1-2. Ki “bon travay” en ansyen i fer?

 SI OU’N servi konman en serviter kongregasyon pour en pe letan, i kapab ki ou’n travay dir pour devlop bann kalite ki neseser pour vin en ansyen. Eski ou ti pou anvi ed ou bann frer ek ser plis par vin en ansyen?—1 Tim. 3:1.

² Ki travay en ansyen i fer? I kit en bon legzanp par devoue dan sa travay predikasyon, fer bokou zefor pour pran swen avek bann frer ek ser e ansenny zot e ankouraz kongregasyon par sa ki i dir e fer. I pour sa rezon ki Labib i dir ki bann ansyen ki travay dir i “bann zonm konman kado.”—Efe. 4:8.

3. Ki en frer i kapab fer pour kalifye pour vin en ansyen? (1 Timote 3:1-7; Tit 1:5-9)

³ Ki ou kapab fer pour kalifye pour vin en ansyen? Pour en frer vin en ansyen i pa parey avek ler en dimoun pe al rod en travay. Dan lemonn, souvandfwa ou zis bezwen annan bann abilite ki sa anplwayer pe rode pour ou kapab ganny sa travay. Dan kongregasyon i diferan. Si ou anvi vin en ansyen, ou bezwen annan plis ki zis sa abilite pour prese e pour ansennyen. Ou bezwen annan bann kalite ki bann ansyen i bezwen annan ki ganny mansyonnen dan 1 Timote 3:1-7 ek Tit 1:5-9. (Lir.) Dan sa lartik, nou pou vwar serten sa bann kalite e nou pou vwar ki mannyer en frer i kapab annan en bon repitasyon, vin en bon sef fanmir e kwa ki kapab ed li pour anvi ed kongregasyon.

ANNAN EN BON REPITASYON

4. Ki i vedir ler en frer i “san okenn repros”?

⁴ Frer, pour ou kalifye pour vin en ansyen, ou bezwen “san okenn repros,” setadir ou annan en bon repitasyon dan kongregasyon parski ou annan en bon konportman e personn napa okenn rezon pour akiz ou konmkwa ou’n fer en keksoz  mal. An plis, “dimoun ki an deor kongregasyon osi i devret koz an byen” lo ou. Bann dimoun ki pa servi Zeova i kapab koz an mal lo ou krwayans me zot pa devret annan okenn rezon pour doute ki ou en dimoun onnet e en bon dimoun. (Dan. 6:4, 5) Demann ou lekor: ‘Eski mon annan en bon repitasyon dan kongregasyon e an deor kongregasyon?’

5. Ki mannyer ou kapab montre ki ou “kontan sa ki byen”?

⁵ Si ou “kontan sa ki byen,” ou pou vwar bann bon kalite ki lezot i annan e ou pou dir zot ki kantite ou kontan zot bann kalite. Ou osi kontan pour fer bann bon keksoz pour lezot, menm bann keksoz ki lezot pa ekspekte ou fer. (1 Tesa. 2:8; vwar not letid “lover of goodness” dan nwtsty-E dan Tit 1:8.) Akoz i enportan pour bann ansyen “kontan sa ki byen”? Parski sa pou fer ki zot pou kontan pour servi zot letan pour pran swen avek bann frer ek ser dan kongregasyon e pour desarz zot bann responsabilite dan kongregasyon. (1 Pyer 5:1-3) Menm si sa i enplik en kantite travay, sa lazwa ki zot gannyen ler zot ed lezot i plis ki okenn sakrifis ki zot kapab fer.—Akt 20:35.

6. Ki serten fason en frer i kapab “demontre lospitalite”? (Ebre 13:2, 16; vwar portre.)

⁶ Ou “demontre lospitalite” ler ou fer bann bon keksoz pour lezot, enkli pour bann ki pa ou zanmi. (1 Pyer 4:9) En liv referans i dir ki en zonm ki demontre lospitalite i demontre labonte menm anver bann dimoun ki i pa konnen e i kontan pour envit zot kot son lakour. Demann ou lekor, ‘Eski lezot i konn mwan konman en dimoun ki demontre labonte anver bann ki vin vizit mon kongregasyon?’ (Lir Ebre 13:2, 16.) En zonm ki demontre lospitalite i demontre labonte anver bann viziter, enkli bann ki pov, bann frer ki vin fer diskour dan son kongregasyon e anver bann ki travay dir pour ankouraz bann frer ek ser, parey sirveyan rezyonal.—Zen. 18:2-8; Prov. 3:27; Lik 14:13, 14; Akt 16:15; Rom. 12:13.

7. Ki mannyer en ansyen i montre ki i pa kontan larzan?

⁷ “I pa devret en dimoun . . . ki kontan larzan.” Sa i vedir ki larzan ek bann keksoz materyel pa sa keksoz pli enportan pour ou. Ki swa ou annan larzan oubyen non, ou fer ou servis pour Zeova vin sa keksoz pli enportan dan ou lavi. (Mat. 6:33) Ou servi ou  letan, lenerzi ek bann keksoz materyel ki ou annan pour ador Zeova, pour pran swen avek ou fanmir e pour ed ou bann frer ek ser dan kongregasyon. (Mat. 6:24; 1 Zan 2:15-17) Demann ou lekor: ‘Eski larzan i enportan pour mwan? Eski mon satisfe pour annan zis bann keksoz ki mon bezwen pour viv? Oubyen eski mon anvi plis larzan ek keksoz materyel?’—1 Tim. 6:6, 17-19.

8. Ki serten fason ou kapab montre ki ou “annan kontrol lo ou lekor” e ou “annan kontrol dan tou keksoz”?

⁸ Si ou “annan kontrol lo ou lekor” e ou “annan kontrol dan tou keksoz,” ou rezonnab dan tou laspe ou lavi. Par egzanp, ou pa manze oubyen bwar tro bokou, ou fason sanze ek laparans i apropriye e ou fer bann bon desizyon konsernan ou divertisman. Ou pa swiv fason viv bann dimoun ki pa servi Zeova. (Lik 21:34; Zak 4:4) Ou reste kalm menm ler lezot i esey fer ou ankoler. Ou “pa devret en soular” e ou pa devret annan en repitasyon konman en dimoun ki bwar tro bokou. Demann ou lekor, ‘Eski mon fason viv i montre ki mon annan kontrol lo mon lekor e mon annan kontrol dan tou keksoz?’

9. Ki mannyer en ansyen i kapab montre ki i “annan bon zizman” e ki son lavi i “annord”?

⁹ Si ou “annan bon zizman,” ou reflesir lo sa ki Labib i dir konsernan diferan sityasyon dan lavi. Ou’n reflesir lo bann prensip Labib e sa i fer ki ou konpran keksoz pli byen e ou fer bann bon desizyon. Ou pa fer bann desizyon san reflesir ler ou napa bokou lenformasyon. O kontrer, ou fer sir ki ou annan tou lenformasyon ki ou bezwen. (Prov. 18:13) Sa i fer ki ou fer bann bon desizyon ki annakor avek fason panse Zeova. Si ou en dimoun ki “annord,” tou keksoz dan ou lavi i annan en plas e ou aler. Lezot i konn ou konman en dimoun ki zot kapab depan lo la e ki fer keksoz dapre lenstriksyon. Sa bann kalite ki nou’n diskite anba sa soutit pou ed ou pour annan en bon repitasyon. Aprezan annou vwar bann kalite ki Labib i dir en ansyen i devret annan pour li kapab en bon legzanp konman en sef fanmir.

VIN EN BON SEF FANMIR

10. Ki mannyer en zonm i “diriz son prop lakour dan en bon fason”?

¹⁰ Si ou’n marye e ou anvi vin en ansyen, repitasyon ou fanmir pou annan en lefe lo si ou kalifye pour vin en ansyen. Alor ou bezwen “diriz [ou] prop lakour dan en bon fason.” Ou bezwen annan repitasyon konman en sef fanmir ki tret son fanmir avek lanmour e ki fer bann bon desizyon pour son fanmir. Sa i vedir ki ou fer ladorasyon fanmir, ou fer sir ki ou fanmir i asiste renyon e ou ed ou fanmir pour fer zot mye dan predikasyon. Akoz i sitan enportan pour li fer sa? Zapot Pol ti dir: “Parski si en zonm pa konnen ki mannyer pour diriz son prop lakour, ki mannyer i pou kapab pran swen avek kongregasyon Bondye?”—1 Tim. 3:5.

11-12. Akoz konportman zanfan en frer i vreman enportan si sa frer i anvi vin en ansyen? (Vwar portre.)

¹¹ Si ou annan zanfan, ou zanfan anba laz i devret “byen elve e obeisan.” Ou bezwen ansenny ou zanfan avek lanmour. Byensir parey tou zanfan, zot pou kontan riye e zwe. Me vi ki ou’n elve zot byen, zot pou obeisan, zot pou annan respe pour lezot e zot pou konport zot byen. Osi, ou bezwen fer ou mye pour ed ou zanfan devlop en bon lanmitye avek Zeova, pour viv dapre bann prensip Labib e pour fer progre spirityel ziska ki i batize.

¹² Ou “bann zanfan ki Kretyen . . . pa . . . ganny akize pour annan en lavi dezord ouswa ki rebel.” Si en zanfan ki Kretyen oubyen  ki pe fer progre pour batize i fer en pese grav e si sa zanfan pe reste kot son paran, ki lefe sa i annan lo sa papa? Si sa papa pa’n ansenny e disiplin son zanfan byen, i tre probab ki i pa pou kalifye pour servi konman en ansyen.—Vwar Latour Veyer le 15 Oktob 1996, paz 21, paragraf 6-7 an Angle.

ED BANN FRER EK SER DAN KONGREGASYON

13. Ki mannyer ou kapab montre ki ou en dimoun ki “rezonnab” e ki pa “antete”?

¹³ Bann frer ki demontre bann zoli kalite i en gran led pour kongregasyon. En zonm ki “rezonnab” i travay dir pour gard lape avek lezot e pour ed lezot annan lape antre zot. Osi, en zonm ki rezonnab i ekout lezot e i esey konpran zot pwennvi. Par egzanp, si laplipar ansyen i an faver en desizyon e sa desizyon i an armoni avek bann prensip Labib, eski ou ti pou siport sa desizyon menm si ou ti pou prefer en lot keksoz? Ou “pa devret antete” setadir ou pa ensiste ki lezot i fer keksoz dan ou fason. Ou konnen i enportan pour ekout lopinyon lezot. (Zen. 13:8, 9; Prov. 15:22) Ou pa en dimoun ki “kontan fer kankan” oubyen ki “ankoler vitman.” Sa i vedir ki ou pa mank respe pour lezot oubyen argimant avek zot. O kontrer, ou zantiy e ou demontre labonte anver zot. Konman en zonm ki kontan fer lape, ou pran linisyativ pour fer lape avek lezot menm dan bann sityasyon kot sa dimoun i ankor ankoler. (Zak 3:17, 18) Si ou koz dan en fason zantiy, sa i kapab ed lezot pour kalme en pti pe menm bann ki opoz nou.—Ziz 8:1-3; Prov. 20:3; 25:15; Mat. 5:23, 24.

14. (a) Ki sa lekspresyon “i pa devret en dimoun ki’n fek vin en Kretyen” i vedir? (b) Ki mannyer en frer i montre ki i “fidel”?

¹⁴ En frer ki ganny apwente konman en ansyen “pa devret en dimoun ki’n fek vin en Kretyen.” Menm si i pa neseser ki ou’n batize pour plizyer lannen, kantmenm sa, ou bezwen letan pour vin en Kretyen matir. Avan ki ou ganny apwente pour vin en ansyen, ou bezwen montre ki ou pe swiv legzanp Zezi setadir ou annan limilite e ou pare pour espere ziska ki Zeova  i donn ou plis responsabilite dan kongregasyon. (Mat. 20:23; Fili. 2:5-8) Ou montre ki ou en dimoun “fidel” par reste atase avek Zeova, par viv dapre son bann standar drwat e par swiv lenstriksyon sorti kot son lorganizasyon.—1 Tim. 4:15.

15. Eski en ansyen i bezwen en bon orater? Eksplike.

¹⁵ Labib i montre klerman ki en ansyen “i devret kalifye pour ansennyen.” Eski sa i vedir ki ou bezwen en bon orater? Non. Pa tou ansyen ki bann bon orater me bann ansyen i bezwen kapab servi Labib byen pour ansenny e ankouraz lezot dan predikasyon e ler zot fer vizit lankourazman. (Vwar not letid “qualified to teach” dan nwtsty-E dan 1 Timote 3:2; konpar 1 Korentyen 12:28, 29 ek Efezyen 4:11.) Menm si ou pa en bon orater, ou bezwen kontinyen fer zefor pour vin en pli bon ansenyan. Ki mannyer ou kapab fer sa?

16. Ki mannyer ou kapab vin en pli bon ansenyan? (Vwar portre.)

¹⁶ “I devret reste atase avek sa vre parol.” Pour ou kapab vin en bon ansenyan, ou bezwen fer sir ki sa ki ou ansennyen e konsey ki ou donn bann frer ek ser i toultan an armoni avek Parol Bondye. Alor ou bezwen etidye Labib ek nou bann piblikasyon. (Prov. 15:28; 16:23; vwar not letid “holding firmly to the faithful word” dan nwtsty-E dan Tit 1:9.) Anmezir ou etidye, port atansyon lo ki mannyer bann piblikasyon i eksplik bann verse pour ou kapab aplik sa bann verse dan sa bon fason. Osi ler ou pe ansennyen, fer zefor pour tous leker bann ki pe ekout ou. Ou kapab vin en pli bon ansenyan, si ou demann bann ansyen ki pli eksperyanse lo ki mannyer ou kapab amelyore e apre ou aplik sa bann sizesyon. (1 Tim. 5:17) Bann ansyen i bezwen “kapab ankouraz” bann frer ek ser me parfwa, bann ansyen i bezwen donn konsey oubyen menm “reprimann” bann frer ek ser. Dan tou le de ka, bann ansyen i devret toultan fer li avek labonte. Si ou zantiy, ou demontre lanmour e ou lansennyman i an armoni avek Parol Bondye, ou pou vin en bon ansenyan parski ou pou pe swiv legzanp Zezi ki sa Gran Ansenyan.—Mat. 11:28-30; 2 Tim. 2:24.

 KONTINYEN FER PROGRE

17. (a) Kwa ki kapab ed en serviter kongregasyon pour kontinyen fer progre? (b) Ki bann ansyen i devret gard antet ler zot pe deside si zot pou rekomann en frer pour vin en ansyen? (Vwar bwat “ Zot bezwen rezonnab ler zot pe deside si zot pou rekomann en frer.”)

¹⁷ Serten serviter kongregasyon i kapab santi ki zot pa pou zanmen kapab vin en ansyen parski i annan sitan en kantite kalite ki zot bezwen devlope. Me rapel ki Zeova ek son lorganizasyon pa ekspekte ki ou parfe. (1 Pyer 2:21) Osi lespri sen Zeova ki ed ou devlop sa bann kalite. (Fili. 2:13) Eski i annan enn sa bann kalite ki ou ti pou kontan travay lo la? Priy Zeova konsernan sa. Fer resers lo sa kalite e demann en ansyen pour donn ou sizesyon lo ki mannyer ou kapab amelyore.

18. Ki tou serviter kongregasyon i ganny ankouraze pour fer?

¹⁸ Nou tou, enkli bann ki pe servi konman ansyen, annou kontinyen devlop bann kalite ki’n ganny diskite dan sa lartik. (Fili. 3:16) Eski ou en serviter kongregasyon? Kontinyen fer progre. Demann Zeova pour form ou pour ou kapab vin pli itil pour li e pour kongregasyon. (Iza. 64:8) Ou kapab asire ki Zeova pou beni sa zefor ki ou pe fer pour kalifye pour servi konman en ansyen.