VER lafen bann lannen 1950, papa John ti batize konman en Temwen Zeova dan en pti lavil Gujarat, Lenn. Me John, son senk frer ek ser ek zot manman ti bann Katolik Romen ki ti vreman relizye. I pour sa rezon ki zot ti opoz lafwa zot papa.

En zour, papa John ti demann li pour anmenn en lanvlop kot en frer ki ti dan son kongregasyon. Me sa zour bomaten, John ti koup son ledwa ler i ti pe ouver en gro barik. Kantmenm sa, i ti anvi obei son papa, alor i ti anmar en sifon lo son ledwa ki ti pe sennyen e al anmenn sa lanvlop.

Ler John ti ariv laba, i ti donn sa lanvlop avek madanm sa frer ki ti en Temwen Zeova osi. I ti remark blesir John e ofer pour ede. I ti al sers bann keksoz premye swen, netway sa blesir e met en bandaz lo son ledwa. Apre i ti fer en tas dite so pour John. An menm tan ki i ti pe fer tousala i ti koz avek John zantiman lo Labib.

Gras a labonte sa madanm, santiman John anver bann Temwen ti konmans sanze. Alor, i ti demann sa madanm de kestyon lo krwayans Temwen Zeova ki diferan avek krwayans Legliz Katolik. I ti demande si Zezi i Bondye e si bann Kretyen i devret priy avek Mari. Sa ser ti’n aprann langaz Gujarati e i ti kapab reponn John dan son prop langaz. I ti montre li larepons dan Labib e donn li sa pti liv “This Good News of the Kingdom.”

Pli tar, ler John ti lir sa pti liv, i ti konnen ki sa ki i ti pe lir ti laverite. I ti al kot son pret e demann li sa menm de kestyon. Sa pret ti pran en gran lakoler, balans en Labib avek li e kriy avek li: “Ou’n vin Satan! Montre mwan kote dan Labib ki dir ki Zezi pa Bondye. Montre mwan kote ki dir ki ou pa devret ador Mari. Montre mwan!” John ti sirprann pour vwar sa pret azir dan sa fason. I ti dir sa pret ki i pa ti pou zanmen antre dan en legliz Katolik ankor. E zanmen in antre ankor!

John ti konmans etidye Labib avek bann Temwen, aksepte laverite e konmans servi Zeova. Avek letan, plizyer manm son fanmir ti fer parey. Apepre 60 an pli tar, sa sikatris lo ledwa John i ankor fer li rapel sa aksyon ki demontre labonte Kretyen ki ti pous li pour servi Zeova tou son lavi.​—2 Korentyen 6:4, 6.