BIOGRAFI
“Mon ti anvi travay pour Zeova”
NOU ti dir orevwar en pti group dimoun ki nou ti’n vizite pros avek vilaz Granbori ki trouve vreman lwen dan lafore Suriname. Apre sa nou ti anbark dan en bato dibwa e fer nou vwayaz lo Tapanahoni River. Pli tar ler nou ti pas en landrwa kot delo i desann vit, lelis bato ti tap avek en ros e deswit devan bato ti plonz dan larivyer. Mon leker ti pe anvole. Menm si konman en sirveyan rezyonal mon ti’n voyaz lo sa bann kalite bato pour plizyer lannen, mon pa ti konn naze!
Avan mon rakont sa ki ti arive apre, les mwan dir ou ki mannyer mon ti konmans fer servis a plen tan.
Mon ti ne an 1942 lo en zoli zil dan Karaib ki apel Curaçao. Mon papa ti sorti Suriname me i ti al reste Curaçao pour travay. Detrwa lannen avan mon ti ne, mon papa ti parmi enn bann premye dimoun lo sa zil pour batize konman en Temwen Zeova. a I ti fer letid Labib avek nou tou le semenn menm si nou pa ti toultan anvi etidye. Ler mon ti annan 14 an, mon papa ti anmenn nou reste Suriname pour li kapab pran swen avek son manman ki ti aze.
MON TI GANNY LED AVEK BANN BON ZANMI
Ler mon ti Suriname, mon ti fer zanmi avek bann zenn dan kongregasyon ki ti pe servi Zeova avek devouman. Zot ti detrwa lannen pli vye ki mwan e zot ti pe fer pionye ordiner. Ler zot ti koz lo bann leksperyans ki zot in gannyen dan predikasyon, mon ti vwar ki zot ti vreman ere. Apre renyon, mwan ek mon bann zanmi nou ti kontan koz lo Labib e parfwa nou ti fer sa deor anmezir ki nou ti get zetwal. Sa bann zanmi ti ed mwan pour konnen kwa ki mon ti vreman anvi dan lavi. Sa ki mon ti vreman anvi ti pour travay pour Zeova. Alor ler mon ti annan 16 an mon ti pran batenm. Pli tar a laz 18 an mon ti konmans fer pionye ordiner.
MON TI APRANN BANN LESON ENPORTAN
Ler mon ti pe fer pionye Paramaribo
Mon ti aprann en kantite leson konman en pionye e sa in ed mwan tou dilon mon lavi dan servis a plen tan. Par egzanp, enn bann premye leson ki mon ti aprann ti sa lenportans pour form lezot. Ler mon ti konmans fer pionye, en misyonner ki ti apel Willem van Seijl ti demontre en lentere personnel dan mwan. b I ti montre mwan en kantite keksoz lo ki mannyer pour desarz bann diferan responsabilite dan kongregasyon. Sa letan mon pa ti ni menm realize ki mon ti byen bezwen sa formasyon. Son lannen ki ti swiv, mon ti ganny apwente konman en pionye spesyal e mon ti konmans ed bann pti group frer ek ser ki ti reste lwen dan lafore Suriname. Mon rekonesan pour formasyon ki bann frer parey Willem in donn mwan ler mon ti vreman bezwen. Depi sa letan mon’n fer mon mye pour swiv zot legzanp par pran letan pour form lezot.
En dezyenm leson ki mon ti aprann, i ki i bon pour viv en lavi senp e byen organize. O konmansman sak mwan, mwan ek mon koleg pionye spesyal nou ti plàn davans ki kalite manze ek lezot keksoz ki nou ti pou bezwen pour bann semenn ki pou vini. Apre sa, enn parmi nou ti fer sa gran vwayaz pour al dan kapital pour aste sa ki nou ti bezwen. Nou ti bezwen vey byen lafason ki nou ti depans nou larzan e servi byen nou manze pour ki i dire pour en mwan. Si en keksoz ti fini ler nou dan sa lafore, i ti pou difisil pour ganny en dimoun ki ti pou kapab ed nou. Mon krwar ki vi ki mon’n aprann depi byen zenn pour viv en lavi senp me byen organize, sa in ed mwan pour reste konsantre lo travay Zeova tou dilon mon lavi.
En trwazyenm leson ki mon’n aprann, i ki ler dimoun i ganny ansennyen dan zot prop langaz, sa i anmenn bokou byenfe. Ler mon ti pe grandi mon ti aprann koz Dutch, Angle, Papiamento ek Sranantongo (ki osi ganny apele Sranan), ki ti langaz ofisyel Suriname. Me dan lafore mon ti vwar ki dimoun ti pli pare pour ekout sa bon nouvel ler ou koz avek zot dan zot prop langaz. Mon ti vwar li difisil pour koz serten sa bann langaz, parey Saramaccan ki son lentonasyon i o e ba. Me i ti vo lapenn fer sa zefor. Pandan plizyer lannen mon’n reisi ansenny laverite avek bokou plis dimoun parski mon ti kapab koz zot langaz.
Byensir, mon’n pas dan bann leksperyans anbarasan. Par egzanp, en fwa mon ti krwar ki mon’n demann enn mon etidyan Labib ki en madanm e ki koz Saramaccan, konman i sava, vi ki i ti pe ganny douler dan son vant. Me san realize mon ti’n demann li si i ansent! Byensir sa ti en kestyon anbarasan pour li. Menm si mon ti fer bann fot koumsa, kot mon ti ale mon ti toultan eseye pour koz sa langaz ki dimoun i koze dan sa landrwa.
MON TI AKSEPTE LEZOT RESPONSABILITE
An 1970 mon ti ganny apwente konman en sirveyan rezyonal. Sa menm lannen mon ti zwe sa progranm “Visiting the World Headquarters of Jehovah’s Witnesses” avek plizyer group ki ti reste dan lafore. Pour vizit sa bann frer ek ser, mwan ansanm avek lezot frer nou ti navige lo bann larivyer dan sa lafore dan en gran bato dibwa. Dan bato, i ti annan en zenerater, en tenk bennzin, lalanp petrol ek lekipman pour zwe sa progranm. Ler nou ti ariv dan sa landrwa kot nou ti pe ale, nou ti anmenn tou sa bann lekipman ziska kot nou ti pou servi zot. Me sa ki mon ti pli kontan avek sa bann voyaz, i ki sa bann dimoun dan sa bann landrwa ti vreman kontan sa bann progranm. Mon ti vreman kontan pour ed lezot aprann konsernan Zeova ek sa parti son lorganizasyon ki lo later. Ler mon vwar ki mannyer bann dimoun in vin pros avek Zeova, sa in fer mwan vreman kontan ki mon’n travay dir dan servis Zeova.
EN LAKORD KI’N TRES AN TRWA
An Septanm 1971, ler nou de Ethel nou ti marye
Menm si mon ti vwar ki i ti pli fasil pour mwan fer mon servis konman en selibater, mon ti anvi marye. Alor mon ti konmans priy Zeova e demann li pour ed mwan trouv en madanm ki ti pou kontan pour servi ansanm avek mwan dan sa lafore. Apepre enn an pli tar mon ti konmans pwente avek Ethel, en pionye spesyal ki ti pare pour travay dir pour Zeova menm ler i pa ti fasil pour li. Depi ler Ethel ti ankor zenn i ti kontan legzanp zapot Pol e i ti anvi fer tou sa ki i ti kapab dan predikasyon parey zapot Pol ti fer. Nou ti marye Septanm 1971 e konman en koup nou ti konmans servi konman sirveyan rezyonal.
Ler Ethel ti pe grandi, son fanmir ti napa bokou keksoz materyel alor i ti fasil pour li adapte ler nou pe vizit bann kongregasyon dan lafore. Par egzanp, ler nou ti prepare pour al vizit bann kongregasyon ki vreman lwen dan lafore, nou pa ti anmenn bokou keksoz avek nou. Nou ti lav nou lenz dan larivyer e benny dan larivyer. Nou ti osi ganny labitid pour manz nenport kwa ki bann frer ek ser i donn nou. Par egzanp, nou ti manz iguanas, piranhas oubyen nenport lezot keksoz ki zot in atrape dan lafore oubyen dan larivyer. Ler i ti napa lasyet, nou ti manz dan fey bannann. Ler i ti napa kwiyer, nou ti manz avek nou lanmen. Nou de Ethel, nou santi ki bann sakrifis ki nou’n fer ansanm dan servis Zeova in fer nou vin pli pros avek kanmarad parey en lakord ki’n tres an trwa. (Ekle. 4:12) Nou pa pou sanz sa bann leksperyans pour okenn keksoz.
En keksoz ti arive en zour ler nou ti pe retournen sorti vizit bann frer ek ser dan lafore. I sanmenm sa leksperyans ki mon ti rakonte o konmansman. Ler bato ti pas dan en landrwa kot delo i desann vit, bato ti plonz anba delo e remont lo sirfas. Erezman, nou ti annan nou life jacket lo nou e nou pa ti tonm dan larivyer. Me i ti annan en kantite delo dan bato. Nou ti zet manze ki ti dan bann kastrol dan larivyer e servi sa bann kastrol pour tir delo dan bato.
Nou ti napa manze, alor nou ti lapes anmezir ki nou ti desann dan larivyer. Me nou pa ti ganny nanryen. Nou ti priy Zeova e demann li pour donn nou, nou manze pour sa lazournen. Zis apre ki nou ti’n fer lapriyer, enn bann frer ki ti la ti anvoy en laliny dan delo e i ti ganny en gro pwason ki ti ase pour nou senk manze sa zour swar. Nou tou nou ti manze vant plen.
MON TI EN MSYE, PAPA EK SIRVEYAN REZYONAL AN MENM TAN
Apre senk an konman sirveyan rezyonal, nou de Ethel nou ti ganny en benediksyon ki nou pa ti pe ekspekte. Nou ti pe vin paran. Mon ti kontan pour tann sa nouvel menm si mon pa ti konnen ki lefe sa ti pou annan lo nou lavi. Nou de Ethel nou ti vreman anvi reste dan servis a plen tan si posib. An 1976 nou garson Ethniël ti ne. De-z-an edmi pli tar nou dezyenm garson, Giovanni ti ne.
An 1983, ler mon ti pe get batenm ki ti ganny fer dan Tapanahoni River pros o bor Godo Holo dan les Suriname
Vi ki i ti annan en gran bezwen Suriname sa letan, biro brans ti fer laranzman pour mwan kontinyen servi konman sirveyan rezyonal an menm tan ki nou pe fer grandi nou zanfan. Ler nou bann garson ti ankor zenn, mon ti vin sirveyan rezyonal pour en rezyon ki napa bokou kongregasyon. Sa ti fer ki sak mwan mon ti pas detrwa semenn pe vizit bann kongregasyon e larestan zour mon ti servi konman en pionye dan sa kongregasyon kot nou ti pe servi. Ethel ek nou bann garson ti akonpanny mwan ler mon ti al vizit bann kongregasyon ki ti pros avek kot nou ti reste. Me mon ti al mon tousel ler mon ti al vizit bann kongregasyon ki ti dan lafore e ler mon ti al bann lasanble ki ti ganny fer dan lafore.
Ler mon ti sirveyan rezyonal, mon ti souvan vwayaz par bato pour al vizit bann kongregasyon ki ti lwen
Mon ti bezwen plàn byen pour mon kapab desarz tou mon bann responsabilite. Mon ti fer sir ki mon ti fer ladorasyon fanmir tou le semenn. Ler mon ti al vizit bann kongregasyon dan lafore, Ethel ti fer ladorasyon fanmir avek nou bann garson. Me otan ki posib nou ti fer keksoz an fanmir. Nou de Ethel nou ti fer bann aktivite avek nou bann garson. Nou ti zwe ansanm oubyen nou ti vizit bann landrwa enteresan ki pa ti lwen avek kot nou ti reste. Souvan mon ti prepar bann progranm pour renyon ek predikasyon ziska tar aswar. Ethel ti en bon madanm parey sa madanm ki ganny dekrir dan Proverb 31:15. Toulezour, i ti lev granmaten pour li fer sir ki nou kapab lir teks pour lazournen ansanm konman en fanmir e pour nou pran brekfas avek nou bann garson avan zot al lekol. Mon vreman rekonesan ki mon annan en madanm ki pare pour fer bann sakrifis e ki toultan ed mwan pour pran swen avek tou bann responsabilite ki Zeova in donn mwan.
Konman paran, nou ti travay dir pour ed nou bann garson pour kontan Zeova ek predikasyon. Nou ti anvi ki nou bann garson i pran servis a plen tan, pa akoz nou ki anvi zot fer sa me akoz zot ki swazir pour fer sa. Nou ti toultan koz avek zot lo lazwa ki nou’n gannyen dan servis a plen tan. Nou ti koz lo bann difikilte ki nou ti gannyen e nou ti koz lo lafason ki Zeova ti ed nou e beni nou fanmir. Nou ti osi fer sir ki nou bann garson ti pas letan avek bann frer ek ser ki met Zeova premye dan zot lavi.
Anmezir ki nou ti pe fer grandi nou bann zanfan, Zeova ti donn nou tou sa ki nou ti bezwen. Byensir, mon ti toultan fer sa ki mon kapab pour pran swen avek mon fanmir. Sa leksperyans ki mon ti gannyen ler mon ti en selibater e ler mon ti pe fer pionye spesyal dan lafore, ti ansenny mwan ki mon bezwen anmas larzan pour bann keksoz ki nou ti pou bezwen. Me menm si nou ti fer nou mye, parfwa nou ti napa tou sa ki nou ti bezwen. Mon krwar ki dan sa bann moman, Zeova ti ed nou. Par egzanp, ver lafen bann lannen 1980 ziska o konmansman bann lannen 1990, i ti annan en lager sivil Suriname. Dan sa bann lannen, i ti annan moman kot i ti difisil pour ganny bann keksoz de baz. Me kantmenm sa, Zeova ti donn nou sa ki nou ti bezwen.—Mat. 6:32.
MON MAZIN BANN LANNEN KI’N PASE
Sorti gos pour al drwat: Nou de Ethel
Nou premye garson Ethniël ek son madanm Natalie
Nou dezyenm garson Giovanni ek son madanm Christal
Tou dilon nou lavi, Zeova in toultan pran swen avek nou e i’n ed nou pour nou zwaye e pour kontant nou avek sa ki nou annan. Nou bann zanfan in toultan fer nou zwaye e nou rekonesan ki nou’n kapab ansenny nou zanfan pour servi Zeova. Nou vreman kontan ki zot osi zot in swazir pour pran servis a plen tan. Ethniël ek Giovanni in asiste bann lekol ki lorganizasyon Zeova in fer e aprezan zot pe servi dan Betel Suriname avek zot madanm.
Aprezan, nou de Ethel nou’n vye me nou ankor bizi dan servis Zeova pe servi konman pionye spesyal. Anfet, nou sitan bizi ki mon pa ankor ganny letan pour aprann naze! Me mon napa okenn regre. Ler mon mazin bann lannen ki’n pase, mon santi ki mon desizyon pour pran servis a plen tan depi ler mon ti ankor zenn, i enn bann pli bon desizyon ki mon’n deza fer.
a Vwar 2002 Yearbook of Jehovah’s Witnesses, paz 70 an Angle.
b Biografi Willem van Seijl ki annan pour tit, “Reality Has Exceeded My Expectations,” i ganny pibliye dan magazin Awake! le 8 Oktob 1999 an Angle.