1, 2. (a) Ki mannyer bann keksoz ki nou pe espere i diferan avek sa ki pour lezot dimoun? (b) Ki nou pou diskite dan sa lartik?

ZEOVA in donn nou bann keksoz merveye pour nou espere. I’n promet pour sanktifye son non e pour fer ki son lavolonte i ganny fer dan lesyel e osi lo later. (Matye 6:9, 10) Sa i bann keksoz pli enportan ki nou enpasyan pour vwar. Zeova in osi promet pour rekonpans nou avek lavi eternel, ki swa dan lesyel ouswa lo later. Pa sa pou en keksoz merveye! (Zan 10:16; 2 Pyer 3:13) Nou osi enpasyan pour vwar ki mannyer Zeova pou kontinyen gid e siport son pep dan sa bann dernyen zour.

² Labib i dir, ki lafwa i “ler nou asire ki sa ki nou pe espere” pou vin vre. Sa i vedir ki sa bann ki annan lafwa, zot asire ki tou sa ki Zeova in promet pou vin vre. (Ebre 11:1) Par kont, bokou dimoun ozordi i espere e swete pour ganny bann keksoz, me zot pa asire ki tousala pou vin vre. Par egzanp, en dimoun i kapab swete pour ganny  en lotri, me i pa kapab asire ki i pou gannyen. Dan sa lartik, nou pou vwar sa ki nou kapab fer pour batir nou lafwa dan bann promes Bondye. Nou pou osi diskit lo ki mannyer lafwa for i kapab ed nou la konmela.

3. Akoz nou annan lafwa ki bann promes Bondye pou vin vre?

³ Personn pa’n ne avek lafwa. Pour ganny lafwa, nou bezwen les lespri sen Bondye gid nou leker. (Galat 5:22, NW) Lespri sen i kapab ed nou pour aprann konn Zeova. Ler nou konpran ki i tou pwisan e saz, nou vin pli konfidan ki i annan sa abilite pour fer tou sa ki i’n promet. Li menm li Zeova, i konsider son bann promes konmsi zot in fini akonplir e i dir: “Tou keksoz in akonpli!” (Lir Revelasyon 21:3-6.) Nou konnen ki Zeova i toultan fer sa ki i’n promet. I “sa vre Bondye fidel.” Sa i rezon ki nou krwar tou sa ki i dir nou konsernan lavenir.​—Deterononm 7:9.

4. Ki bann serviter Zeova dan lepase ti annan lafwa ladan?

⁴ Ebre sapit 11 i donn nou non 16 zonm ek fanm fidel ki ti annan lafwa for dan bann promes Zeova. I osi koz lo plizyer lezot ki ti fer plezir Zeova “akoz zot lafwa.” (Ebre 11:39) Zot tou ti pe esper sa “desandans” ki Zeova ti’n promet. Zot ti konnen ki sa “desandans” ti pou detri tou bann lennmi Bondye e fer later revin en paradi. (Zenez 3:15) Tou sa bann serviter Bondye ti annan lafwa for ki Zeova ti pou resisit zot. Byensir, zot pa ti enpasyan pour ganny resisite pour al viv dan lesyel, vi ki Zezi pa ti ankor fer sa posib. (Galat 3:16) O kontrer, zot ti enpasyan pour viv pour touzour lo later dan en zoli paradi.​—Psonm 37:11; Izai 26:19; Osea 13:14.

5, 6. Ki Abraam ek son fanmir ti enpasyan pour vwar? Ki mannyer zot ti gard zot lafwa for? (Vwar portre lo paz 15.)

⁵ Konsernan sa bann serviter fidel Zeova, Ebre 11:13 i dir sa lo zot: “Zot tou, zot in mor dan lafwa, san ki zot i’n resevwar sa ki zot ti’n ganny promet. Me zot in war li dan lwen e zot in rezoui.” Zot ti enpasyan pour vwar sa nouvo lemonn e imazin zot pe viv ladan. Enn parmi zot ti Abraam. Zezi ti dir ki Abraam “ti rezoui ler i ti pe reflesir lo” sa letan. (Zan 8:56, NW) Sara, Izaak, Zakob ek plizyer lezot ti osi enpasyan pour sa letan ki sa Rwayonm, “ki Bondye i li menm arsitek e konstrikter,” pou diriz lo later antye.​—Ebre 11:8-11.

⁶ Ki mannyer Abraam ek son fanmir ti gard zot lafwa for? Zot ti kontinyen aprann lo Zeova. Parfwa, Bondye ti koz avek zot par servi bann lanz, vizyon ouswa rev. I tre probab ki zot ti osi aprann avek bann serviter fidel pli aze ouswa avek bann liv Labib ki ti’n deza ganny ekrir. Abraam ek son fanmir pa ti zanmen oubliy bann promes Bondye e zot ti kontan medit lo la. Sa ti fer zot napa dout ki Zeova ti pou gard son bann promes. Alor, zot ti reste fidel avek li menm ler zot ti soufer avek bann difikilte ouswa persekisyon.

7. Ki Zeova in donn nou pour ranforsi nou lafwa e ki nou devret fer?

 ⁷ Kwa ki pou ed nou gard nou lafwa for? Zeova in donn nou Labib pour ansenny nou konsernan son bann promes pour lavenir. Ladan, i montre nou sa ki nou bezwen fer pour nou ere. Sa i rezon akoz i bon pour nou lir Labib toulezour e swiv son gidans. (Psonm 1:1-3; lir Akt 17:11.) Zeova i osi donn nou “manze dan sa moman apropriye” par servi son “lesklav fidel e pridan.” (Matye 24:45, NW) Zis parey pep Bondye dan lepase, nou bezwen lir regilyerman konsernan bann promes Bondye e medit o profon lo la. Sa pou ed nou reste fidel avek Bondye e kontinyen reste enpasyan pour vwar sa letan kot Rwayonm Bondye pou diriz lo later antye.

8. Ki mannyer lapriyer i kapab batir nou lafwa?

⁸ Kwa ankor ki’n ed pep Zeova dan lepase pour gard zot lafwa for? Zot ti priy Zeova pour ganny led e ler zot ti vwar zot lapriyer ganny reponn, zot lafwa ti vin pli for. (Neemya 1:4, 11; Psonm 34:4, 15, 17; Danyel 9:19-21) Pareyman, ler nou’n vwar ki Zeova in ekout nou lapriyer e i’n donn nou egzakteman sa ki nou ti bezwen zis ler nou ti bezwen, nou lafwa dan li i vin pli for. (Lir 1 Zan 5:14, 15.) Nou osi bezwen kontinyen “demande” pour ki Zeova i donn nou son lespri sen pour nou kapab ganny plis lafwa.​—Lik 11:9, 13.

9. Ki serten keksoz ki nou kapab priy lo la?

⁹ Ler nou priy avek Zeova, nou pa devret zis demann li pour donn nou sa ki nou bezwen. Nou devret osi remersi li e loue li toulezour. Apre tou, pa i’n fer en kantite keksoz merveye! (Psonm 40:5) Pep Zeova i osi priy pour zot bann frer ek ser dan lemonn antye. Par egzanp, nou “mazin bann prizonnyen.” Nou osi priy pour “bann ansyen.” Ler nou vwar ki mannyer Zeova i reponn nou lapriyer, nou lafwa dan li i vin pli for e nou vin pli pros avek li.​—Ebre 13:3, 7.

10. Kwa ki’n ed plizyer pour annan kouraz e reste fidel avek Zeova?

¹⁰ Dan Ebre sapit 11, zapot Pol ti dir: “Par lafwa, bann [madanm] ti resevwar vivan, zot fanmir ki ti’n mor. Lezot [zonm] ti ganny tortire ziska lanmor. Zot ti refize ganny delivre pour zot kapab resisite pour en lavi meyer.” (Ebre 11:35) Plizyer ti andir bann sityasyon difisil e reste fidel avek Bondye parski zot ti annan lafwa for dan rezireksyon ki Bondye in promet. Zot ti konnen ki dan lavenir Zeova ti pou resisit zot e ki zot pou reste pour touzour lo later. Mazin Nabot ek Zekarya. Zot ti ganny saboule avek ros akoz zot  ti obei Zeova. (1 Lerwa 21:3, 15; 2 Kronik 24:20, 21) Danyel ti ganny zete dan en trou kot ti annan bann lyon lafen e son bann zanmi ti ganny anvoye dan en fourno laflanm dife. Zot ti pare pour mor plito ki enfidel avek Zeova. Sa bann zonm ti annan en lafwa for ki Zeova ti pou donn zot lespri sen e ed zot fer fas avek sa bann soufrans.​—Danyel 3:16-18, 20, 28; 6:13, 16, 21-23; Ebre 11:33, 34.

11. Ki bann leprev ki serten profet ti fer fas avek akoz zot lafwa?

¹¹ Plizyer profet, tel parey Mikaya ek Zeremi, ti ganny monke ouswa met dan prizon. Lezot, parey Eliya ti, “eran dan dezer e dan montanny. Zot ti viv dan kavern ros, e bann trou dan later.” Zot tou zot ti andir bann leprev e reste fidel avek Bondye akoz zot lafwa, setadir zot ti ‘asire ki sa ki zot pe espere’ pou vin vre.​—Ebre 11:1, 36-38; 1 Lerwa 18:13; 22:24-27; Zeremi 20:1, 2; 28:10, 11; 32:2.

12. Lekel sa pli bon legzanp ki nou kapab imite? Kwa ki ti ed li pour andir bann leprev?

¹² Zezi Kri ti andir sa leprev pli difisil ki tou e i ti reste fidel avek Zeova. Kwa ki ti ed li pour andire? Pol ti dir: “Akoz sa lazwa ki i ti pou gannyen, i pa ti pran kont laont pour mor lo en poto martir e aprezan i pe asize lo kote drwat tronn Bondye.” (Ebre 12:2, NW) Apre sa, Pol ti ankouraz bann Kretyen pour “reflesir byen” lo legzanp Zezi. (Lir Ebre 12:3.) ^[1] (Vwar lezot not.) Parey Zezi, plizyer Kretyen dan premye syek ti ganny touye akoz zot ti fidel avek Zeova. Antipas ti enn parmi zot. (Revelasyon 2:13) Sa bann Kretyen in fini ganny zot rekonpans, tandis ki bann serviter dan lepase ti enpasyan pe espere pour viv lo later. (Ebre 11:35) En pe letan apre ki Zezi ti vin Lerwa an 1914, bann Kretyen swazir ki ti’n mor ti ganny resisite pour ganny lavi imortel dan lesyel e zot pou renny avek li lo limanite.​—Revelasyon 20:4.

13, 14. Ki bann leprev ki Rudolf Graichen ti andire e kwa ki ti ed li reste fidel avek Zeova?

¹³ Plizyer milyon serviter Bondye pe swiv legzanp Zezi. Zot medit lo bann promes Bondye e reste fidel avek li pandan zot bann leprev. Enn parmi zot i Rudolf Graichen, ki ti ne Lalmanny an 1925. Ler i ti ankor zenn, son paran ti met bann portre zistwar Labib lo miray kot zot. I ti dir: “En portre ti montre en lelou ek en pti mouton, pti kabri ek leopar, pti bef ek lyon, zot tou zot dan lape e en pti garson pe kondir zot.” (Izai 11:6-9) Sa ti ed Rudolf pour reflesir bokou konsernan sa paradi lo later e ranforsi son lafwa ladan. Alor,  i ti reste fidel avek Zeova menm si i ti ganny persekite severman pour plizyer lannen avek bann Gestapo Nazi e apre avek bann Kominis Stasi dan Les Lalmanny.

¹⁴ Rudolf ti fer fas avek plizyer lezot leprev. Son manman ti mor avek typhus dan kan konsantrasyon Ravensbrück. Son papa ti siny en dokiman konmkwa i ti nepli en Temwen Zeova. Me Rudolf ti gard son lafwa for. Apre ki i ti’n ganny large dan prizon, i ti servi konman en sirveyan rezyonal. Pli tar i ti ganny envite Lekol Gilead e apre ganny anvoye Sili kot i ti osi servi konman sirveyan rezyonal. Laba i ti marye avek en ser misyonner ki ti apel Patsy. Me malerezman enn an pli tar zot pti fiy ti mor. En pe letan apre, Patsy osi ti mor a laz 43 an. Malgre tou sa bann leprev, Rudolf ti kontinyen servi Zeova. Menm ler i ti’n vin pli aze e son lasante ti nepli bon, i ti servi konman en pionye ordiner e ansyen. Nou  kapab lir son biografi dan Latour Veyer 1997 paz 20-25 an Angle. ^[2] (Vwar lezot not.)

15. Donn serten legzanp bann frer ek ser ozordi ki servi Zeova dan lazwa menm si zot ganny persekite.

¹⁵ Ozordi, plizyer nou bann frer ek ser i servi Zeova avek lazwa menm si zot ganny persekite severman. Plizyer santenn zot i dan prizon Leritre, Sengapour ek Sid Kore akoz zot refize “servi lepe.” (Matye 26:52) Par egzanp, Izaak, Negede ek Paulos in dan prizon Leritre pour plis ki 20 an! Laba zot in ganny trete dan en fason kriyel. Pandan tou sa lannen, zot pa’n reisi marye ouswa pran swen avek zot paran. Kantmenm sa, zot fidel avek Zeova e zot lafwa i for. Menm zot gard prizon i annan respe pour zot. I annan en portre sa bann frer lo sit jw.org. Zot an souriyan menm si zot pe soufer.

16. Ki lafwa for i kapab ed ou pour fer?

¹⁶ Laplipar serviter Zeova ozordi pa’n ganny met dan prizon ouswa ganny maltrete severman parey nou bann frer ki nou fek mansyonnen. Me plizyer zot in soufer akoz lapovrete, dezas natirel ouswa bann lager sivil. Lezot in swiv legzanp Abraam, Izaak, Zakob ek Moiz e zot in abandonn popilarite ouswa larises pour konsantre dan servis Zeova. Kwa ki ed nou bann frer pour gard zot lazwa dan servis Zeova? Zot lanmour pour li e zot lafwa for dan son bann promes. Zot konnen ki i pou rekonpans son bann serviter avek lavi eternel dan sa nouvo lemonn kot pou napa lenzistis.​—Lir Psonm 37:5, 7, 9, 29.

17. Ki mannyer ou pou gard ou lafwa for e ki nou pou diskite dan sa lot lartik?

¹⁷ Dan sa lartik nou’n vwar ki mannyer lafwa i “ler nou asire ki sa ki nou pe espere” pou vin vre. Pour annan en tel lafwa, nou bezwen priy Zeova e kontinyen medit lo son promes. La ki nou pou kapab andir bann leprev. Dan sa lot lartik nou pou diskit plis lo ki savedir annan lafwa.