1-3. (a) Kwa ki devret toultan nou priyorite? (b) Ki defi bann ki pe aprann en nouvo langaz i annan e ki kestyon sa i fer nou demande? (Vwar portre anler.)

OZORDI, bokou Temwen Zeova i okipe pe ede akonplir sa profesi pour pres “avek tou nasyon, tribi, langaz ek pep.” (Revelasyon 14:6, NW) Eski ou parmi bann ki pe aprann en nouvo langaz? Serten pe servi konman misyonner oubyen al prese kot i annan en pli gran bezwen dan en lot pei. Lezot in konmans asiste renyon dan en kongregasyon ki koz en lot langaz dan zot pei menm.

² Priyorite tou serviter Bondye i devret zot prop spirityalite ek spirityalite zot fanmir. (Matye 5:3, NW) Par ler, nou kapab vreman okipe e sa i fer li difisil pour ganny letan pour fer letid personnel. Me bann ki pe servi dan en kongregasyon ki koz en lot langaz i osi annan lezot defi.

³ Bann ki pe servi dan en kongregasyon ki koz en lot langaz i bezwen aprann sa langaz, me zot osi bezwen  fer sir ki zot etidye bann keksoz profon dan Labib regilyerman. (1 Korentyen 2:10) Ki mannyer zot kapab fer sa si zot pa vreman konpran sa ki pe ganny dir dan kongregasyon? Akoz bann paran Kretyen ki pe servi dan kongregasyon ki koz en lot langaz i bezwen fer sir ki laverite i tous leker zot zanfan?

4. Kwa ki kapab met ou relasyon avek Zeova an danze? Donn en legzanp.

⁴ Ler nou pa kapab konpran bann lansennyman Labib dan en lot langaz, sa i kapab en danze pour nou relasyon avek Zeova. Ler Neemya ti retourn Zerizalenm, i ti remarke ki serten zanfan pa ti kapab koz Ebre. (Lir Neemya 13:23, 24.) Parski sa bann zanfan pa ti konpran Parol Bondye, zot relasyon avek Zeova ti’n afeblir.​—Neemya 8:2, 8.

5, 6. Ki serten paran ki pe servi dan en kongregasyon ki koz en lot langaz in remarke e ki problenm i annan?

⁵ Serten paran Kretyen ki pe servi dan en kongregasyon ki koz en lot langaz i remarke ki relasyon ki zot zanfan i annan avek Zeova in afeblir. Vi ki zot zanfan pa vreman konpran byen ki pe ganny dir dan renyon, sa lenformasyon pa motiv zot pour azir. Pedro ki ti sorti Sid Lanmerik pour al reste Lostrali avek son fanmir i dir: “Ler nou koz lo bann keksoz spirityel, leker ek lemosyon i devret enplike.” ^[1] (Vwar lezot not.)​—Lik 24:32.

⁶ Ler nou lir dan en lot langaz, i kapab ki sa pa tous nou bann lemosyon parey i ti pou leka si nou ti lir dan nou langaz maternel. An plis, vi ki i difisil pour kominik dan en lot langaz nou kapab sitan fatige ki i vin difisil pour ador Zeova. Alor, menm si nou anvi servi dan en kongregasyon ki koz en lot langaz, nou osi bezwen gard nou relasyon avek Zeova.​—Matye 4:4.

7. Ki mannyer bann Babilonnyen i esey fors Danyel pour aksepte zot kiltir ek larelizyon?

⁷ Ler Danyel ek son bann zanmi ti an egzil Babilonn, bann Babilonnyen ti esey fors zot pour aksepte zot kiltir ek larelizyon. Ki mannyer sa? Zot ti aprann “Langaz bann Kaldeen” e donn zot bann non Babilonnyen. (Danyel 1:3-7, NW) Sa nouvo non ki bann Babilonnyen ti donn Danyel ti refer avek Bel, bondye prensipal Babilonn. Alor, i posib ki Lerwa Neboukadnezar ti anvi fer Danyel krwar ki bann bondye Babilonnyen ti pli for ki Bondye Danyel, Zeova.​—Danyel 4:8.

8. Ki mannyer Danyel ti gard son relasyon avek Zeova for?

⁸ Laba Babilonn, Danyel ti ganny ofer bann bon manze lerwa. Me i ti “determinen dan son leker” pour pa dezobei lalwa Bondye. (Danyel 1:8) Vi ki i ti kontinyen etidye “bann liv sakre” ki ti an Ebre, i ti gard son relasyon avek Zeova for ler i ti pe reste dan en lot pei. (Danyel 9:2, not dan NW) Anfet, apepre 70 an apre ki i ti’n  vin Babilonn, zot ti ankor konn li par son non Ebre, Danyel.​—Danyel 5:13.

9. Ki latitid ekriven Psonm 119 ti annan anver Parol Bondye?

⁹ Ekriven Psonm 119 ti bezwen andire ler bann manm dan lakour rwayal ti koz kont li. Me i ti ganny lafors dan parol Bondye ki ti ed li pour diferan avek lezot. (Psonm 119:23, 61) I ti permet Parol Bondye annan lefe lo son bann lemosyon.​—Lir Psonm 119:11, 46.

10, 11. (a) Kwa ki devret nou lobzektif ler nou pe etidye Parol Bondye? (b) Ki mannyer nou kapab atenn nou lobzektif? Donn en legzanp.

¹⁰ Menm si nou kapab vreman okipe avek nou bann responsabilite dan kongregasyon e dan travay, nou tou nou bezwen fer letan pour fer letid personnel ek ladorasyon fanmir. (Efezyen 5:15, 16) Nou lobzektif i pa zis pour lir en kantite oubyen prepar en komanter pour renyon. O kontrer, nou lobzektif i pour permet parol Bondye annan en lefe lo nou e fortifye nou lafwa.

¹¹ Pour arive atenn nou lobzektif, nou bezwen annan en bon balans. Ler nou etidye, nou pa devret zis mazin bezwen lezot me osi nou prop bezwen. (Filipyen 1:9, 10) Nou devret rekonnet ki ler nou prepare pour al predikasyon, pour al renyon oubyen pou fer diskour i kapab pa fasil aplik sa ki nou pe lir pour nou menm. Par egzanp, menm si en kwizinyen i bezwen gout manze avan i donn lezot, sa ki in goute i tro ptigin pour li viv lo la. Si i anvi reste an bonn sante, i bezwen regilyerman prepar bann bon manze pour li menm. Pareyman, si nou anvi fortifye nou relasyon avek Zeova, nou bezwen etidye Labib regilyerman. Sa bann letid o profon pou donn nou tou sa ki nou bezwen.

12, 13. Akoz bokou dimoun i santi ki i byen pour etidye Labib dan zot prop langaz?

¹² Bokou ki servi dan bann kongregasyon ki koz en lot langaz i vwar ki i byen pour etidye Labib regilyerman dan zot “prop lalang.” (Akt 2:8) Menm bann misyonner i konnen ki pour zot reisi reste for dan en kongregasyon ki koz en lot langaz, zot pa pou kapab depan zis lo sa ki zot tande dan renyon.

¹³ Alain, ki ti pe aprann langaz Pers pour wit an, i admet: “Ler mon prepar renyon dan langaz Pers, mon tant pour konsantre lo zis sa langaz. Vi ki mon lespri i pli konsantre lo aprann sa langaz, sa bann panse spirityel ki mon lir dan sa langaz pa neseserman  tous mon leker. Sanmenm sa mon regilyerman met letan dekote pour etidye Labib ek lezot piblikasyon dan mon langaz.”

14. Ki paran i devret fer sir e akoz?

¹⁴ Bann paran Kretyen i bezwen fer sir ki laverite i tous leker ek lespri zot zanfan. Annou pran legzanp Serge ek son madanm Muriel ki ti servi dan en kongregasyon ki koz en lot langaz pour plis ki trwa zan. Avek letan zot ti konmans remarke ki zot garson ki ti annan 17 an pa ti kontan al predikasyon ek renyon. Muriel i dir: “I annwiyan pour li pres dan en lot langaz me avan sa i ti kontan pres an Franse, son langaz maternel.” Serge i dir: “Ler nou ti realize ki sa sityasyon ti pe anpes nou garson fer progre spirityel, nou ti deside retourn dan nou kongregasyon.”

15. (a) Kwa ki kapab ed bann paran deside si zot pou sanz kongregasyon? (b) Ki gidans Deterononm 6:5-7 i donn bann paran?

¹⁵ Kwa ki kapab ed bann paran deside si zot pou retourn dan en kongregasyon ki servi en langaz ki zot zanfan i pli konpran? Premyerman, zot devret deside si zot vreman annan ase letan ek lenerzi pour ansenny zot zanfan pour kontan Zeova e osi ansenny zot en lot langaz an menm tan. Dezyenmman, zot kapab remarke ki zot zanfan pa anvi prese, al renyon  oubyen menm servi dan en kongregasyon ki koz en lot langaz. Sanmenm sa ki bann paran i kapab deside retourn dan en kongregasyon ki servi en langaz ki zot zanfan i pli byen konpran. Apre ki sa zanfan in devlop en bon relasyon avek Zeova sa zanfan i kapab deside retourn dan sa kongregasyon ki koz en lot langaz.​—Lir Deterononm 6:5-7.

16, 17. Kwa ki’n ed serten paran ansenny zot zanfan lo Zeova?

¹⁶ Lezot paran i trouv bann fason pour ansenny zot zanfan lo Zeova dan zot lalang maternel menm ler zot asiste renyon dan kongregasyon oubyen group ki koz en lot langaz. Charles i papa trwa fiy ki ant 9 a 13 an. Zot al dan en group ki koz Lingala. I dir: “Nou ti deside etidye e fer ladorasyon fanmir avek bann zanfan dan nou lalang maternel. Me nou osi enkli bann zwe ek bann sesyon pour aprann koz Lingala, pour ki zot kapab aprann sa langaz dan en fason ki fer li gou.”

¹⁷ Kevin, i en papa ki annan de fiy, enn senk an e lot wit an. I travay dir pour ansenny zot laverite akoz son de fiy pa ankor vreman konpran renyon dan sa kongregasyon ki koz en lot langaz ki zot pe asiste. I dir: “Mwan ek mon madanm nou fer letid personnel avek tou le de fiy an Franse, zot  langaz maternel. Nou osi met sa lobzektif pour asiste en renyon an Franse enn fwa par mwan e ler nou dan vakans nou pran sa loportinite pour asiste bann lasanble ki ganny fer dan nou langaz maternel.”

18. (a) Ki mannyer Romen 15:1, 2 i ed ou pour fer bann desizyon ki saz ler ou pe ed ou zanfan? (b) Ki bann sizesyon lezot paran in donnen? (Vwar lezot not.)

¹⁸ Sak fanmir i bezwen deside kwa ki pli bon pour zot zanfan ek zot relasyon avek Zeova. ^[2] (Vwar lezot not.) (Galat 6:5) Muriel i dir ki menm si li ek son msye ti vreman anvi kontinyen servi dan sa kongregasyon ki koz en lot langaz, zot ti deside pour arete pour ed zot garson ranforsi son lanmour pour Zeova. (Lir Romen 15:1, 2.) Ozordi, Serge i konnen ki zot in fer sa bon desizyon. I dir: “Depi ler nou’n retourn dan kongregasyon Franse, nou garson ti fer progre spirityel e batize. Aprezan i pe servi konman en pionye ordiner. I pe menm mazin retourn dan en group ki koz en lot langaz!”

19, 20. Ki mannyer nou kapab montre ki nou kontan parol Bondye?

¹⁹ Zeova i kontan tou dimoun. I’n fer Labib disponib dan plizyer santenn langaz pour ki “tou sort kalite dimoun” i ganny konnesans egzakt laverite. (1 Timote 2:4, NW) I konnen ki nou relasyon avek li pou vin pli for ler nou lir Labib dan sa langaz ki nou pli byen konpran.

²⁰ Nou tou nou bezwen fer bokou zefor pour gard nou relasyon avek Zeova for. Nou kapab fer sa ler nou regilyerman etidye Labib dan sa langaz ki nou pli byen konpran. Nou pou osi ed nou fanmir pour gard zot spirityalite an bonn sante e nou pou montre ki nou vreman kontan parol Bondye.​—Psonm 119:11.