Paul: Nou ti vreman eksite! I ti Novanm 1985 e nou ti pe al Liberya ki dan Was Lafrik pour konmans nou premye travay misyonner. Nou avyon ti aret Senegal. Anne ti dir: “Dan zis enn erdtan, nou pou Liberya!” Apre nou ti tann en lanons: “Bann pasaze ki pe al Liberya i bezwen debarke. I annan en koudeta laba e nou pa pou kapab apoze.” Pour sa prosen dis zour, nou ti reste avek bann misyonner Senegal. Nou ti ekout nouvel konsernan Liberya e nou ti tande ki i ti annan bann gro kanmiyon ranpli avek dimoun mor e gouvernman pa ti pe permet dimoun kit zot lakour dan aswar si non zot ti pou ganny fiziye amor.

Anne: Nou ti bann dimoun ki ti vreman pridan. Anfet, mon ti en zanfan ki ti vreman pridan e dimoun ti donn mwan en pti non parski mon ti toultan per. Mon menm per pour koup semen! Me nou ti anvi al Liberya menm si i ti en landrwa danzere.

Paul: Nou de Anne, nou ti grandi dan was Langleter, zis wit kilomet avek kanmarad. Mon paran ti ankouraz mwan pour fer pionye e manman Anne ti ankouraz Anne pour fer pionye li osi. Alor nou tou le de, nou ti konmans fer pionye zis apre ki nou ti’n fini lekol segonder. Zot ti vreman kontan ki nou ti anvi fer servis a plen tan tou nou lavi. Ler mon ti annan 19 an, mon ti annan sa privilez pour al servi dan Betel e apre nou maryaz an 1982, Anne ti vin servi ansanm avek mwan dan Betel.

Anne: Nou ti kontan Betel me nou ti toultan anvi al servi kot i annan bezwen pour plis proklanmater. Dan Betel, nou ti travay avek bann frer ek ser ki ti bann misyonner avan e zot bon legzanp ek leksperyans ti fer nou anvi vin bann misyonner nou osi. Pour trwa-z-an, nou ti priy spesifikman lo sa size tou le swar e an 1985, nou ti vreman kontan ler nou ti ganny envite pour asiste 79 vyenm laklas Lekol Gilead. Apre sa, nou ti ganny demande pour al Liberya, Was Lafrik.

Paul: Nou ti al lo sa premye avyon ki ti ganny permisyon pour al Liberya. Bann dimoun ti vreman per e menm si letan ti’n pase, gouvernman pa ti pe permet dimoun kit zot lakour dan aswar. Dimoun ti sitan per ki ler en loto ti fer tapaz en sel kou, zot ti kriye  e taye. Pour ed nou reste kalm, nou ti lir Psonm tou le swar. Me nou ti vreman kontan nou servis. Anne ti servi konman en misyonner e mwan mon ti travay dan Betel, ansanm avek John Charuk. a Mon ti aprann en kantite avek li parski i ti’n reste Liberya pour bokou letan e i ti konn byen sirkonstans ek problenm bann frer ek ser.

Anne: Akoz nou pa ti tarde pour kontan nou servis Liberya? Sa i akoz nou bann frer ek ser ti demontre en kantite lanmour anver nou e zot ti fidel. Nou ti vin bann bon zanmi e zot ti vin parey en fanmir pour nou. Zot ti donn nou bann bon konsey e zot ti ankouraz nou. I ti gou pour fer predikasyon dan sa landrwa. Bann met lakour pa ti kontan ler nou ti pas zis en ptigin letan avek zot! Dimoun ti pare pour koz lo bann keksoz spirityel dan tou kwen semen. I ti fasil pour antre dan zot konversasyon. Nou ti sitan annan bokou letid Labib ki i ti difisil pour fer letid avek zot tou. I ti gou pour pres dan sa teritwar!

Paul: Pour kat-r-an keksoz ti ase anpe dan sa pei. Me an 1989, tou keksoz ti sanze. En lager sivil ti konmanse. Le 2 Zilyet 1990, bann rebel ti pran sa teritwar otour Betel. Pour trwa mwan, nou ti napa okenn kontak avek dimoun an deor Betel, enkli nou fanmir ek biro prensipal Temwen Zeova. I ti annan dezord, mankman manze ek vyol. Sa bann problenm ti kontinyen pour 14 an dan pei antye.

Anne: Bann dimoun ki sorti dan serten tribi ti pe lager e touy bann dimoun ki sorti dan lezot tribi. I ti annan bann gerye partou. Zot ti annan bann zarm, zot ti’n abiy dan en fason drol e zot ti pe antre dan tou lakaz pour pran sa ki zot ti anvi. Pour serten zot, touy bann dimoun ti parey ler zot touy poul. Bann gerye ti blok semen pour kontrol dimoun ki ti pe pase lo semen e souvandfwa, zot ti touy dimoun ki ti oule pase. Apre sa, zot ti met bann lekor mor lo kanmarad. Sa ti menm arive pa tro lwen avek Betel. Bann Temwen fidel ti ganny touye, enkli de misyonner.

Bann frer ek ser ti riske zot lavi pour kasyet bann frer ek ser ki ti sorti dan sa bann tribi ki ti pe ganny touye. Bann misyonner ek Betelit osi ti fer parey. Serten Temwen ki ti bezwen kit zot lakour ti dormi anba dan Betel e lezot ti reste avek nou dan nou lasanm ki ti anler. Nou ti partaz nou lasanm avek en fanmir set dimoun.

Paul: Tou le zour, bann gerye ti esey antre dan Betel pour gete si nou ti pe kasyet dimoun. Sak fwa sa ti arive, de Betelit ti al kot baro deor e de ti obzerv sa ki ti pe arive par lafnet. Si sa de kot baro deor ti kit zot lanmen devan zot, sa ti montre sa de  par lafnet ki tou keksoz ti oke. Me si zot ti met zot lanmen deryer zot, sa ti vedir ki bann gerye ti agresif, alor bann ki ti kot lafnet ti taye pour al kasyet nou bann zanmi.

Anne: Apre plizyer semenn, en group gerye byen ankoler ti antre anndan pardfors. Mon ti tak mon lekor dan en lasanmben ansanm avek en ser. Laba, i ti annan en bife ki ti annan en pti landrwa kasyet ladan. Sa ser ti antre dan sa pti landrwa pour kasyet. Bann gerye ti vin anler avek zot fizi. Avek lakoler, zot ti bis laport. Paul ti esey fer zot pa antre dan sa lasanmben e i ti dir: “Mon madanm i dan lasanmben.” Ler mon ti ferm sa landrwa kot sa ser ti ete, sa ti fer tapaz. Apre mon ti bezwen remet tou keksoz dan sa bife e sa ti pran letan. Mon ti asire ki bann gerye ti pou krwar ki mon ti pe fer en keksoz mal. Mon ti konmans tranble depi latet ziska lipye. Mon ti konnen ki mon ti bezwen aret tranble avan mon ouver laport. Alor, mon ti fer en pti lapriyer trankil e sipliy Zeova pour ed mwan. Apre mon ti ouver laport e mon ti dir zot bonzour byen kalm. Enn antre zot ti pous mwan akote e al kot sa bife. I ti ouver sa bife e fouy ladan. I pa ti oule krwar ki i ti napa nanryen dan sa bife. Apre li ansanm ek lezot gerye ti fouy dan lezot lasanm e dan plafon. Me zot pa ti trouv nanryen.

Paul: Pour plizyer mwan, nou ti napa preski ditou manze. Me manze spirityel ki ti ed nou reste for. Souvandfwa, nou ti napa nanryen pour manze dan bomaten me nou ladorasyon bomaten dan Betel ti parey en “brekfas” pour nou. Nou tou nou ti konnen ki si nou lir e etidye Labib, sa ti pou donn nou sa lafors ki nou ti bezwen pour andire sak zour.

Si manze ek delo ti fini, nou tou nou ti pou bezwen kit Betel e bann ki ti pe kasyet ti pou ganny touye. Souvandfwa, Zeova ti donn nou sa ki nou bezwen dan sa bon moman e dan en fason ekstraordiner. Zeova ti pran swen avek nou e ed nou pour reste kalm.

Ler sityasyon ti vin pli difisil, laverite ti donn nou lafors. Plizyer fwa, nou bann frer ek ser ti bezwen sove pour sov zot lavi me malgre difikilte, zot lafwa ti reste for e zot ti reste kalm. Serten ti dir ki ler zot ti fer fas avek lager, sa ti pe “prepar zot pour gran ladetres.” Bann ansyen ek bann zenn frer ti demontre kouraz e fer tou sa ki zot ti kapab pour ed bann frer ek ser. Bann frer ek ser ki ti bezwen kit zot lakour ti ed kanmarad e zot ti konmans anons sa bon nouvel dan bann landrwa kot zot ti ale. Zot ti servi sa ki zot ti trouve dan lafore pour fer bann Lasal Rwayonm pour zot kapab annan bann renyon. Dan sa bann moman difisil, bann renyon ek predikasyon ti ankouraz bann frer ek ser e donn zot lespwar. Ler nou ti distribye led sekour, bann frer ek ser ti demann sak predikasyon olye demann lenz. Sa ti vreman ankouraz nou. En kantite dimoun ki ti’n vwar e eksperyans bann move keksoz pandan lager ti anvi tann sa bon nouvel. Zot ti sirprann pour vwar ki bann Temwen Zeova ti zwaye e pozitif. Bann frer  ek ser ti parey en lalimyer ki pe klere dan fernwanr. (Mat. 5:14-16) Devouman nou bann frer ek ser ti menm fer ki serten sa bann gerye danzere ti vin bann frer.

Paul: Nou ti bezwen kit Liberya plizyer fwa. Trwa fwa pour zis en pti moman e de fwa pour en lannen antye. En ser misyonner ti eksplike ki mannyer nou santi ler nou ti bezwen kit Liberya. Sa ser ti dir: “Ler nou ti Lekol Gilead, zot ti ansenny nou pour kontan nou bann frer ek ser dan bann landrwa kot nou ganny anvoye avek tou nou leker e sanmenm ki nou ti fer. Alor ler nou ti bezwen kit nou bann frer ek ser dan bann sityasyon koumsa, i ti konmsi nou leker ti pe desire!” Me nou ti kontan ki nou ti kapab ed nou bann frer ek ser Liberya e siport sa travay predikasyon menm si nou ti dan bann pei vwazen.

Anne: Pandan mwan Me 1996, kat nou ti pran transpor biro brans e nou ti anvi dray 16 kilomet pour al dan en landrwa ki pli an sekirite lo lot kote lavil. Dan sa transpor, i ti annan bann lenformasyon enportan konsernan bann aktivite Temwen Zeova Liberya. En sel kou sa landrwa kot nou ti ete ti ganny atake. Bann gerye ankoler ti tir fizi dan ler, aret nou, tir trwa nou dan transpor e ale avek transpor avek Pol ladan. Nou ti debout lanmenm dan sok. Apre en sel kou, Pol ti vini sorti dan en lafoul dimoun avek disan pe koule lo son fron. Nou ti konfize, nou ti krwar in ganny en koud bal dan latet me apre nou ti realize ki i pa ti pou pe marse si sa ti leka! En gerye ti’n tap li ler i ti pe pous li an deor transpor. Erezman son blesir pa ti grav.

I ti annan en transpor militer lanmenm la o bor ranpli avek dimoun ki ti per. Nou ti deside pour antre dan sa transpor. Me vi ki i ti napa plas, nou ti bezwen anpandan avek sa transpor. I ti napa preski ditou plas pour nou tenir. Sa drayver ti dray vit e nou ti pros pour tonbe. Nou ti sipliy li pour arete me i ti tro per pour arete. Nou ti kapab tenir ziska ki sa transpor ti arete. Me nou ti vreman fatige e nou ti pe tranble degre nou per.

Paul: Nou lenz ti sal e desire. Nou ti get kanmarad e nou pa ti krwar ki nou ti ankor vivan. Sa zour swar, nou ti dormi dan en laplenn o bor en elikopter ki ti ranpli avek bann trou kot dimoun ti’n tir fizi lo la e ki ti paret konmsi i pou kas fasilman. I sanmenm sa elikopter ki ti anmenn nou Sera Leonn son lannmen. Nou ti rekonesan ki nou vivan me nou ti enkyet pour nou bann frer ek ser Liberya.

Anne: Nou ti ariv sen e sof kot Betel Sera Leonn ki ti sitye Freetown e bann frer ek ser ti pran swen avek nou. Me mon ti konmans rapel bann move keksoz ki ti’n arive Liberya. Pandan lazournen, mon ti per ki en move keksoz ti pou arive e mon ti konfize. Tou keksoz otour mwan ti paret drol. Pandan lannwit, mon ti leve parski mon ti pe tranble e mon ti per ki en move keksoz ti pou arive. Mon ti panik e sa ti fer li difisil pour mwan respire. Paul ti may mwan e priy avek mwan. Nou ti sant kantik ziska ki mon ti aret tranble. Mon ti krwar mon pe fol e ki mon ti pou nepli kapab servi konman en misyonner ankor.

Mon pa pou zanmen oubliy sa ki ti arive apre. Sa menm semenn, nou ti ganny de magazin. Enn ti Awake! le 8 Zen 1996 ki ti annan sa lartik “Coping With Panic Attacks.” Sa ti fer mwan konpran ki ti pe arive avek mwan. Sa lot magazin ti Latour Veyer le 15 Me 1996 an Angle, ki ti annan en lartik ki annan pour tit “Where Do They Get Their Strength?” Sa Latour Veyer ti annan portre en papiyon ki ti’n ganny blese. Sa lartik ti eksplike ki zis parey en papiyon i kapab kontinyen manze e anvole kantmenm i’n ganny dimal dan son lezel, avek led lespri sen Zeova, nou osi nou kapab kontinyen ed lezot menm si nou’n ganny blese emosyonnelman. Atraver sa de lartik, Zeova ti donn mwan sa lafors ki mon ti bezwen dan sa bon moman. (Mat. 24:45) Mon ti fer resers lo sa size e mon ti met bann lartik ki mon ti vwar dan en liv. Sa ti ed mwan en kantite. Avek letan, sa bann move souvenir pa ti fer mwan soufer parey avan.

Paul: Nou ti byen kontan sak fwa nou ti retourn Liberya. Ver lafen 2004, nou ti’n fer apepre 20 an dan nou servis konman misyonner. I ti nepli annan lager. I ti annan bann proze konstriksyon kot biro  brans. Me en sel kou, nou ti ganny demande pour al servi dan en lot landrwa.

Sa ti vreman difisil pour nou. Nou ti vreman pros avek bann frer ek ser Liberya. Zot ti parey en fanmir pour nou e nou pa ti anvi kit zot. Me nou ti’n vwar ki mannyer Zeova ti ed nou ler nou ti kit nou prop fanmir pour al Lekol Gilead, alor nou ti aksepte sa lenvitasyon. Nou ti ganny anvoye Gana, ki pa ti lwen avek Liberya.

Anne: Nou ti plere ler nou ti kit Liberya. Nou ti sirprann ler Frank, en frer aze ki ti byen saz, ti dir nou: “Zot bezwen oubliy nou!” Apre i ti eksplike: “Nou konnen ki zot pa pou zanmen oubliy nou me donn tou pour tou dan zot nouvo servis. Zeova ki’n donn zot sa servis alor pran swen avek bann frer ek ser laba.” Sa ti donn nou lafors pour rekonmanse dan en landrwa kot preski personn pa ti konn nou e ki nou pa ti konn nanryen lo la.

Paul: Me i pa ti pran nou bokou letan pour kontan nou bann frer ek ser Gana. I ti annan en kantite Temwen Zeova laba! Nou bann frer ek ser laba ti fidel e zot ti annan en lafwa for e nou ti aprann en kantite avek zot. Me apre ki nou ti’n servi Gana pour 13 an, nou ti ganny en lot sirpriz. Nou ti ganny demande pour al servi dan biro brans Les Lafrik ki baze Kenya. Kantmenm nou ti mank nou bann zanmi kot nou ti pe servi avan, nou ti deswit vin zanmi avek bann frer ek ser fidel Kenya. Osi nou ti ankor pe servi dan en gran teritwar kot i annan bezwen pour plis proklanmater.

Anne: Dan bann lannen ki’n pase, mon’n pas dan bann sityasyon vreman difisil e parfwa mon’n santi mwan vreman per. Ler nou reste dan bann landrwa danzere e nou pas dan bann sityasyon difisil, sa i kapab fer nou malad e fer nou per. Nou pa kapab ekspekte ki Zeova i anpes sa bann keksoz arive avek nou. Ziska ozordi, si mon tann tapaz fizi, mon lestoman i konmans lour e mon lanmen i angourdi. Me mon’n aprann pour aksepte tou mwayen ki Zeova i servi pour donn nou lafors, enkli led ki nou gannyen avek nou bann frer ek ser. Mon’n vwar osi ki ler nou gard en bon routin spirityel, Zeova i kapab ed nou reste dan nou servis.

Paul: Serten dimoun i kapab demande: “Eski ou kontan ou servis?” En pei i kapab zoli, me keksoz i kapab sanze e vin danzere. Alor kwa ki nou kontan plis ki bann pei ki nou’n ale? Nou bann frer ek ser ki presye ki parey nou fanmir. Menm si lafason ki nou’n grandi i diferan, nou annan menm fason panse. Nou ti krwar nou’n ganny anvoye pour ankouraz zot, me an realite zot ki’n ankouraz nou.

Sak fwa nou al reste dan en nouvo landrwa, nou eksperyans en mirak sorti kot Zeova setadir ki nou annan fanmir partou dan lemonn. Tan ki nou form parti en kongregasyon, nou annan en fanmir ek en landrwa kot nou kapab santi nou an sekirite. Nenport keksoz ki arive, nou asire ki Zeova pou donn nou sa lafors ki nou bezwen si nou kontinyen depan lo li.—Fili. 4: 13.