LALWA Moiz ti permet en dimoun pour fer en serman par dir, “Mon fer serman avek ou par Bondye” oubyen “Mon fer serman par non Zeova.” Par kont, dan letan Zezi, fer serman ti’n vin sitan popiler ki bann Zwif ti pe fer serman an bonnavini. Zot ti fer sa pour esey fer lezot pli krwar sa ki zot ti pe dir, me dan de lokazyon Zezi ti kondann sa kalite pratik initil. I ti ansennyen: “Zis fer sir ki ou ‘Wi’ i wi e ou ‘Non’ i non.”​—Matye 5:33-37; 23:16-22.

Dapre Theological Dictionary of the New Testament, liv Talmud i ed nou pour vwar ki kantite bann Zwif ti annan labitid fer serman pour montre ki sa ki zot ti pe dir i vre. Sa i akoz liv Talmud i eksplik an detay ki bann serman zot ti devret garde e ki bann serman zot ti kapab kase.

Pa zis Zezi ki ti kondann sa move pratik. Par egzanp, istoryen Zwif, Flavius Josephus ti ekri konsernan en sekt Zwif ki ti evite fer serman. Bann manm sa sekt ti krwar ki fer serman ti pli pir ki koz manti. Zot ti krwar ki si en dimoun ti bezwen fer en serman pour prouve ki i pe koz laverite, i bezwen ki sa dimoun ti en manter. Sa liv Zwif Deterokanonik ki apel Lasazes oubyen dan liv Ecclesiasticus (23:11) i dir parey: “En zonm ki abitye fer serman i en dimoun ki kas lalwa.” Zezi ti kondann sa pratik fer serman lo bann keksoz ki pa enportan. Si nou toultan koz laverite, nou pa bezwen fer serman pour fer lezot pli krwar sa ki nou pe dir.