1. Ki mannyer zapot Pol ti santi konsernan bann serviter kongregasyon?

 BANN serviter kongregasyon i fer bann travay vreman enportan dan kongregasyon. I kler ki zapot Pol ti apresye sa bann zonm fidel. Par egzanp, dan sa let ki zapot Pol ti ekri pour bann Kretyen dan lavil Filip, i ti fer salanm bann ansyen e i ti osi spesifikman mansyonn bann serviter kongregasyon.—Fili. 1:1.

2. Ki mannyer en frer ki apel Luis i santi konsernan son servis konman en serviter kongregasyon?

² Ki swa zot zenn oubyen aze, en kantite frer i kontan pour ed kongregasyon konman bann serviter kongregasyon. Par egzanp, en frer ki apel Devan ti annan 18 an ler i ti ganny apwente konman serviter kongregasyon. De lot kote, en frer ki apel Luis ti ganny apwente konman serviter kongregasyon ler i ti dan son 50 an. Ki mannyer i santi konsernan son servis konman en serviter kongregasyon? I dir: “Mon vreman kontan pour ed mon bann frer ek ser dan kongregasyon dan sa fason. Zot in demontre en gran lanmour anver mwan e aprezan mon kapab demontre mon lanmour anver zot.” En kantite serviter kongregasyon i santi koumsa.

3. Ki kestyon nou pou reponn?

³ Si ou en frer e ou pa en serviter kongregasyon, eski ou kapab fer sa vin ou lobzektif? Kwa ki pou motiv ou pour fer sa? Ki serten kalite ki ou bezwen annan pour ou kalifye pour vin en serviter kongregasyon? Dan sa lartik, nou pou vwar larepons sa bann kestyon. Me premyerman, annou  vwar ki mannyer en serviter kongregasyon i ed kongregasyon.

KI MANNYER EN SERVITER KONGREGASYON I ED KONGREGASYON?

4. Ki mannyer en serviter kongregasyon i ed kongregasyon? (Vwar portre.)

⁴ En serviter kongregasyon i en frer ki’n batize ki’n ganny apwente par lespri sen pour ed bann ansyen desarz serten responsabilite enportan dan kongregasyon. Serten serviter kongregasyon i fer sir ki bann proklanmater i annan ase teritwar ek ase piblikasyon pour fer predikasyon. Lezot i ede pour netway e mentenir Lasal Rwayonm. Bann serviter kongregasyon i osi servi konman bann manm servis lakey e pandan renyon kongregasyon, zot okip sistenm sonorizasyon e zwe bann video. Bann travay ki bann serviter kongregasyon i fer i ed kongregasyon dan bann fason pratik. Me pli enportan, bann serviter kongregasyon i bann zonm spirityel ki kontan Zeova e ki viv dapre son bann standar. Zot osi kontan zot bann frer ek ser en kantite. (Mat. 22:37-39) Ki mannyer en frer ki’n batize i kapab fer zefor pour kalifye pour vin en serviter kongregasyon?

5. Ki en frer i kapab fer pour kalifye pour vin en serviter kongregasyon?

⁵ Labib i koz lo bann kalite ki en frer i bezwen annan pour li kapab kalifye pour vin en serviter kongregasyon. (1 Tim. 3:8-10, 12, 13) Si ou anvi ed kongregasyon konman en serviter kongregasyon, ou kapab etidye sa bann kalite e apre fer zefor pour devlop zot. Me avan sa, ou bezwen reflesir lo akoz ou anvi vin en serviter kongregasyon.

KWA KI MOTIV OU POUR VIN EN SERVITER KONGREGASYON?

6. Kwa ki devret motiv ou pour ed bann frer ek ser? (Matye 20:28; vwar kouvertir.)

⁶ Zezi in kit sa pli bon legzanp pour nou. Tou sa ki i ti fer ti akoz i kontan son Papa e i kontan dimoun. Sa lanmour ti motiv li pour travay dir e i ti menm fer bann keksoz ki serten ti krwar i bann travay ki pa enportan. (Lir Matye 20:28; Zan 13:5, 14, 15) Si lanmour ki pe motiv ou pour kalifye pour vin en serviter kongregasyon, Zeova pou beni ou e i pou ed ou atenn ou lobzektif.—1 Kor. 16:14; 1 Pyer 5:5.

7. Akoz i mal pour en frer anvi vin en serviter kongregasyon pour bann rezon egois?

 ⁷ Dimoun dan sa lemonn i souvan admir bann ki fer zot lekor paret enportan. Me i pa koumsa dan lorganizasyon Zeova. En frer ki ganny motive par lanmour parey Zezi, pa anvi vin en serviter kongregasyon akoz i anvi domin lo lezot oubyen akoz i anvi ki lezot i konsider li konman en dimoun enportan. Si en frer ki ganny apwente dan kongregasyon i en dimoun ki anvi lezot i vwar li konman en dimoun enportan, i tre probab ki sa frer pa pou anvi fer bann travay ki pa paret enportan me ki bezwen ganny fer pour pran swen avek mouton Zeova. I kapab krwar ki i tro enportan pour fer serten sa bann travay. (Zan 10:12) Zeova pa pou beni zefor en dimoun ki fer keksoz akoz i orgeye oubyen ki fer keksoz pour bann rezon egois.—1 Kor. 10:24, 33; 13:4, 5.

8. Ki konsey Zezi ti donn son bann zapot?

⁸ Menm serten ki ti bon zanmi avek Zezi ti anvi ganny plis responsabilite. Me zot ti napa en bon motivasyon. Annou vwar sa ki zapot Zak ek Zan ti fer. Zot ti demann Zezi pour donn zot en plas enportan dan son Rwayonm. Zezi pa ti felisit zot pour sa ki zot ti demande. O kontrer, i ti dir sa 12 zapot: “Sa ki anvi vin enportan parmi zot i devret vin zot serviter e sa ki anvi vin premye parmi zot i devret lesklav tou lezot.” (Mark 10:35-37, 43, 44) Bann frer ki annan sa bon motivasyon setadir ki anvi ed lezot pou vin en benediksyon pour kongregasyon.—1 Tesa. 2:8.

KWA KI KAPAB ED OU POUR ANVI FER PLIS DAN KONGREGASYON?

9. Kwa ki kapab ed ou pour anvi fer plis dan kongregasyon?

⁹ San dout ou kontan Zeova e ou anvi ed lezot. Me i kapab ki ou pa anvi fer sa travay an plis ki en serviter kongregasyon i fer. Kwa ki kapab ed ou pour anvi fer plis pour bann frer ek ser? Mazin sa lazwa ki ou pou gannyen ler ou pe ed ou bann frer ek ser. Zezi ti dir: “I annan plis lazwa pour donnen ki pour resevwar.” (Akt 20:35) Zezi ti fer sa ki i ti’n dir. I ti vreman kontan ler i ti ed lezot e ou osi ou kapab santi koumsa.

10. Ki mannyer Zezi ti montre ki i ti kontan pour ed lezot? (Mark 6:31-34)

¹⁰ Annou vwar ki mannyer Zezi ti montre ki i ti kontan pour ed lezot. (Lir Mark 6:31-34.) En fwa, Zezi ek son bann zapot ti fatige. Zot ti pe al en landrwa trankil pour zot repoze. Me en lafoul dimoun ti ariv laba avan zot parski zot ti anvi ki Zezi i ansenny zot. Zezi ti’n kapab dir zot non. Apre tou, Zezi ek son bann zapot ti “napa letan ni menm pour manze.” Oubyen Zezi ti’n kapab ansenny zot enn oubyen de laverite e apre fer zot ale. Me vi ki i ti kontan Zeova e i ti kontan lezot, i ti “konmans ansenny zot en kantite keksoz.” I ti kontinyen ansenny zot ziska “tar apremidi.” (Mark 6:35) I ti fer sa, pa akoz i ti oblize fer li me akoz ler i ti vwar zot, “son leker ti fermal.” I ti anvi ansenny zot parski i ti kontan zot. Ler Zezi ti ed lezot, sa ti fer li vreman zwaye.

11. Ki mannyer Zezi ti ed bann ki ti ekout li dan en fason pratik? (Vwar portre.)

¹¹ Zezi ti ed dimoun par ansenny zot konsernan Bondye. I ti osi ed zot dan bann lezot fason pratik. I ti fer mirak pour donn zot manze. Apre sa, i ti demann son bann disip pour partaz sa manze avek sa bann dimoun. (Mark 6:41) Par fer sa, i ti ansenny son bann disip en fason pour servi lezot. I ti osi montre zot ki bann pti keksoz pratik ki zot fer pour lezot ki menm parey avek sa ki bann serviter kongregasyon i fer, i enportan. Imazin sa lazwa ki bann zapot ti annan pour travay ansanm avek Zezi  pour partaz manze avek bann dimoun ziska ki “zot tou zot ti manze vant plen.” (Mark 6:42) Byensir, sa pa ti sa sel fwa ki Zezi ti met lentere lezot avan sa ki pour li. I ti fer sa tou dilon son lavi lo later. (Mat. 4:23; 8:16) Zezi ti vreman kontan pour ed lezot e pour donn zot sa ki zot ti bezwen. San dout, ou osi ou pou zwaye si ou pare pour ed bann frer ek ser konman en serviter kongregasyon.

12. Akoz nou pa devret krwar ki nou napa okenn abilite ki nou kapab servi pour ede dan kongregasyon?

¹² Si ou santi ki ou napa okenn abilite spesyal, pa bezwen dekouraze. San dout, ou annan bann kalite ki ou kapab servi pour ed lezot dan kongregasyon. Reflesir lo sa ki Pol i dir dan 1 Korentyen 12:12-30 e apre demann Zeova pour ed ou vwar ki mannyer sa ki ou’n lir i aplik pour ou. Sa ki Pol ti dir i montre klerman ki tou serviter Zeova, enkli ou, nou annan en plas enportan dan kongregasyon e nou presye pour kongregasyon. Si pour le moman, ou pa kalifye pour servi konman serviter kongregasyon, pa bezwen dekouraze. O kontrer, akoz ou pa fer tou sa ki ou kapab pour servi Zeova e ed ou bann frer ek ser? Ou kapab asire ki ler bann ansyen pou donn ou en keksoz pour fer, zot pou pran kont bann abilite ki ou annan.—Rom. 12:4-8.

13. Ki nou kapab dir konsernan bann kalite ki en frer i bezwen annan pour fer plis dan kongregasyon?

¹³ Annou vwar en lot rezon akoz ou devret fer zefor pour kalifye pour vin en serviter kongregasyon. Laplipar kalite ki Labib i dir ki bann serviter kongregasyon i devret annan, i bann kalite ki tou Kretyen i devret annan. Tou Kretyen i devret vin pros avek Zeova, kontan pour donnen e viv dan en fason ki fer Bondye plezir. Alor i tre probab ki ou deza annan laplipar bann kalite ki neseser pour ou vin serviter kongregasyon. Me ki en frer i bezwen fer pour kalifye pour vin en serviter kongregasyon?

KI OU KAPAB FER POUR KALIFYE POUR VIN SERVITER KONGREGASYON?

14. Ki sa mo “serye” dan 1 Timote 3:8-10, 12 i vedir?

¹⁴ Aprezan, annou vwar serten bann kalite ki 1 Timote 3:8-10, 12 i koz lo la. (Lir.) En serviter kongregasyon i bezwen “serye.” Sa mo i osi kapab ganny tradwir konman “respektab” ouswa “onorab.” Sa pa vedir ki ou pa zanmen riye oubyen pas bann  bon moman. (Ekle. 3:1, 4) Me ou devret pran tou ou bann responsabilite o serye. Si ou annan en repitasyon konman en dimoun ki lezot i kapab depan lo la, bann frer ek ser dan kongregasyon pou annan respe pour ou.

15. Ki sa lekspresyon “pa devret ipokrit” e ‘pa fer profi dan en fason malonnet e voras’ i vedir?

¹⁵ En serviter kongregasyon “pa devret ipokrit,” sa i vedir ki i en dimoun ki senser, onnet e diny konfyans. I fer sa ki i dir e i pa esey anbet lezot. (Prov. 3:32) En dimoun ki ‘pa fer profi dan en fason malonnet e voras’ i en dimoun ki onnet ler i fer biznes avek lezot e dan lafason ki i zer larzan. I pa pou profit sa lanmitye ki i annan avek bann frer ek ser dan kongregasyon pour li fer larzan.

16. (a) Ki sa lekspresyon “pa devret bwar bokou diven” i vedir? (b) Ki i vedir pour annan “en konsyans kler”?

¹⁶ En serviter kongregasyon “pa devret bwar bokou diven,” sa i vedir ki i en dimoun ki pa bwar bokou lalkol oubyen ki napa repitasyon konman en soular. I annan “en konsyans kler” ki vedir ki i pe viv dapre bann standar Zeova. Menm si i enparfe, i annan en bon lanmitye avek Zeova e sa i fer li annan lape lespri.

17. Ler en frer pe “ganny teste avan pour konnen si [i] kalifye,” ki mannyer i montre ki i diny konfyans? (1 Timote 3:10; vwar portre.)

¹⁷ En dimoun ki’n “ganny teste avan pour konnen si [i] kalifye” i en dimoun ki’n montre ki ou kapab depan lo li pour desarz en responsabilite. Alor ler bann ansyen i donn ou en travay pour fer, swiv byen zot bann lenstriksyon ek bann lenstriksyon ki lorganizasyon i donnen. Fer sir ki ou konpran egzakteman sa ki ou bezwen fer e kan ki ou bezwen fini sa travay. Ler ou fer byen sa travay ki ou’n ganny donnen pour fer, bann frer ek ser pou vwar e apresye bann bon progre ki ou pe fer. Bann ansyen, fer sir ki ou form bann frer ki’n batize. (Lir 1 Timote 3:10.) Eski dan ou kongregasyon i annan bann frer ki adolesan oubyen pli zenn? Eski zot annan labitid pour fer zot letid personnel e prepar byen zot bann renyon? Eski zot regilyerman reponn pandan renyon e partisip dan predikasyon? Si wi, donn zot bann responsabilite dapre zot laz ek sirkonstans? Dan sa fason, sa bann zenn frer pour kapab “ganny teste avan pour konnen si zot kalifye.” Koumsa, ler zot ariv dan bann 16 an a 20 an, i kapab ki zot pou’n kalifye pour vin bann serviter kongregasyon.

18. Ki i vedir ler ou en dimoun ki “napa okenn lakizasyon kont [ou]”?

 ¹⁸ Ler en dimoun “napa okenn lakizasyon kont [li],” sa i vedir ki personn pa kapab akiz li konmkwa in fer en keksoz mal. Byensir dimoun i kapab fer bann fo lakizasyon kont en Kretyen. Dimoun ti fer bann fo lakizasyon kont Zezi e Zezi ti dir ki en kantite dimoun ti pou fer bann fo lakizasyon kot son bann disip. (Zan 15:20) Me si ou fer bann keksoz ki byen parey Zezi ti fer, ou pou annan en bon repitasyon dan kongregasyon.—Mat. 11:19.

19. Ki i vedir ler Labib i dir ki en frer ki’n marye “i devret annan en sel madanm”?

¹⁹ “I devret annan en sel madanm.” Si ou’n marye, ou bezwen viv dapre standar Zeova konsernan maryaz setadir en msye i marye avek en madanm. (Mat. 19:3-9) En frer ki’n marye pa devret zanmen komet imoralite seksyel. (Ebr. 13:4) Sa i osi vedir ki i devret toultan fidel avek son madanm. Alor i pa pou zanmen donn en latansyon ki pa apropriye lezot madanm.—Zob 31:1.

20. Ki mannyer en zonm i kapab “diriz byen [son] zanfan ek [son] fanmir”?

²⁰ I “devret diriz byen [son] zanfan ek [son] fanmir.” Si ou en sef fanmir, ou devret pran ou responsabilite o serye. Fer ladorasyon fanmir regilyerman. Otan ki posib fer predikasyon avek sak manm ou fanmir regilyerman. Ed ou zanfan pour devlop son prop lanmitye avek Zeova. (Efe. 6:4) En zonm ki pran swen avek son fanmir i montre ki i kapab pran swen avek kongregasyon.—Konpar 1 Timote 3:5.

21. Si ou pa en serviter kongregasyon, ki ou kapab fer?

²¹ Frer, si ou pa pe servi konman en serviter kongregasyon, silvouple, etidye sa lartik e priy Zeova lo sa size. Etidye bann kalite ki en serviter kongregasyon i bezwen annan e fer zefor pour devlop sa bann kalite. Medit lo sa lanmour ki ou annan pour Zeova ek ou bann frer ek ser. Fer zefor pour devlop plis lanmour pour ou bann frer ek ser e reflesir lo akoz ou anvi ed zot. (1 Pyer 4:8, 10) Ler ou fer zefor pour ed ou bann frer ek ser dan kongregasyon, sa pou fer ou vreman zwaye. Zeova pou beni bann zefor ki ou fer pour kalifye pour vin en serviter kongregasyon.—Fili. 2:13.