LARTIK LETID 47
Pa les nanryen fer ou aret servi Zeova
“Mon met konfyans dan ou, O Zeova.”—PS. 31:14.
KANTIK 122 Reste ferm e solid!
SA KI NOU POU ETIDYE a
1. Ki mannyer nou konnen ki Zeova i anvi vin pros avek nou?
ZEOVA i envit nou pour vin pros avek li. (Zak 4:8) I anvi vin nou Bondye, nou Papa e nou Zanmi. I reponn nou lapriyer e i ed nou dan bann moman difisil. I servi son lorganizasyon pour ansenny nou e protez nou. Me ki nou nou devret fer pour vin pli pros avek Zeova?
2. Ki mannyer nou kapab vin pros avek Zeova?
2 Nou kapab vin pros avek Zeova ler nou koz avek li dan lapriyer, ler nou lir son Parol e ler nou medit lo la. Ler nou fer sa, nou devlop plis lanmour ek lapresyasyon pour li. Sa i osi fer nou anvi obei li e donn li sa louanz ki i merite. (Rev. 4:11) Pli nou aprann konn Zeova, pli nou pou annan konfyans dan li ek son lorganizasyon ki i pe servi pour ed nou.
3. Ki mannyer Satan i esey fer nou aret servi Zeova me kwa ki pou ed nou pour pa zanmen abandonn nou Bondye ek Son lorganizasyon? (Psonm 31:13, 14)
3 Satan i esey fer nou aret servi Zeova sirtou ler nou fer fas avek difikilte. Ki mannyer i fer sa? Satan i esey fer nou ptitapti perdi konfyans dan Zeova ek Son lorganizasyon. Me nou kapab defann nou lekor kont son bann latak. Ler nou annan en lafwa ki for e nou vreman annan konfyans dan Zeova, nou pa pou abandonn nou Bondye ek son lorganizasyon.—Lir Psonm 31:13, 14.
4. Ki nou pou vwar dan sa lartik?
4 Dan sa lartik, nou pou vwar trwa problenm ki sorti an deor kongregasyon. Sa bann problenm i kapab fer nou perdi konfyans dan Zeova ek son lorganizasyon. Ki mannyer sa bann problenm i kapab fer nou aret servi Zeova? Ki nou kapab fer pour protez nou lekor kont bann latak Satan?
LER NOU FER FAS AVEK BANN DIFIKILTE
5. Ki mannyer bann problenm i kapab fer nou perdi konfyans dan Zeova ek son lorganizasyon?
5 Parfwa nou fer fas avek bann difikilte. Par egzanp, i kapab ki nou fanmir i opoz nou ouswa nou perdi nou travay. Ki mannyer sa bann difikilte i kapab fer nou perdi konfyans dan lorganizasyon Zeova e fer nou aret servi Zeova? Ler nou fer fas avek en problenm pour en kantite letan, nou kapab santi ki sa problenm pa pou zanmen arete e sa i fer nou dekouraze. Satan i servi sa bann moman difisil pour fer nou krwar ki Zeova pa kontan nou. Dyab i anvi ki nou krwar ki Zeova ouswa Son lorganizasyon ki responsab pour nou soufrans. En keksoz en pe parey ti arive avek serten Izraelit ler zot ti Lezip. O konmansman, zot ti krwar ki Zeova in apwent Moiz ek Aaron pour liber zot dan lesklavaz. (Egz. 4:29-31) Me ler Faraon ti fer zot lavi vin pli difisil, zot ti blanm Moiz ek Aaron pour zot problenm e zot ti dir: “Zot in fer Faraon ek son bann serviter ay nou. Zot in met en lepe dan zot lanmen pour touy nou.” (Egz. 5:19-21) Zot ti blanm bann serviter fidel Bondye. Sa ti vreman mal! Si depi lontan ou pe fer fas avek en problenm, ki mannyer ou kapab kontinyen annan konfyans dan Zeova ek son lorganizasyon?
6. Ki nou aprann avek profet Abakouk lo ki mannyer nou kapab fer fas avek nou problenm? (Abakouk 3:17-19)
6 Koz avek Zeova dan lapriyer e rod led avek li. Profet Abakouk ti fer fas avek en kantite problenm. I paret ki i ti annan en moman ki Abakouk ti krwar ki Zeova pa ti enterese avek li. Alor i ti koz avek Zeova dan lapriyer e i ti dir li tou sa ki i ti pe santi. I ti dir: “O Zeova, ziska kan mon pou bezwen kriy osekour, me ou pa tann mwan? . . . Akoz ou toler dimoun ki abiz lezot?” (Aba. 1:2, 3) Zeova ti reponn son serviter fidel. (Aba. 2:2, 3) Apre ki Abakouk ti’n reflesir lo lafason ki Zeova ti’n sov son pep, i ti reganny son lazwa. I ti asire ki Zeova i enterese avek li e ki Zeova ti pou ed li fer fas avek son bann problenm. (Lir Abakouk 3:17-19.) Ki leson nou aprann? Ler ou fer fas avek difikilte, priy Zeova e dir li ki mannyer ou pe santi. Apre, demann li pour ed ou. Ler ou fer sa, ou kapab asire ki Zeova pou donn ou sa lafors ki ou bezwen pour andire. Ler ou santi ki Zeova pe ed ou, sa pou fer ou lafwa vin pli for.
7. Ki en manm fanmir Shirley ti esey fer li krwar e kwa ki ti fer Shirley pa perdi lafwa dan Zeova?
7 Kontinyen fer bann keksoz ki pou ed ou reste pros avek Zeova. Sanmenm sa ki ti ed en ser ki apel Shirley ki reste Papua New Guinea ler i ti fer fas avek bann problenm. b Fanmir Shirley ti pov e parfwa i ti difisil pour zot ganny ase manze. Enn son manm fanmir ti esey fer li perdi konfyans dan Zeova. I ti dir: “Ou dir ki lespri sen Bondye pe ed ou, me ki led ou’n gannyen? Ou fanmir i ankor pov. Ou pe gaspiy ou letan dan predikasyon.” Shirley i dir: “Mon ti demann mon lekor: ‘Eski Bondye i enterese avek nou oubyen non?’ Alor deswit mon ti priy Zeova e dir li tou sa ki ti pe fatig mwan. Mon pa ti aret lir Labib ek nou bann piblikasyon e mon ti kontinyen al predikasyon e asiste renyon.” Shirley pa ti tarde pour konmans realize ki Zeova ti pe pran swen avek son fanmir. Son fanmir ti toultan annan manze e zot ti zwaye. Shirley i dir: “Mon ti santi ki Zeova ti pe reponn mon bann lapriyer.” (1 Tim. 6:6-8) Si ou fer parey Shirley e ou fer bann keksoz ki ed ou reste pros avek Zeova, ou pa pou les bann problenm oubyen dout fer ou aret servi Zeova.
LER BANN FRER KI DIRIZ KONGREGASYON PA GANNY TRETE BYEN
8. Kwa ki kapab arive avek bann frer ki pe dirize dan lorganizasyon Zeova?
8 Atraver medya ek rezo sosyal, nou bann lennmi i dir bann mansonz oubyen zot dir bann keksoz ki fer nou annan dout lo bann frer ki pe dirize dan lorganizasyon Zeova. (Ps. 31:13) Serten frer in ganny arete e akize konmkwa zot bann kriminel. Bann Kretyen dan premye syek ti fer fas avek en sityasyon en pe parey ler zapot Pol ti ganny arete e akize dan en fason enzis. Ki mannyer zot ti reazir?
9. Ki mannyer serten Kretyen ti reazir ler zapot Pol ti ganny met dan prizon?
9 Serten Kretyen dan premye syek ti aret siport zapot Pol ler i ti ganny mete dan prizon Ronm. (2 Tim. 1:8, 15) Akoz? Eski zot ti onte parski dimoun ti vwar Pol konman en kriminel? (2 Tim. 2:8, 9) Ouswa eski zot ti per ki zot osi zot ti pou ganny persekite? Nenport rezon ki zot ti annan, mazin ki mannyer zot aksyon ti fer Pol santi. I ti’n fer fas avek en kantite difikilte e i ti’n menm riske son lavi pour zot. (Akt 20:18-21; 2 Kor. 1:8) Annou pa zanmen vin parey bann dimoun ki pa ti ed Pol ler i ti bezwen led. Ki nou devret gard antet ler bann frer ki pe dirize dan kongregasyon i ganny persekite?
10. Ki nou devret gard antet ler bann frer ki pe dirize dan kongregasyon i ganny persekite e akoz?
10 Nou bezwen gard antet rezon akoz nou ganny persekite e lekel ki par deryer sa bann persekisyon. Dezyenm Timote 3:12 i dir: “Tou bann ki oule vin disip Kris Zezi e demontre devosyon pour Bondye dan zot lavi pou osi ganny persekite.” Alor nou pa devret sirprann ki Satan i atak bann frer ki pe dirize dan kongregasyon. Satan i anvi ki sa bann frer i aret fidel avek Zeova e i osi anvi fer nou per.—1 Pyer 5:8.
Menm si Pol ti dan prizon, Onezifor ti demontre kouraz par siport Pol. Ozordi, nou bann frer ek ser i siport lezot frer ek ser ki dan prizon parey nou vwar dan sa portre (Vwar paragraf 11-12)
11. Ki nou aprann avek legzanp Onezifor? (2 Timote 1:16-18)
11 Kontinyen siport ou bann frer e reste fidel avek zot. (Lir 2 Timote 1:16-18.) Ler Pol ti ganny met dan prizon, en frer ki ti apel Onezifor pa ti azir parey lezot dimoun. ‘I pa ti onte ki Pol ti dan prizon.’ O kontrer, Onezifor ti rod Pol e ler i ti trouv li, i ti esey ed li ganny sa ki i bezwen. Ler Onezifor ti fer sa, i ti pe met son prop lavi an danze. Ki leson nou aprann? Nou pa devret les lafreyer pour zonm anpes nou siport nou bann frer ki pe ganny persekite. O kontrer, annou fer tou sa ki nou kapab pour ed zot. (Prov. 17:17) Zot bezwen santi ki nou kontan zot e zot bezwen nou sipor.
12. Ki nou aprann avek nou bann frer ek ser Larisi?
12 Annou vwar ki mannyer bann frer ek ser Larisi in ed zot bann frer ek ser ki’n ganny met dan prizon. Ler serten frer ek ser i ganny anmennen ankour, lezot frer ek ser i vin ankour pour siport zot. Ki leson nou aprann? Ler dimoun i koz mansonz lo bann frer ki pe dirize dan kongregasyon, ler sa bann frer i ganny arete oubyen persekite, pa bezwen per. Priy pour sa bann frer, pran swen avek zot fanmir e rod lezot fason pour montre ki ou pe siport zot.—Akt 12:5; 2 Kor. 1:10, 11.
LER NOU GANNY SIKANNEN
13. Ki mannyer ler dimoun i sikann nou, sa i kapab fer nou aret annan konfyans dan Zeova ek son lorganizasyon?
13 Nou fanmir ki pa Temwen Zeova, nou koleg travay oubyen kanmarad lekol i kapab sikann nou akoz nou anons sa bon nouvel oubyen akoz nou viv dapre bann standar moral Zeova. (1 Pyer 4:4) Zot kapab dir: “Mon dakor avek ou me ou larelizyon i tro strik e lavi in sanze.” Serten i kapab kritik nou konsernan lafason ki nou tret bann ki’n ganny ekskli dan kongregasyon. Zot kapab dir: “Ki mannyer ou kapab dir ki ou en dimoun ki kontan lezot?” Bann komanter koumsa i kapab fer nou konmans annan dout konsernan bann lalwa Zeova. Nou kapab konmans demann nou lekor: ‘Eski Zeova i ekspekte tro bokou avek mwan? Eski son lorganizasyon pe priv nou?’ Si ou dan en sityasyon koumsa, ki mannyer ou kapab reste pros avek Zeova ek son lorganizasyon?
Zob pa ti krwar bann mansonz ki son bann swadizan zanmi ki ti pe sikann li, ti dir. O kontrer, i ti determinen pour reste fidel avek Zeova (Vwar paragraf 14)
14. Ki mannyer nou devret azir ler lezot i sikann nou parski nou viv dapre bann standar Zeova? (Psonm 119:50-52)
14 Nou devret determinen pour kontinyen swiv bann standar drwat Zeova. Zob ti obei bann standar drwat Zeova menm si i ti ganny sikannen. Enn bann swadizan zanmi Zob ti esey fer Zob krwar ki pour Bondye i pa enportan si Zob i fer sa ki byen ouswa sa ki mal. (Zob 4:17, 18; 22:3) Me Zob pa ti krwar sa bann mansonz. I ti konnen ki bann standar Zeova konsernan sa ki byen ek sa ki mal i bon e i ti determinen pour obei sa bann standar. I pa ti les lezot fer li dezobei Zeova. (Zob 27:5, 6) Ki leson nou aprann? Menm si ou ganny sikannen, pa les sa fer ou annan dout konsernan bann standar Zeova. Reflesir lo ou prop leksperyans. I tre probab ki plizyer fwa ou’n vwar ki ou lavi i pli meyer ler ou fer sa ki Zeova i dir i drwat. Alor annou determinen pour siport sa lorganizasyon ki obei sa bann standar. Koumsa, malgre nenport ki kantite fwa dimoun i sikann ou, ou pa pou zanmen aret servi Zeova.—Lir Psonm 119:50-52.
15. Akoz Brizit ti ganny sikannen?
15 Annou vwar leksperyans en ser dan Lenn ki apel Brizit. Brizit ti ganny sikannen avek son fanmir akoz i ti en Temwen Zeova. Pa bokou letan apre son batenm an 1997, son msye ki pa ti en Temwen Zeova ti perdi son travay. Alor, son msye ti deside ki li, Brizit ek zot bann fiy, zot devret al reste avek son paran ki reste dan en lot lavil. Me Brizit ti pou fer fas avek bann pli gro problenm. Vi ki son msye pa ti pe travay, Brizit ti pou bezwen travay a plen tan pour siport son fanmir. An plis, sa kongregasyon pli pros ti apepre 350 kilomet avek kot zot ti pe reste. Malerezman, bann fanmir son msye ti opoz li akoz i ti en Temwen Zeova. Me sa sityasyon ti vin sitan move ki Brizit ek son fanmir ti bezwen al reste dan en lot landrwa. Apre sa, son msye ti mor san ekspekte. Pli tar, enn son fiy ti mor avek kanser a laz 12 an. Pour fer keksoz pli grav, bann fanmir Brizit ti blanm li pour sa ki ti’n arive. Zot ti dir li ki si i pa ti’n vin en Temwen Zeova, tou sa bann problenm pa ti pou’n arive. Kantmenm sa, i ti kontinyen met son konfyans dan Zeova e reste pros avek Son lorganizasyon.
16. Ki benediksyon Brizit ti gannyen ler i ti reste pros avek Zeova ek son lorganizasyon?
16 Brizit ti reste lwen avek Lasal Rwayonm. Alor sirveyan rezyonal ti ankouraz li pour fer predikasyon dan sa landrwa kot i ti reste e pour fer renyon dan son prop lakour. O konmansman, i ti santi ki sa ti tro difisil. Me i ti swiv lenstriksyon. I ti anons sa bon nouvel avek lezot, i ti fer renyon kot son lakour e i ti fer letan pour fer ladorasyon fanmir avek son bann fiy. Ki ti arive? Brizit ti kondwir plizyer letid Labib e en kantite son bann etidyan ti batize. An 2005, i ti konmans fer pionye ordiner. Vi ki i ti annan konfyans dan Zeova e i ti siport Son lorganizasyon, i ti ganny en kantite benediksyon. Son bann fiy pe servi Zeova e aprezan, i annan de kongregasyon dan sa landrwa kot i pe reste. Brizit i asire ki Zeova ki’n donn li lafors pour fer fas avek son bann difikilte e pour andire ler son fanmir i sikann li.
RESTE FIDEL AVEK ZEOVA EK SON LORGANIZASYON
17. Ki nou devret determinen pour fer?
17 Satan i anvi ki nou krwar ki Zeova pa pou ed nou ler nou annan problenm e ki ler nou siport lorganizasyon Zeova, sa pou fer nou lavi pli difisil. Satan i anvi ki nou santi nou per ler dimoun i dir bann mansonz lo bann frer ki pe dirize dan kongregasyon, ler sa bann frer i ganny persekite oubyen ganny met dan prizon. I anvi ki ler nou ganny sikannen, sa i fer nou perdi konfyans dan bann standar Zeova e dan Son lorganizasyon. Me nou konn byen son bann taktik e nou pa pou les nou ganny anbete. (2 Kor. 2:11) Annou determinen pour rezet bann mansonz Satan e pour reste fidel avek Zeova ek Son lorganizasyon. Rapel ki Zeova pa pou zanmen abandonn nou. (Ps. 28:7) Alor, pa les nanryen fer ou aret servi Zeova!—Rom. 8:35-39.
18. Ki nou pou vwar dan sa lartik ki swiv?
18 Dan sa lartik, nou’n vwar bann problenm ki nou kapab gannyen ki sorti an deor kongregasyon. Me i annan bann sityasyon ki kapab arive dan kongregasyon ki kapab fer li difisil pour nou annan konfyans dan Zeova ek son lorganizasyon. Ki mannyer nou kapab fer fas avek sa bann problenm? Nou pou vwar sa dan sa lartik ki swiv.
KANTIK 118 “Donn nou plis lafwa”
a Pour nou kapab andire e reste fidel dan sa bann dernyen zour, nou bezwen kontinyen annan konfyans dan Zeova ek son lorganizasyon. Dyab i esey servi bann problenm pour fer nou perdi konfyans dan Zeova ek son lorganizasyon. Dan sa lartik, nou pou vwar trwa keksoz ki Dyab i servi e ki nou kapab fer pour reste fidel avek Zeova ek son lorganizasyon.
b Serten non in sanze.