “Kontinyen demande . . . , kontinyen rode e . . . , kontinyen tap laport.” An retour, Zeova pou “donn lespri sen bann ki pe demann li.”​—Lik 11:9, 13; Akt 1:14; 2:4.

12. Dapre Ezekyel 2:9–3:3, kote sa roulo ti sorti e kwa ki ti’n ganny ekrir dan sa roulo?

¹² Lespri sen Bondye ti donn Ezekyel sa kouraz ki i ti bezwen pour anons mesaz Bondye. An plis ki sa, sa ki Bondye ti dir Ezekyel ti ranforsi lafwa Ezekyel. Dan en vizyon, Ezekyel ti vwar en lanmen pe tenir en roulo. (Lir Ezekyel 2:9–3:3.) Kote sa roulo ti sorti? Kwa ki ti’n ganny ekrir dan sa roulo? Ki mannyer sa roulo ti ranforsi son lafwa? Annou vwar larepons sa bann kestyon. Sa roulo ti sorti kot tronn Bondye. I tre probab ki Zeova ti servi enn parmi sa kat lanz ki Ezekyel ti’n vwar pli boner pour donn Ezekyel sa roulo. (Ezek. 1:8; 10:7, 20) Lo sa roulo, i ti annan mesaz Bondye setadir en gran mesaz zizman ki Ezekyel ti pou bezwen anonse avek sa pep rebel ki ti an egzil. (Ezek. 2:7) Sa mesaz ti’n ganny ekrir devan e deryer sa roulo.

13. Ki Zeova ti dir avek Ezekyel fer avek sa roulo e akoz sa roulo ti dou?

¹³ Zeova ti dir son profet manz sa roulo e “ranpli [son] vant.” Ezekyel ti obei Zeova e i ti manz sa roulo antye. Ki sa parti sa vizyon i vedir? Ezekyel ti bezwen konpran byen sa mesaz ki i ti pe al anonse. I ti bezwen krwar sa mesaz pour ki sa i motiv li pour anons sa mesaz. Apre, en keksoz ekstraordiner ti arive. Ezekyel ti realize ki sa roulo “ti dou parey dimyel.” (Ezek. 3:3) Akoz sa? Parski Ezekyel ti vwar sa loner pour reprezant Zeova konman en bon leksperyans. (Ps. 19:8-11) I ti rekonesan ki Zeova ti’n swazir li pour servi konman son profet.

14. Kwa ki ti ed Ezekyel pour li pare pour konmans sa travay ki Zeova ti’n donn li?

¹⁴ Pli tar, Zeova ti dir Ezekyel: “Pran a ker e ekout tou sa ki mon dir ou.” (Ezek. 3:10) Ler Zeova ti donn Ezekyel sa bann lenstriksyon, i ti pe dir ki Ezekyel i bezwen gard sa ki’n ganny ekrir dan sa roulo dan son lespri e medit lo la. Ler Ezekyel ti fer sa, son lafwa ti vin pli for e i ti konn sa mesaz ki i ti bezwen anons avek sa pep. (Ezek. 3:11) Ler Ezekyel ti konpran byen sa mesaz e krwar dan sa mesaz, i ti pare pour konmans anons sa mesaz e kontinyen ziska ki i fini sa travay ki Bondye ti’n donn li.​—Konpar Psonm 19:14.

15. Ki nou bezwen “pran a ker” pour nou kapab kontinyen fer sa travay predikasyon?

¹⁵ Pour nou kontinyen fer sa travay predikasyon, nou osi nou bezwen les mesaz Bondye kontinyen fer nou lafwa vin pli for. Nou bezwen “pran a ker” tou sa ki Zeova i dir nou. Ozordi, Zeova i koz avek nou atraver son Parol Labib. Ki mannyer nou kapab fer sir ki Parol Bondye i kontinyen annan en lefe lo nou fason panse, santiman ek motivasyon?

16. Ki nou bezwen fer avek Parol Bondye e ki mannyer nou kapab konpran li pli byen?

¹⁶ Ler nou manze, nou manze i ganny  dizere e sa i fer nou vin pli for. Pareyman ler nou etidye Parol Bondye e nou medit lo la, sa i fer nou lafwa vin pli for. Nou bezwen gard antet sa leson ki nou aprann avek sa roulo. Ler nou lir Parol Bondye, Zeova i anvi ki nou “ranpli [nou] vant” avek son Parol setadir konpran byen son Parol. Nou kapab fer sa ler nou fer lapriyer, nou lir Parol Bondye e medit lo la. Premyerman, nou fer lapriyer pour prepar nou leker pour aksepte fason panse Zeova. Apre sa, nou lir en porsyon dan Labib e nou pran en poz pour medit lo sa ki nou’n lir. Ki pou arive apre? Pli ou medite, pli ou pou konpran Parol Bondye e ou lafwa pou vin pli for.

17. Akoz i enportan pour medit lo sa ki nou lir dan Labib?

¹⁷ Akoz i enportan pour lir Labib e medit lo la? Ler nou fer sa, nou pou ganny sa lafors ki nou bezwen pour anons sa bon nouvel Rwayonm la konmela e pour anons sa mesaz zizman ki petet nou pou anonse tre byento. Osi ler nou medit lo bann zoli kalite ki Zeova i annan, nou pou vin pli pros avek li. Sa pou fer ki nou pou annan en keksoz ki “dou” e bon, setadir lape lespri ek lazwa.​—Ps. 119:103.

18. Ki bann dimoun ki nou’n koz avek dan predikasyon pou bezwen rekonnet e akoz?

¹⁸ Ezekyel ti en profet me nou, nou pa en profet. Me nou determinen pour kontinyen anons mesaz Zeova ki dan Labib ziska ki Zeova i dir ki sa travay in fini. Ler zizman i arive, dimoun ki nou’n koz avek dan predikasyon pou napa rezon pour dir ki zot pa’n ganny averti oubyen ki Bondye pa enterese avek zot. (Ezek. 3:19; 18:23) O kontrer, zot pou bezwen rekonnet ki sa mesaz ki nou ti anonse ti sorti kot Bondye.

19. Kwa ki pou donn nou sa lafors pour fer sa travay predikasyon?

¹⁹ Kwa ki pou donn nou sa lafors pour fer sa travay predikasyon? Sa trwa keksoz ki ti ankouraz Ezekyel i kapab osi donn nou sa lafors pour fer sa travay predikasyon. Nou kontinyen anons sa bon nouvel parski nou konnen ki Zeova ki’n anvoy nou, lespri sen Bondye i donn nou sa lafors ki nou bezwen e mesaz Bondye i fer nou lafwa vin pli for. Avek led Zeova, nou ganny motive pour kontinyen fer sa travay predikasyon e pour andire “ziska lafen.”​—Mat. 24:13.