LARTIK LETID 44
KANTIK 33 Larg ou fardo lo Zeova
Ki mannyer nou kapab fer fas avek lenzistis?
“Pa les lemal domin zot, me kontinyen domin lemal avek sa ki byen.”—ROM. 12:21.
TOPIK
Nou pou vwar ki nou kapab fer ler nou fer fas avek lenzistis e ki mannyer nou kapab reazir dan en fason ki pa pou fer keksoz vin pli grav.
1-2. Lekel ki kapab tret nou dan en fason enzis? Eksplike.
ZEZI ti donn en legzanp konsernan en vev ki ti kontinyen demann en ziz pour fer li ganny lazistis. San dout, bann disip Zezi ti konpran lafason ki sa madanm dan sa legzanp ti santi parski en kantite dimoun sa letan pa ti ganny trete byen. (Lik 18:1-5) Nou osi nou kapab konpran lafason ki sa madanm ti santi parski nou tou nou’n fer fas avek lenzistis a en moman dan nou lavi.
2 En kantite dimoun dan lemonn ozordi i annan bann prezidis, zot pa demontre labonte e zot egois. (Ekle. 5:8) Alor, nou pa sirprann ki nou pa ganny trete byen. Petet nou pa ekspekte ki en frer oubyen en ser i tret nou dan en move fason me sa i kapab arive. Byensir nou bann frer ek ser pa parey bann ki persekit nou oubyen opoz nou. Zot pa anvi tret nou dan en move fason. Me zot enparfe. Nou kapab aprann en kantite avek lafason ki Zezi ti reazir ler bann dimoun ki ti opoz li pa ti tret li byen. Si nou kapab demontre pasyans anver bann dimoun ki pa tret nou byen, i pli enportan ankor pour nou demontre pasyans anver nou bann frer ek ser. Ki mannyer Zeova i santi ler nou pa ganny trete byen ki swa par bann dimoun an deor kongregasyon oubyen par nou bann frer ek ser dan kongregasyon? Eski Zeova i enterese avek sa ki arive avek nou?
3. Eski Zeova i enterese avek lafason ki son bann serviter i santi ler zot pa ganny trete byen e akoz?
3 Zeova i anvi ki lezot i tret nou byen e i vwar ler lezot pa tret nou byen. “Zeova i kontan lazistis.” (Ps. 37:28) Zezi i asir nou ki dek ki sa moman apropriye i arive, Zeova pou “rann lazistis.” (Lik 18:7, 8) Byento, i pou retir tou sa ki fer nou soufer e i pa pou les nou soufer akoz lenzistis ankor.—Ps. 72:1, 2.
4. Ki mannyer Zeova i ed nou ozordi?
4 Nou bezwen esper sa letan kot Zeova pou rezourd tou problenm. Me depi la konmela, Zeova i ed nou ler lezot pa tret nou byen. (2 Pyer 3:13) Par egzanp, i ansenny nou ki mannyer pour reazir ler nou ganny trete dan en fason enzis pour nou evite ganny plis problenm. En fason ki Zeova i fer sa i par montre nou dan Labib lafason ki son Garson ti reazir ler i ti ganny trete dan en fason enzis. I osi donn nou bann konsey ki nou kapab aplike ler nou pa ganny trete byen.
VEY BYEN LAFASON KI OU REAZIR LER OU GANNY TRETE DAN EN FASON ENZIS
5. Akoz nou bezwen vey byen lafason ki nou reazir ler nou ganny trete dan en fason enzis?
5 Ler nou ganny trete dan en fason enzis, sa i kapab fer nou santi nou sagren e dekouraze. (Ekle. 7:7) Bann serviter fidel Zeova parey Zob ek Abakouk ti santi koumsa. (Zob 6:2, 3; Aba. 1:1-3) Menm si i normal pour nou annan sa bann santiman, nou bezwen fer atansyon ki mannyer nou reazir pour ki nou pa fer en keksoz mal.
6. Ki nou aprann avek legzanp Absalonm? (Vwar portre.)
6 Ler en dimoun pa tret nou byen oubyen pa tret en dimoun ki nou kontan byen, i kapab ki nou anvi revanze. Me si nou reazir dan sa fason, i kapab fer plis problenm. Annou vwar legzanp Absalonm, garson Lerwa David. I ti ankoler ler son demi frer Amnonn ti vyol son ser Tamar. Dapre Lalwa Moiz, Amnonn ti devret ganny touye pour sa ki in fer. (Lev. 20:17) Nou kapab konpran akoz Absalonm ti ankoler me kantmenm sa i ti napa drwa touy Amnonn.—2 Sam. 13:20-23, 28, 29.
Absalonm pa ti kontrol son lakoler ler son ser Tamar ti ganny vyole (Vwar paragraf 6)
7. O konmansman ki mannyer en psalmis ti santi ler i ti vwar lenzistis?
7 Ler bann dimoun ki tret lezot dan en fason enzis pa ganny pini, nou kapab konmans mazinen si i vo lapenn pour fer sa ki byen. Annou vwar leksperyans en psalmis ki ti vwar bann move dimoun pe tret bann bon dimoun dan en move fason. Me sa bann move dimoun ti paret ere. Sa psalmis ti dir: “Tou keksoz i fasil pour sa bann move dimoun.” (Ps. 73:12) I ti sitan dekouraze ler i ti vwar bann lenzistis ki ti pe arive, ki i ti konmans krwar ki i pa vo lapenn pour servi Zeova. I ti dir: “Ler mon ti esey konpran sa, sa ti fatig mwan.” (Ps. 73:14, 16) I ti osi dir: “Me mwan, mon lipye ti pros pour kit sa bon semen, mon lipye ti pros pour glise.” (Ps. 73:2) En keksoz en pe parey ti arive avek en frer ki apel Alberto. a
8. Ki ti arive ler en frer pa ti ganny trete byen?
8 Serten frer ti akiz Alberto konmkwa i ti’n vol larzan kongregasyon. Sa ti fer ki i ti perdi son bann privilez e en kantite dimoun dan kongregasyon ti nepli annan respe pour li. I dir: “Mon ti ankoler e dezapwente.” Alberto ti les son santiman elwanny li avek Zeova e i ti menm vin inaktif pour senk an. Sa leksperyans i montre sa ki kapab arive si nou reste ankoler ler nou pa ganny trete byen.
SWIV LAFASON KI ZEZI TI FER FAS AVEK LENZISTIS
9. Ki lenzistis Zezi ti fer fas avek? (Vwar portre.)
9 Zezi in kit en legzanp parfe lo ki mannyer pour sirmont lenzistis. En kantite dimoun ti tret li dan en fason enzis, enkli son fanmir. Son fanmir ti dir ki i ti’n perdi latet, bann sef larelizyon ti akiz li konmkwa i ti pe travay avek bann demon, bann solda Romen ti boufonn li, fer li martir e touy li. (Mark 3:21, 22; 14:55; 15:16-20, 35-37) Me Zezi ti andir tousala san fer nanryen. Ki nou kapab aprann avek son legzanp?
Zezi in kit en legzanp parfe lo ki mannyer pour reazir ler lezot pa tret nou byen (Vwar paragraf 9-10)
10. Ki Zezi ti fer ler i ti ganny trete dan en fason enzis? (1 Pyer 2:21-23)
10 Lir 1 Pyer 2:21-23. b Zezi in kit en legzanp parfe lo ki nou pou fer ler nou fer fas avek lenzistis. I ti konnen kan ki i pou reste trankil e kan ki i pou koze. (Mat. 26:62-64) I pa ti santi ki i bezwen donn en larepons pour tou bann mansonz ki dimoun ti dir lo li. (Mat. 11:19) Ler i ti koze, i pa ti ensilte oubyen menas bann ki ti persekit li. I ti annan kontrol lo son lekor parski “i ti les tou dan lanmen sa Enn ki ziz avek lazistis.” Zezi ti konnen ki sa ki pli enportan, i lafason ki Zeova ti pe vwar sa ki ti pe arive avek li. I ti asire ki dan sa bon moman, Zeova ti pou tir tou lenzistis.
11. Ler nou fer fas avek lenzistis, ki mannyer nou kapab kontrol sa ki nou dir? (Vwar portre.)
11 Nou kapab swiv legzanp Zezi par kontrol sa ki nou dir ler nou ganny trete dan en fason enzis. Parfwa sa problenm ki nou pas ladan pa sitan grav alor i pa neseser pour dir oubyen fer okenn keksoz. Oubyen nou kapab swazir pour pa dir nanryen parski si nou dir en keksoz, sa i kapab fer sityasyon vin pli grav. (Ekle. 3:7; Zak 1:19, 20) Me i annan moman ki nou bezwen koze pour defann en dimoun ki pa pe ganny trete byen ouswa pour defann nou krwayans. (Akt 6:1, 2) Si nou koze, nou devret fer nou mye pour fer li dan en fason kalm e avek respe.—1 Pyer 3:15. c
Ler nou ganny trete dan en fason enzis, nou kapab swiv legzanp Zezi par swazir byen kan e ki mannyer pour koze (Vwar paragraf 11-12)
12. Ki mannyer nou kapab les tou dan lanmen “sa Enn ki ziz avek lazistis”?
12 Nou osi nou kapab swiv legzanp Zezi par les tou dan lanmen “sa Enn ki ziz avek lazistis.” Ler lezot pa tret nou byen, nou asire ki Zeova i konnen ki’n arive. Vi ki nou konnen ki Zeova pou aranz tou keksoz dan sa moman apropriye, sa i ed nou pour andire ler nou pa ganny trete byen. Ler nou les tou keksoz dan lanmen Zeova, nou pa pou reste ankoler oubyen gard rankin. Sa bann santiman koumsa i kapab fer nou fer en keksoz mal, fer nou perdi nou lazwa e gat nou lanmitye avek Zeova.—Ps. 37:8.
13. Kwa ki kapab ed nou pour kontinyen andire ler nou ganny trete dan en fason enzis?
13 Nou pa pou zanmen kapab swiv legzanp Zezi dan en fason parfe. I kapab arive ki nou fer oubyen dir bann keksoz ki pli tar nou regrete. (Zak 3:2) Parfwa lafason ki lezot i tret nou, i kapab fer nou soufer pour larestan nou lavi dan sa lemonn. Si ou dan sa sityasyon, ou kapab asire ki Zeova i konn sa ki ou pe pas ladan. Zezi i konpran lafason ki ou pe santi parski li osi i ti ganny trete dan en fason enzis. (Ebr. 4:15, 16) Zeova in donn nou legzanp Zezi e in osi donn nou konsey dan son Parol ki ed nou ler nou pa ganny trete byen. Annou vwar de verse dan liv Romen ki kapab ed nou.
“LES BONDYE DEMONTRE SON LAKOLER”
14. Ki i vedir pour “les Bondye demontre son lakoler”? (Romen 12:19)
14 Lir Romen 12:19. Zapot Pol ti ankouraz bann Kretyen pour “les Bondye demontre son lakoler.” Nou “les Bondye demontre son lakoler” par les li deside kan e ki mannyer i pou anmenn lazistis. Apre ki en frer ki apel John ti’n ganny trete dan en fason enzis, i ti dir: “Mon ti anvi anmenn lazistis dan mon prop fason e mon ti bezwen lager avek sa santiman. Romen 12:19 ti ed mwan pour esper Zeova.”
15. Akoz i pli byen pour esper Zeova pour rezourd en problenm?
15 Nou ganny bann byenfe ler nou esper Zeova pour rezourd en problenm. Ler nou fer sa, nou pou evit bann presyon ek dezapwentman ki nou gannyen ler nou esey rezourd en problenm lo nou menm. Zeova i pare pour ed nou. I konmsi Zeova pe dir: ‘Les sa lenzistis dan mon lanmen, mwan ki pou aranz sa sityasyon.’ Si nou krwar dan promes ki Zeova in fer pour ziz bann ki pa tret lezot byen, nou pa bezwen kontinyen reste ankoler parski nou konnen ki Zeova pou fer sa ki byen. Sanmenm ki ti ed John, ki’n ganny mansyonnen pli boner. John ti dir: “Si mon esper Zeova pour rezourd mon problenm, Zeova pou fer li bokou pli byen ki si mon esey rezourd mon problenm lo mwan menm.”
“KONTINYEN DOMIN LEMAL AVEK SA KI BYEN”
16-17. Ki mannyer lapriyer i kapab ed nou pour “kontinyen domin lemal avek sa ki byen”? (Romen 12:21)
16 Lir Romen 12:21. Pol ti ankouraz bann Kretyen pour “kontinyen domin lemal avek sa ki byen.” Dan Sermon lo Montanny, Zezi ti dir: “Kontinyen kontan zot lennmi e priy pour sa bann ki persekit zot.” (Mat. 5:44) Sanmenm sa ki Zezi ti fer. Nou kapab imazin sa soufrans ki Zezi ti eksperyanse ler bann solda Romen ti klout li lo poto. I ti ganny trete dan en fason kriyel e i ti annan en kantite douler. Nou pa vreman kapab konpran sa douler ki Zezi ti ladan.
17 Zezi pa ti les sa bann lenzistis ki i ti pe eksperyanse fer li fer en keksoz mal. Olye demann Zeova pour pini sa bann solda, i ti priye: “Papa, pardonn zot, parski zot pa konnen ki zot pe fer.” (Lik 23:34) Ler nou priy pour bann ki pa tret nou byen, sa pou ed nou pour reste kalm e pour pa tro ankoler. I kapab menm ed nou pour sanz lafason ki nou santi anver bann ki pa’n tret nou byen.
18. Ki mannyer lapriyer ti ed Alberto ek John pour andire ler zot ti ganny trete dan en fason enzis?
18 Lapriyer ti ed sa de frer ki’n ganny mansyonnen pli boner, pour andire ler zot ti fer fas avek lenzistis. Alberto i dir: “Mon ti priy pour sa bann frer ki ti tret mwan dan en fason enzis. Plizyer fwa mon ti demann Zeova pour ed mwan pour aret ankoler konsernan sa ki ti’n arive avek mwan.” Erezman, Alberto in rekonmans servi Zeova fidelman. John i dir: “Plizyer fwa, mon’n priy pour sa frer ki ti bles mon santiman. Mon ti demann Zeova pour ed mwan pour pardonn li. Zeova ti ed mwan pour aret ankoler avek li e pour aret ziz li. Sa bann lapriyer ti osi donn mwan lape lespri.”
19. Ki nou devret fer tan ki nou ankor dan sa move lemonn? (1 Pyer 3:8, 9)
19 Tan ki nou ankor pe viv dan sa move lemonn, nou pou fer fas avek lenzistis. Nenport kwa ki arive, annou pa zanmen aret demann Zeova pour ed nou. Nou osi bezwen swiv lafason ki Zezi ti reazir ler lezot pa ti tret li byen. Nou bezwen aplik bann konsey ki dan Parol Bondye. Si nou fer sa, nou kapab asire ki Zeova pou beni nou.—Lir 1 Pyer 3:8, 9.
KANTIK 38 I pou fer ou for
a Serten non in sanze.
b Dan 1 Pyer sapit 2 ek 3, zapot Pyer i koz lo plizyer sityasyon kot bann Kretyen dan premye syek ti ganny trete dan en fason enzis par zot met oubyen par zot msye ki pa ti en Kretyen.—1 Pyer 2:18-20; 3:1-6, 8, 9.
c Vwar sa video Ki mannyer lanmour i promot vre lape? lo jw.org.
