1. Ki sa pli gran kalite lanmour e ki mannyer ou ti pou dekrir li? (Vwar portre o konmansman sa lartik.)

ZEOVA i Sours lanmour. (1 Zan 4:7) Sa pli gran kalite lanmour i baze lo bann prensip drwat. Dan Labib, sa kalite lanmour i ganny dekrir par sa mo Grek, a·gaʹpe. Sa kalite lanmour i kapab enkli lafeksyon pour en dimoun me i plis ki zis bann santiman. I ganny demontre par bann aksyon ki met lentere lezot avan e ki anmenn byenfe pour lezot. Lanmour ki motiv nou pour fer bann bon keksoz pour lezot. Sa kalite lanmour i donn nou lazwa e i donn nou lavi en vre sans.

2, 3. Ki mannyer Zeova in met lentere bann imen avan sa ki pour li dan lafason ki i’n demontre lanmour pour zot?

² Zeova ti demontre lanmour pour bann imen menm avan ki i ti kree Adan ek Ev. I ti kree later avek tou sa ki nou bezwen pour viv. An plis ki sa, i’n fer later en landrwa kot nou vreman kapab viv ere. Zeova pa ti fer sa pour li menm. I ti fer sa pour nou. Enn fwa ki later ti’n pare, i ti  kree imen e donn zot sa lespwar pour viv pour touzour dan en paradi lo later.

³ Pli tar, Zeova ti met lentere bann imen avan sa ki pour li par demontre son lanmour dan sa pli gran fason posib. Menm si Adan ek Ev ti’n rebele, Zeova ti sitan asire ki serten zot desandans ti pou kontan li ki i ti fer en laranzman pour donn son Garson konman en ranson pour sov zot. (Zenez 3:15; 1 Zan 4:10) Dek ki Zeova ti fer sa promes pour en ranson, i ti konmsi sa sakrifis ti’n fini ganny fer. Kat mil an pli tar, Zeova ti donn son sel Garson pour sov bann imen. (Zan 3:16) Pa nou vreman rekonesan pour sa lanmour ki Zeova in demontre!

4. Ki mannyer nou konnen ki bann imen enparfe i kapab demontre lanmour ki met lentere lezot avan?

⁴ Eski nou kapab demontre lanmour ki met lentere lezot avan sa ki pour nou menm si nou enparfe? Byensir nou kapab. Zeova in kree nou dan son resanblans, savedir avek sa abilite pour imit li. I pa toultan fasil pour demontre lanmour ki met lentere lezot avan sa ki pour nou, me i posib pour fer li. Abel ti demontre lanmour pour Bondye ler i ti ofer sa pli meyer ki i ti annan. (Zenez 4:3, 4, NWT) Noe ti demontre lanmour ki met lentere lezot avan ler i ti kontinyen anons mesaz Bondye pour en kantite lannen menm si bann dimoun pa ti ekoute. (2 Pyer 2:5) Abraam ti demontre ki son lanmour pour Bondye ti pli for ki tou lezot keksoz ler i ti pare pour ofer Izaak ki ti son garson byenneme konman en sakrifis. (Zak 2:21) Parey sa bann zonm fidel, nou osi nou anvi demontre lanmour menm ler i pa fasil.

5. Dan ki fason nou kapab demontre vre lanmour?

⁵ Labib i dir ki nou devret demontre vre lanmour “pa zis an parol ouswa avek labous, me montre ki nou lanmour i senser par nou aksyon.” (1 Zan 3:18) Eski sa i vedir ki nou pa kapab eksprim nou lanmour par sa ki nou dir? Non. (1 Tesalonisyen 4:18) I vedir ki i pa touzour ase pour zis dir “Mon kontan ou.” Nou bezwen demontre ki nou senser dan sa ki nou pe dir. Par egzanp, si nou frer oubyen ser napa ase manze ouswa lenz, zot bezwen plis ki zis bann parol zantiy. (Zak 2:15, 16) Dan menm fason, vi ki nou kontan Zeova ek nou prosen, nou pa zis priye pour ganny plis dimoun pour donn nou koudmen prese me nou osi travay dir dan predikasyon.​—Matye 9:38.

6, 7. (a) Ki savedir “lanmour san okenn lipokrizi”? (b) Ki serten legzanp fo lanmour?

⁶ Zapot Zan ti dir ki nou devret “montre ki nou lanmour i senser par nou aksyon.” Alor, nou pa devret ‘fer krwar ki nou kontan lezot’ e nou lanmour i devret “san okenn lipokrizi.” (Romen 12:9; 2 Korentyen 6:6) Parfwa en dimoun i kapab fer krwar ki i kontan lezot. Me eski son lanmour i vre e senser?  Kwa ki motiv li pour fer sa? I pa posib pour en dimoun demontre lanmour ek lipokrizi an menm tan. Fo lanmour pa vo nanryen.

⁷ Annou vwar serten legzanp fo lanmour. Ler Satan ti koz avek Ev dan zarden Edenn, sa ki i ti dir ti fer li paret konmsi i ti anvi sa ki pli meyer pour Ev. Me son bann aksyon ti montre ki sa pa ti leka. (Zenez 3:4, 5) Ler David ti lerwa, i ti annan en zanmi ki ti apel Aitofel. Me Aitofel ti trai David pour son prop benefis. Son bann aksyon ti montre ki i pa ti en vre zanmi. (2 Samyel 15:31) Ozordi, bann aposta ek lezot ki senm divizyon dan kongregasyon i servi “bann zoli parol ek flatri.” (Romen 16:17, 18) Zot kapab fer krwar ki zot enterese avek lezot me an realite zot egois.

8. Ki kestyon nou devret demann nou lekor?

⁸ Fo lanmour i fer onte akoz i ganny servi pour anbet dimoun. Nou kapab anbet bann imen me nou pa kapab anbet Zeova. Zezi ti dir ki bann ki azir parey bann ipokrit pou ganny pini “severman.” (Matye 24:51) Konman bann serviter Zeova, nou pa zanmen anvi vin ipokrit. Alor nou devret demann nou lekor, ‘Eski mon pe demontre vre lanmour ouswa mon egois e dezonnet?’ Annou vwar nef fason ki nou kapab demontre lanmour ki “san okenn lipokrizi.”

9. Ki vre lanmour pou motiv nou pour fer?

⁹ Trouv lazwa dan ou servis menm si personn pa remark sa ki ou fer. Nou devret pare pour fer bann bon keksoz pour lezot, bann keksoz ki personn pa pou zanmen konnen. (Lir Matye 6:1-4.) Ananyas ek Safira ti annan en diferan latitid. Ler zot ti fer en donasyon, zot ti anvi ki lezot i konn sa ki zot in fer. Zot ti koz lalang lo lakantite larzan ki zot ti pe donnen e zot ti ganny pini pour zot lipokrizi. (Akt 5:1-10) Me si nou vreman kontan nou bann frer ek ser, nou pou kontan pour fer bann bon keksoz pour zot san ki nou anvi ki lezot i konnen. Nou kapab aprann avek bann frer ki pe ed Konsey Direkter pour prepar manze spirityel. Zot pa atir latansyon lo zot menm e zot pa fer dimoun konn bann proze ki zot in travay lo la.

10. Ki mannyer nou onor lezot?

¹⁰ Onor lezot. (Lir Romen 12:10.) Zezi ti onor son bann zapot ler i ti lav zot lipye. (Zan 13:3-5, 12-15) Nou devret travay dir pour annan limilite parey Zezi e pour servi lezot. Bann zapot pa ti vreman konpran sa ki Zezi ti fer ziska bokou pli tar ler zot ti ganny lespri sen. (Zan 13:7) Nou onor lezot ler nou pa krwar ki nou pli siperyer ki zot akoz nou annan plis ledikasyon, nou pli ris ouswa akoz nou annan en responsabilite ki spesyal. (Romen 12:3)  Nou pa zalou ler lezot i ganny felisite, me nou kontan pour zot menm si nou santi ki nou devret ganny felisite nou osi.

11. Akoz nou devret felisit lezot senserman?

¹¹ Felisit lezot senserman. Rod loportinite pour felisit lezot. Nou tou nou konnen ki felisitasyon i “bon pour batir lezot.” (Efezyen 4:29) Nou anvi fer sir ki sa ki nou dir i senser e nou pa pe zis flat lezot. Nou pa devret dir en keksoz ki pa senser ouswa evit nou responsabilite pour donn en konsey ki neseser. (Proverb 29:5) Si nou felisit lezot e apre kritik zot par deryer zot ledo, savedir nou en bann ipokrit. Zapot Pol ti demontre vre lanmour. Ler i ti ekri bann Kretyen Korent, i ti felisit zot pour sa ki zot ti pe byen fer. (1 Korentyen 11:2) Me ler zot ti bezwen konsey, i ti zantiman eksplik zot akoz dan en fason kler.​—1 Korentyen 11:20-22.

12. Ki mannyer nou kapab demontre vre lanmour ler nou demontre lospitalite?

¹² Demontre lospitalite. Zeova i demann nou pour demontre zenerozite anver nou bann frer ek ser. (Lir 1 Zan 3:17.) Me nou bezwen annan sa bon rezon pour demontre lospitalite. Nou kapab demann nou lekor: ‘Eski mon envit zis mon bann zanmi pros ouswa bann ki mon konsider enportan dan kongregasyon kot mwan? Eski mon envit zis bann dimoun ki mon krwar pou fer keksoz pour mwan an retour? Ouswa eski mon zenere avek bann frer ek ser ki mon pa tro konnen oubyen ki pa kapab fer nanryen pour mwan?’ (Lik 14:12-14) Imazin sa bann sityasyon: Ki nou pou fer si en frer i bezwen led akoz bann move desizyon ki i’n pran? Oubyen ki nou pou fer si en dimoun ki nou’n envit kot nou pa’n zanmen dir nou mersi? Zeova i dir nou: “Demontre lospitalite anver kanmarad san konplent.” (1 Pyer 4:9) Ler nou donn avek sa bon rezon, nou pou ere.​—Akt 20:35.

13. (a) Kan ki petet nou bezwen plis pasyans? (b) Ki nou kapab fer pour ed bann ki feb?

¹³ Ed bann ki feb. Sa komannman dan Labib pour “siport bann ki feb, annan pasyans anver tou dimoun” i kapab montre si nou annan vre lanmour. (1 Tesalonisyen 5:14) Plizyer frer ek ser ki ti annan en lafwa feb, ti devlop en lafwa for pli tar. Me i annan serten ki nou bezwen kontinyen demontre pasyans ek lanmour pour kapab ed zot. Ki mannyer nou kapab fer sa? Nou kapab servi Labib pour ankouraz zot, nou kapab  envit zot pour vin pres ansanm avek nou ouswa nou kapab zis ekout zot. Nou osi pa devret mazin lo nou bann frer ek ser zis konman bann ki “for” ouswa “feb.” O kontrer, nou devret realize ki nou tou nou annan bann pwen for ek pwen feb. Menm zapot Pol ti admet ki i ti annan bann febles. (2 Korentyen 12:9, 10) Nou tou nou bezwen led ek lankourazman avek kanmarad.

14. Ki nou devret pare pour fer pour gard lape avek nou bann frer ek ser?

¹⁴ Fer lape. Lape avek nou bann frer ek ser i vreman presye. Menm si nou santi ki lezot in mal konpran nou ouswa ki nou pa’n ganny trete dan en fason zis, nou devret fer tou sa ki nou kapab pour fer lape. (Lir Romen 12:17, 18.) Si nou’n bles santiman en dimoun, petet nou bezwen zis demann leskiz. Me nou bezwen senser. Par egzanp, olye dir, “Eskize si ou santi koumsa,” i ti pou pli byen pour admet nou fot par dir, “Eskize ki mon’n bles ou par sa ki mon’n dir.” Lape i enportan espesyalman dan en maryaz. I ti pou mal pour en msye ek madanm fer konmsi zot kontan kanmarad devan lezot, me ler zot an prive zot refize koz avek kanmarad, zot dir bann parol blesan ouswa zot menm vyolan avek kanmarad.

15. Ki mannyer nou kapab montre ki nou pardon i senser?

¹⁵ Pardonn volonterman. Si en dimoun i ofans nou, nou pardonn li e rezet sa bann move santiman. Nou devret fer sa menm si sa dimoun pa realize ki i’n ofans nou. Nou pardonn volonterman par “siport kanmarad avek lanmour. [Nou] fer bokou zefor pour gard sa linite ki [nou] annan gras a lespri sen e ki lape i ini [nou] tou ansanm.” (Efezyen 4:2, 3) Pour arive pardonn senserman, nou devret aret mazin lo sa ki sa  dimoun in fer. Lanmour “pa gard rankin.” (1 Korentyen 13:4, 5) Anfet, si nou gard rankin, nou kapab gat nou relasyon avek nou frer ouswa ser e osi avek Zeova. (Matye 6:14, 15) Nou montre ki nou pardon i senser ler nou priy pour sa dimoun ki’n ofans nou.​—Lik 6:27, 28.

16. Ki mannyer nou devret santi konsernan bann responsabilite spesyal ki nou gannyen dan servis Zeova?

¹⁶ Met lentere lezot premye. Ler nou ganny en responsabilite spesyal dan servis Zeova, nou kapab montre ki nou lanmour i senser ler nou pa “rod [nou] prop lentere, me lentere lezot.” (1 Korentyen 10:24) Par egzanp, dan nou bann lasanble, bann manm servis lakey i antre dan lasal avan lezot e zot ti pou kapab ganny tante pour anmas bann pli bon plas pour zot ek zot fanmir. Me laplipar zot i swazir bann plas ki petet lezot pa ti pou anvi dan sa seksyon kot zot pe travay. Par fer sa, zot pe demontre lanmour ki met lentere lezot avan. Ki mannyer ou kapab imit zot bon legzanp?

17. Si en Kretyen i fer en pese grav, ki vre lanmour pou pous li pour fer?

¹⁷ Konfese e aret fer pese an kasyet. Serten Kretyen ki’n fer en pese grav in esey kasyet sa fot. Petet zot anbarase ouswa zot pa anvi dezapwent lezot. (Proverb 28:13) Me en dimoun ki kasyet son fot napa lanmour parski sa i fer li ek lezot ditor. Ki mannyer? Zeova i kapab aret beni kongregasyon avek son lespri sen e i pou napa lape dan kongregasyon. (Efezyen 4:30) Alor si en Kretyen i fer en pese grav, vre lanmour pou pous li pour koz avek bann ansyen e ganny led ki i bezwen.​—Zak 5:14, 15.

18. Ki degre vre lanmour i enportan?

¹⁸ Lanmour i sa pli gran kalite parmi tou lezot. (1 Korentyen 13:13) I ed dimoun pour vwar lekel ki bann vre disip Zezi e pour vwar lekel ki pe vreman imit Zeova, Sours lanmour. (Efezyen 5:1, 2) Pol ti dir ki si i ti napa lanmour, i ti pou en nanryen ditou. (1 Korentyen 13:2) Alor nou tou, annou kontinyen “montre ki nou lanmour i senser par nou aksyon,” pa zis “an parol.”