1, 2. (a) Ki bann defi bann etranze i fer fas avek ozordi? (Vwar portre anler.) (b) Ki rapel zapot Pol in donnen e ki bann kestyon nou pou egzaminen?

PLIS ki 30 an pase, Osei, ki pa ti ankor vin en Temwen Zeova ti kit son lakour Gana pour al reste Lerop. ^[1] (Vwar lezot not.) I dir: “Mon ti deswit realize ki laplipar dimoun pa ti enterese avek mwan. Klima Lerop ti konpletman diferan avek Gana. Ler mon ti sorti andeor erport e santi sa lafreser pour premye fwa dan mon lavi, mon ti konmans plere.” I ti pran Osei plis ki enn an pour trouv en bon travay akoz i ti difisil pour li aprann sa langaz. Vi ki i ti lwen avek son fanmir i ti mank zot e santi li tousel.

² Si ou ti dan menm sityasyon, ki mannyer ou ti pou kontan dimoun i azir anver ou? Ou ti pou apresye pour ganny byen resevwar kot Lasal Rwayonm par bann dimoun ki kontan ou menm si ou kouler ek nasyonalite i diferan avek sa ki pour zot. Anfet Labib i dir bann vre Kretyen pour “pa oubliye demontre lanmour anver bann etranze.” (Ebre  13:2, not dan NW) Alor, annou egzamin sa bann kestyon swivan: Ki santiman Zeova i annan pour bann etranze? Eski nou bezwen sanz nou pwennvi lo bann etranze? Ki mannyer nou kapab demontre lanmour anver en etranze ler i vin dan nou kongregasyon?

3, 4. Dapre Egzod 23:9, ki mannyer Bondye ti anvi bann Izraelit i azir anver bann etranze e akoz?

³ Apre ki Zeova ti delivre son pep Lezip, i ti donn zot bann lalwa ki ti ansenny zot pour demontre lanmour anver bann etranze ki ti kit Lezip avek zot. (Egzod 12:38, 49; 22:21) Vi ki lavi pa toultan fasil pour bann etranze, Zeova i pran swen avek zot avek lanmour. Par egzanp, bann etranze ti kapab anmas sa ki reste apre rekolt.​—Levitik 19:9, 10.

⁴ Dan plas zis donn bann Izraelit lord pour annan respe pour bann etranze, i oule ki zot rapel ki mannyer en etranze i santi. (Lir Egzod 23:9.) Menm avan bann Izraelit ti vin lesklav Lezip, bann Ezipsyen pa ti kontan zot akoz zot ti diferan. (Zenez 43:32; 46:34; Egzod 1:11-14) Bann Izraelit ti annan en lavi dir ler zot ti bann etranze. Zeova ti anvi ki zot rapel ki zot ti bann etranze e ki zot devret demontre lanmour anver bann etranze ki ti pe reste parmi zot.​—Levitik 19:33, 34.

5. Kwa ki pou ed nou demontre lanmour anver bann etranze parey Zeova?

⁵ Zeova pa’n sanze. Alor ler bann etranze i vin dan nou kongregasyon, nou pa devret oubliye ki mannyer Zeova i ankor pe demontre lanmour anver sa bann dimoun. (Deterononm 10:17-19; Malaki 3:5, 6) Reflesir en pe e mazin bann defi ki bann etranze i kapab pe fer fas avek. Par egzanp, zot kapab pa konpran sa nouvo langaz e zot kapab ganny trete dan en fason ki enzis. Annou fer tou zefor pour ed zot e pour tret zot byen.​—1 Pyer 3:8.

6, 7. Kwa ki montre ki bann Kretyen Zwif dan premye syek ti aprann rezet bann prezidis?

⁶ Bann Kretyen dan premye syek ti aprann rezet bann prezidis ki bann Zwif ti annan. Lapannkot lannen 33, bann Kretyen Zwif ti demontre lospitalite ek lanmour anver bann nouvo ki sorti dan bann diferan pei. (Akt 2:5, 44-47) Sa ti montre ki bann Kretyen Zwif ti konpran ki sa vedir “lospitalite” setadir, “lanmour anver bann etranze.”

⁷ Par kont, pandan sa letan, en keksoz ti arive. Bann Zwif ki koz Grek ti konplent konmkwa zot bann vev ti pe ganny trete dan en fason enzis. (Akt 6:1) Pour rezourd sa problenm, bann zapot ti swazir set zonm pour fer sir ki tou dimoun i ganny trete dan en fason zis. Petet pour fer sa bann vev santi zot byen, bann zapot ti swazir bann zonm ki ti annan en non Grek.​—Akt 6:2-6.

8, 9. (a) Ki bann kestyon ki pou ed nou vwar si nou annan okenn prezidis? (b) Kwa ki nou devret rezete? (1 Pyer 1:22)

 ⁸ Ki swa nou realiz sa ouswa non, nou tou nou ganny enfliyanse par nou kiltir. (Romen 12:2) Nou osi kapab tann nou vwazen, koleg travay ek kanmarad lekol dir bann move keksoz lo bann dimoun ki annan diferan lorizin, ki sorti dan en tribi diferan oubyen annan en diferan kouler lapo. Ki degre nou’n ganny enfliyanse par sa bann nide negatif? Ouswa, ki mannyer nou reazir ler dimoun i sikann nou akoz nou nasyonalite oubyen nou kiltir?

⁹ I ti annan en letan ki zapot Pyer ti montre ki i ti annan prezidis kont bann dimoun ki pa ti Zwif. Me gradyelman i ti aprann pour rezet sa santiman negatif. (Akt 10:28, 34, 35; Galat 2:11-14) Pareyman, si nou remarke ki i annan okenn pti tras prezidis oubyen ki nou fyer akoz nou ras, nou devret fer zefor pour rezet zot konpletman. (Lir 1 Pyer 1:22.) Kwa ki kapab ed nou fer sa? Pa oubliye ki menm si nou sorti dan diferan pei, nou tou nou enparfe e ki nou pa merit ganny sove. (Romen 3:9, 10, 21-24) Alor nou napa okenn rezon pour santi nou pli siperyer ki lezot! (1 Korentyen 4:7) Nou devret santi parey zapot Pol. I ti dir son bann frer Kretyen ki zot “nepli bann etranze oubyen sitwayen lezot pei” me “zot form parti fanmir Bondye.” (Efezyen 2:19, NW) Nou tou nou devret fer tou zefor pour rezet tou prezidis pour ki nou kapab devlop sa nouvo personnalite.​—Kolosyen 3:10, 11.

10, 11. Ki mannyer Boaz ti imit pwennvi Zeova konsernan bann etranze?

¹⁰ Boaz, en zonm fidel ti vwar bann etranze parey Zeova. Ki mannyer sa? Ler Boaz ti al get son plantasyon pandan rekolt, i ti remark Rit, en madanm etranze sorti Moab. Rit ti pe travay dir pour anmas bann lagrenn ater. Anba Lalwa Moiz, Rit ti annan drwa anmas bann lagrenn ki’n reste apre rekolt. Me ler Boaz ti tande ki Rit ti’n demann permisyon, i ti sitan enpresyonnen ki i ti les Rit anmas lagrenn menm parmi bann pake zepi anmare.​—Lir Rit 2:5-7, 15, 16.

¹¹ Sa ki ti arive apre, i montre klerman ki Boaz ti enkyet pour Rit akoz i ti konnen ki Rit ti dan difikilte akoz i ti en etranze. I ti envit Rit pour reste ansanm avek son group zenn madanm pour anpese ki bann zonm ki ti pe travay dan plantasyon i sifok li. I ti menm fer sir ki Rit i ganny ase manze ek delo parey son bann travayer. Boaz ti demontre respe pour sa madanm etranze e i ti ankouraz li.​—Rit 2:8-10, 13, 14.

12. Ki lefe lanmour i kapab annan lo bann etranze?

¹² Boaz ti demontre lanmour anver Rit pa zis akoz Rit ti annan lanmour fidel pour son belmer, Naomi, me osi akoz Rit ti deza pe servi Zeova e i ti pe rod proteksyon avek Li. Anfet, Boaz ti pe imit Zeova ler i ti demontre lanmour fidel anver Rit. (Rit 2:12, 20; Proverb 19:17) Pareyman ozordi, ler nou demontre lanmour, nou pou kapab ed  “tou sort kalite dimoun” aprann laverite e vwar ki Zeova i kontan zot en kantite.​—1 Timote 2:3, 4, NW.

13, 14. (a) Akoz nou devret akey bann etranze kot Lasal Rwayonm? (b) Kwa ki kapab fer ou santi alez pour koz avek en dimoun ki sorti dan en lot kiltir?

¹³ Nou kapab demontre lanmour anver bann etranze par akey zot byen kot Lasal Rwayonm. Bann imigran ki’n fek ariv dan en pei i kapab santi zot kanmi parfwa e zot pa frekant lezot dimoun. Akoz zot kiltir oubyen zot ran sosyal, zot kapab santi ki zot pli enferyer ki dimoun ki sorti dan en lot ras oubyen nasyonalite. Alor, nou devret premyerman akey zot e demontre en lentere senser dan zot. Si JW Language app i disponib dan ou langaz, ou kapab servi li pour aprann dir bonzour dan langaz sa bann dimoun.​—Lir Filipyen 2:3, 4.

¹⁴ Ou kapab santi ou mal alez pour koz avek en dimoun ki sorti dan en lot kiltir. Pour sirmont sa santiman, ou kapab koz en pe lo ou avek li. Ou pou kapab vwar ki zot annan plizyer keksoz an komen ki ou ti krwar. Pa oubliye ki sak kiltir i annan son pwen for ek son pwen feb.

15. Ki mannyer nou kapab ed bann ki pe esey adapte dan en nouvo pei?

¹⁵ Pour kapab fer lezot santi zot alez dan kongregasyon, demann ou lekor sa kestyon, ‘Si mon ti dan en lot pei, ki mannyer mon ti a kontan ganny trete?’ (Matye 7:12) Annan pasyans avek bann ki pe esey adapte dan en lot pei. O konmansman,  nou kapab pa byen konpran zot fason panse oubyen ki mannyer zot pou reazir. Dan plas ekspekte ki zot fason panse ek fason azir i parey sa ki pour dimoun dan nou kiltir, nou kapab aksepte zot parey zot ete.​—Lir Romen 15:7, not dan NW.

16, 17. (a) Ki nou kapab fer pour vin pli pros avek bann ki annan en lot kiltir? (b) Ki led pratik nou kapab donn bann imigran dan nou kongregasyon?

¹⁶ Si nou pran letan pour aprann lo pei ek kiltir bann etranze, i pou pli fasil pour konn zot. Pandan ladorasyon fanmir nou kapab fer resers lo kiltir bann imigran dan nou kongregasyon oubyen teritwar. En lot fason pour vin pli pros avek bann imigran i envit zot pour en repa kot nou. Zeova in “ouver en laport pour ki bann non-Zwif i krwar”, alor nou devret imit li e ouver nou laport avek bann etranze sirtou “bann frer ek ser dan lafwa.”​—Akt 14:27; Galat 6:10; Zob 31:32.

¹⁷ Ler nou pas letan avek en fanmir ki’n imigre, sa pou ed nou pour konpran e apresye zefor ki zot fer pour adapte avek nou kiltir. Nou pou kapab vwar ki zot bezwen led pour aprann nou langaz. Nou kapab ed zot pour al kot bann biro kot zot kapab ganny led pour trouv en landrwa reste oubyen en travay. Sa bann led pratik i kapab fer en  gran diferans dan lavi nou bann frer ek ser.​—Proverb 3:27.

18. Konsernan respe ek rekonesans, legzanp lekel bann imigran i kapab imite?

¹⁸ Byensir, i ti pou byen si bann imigran i fer zot mye pour adapte avek kiltir sa nouvo pei. Rit in kit en bon legzanp dan sa domenn. I ti montre respe pour kiltir sa nouvo pei par demann permisyon pour anmas bann zepi ki bann travayer in kit deryer. (Rit 2:7) I pa ti pran sa konman en nanryen ditou oubyen konmsi lezot ti dwa li. An plis ki sa, deswit i ti remersye lezot pour zot lanmour anver li. (Rit 2:13) Ler bann imigran i montre sa bon latitid, zot bann frer ek ser e lezot dimoun pou pli pare pour annan respe pour zot.

19. Ki bann rezon nou annan pour akey bann etranze?

¹⁹ Nou ere ki Zeova in demontre labonte ekstraordiner par permet tou dimoun tann sa bon nouvel. Dan zot pei, petet serten pa’n kapab etidye Labib oubyen asiste renyon avek pep Zeova. Me aprezan, vi ki zot annan sa loportinite pour asiste renyon avek nou, nou devret ed zot pour ki zot pa santi zot konman bann etranze. Menm si nou napa en kantite larzan oubyen nou pa kapab donn zot bann led pratik, me ler nou demontre lanmour anver bann etranze, nou imit lanmour ki Zeova i annan pour zot. Alor, konman bann ki “imit Bondye,” annou fer nou mye pour akey bann etranze ki parmi nou!​—Efezyen 5:1, 2.