MON ti ne Wichita, Kansas, Leta-z-ini, le 10 Desanm 1936. Mon ti premye dan kat zanfan e mon paran, William ek Jean, ti de serviter fidel Zeova. Mon papa ti kordinater konsey ansyen. Mon manman ti’n konn laverite avek son manman, Emma Wagner. Emma in ansenny bokou dimoun laverite, enkli Gertrude Steele ki ti en misyonner Porto Riko. * (Vwar not.) Alor mon ti annan bokou bon legzanp pour mwan imite.

En Sanmdi swar, mwan ek mon papa ti pe ofer magazin Latour Veyer ek Consolation (ki aprezan i apel Awake!) avek bann dimoun ki ti pe pase lo semen, sa letan mon ti annan senk an. Pandan sa letan, Leta-z-ini ti pe partisip dan Dezyenm Lager Mondyal, me mon papa pa ti pran okenn kote. En dokter sou ti dir avek mon papa ki i en kapon e ki i ti pe rod leskiz pour li pa al lager. Sa dokter ti koste pros ek mon papa e dir li, “Akoz ou pa tap mwan, gran kapon!” Mon ti per me mon ti kontan pour vwar ki mannyer mon papa ti reakte. I ti kontinyen ofer magazin avek bann dimoun ki ti pe get sa ki ti pe arive. Apre sa, en solda ti pase e sa dokter ti kriye, “Ou pa fer nanryen ek sa gran kapon!” Sa solda ti kapab vwar ki sa zonm ti  sou, alors i ti dir li, “Al dormi se ou!” Apre sa, tou le de ti ale. Mon vreman apresye sa kouraz ki Zeova ti’n donn mon papa. Mon papa ti annan de latelye koup seve Wichita e sa dokter ti enn son kliyan.

Letan mon ti annan wit an, mon paran ti vann zot lakaz ek latelye e zot ti konstrir en karavann pour nou reste ladan. Apre sa, nou ti al reste Colorado, pre avek Grand Junction, kot ti annan bezwen pour plis proklanmater. Mon paran ti fer pionye e zot ti travay a mitan lo en laferm. Avek benediksyon Zeova ek zot travay dir, en kongregasyon ti formen. Le 20 Zen 1948, mon papa ti batiz mwan dan en pti larivyer ansanm avek lezot ki ti’n aksepte laverite. Billie Nichols ek son madanm ti osi batize sa zour e pli tar zot ti fer travay rezyonal. Zot garson ek son madanm osi ti fer parey.

Nou ti annan bokou bon zanmi ki ti byen okipe dan servis Zeova e parmi bann ki nou ti pli pros avek ti lafanmir Steele, ki ti enkli, Don ek Earlene, Dave ek Julia, Si ek Martha. Nou ti kontan koz lo Labib avek zot e zot ti annan en gran enfliyans lo mon lavi. Zot ti montre mwan ki nou lavi i annan en bi e ki nou kapab ere ler nou met Rwayonm premye dan nou lavi.

Letan mon ti annan 19 an, Bud Hasty, ki ti en zanmi, ti envit mwan pour fer pionye ansanm avek li dan sid Leta-z-ini. Sirveyan rezyonal ti demann nou pour al reste Ruston, Louisiana, kot plizyer Temwen Zeova ti’n vin inaktif. I ti demann nou pour fer tou bann renyon sak semenn menm si personn pa vini. Laba, nou ti trouv en landrwa e nou ti fer bann preparasyon. Nou ti fer tou bann renyon, me pour en pe letan zis nou de Bud ki ti asiste. Nou ti kondwir sakenn son tour diferan parti renyon e sakenn son tour ti reponn tou bann kestyon. Si ti annan en demonstrasyon, nou tou le de nou ti pou lo platform e ti pou napa personn dan lodyans. Alafendefen en ser aze ti konmans vin renyon. Avek letan, plizyer etidyan Labib ek lezot ki ti inaktif ti konmans vin renyon e pa bokou letan apre nou ti vin en kongregasyon.

En zour, mwan ek Bud ti zwenn en paster sorti dan larelizyon Church of Christ e sa paster ti koz lo bann verse Labib ki mon pa ti konnen. Sa ti fatig mwan e ti fer mwan reflesir pli o profon lo mon krwayans. Pandan en semenn, mon ti etidye ziska tar aswar pour trouv larepons pour son bann kestyon. Sa ti ed mwan ranforsi mon relasyon avek Zeova e mon ti anvi koz avek en lot paster.

En pe letan apre, sirveyan rezyonal ti demann mwan pour al reste El Dorado, Arkansas, pour ed sa kongregasyon laba. Letan mon ti laba, mon ti bezwen retourn Colorado tanzantan pour pas devan sa lotorite ki deside lekel ki devret antre dan larme. Dan enn sa bann vwayaz ki nou ti fer, mwan ek serten pionye ti fer en aksidan Texas kot mon loto ti ganny andomaze konpletman. Nou ti telefonn en frer ki ti anmenn nou kot li e apre i ti anmenn nou renyon. Dan renyon, zot ti fer en lanons lo nou aksidan e bann frer ti donn nou en pti larzan. Sa frer ti osi vann mon loto pour 25 dolar.

Nou ti reisi ganny en pasaz ziska Wichita e laba E. F. McCartney en zanmi pros ki nou ti apel li Doc, li osi ti pe fer pionye. Son de garson, Frank ek Francis ki de frer zimo i ankor touzour de parmi mon bann bon zanmi. Zot ti annan en vye loto ki zot ti vann mwan pour 25 dolar, egzakteman sa sonm  ki mon ti gannyen ler mon ti vann mon loto ki ti’n kraze. Sa ti premye fwa ki mon ti konpran ki akoz mon ti pe met Rwayonm premye dan mon lavi, Zeova ti pe donn mwan sa ki mon bezwen. Lo sa vizit, lafanmir McCartney ti fer mwan konn en zoli ser ki ti apel Bethel Crane. Manman Bethel ki apel Ruth, ti en Temwen devoue Wellington, Kansas. Ruth ti kontinyen fer pionye ziska dan son 90 an. Mwens ki enn an pli tar, an 1958, mwan ek Bethel ti marye e nou ti konmans fer pionye El Dorado.

Nou ti anvi swiv bann bon legzanp ki nou ti’n vwar letan nou ti pe grandi, alor nou ti deside ki nou ti pou aksepte nenport lenvitasyon ki Zeova i ofer atraver son lorganizasyon. Nou ti ganny anvoye konman pionye spesyal Walnut Ridge, Arkansas. Apre, an 1962, nou ti vreman kontan ler nou ti ganny envite pour asiste trannsetyenm laklas Lekol Gilead. Nou ti kontan pour konnen ki Don Steele ti dan sa menm laklas. Apre ki nou ti’n ganny nou diplonm, mwan ek Bethel ti ganny anvoye Nairobi, Kenya. Nou ti sagren pour kit New York, me ler nou ti ariv Nairobi nou ti vreman kontan pour vwar nou bann frer pe esper nou lo erport.

I pa ti pran nou bokou letan pour nou adapte e kontan prese Kenya. Nou premye etidyan Labib ki ti vin dan laverite ti Chris avek Mary Kanaiya. Zot ankor dan servis a plen tan Kenya. Son lannen apre, nou ti ganny demande pour al Kampala, Uganda. Nou ti sa de premye misyonner dan sa pei. Nou ti vreman kontan akoz bokou dimoun ti anvi konn plis lo Labib e pli tar sa bann dimoun ti vin nou bann frer ek ser. Par kont, apre ki nou ti’n fer trwa-z-an edmi Lafrik, nou ti retourn Leta-z-ini pour fer nou fanmir. Nou ti pli sagren pour kit Lafrik ki letan nou ti kit New York. Nou ti kontan bann dimoun Lafrik e nou ti swete retournen en zour.

Nou ti al reste dan was Colorado kot mon paran ti reste. En pe letan pli tar, nou premye fiy, Kimberly ti ne e 17 mwan pli tar, nou ti ganny Stephany. Nou ti pran nou nouvo responsabilite konman paran o serye e nou ti travay dir pour ansenny laverite nou de pti fiy. Nou ti anvi imit bann bon legzanp ki bokou lezot dimoun ti’n kite. Nou ti konnen ki menm si bann bon legzanp ti kapab enfliyans zanfan, sa pa ti en garanti ki pli tar zot ti pou servi Zeova. Malerezman, mon pti frer ek ser ti kit laverite. Mon swete ki avek letan zot a kapab imit ankor sa bann bon legzanp ki zot in vwar.

Mwan ek Bethel ti vreman kontan pour elve nou de fiy e nou ti toultan esey fer keksoz ansanm konman en fanmir. Vi ki nou ti reste pre Aspen, Colorado, nou ti aprann ki mannyer pour ski e plizyer fwa nou ti al ski konman en fanmir. Sa ti donn nou loportinite pour koz avek nou de fiy. Nou ti osi al kanpe avek zot e nou ti annan bann bon konversasyon aswar. Menm si zot ti ankor zenn, zot ti kontan demann bann kestyon tel parey, “Ki mon pou vini ler mon gran?” e “Ki kalite dimoun ki mon anvi marye avek?” Nou ti fer tou sa ki nou ti kapab pour ansenny nou de fiy pour kontan Zeova. Nou ti toultan ankouraz zot pour met servis a plen tan konman en lobzektif e pour marye avek en dimoun ki annan menm lobzektif. Nou ti osi esey ed zot konpran ki i ti pli bon pour pa marye tro zenn. Souvan nou ti dir zot, “Reste selibater ziska zot annan omwen 23 an.”

Nou ti imit legzanp nou paran ki ti fer bokou zefor pour asiste bann renyon e ki ti regilyerman partisip dan predikasyon konman en fanmir. Nou ti osi envit bann dimoun ki ti dan servis a plen tan pour reste kot nou. Souvandfwa nou ti koz lo ki mannyer nou ti vreman kontan sa travay misyonner. Nou ti swete ki en zour nou vizit Lafrik konman en fanmir e nou bann fiy ti osi anvi sanmenm.

Nou ti toultan fer nou ladorasyon fanmir. Nou ti fer bann demonstrasyon lo ki ti kapab arive kot lekol e nou bann fiy ti montre ki mannyer en Temwen ti pou reponn bann kestyon. Zot ti vreman kontan sa metod lansennyman e sa ti fer zot annan konfyans dan zot lekor. Me anmezir ki zot ti grandi, par ler zot ti konplent letan nou ti fer ladorasyon fanmir. En fwa, mon ti telman dekouraze ki mon ti dir zot al dan zot lasanm e ki nou pa ti pou fer ladorasyon fanmir. Zot ti telman soke ki zot ti konmans plere e dir ki zot ti anvi fer ladorasyon fanmir. Nou ti konmans realize ki nou ti pe vreman ed zot pour kontan aprann konn Zeova. Anmezir ki letan ti pase, zot ti kontan ladorasyon fanmir e zot ti santi zot konfortab  pour koz lo zot bann santiman ek sa ki zot ti pe mazinen. Parfwa i ti vreman difisil pour tann zot dir ki zot pa ti dakor avek en lansennyman Labib. Me nou ti aprann ki mannyer zot ti santi. Malgre i pa ti fasil, nou ti ekout zot lopinyon e apre ki nou ti’n rezonn avek zot, zot ti dakor avek bann standar Zeova.

Bann lannen ki nou ti pase pour fer grandi nou de fiy ti pas vit. Avek led ek direksyon lorganizasyon Bondye, nou ti fer nou mye pour elve zot pour kontan Zeova. Nou ti vreman kontan ler nou de fiy ti fini lekol segonder zot ti konmans fer pionye e zot ti aprann bann skil ki ti pou ed zot siport zot lekor finansyerman. Zot ti al reste Cleveland, Tennessee avek de lezot ser akoz laba ti annan sa bezwen pour plis proklanmater. Nou ti mank zot en kantite me nou ti kontan ki zot ti dan servis a plen tan. Mwan ek Bethel ti rekonmans fer pionye e pli tar nou ti ganny loportinite pour ranplas sirveyan rezyonal e osi ede dan bann lasanble.

Avan ki nou bann fiy ti al reste Tennessee, zot ti al vizit biro brans Lonn, Langleter. Laba, Stephany, ki ti annan 19 an sa letan, ti zwenn en zenn Betelit ki ti apel Paul Norton. Lo en lot vizit, Kimberly ti zwenn en lot Betelit ki ti apel Brian Llewellyn. Letan Stephany ti ganny 23 an, i ti marye avek Paul e son lannen answit, letan Kimberly ti annan 25 an i ti marye avek Brian. Zot tou le de ti reste selibater ziska zot ti omwen 23 an e nou ti vreman kontan sa bann konzwen ki zot ti’n marye avek.

Kimberly ek Stephany in dir nou ki nou bon legzanp avek legzanp zot granparan in ed zot pour kontinyen “rod plito Rwayonm Bondye,” menm ler zot ti annan problenm finansyel. (Matye 6:33) An Avril 1998, Paul ek Stephany ti ganny envite pour asiste san senkyenm laklas Lekol Gilead e apre sa zot ti al servi konman misyonner Malawi, Lafrik. An menm tan, Brian ek Kimberly ti ganny envite pour travay dan Betel Lonn e pli tar zot ti ganny anvoye dan Betel Malawi. Nou ti vreman kontan akoz nou zanfan ti pe viv zot lavi dan sa pli bon fason.

An Zanvye 2001, mon ti ganny sa konversasyon lo telefonn ki mon ti mansyonnen o konmansman sa lartik. Frer Marais, ki ti sirveyan Departman Tradiksyon, ti eksplik mwan ki bann frer ti pe prepar en kour ki ti pou ed bann tradikter partou dan lemonn pour pli byen konpran Angle. Menm si mon ti annan 64 an, zot ti anvi form mwan pour vin enn parmi bann enstrikter. Mwan ek Bethel ti priy lo sa size e nou ti demann nou manman konsey. Malgre zot ti a laz e lefet ki nou pa ti pou la pour ed zot, zot ti ankouraz nou pour ale. Alor mon ti telefonn Frer Marais e dir ki nou ti pou vreman kontan pour aksepte sa gran responsabilite.

Apre sa, mon manman ti aprann ki i ti annan kanser. Mon ti dir li ki nou ti pou reste pour nou kapab ed mon ser, Linda, pour pran swen avek li. Me mon manman ti refize e i ti dir, “Mon ti pou santi mwan pli mal si zot pa ti ale.” Linda osi ti santi parey li. Nou ti vreman rekonesan lefet ki zot ti pare pour fer sa sakrifis e pour led ki bann frer ek ser dan kongregasyon ti pe donnen. Son lannmen apre ki nou ti’n kite pour al Watchtower Educational Centre Patterson, Linda ti telefonn nou e dir nou ki mon Manman ti’n mor. Parey mon manman ti’n ankouraz  nou, nou ti reste okipe dan nou nouvo servis.

Nou ti vreman eksite pour aprann ki nou premye responsabilite ti pou dan biro brans Malawi, kot nou de fiy ek zot msye ti pe travay. Nou ti vreman kontan pour nou ansanm ankor enn fwa. Apre sa, nou ti al fer sa kour Zimbabwe e apre Zambia. Apre ki nou ti’n ansenny bann tradikter pour plis ki trwa-z-an edmi, nou ti retourn Malawi pour nou ekri leksperyans bann Temwen ki ti’n ganny persekite akoz zot pa ti al lager. *

An 2005, ankor enn fwa nou ti vreman sagren pour kit Lafrik. Nou ti retourn Basalt, Colorado, kot mwan ek Bethel ti kontinyen fer pionye. An 2006, Brian ek Kimberly ti vin reste o bor nou avek zot de fiy, Mackenzie ek Elizabeth. Paul ek Stephany i ankor Malawi e Paul i servi lo Komite Brans. Ozordi mon annan preski 80 an e mon vreman kontan pour vwar bann zenn frer ki mon’n travay avek annan menm responsabilite ki mon ti annan avan. Pour byenfe nou bann zanfan ek bann pti zanfan, nou’n esey imit bann bon legzanp lezot.