1, 2. (a) Ki ti sa travay pli enportan dan lavi Zezi e akoz? (b) Ki nou bezwen fer pour reisi “travay ansanm avek Bondye”?

ZEZI KRI ti en sarpantye e pli tar i ti vin en ansenyan. (Mark 6:3; Zan 13:13) I ti fer tou le de kalite travay parfetman. Konman en sarpantye, i ti aprann ki mannyer pour servi son bann zouti pour fer bann keksoz itil avek dibwa. Konman en ansenyan, i ti servi son konnesans lo Lekritir pour ed bann dimoun ordiner konpran laverite sorti dan Parol Bondye. (Matye 7:28; Lik 24:32, 45) Ler Zezi ti annan 30 an, i ti aret fer sarpantye e vin en ansenyan parski i ti konnen ki sa ti sa travay pli enportan ki i ti kapab fer. I ti dir ki enn bann rezon ki Bondye ti’n anvoy li lo later, ti pour li anons sa bon nouvel lo Rwayonm Bondye. (Matye 20:28; Lik 3:23; 4:43) Tou dilon son lavi, Zezi ti konsantre lo anons sa bon nouvel e i ti anvi ki lezot i fer parey.​—Matye 9:35-38.

² Laplipar nou pa bann sarpantye, me nou tou nou bann ansenyan ki ansenny lezot sa bon nouvel. Sa travay i sitan enportan ki Bondye i enplike ladan. Anfet, “nou travay ansanm avek Bondye.” (1 Korentyen 3:9; 2 Korentyen 6:4) Nou dakor avek sa psalmis ki ti  dir: “Tou ou parol i laverite.” (Psonm 119:160) Parol Zeova i laverite. I pour sa rezon ki nou anvi asire ki nou pe “servi byen parol laverite” dan predikasyon. (Lir 2 Timote 2:15.) Alor nou esey kontinyen amelyor nou abilite pour servi Labib, ki nou zouti prensipal pour ansenny lezot lo Zeova, Zezi e lo Rwayonm. Pour ki nou reisi dan predikasyon, lorganizasyon Zeova in donn nou lezot bon zouti e nou bezwen konnen ki mannyer pour servi zot osi. Sa bann zouti i form parti Zouti predikasyon (Teaching Toolbox) dan JW Library.

3. Ki nou devret konsantre lo la dan predikasyon e ki mannyer Akt 13:48 i ed nou pour fer sa?

³ Bann piblikasyon ki form parti Zouti predikasyon in ganny fer pour ansenny dimoun. “Ansenny” i vedir eksplik sa mesaz pour ki sa dimoun i konpran sa ki i tande e ganny motive pour aplik sa ki i aprann. Vi ki i pa reste bokou letan dan sa lemonn, nou bezwen konsantre lo konmans bann letid Labib e ansenny dimoun laverite pour ki zot kapab vin bann disip Kris. Sa i vedir ki nou devret devoue pour rod tou bann ki “annan sa bon kondisyon leker pour ganny lavi eternel” e ed zot pour konmans servi Zeova.​—Lir Akt 13:44-48.

4. Ki mannyer nou kapab trouv bann dimoun ki “annan sa bon kondisyon leker pour ganny lavi eternel”?

⁴ Ki mannyer nou kapab trouv bann dimoun ki “annan sa bon kondisyon leker pour ganny lavi eternel”? Bann Kretyen dan premye syek ti bezwen prese parski sa ti sa sel fason pour trouv sa bann dimoun. Zezi ti dir son bann disip: “Dan nenport ki lavil oubyen vilaz kot zot arive, rode lekel ki merite pour ekout zot mesaz.” (Matye 10:11) Nou bezwen fer parey ozordi. Byensir, si bann dimoun i orgeye, pa senser oubyen pa vreman enterese dan Bondye, nou pa ekspekte ki zot pou ekout sa bon nouvel. Nou pe rod bann dimoun ki senser, ki annan limilite e ki vreman anvi konn laverite. Nou kapab konpar sa travay pour rod bann dimoun avek sa ki Zezi ti bezwen fer ler i ti en sarpantye. Premyerman, Zezi ti bezwen rod sa dibwa apropriye avan ki i ti kapab fer en meb, en laport, en zoug oubyen lezot keksoz. Apre i ti kapab pran son bwat zouti, servi son abilite e fer sa keksoz. Pareyman ozordi, nou bezwen premyerman rod bann dimoun senser e apre nou kapab servi nou bann zouti ek abilite pour ed zot vin bann disip.​—Matye 28:19, 20.

5. Ki nou bezwen konnen konsernan bann piblikasyon ki dan nou Zouti predikasyon? Donn en legzanp. (Vwar bann portre o konmansman sa lartik.)

⁵ Dan en bwat zouti, sak zouti i annan en fonksyon spesifik. Par egzanp, mazin bann zouti ki Zezi ti servi konman en sarpantye. * (Vwar not.) I ti bezwen bann zouti pour mezire, marke, koupe, perse e travay sa dibwa. I ti osi bezwen bann zouti pour fer tou morso  dibwa nivo e pour asanble zot. Pareyman, sak piblikasyon ki dan nou Zouti predikasyon i annan en fonksyon spesifik. Alor annou gete ki mannyer pour servi sa bann zouti enportan.

6, 7. (a) Ki mannyer ou’n servi bann kart kontak? (b) Akoz nou servi lenvitasyon pour renyon kongregasyon?

⁶ Kart kontak. Sa i en pti zouti vreman efikas ki ed dimoun konnen lekel nou e ki ankouraz zot pour al lo nou sit Enternet jw.org. Lo nou sit Enternet, zot kapab aprann plis lo nou e menm demann en letid Labib. I annan plis ki 400,000 dimoun ki’n demann en letid Labib ziska aprezan lo jw.org e plizyer santenn pe fer sa toulezour! Ou kapab gard detrwa kart kontak avek ou e servi zot anmezir ki ou koz avek bann dimoun ki ou zwenn dan lazournen.

⁷ Lenvitasyon. Sa lenvitasyon pour renyon kongregasyon i dir: “Ou ganny envite pour etidye Labib avek Temwen Zeova.” Apre i dir ki ou kapab fer sa “kot nou bann renyon piblik” “oubyen avek ou prop ansenyan.” Alor sa lenvitasyon i ed dimoun pour konnen lekel nou e i osi envit “bann ki rekonnet ki zot bezwen gidans Bondye” pour etidye Labib avek nou. (Matye 5:3) Byensir, dimoun i kapab vin nou bann renyon ki swa zot aksepte en letid Labib ouswa non. Ler zot vin nou bann renyon, zot pou vwar ki kantite zot kapab aprann lo Labib.

8. Akoz i enportan pour dimoun vin omwen enn nou bann renyon? Donn en legzanp.

⁸ I enportan ki nou kontinyen envit bann dimoun pour vin nou renyon omwen en fwa. Akoz? Parski ler zot vini, zot pou vwar ki Temwen Zeova i ansenny laverite ki sorti dan Labib e ed dimoun pour konn Bondye, tandis ki bann fo larelizyon pa ed dimoun pour fer sa. (Izai 65:13) Par egzanp, en koup marye Leta-z-ini ki apel Ray ek Linda ti remark sa diferans plizyer lannen pase. Zot ti krwar dan Bondye e zot ti anvi konn li pli byen. Alor zot ti deside pour vizit tou legliz dan zot lavil e pour rod de keksoz avan ki zot vin manm enn sa bann legliz. Premyerman, zot ti pou bezwen aprann en keksoz kot sa legliz e dezyenmman, bann manm sa legliz ti bezwen abiy parey bann dimoun ki krwar dan Bondye. I ti pran plizyer lannen parski i ti annan en kantite legliz. Me zot ti vreman dezapwente. Zot pa ti’n aprann nanryen e labiyman manm sa bann legliz pa ti respektab. Apre ki zot ti’n vizit sa dernyen legliz lo zot lalis, Linda ti al travay e Ray ti retourn kot lakour. Ler Ray ti pe dray pour al kot li, i ti pas o bor en Lasal Rwayonm. I ti dir dan li menm, ‘Les mwan al gete kwa ki pase laba.’ Byensir, sa ti sa pli bon leksperyans ki tou! Tou dimoun kot Lasal Rwayonm ti zantiy e amikal e zot ti’n byen abiye. Ray ti asiz dan premye ranze e i ti kontan sa ki i ti aprann! Sa i fer nou rapel lafason ki zapot Pol ti dekrir en dimoun ki vin renyon pour premye fwa e dir: “Bondye i vreman parmi zot.” (1 Korentyen 14:23-25)  Apre sa, tou le Dimans, Ray ti vin Lasal. Apre i ti konmans vin tou renyon lasemenn. Linda osi ti konmans vin bann renyon e menm si zot ti dan zot 70 an, zot ti etidye Labib e batize.

9, 10. (a) Akoz i fasil pour servi bann trak? (b) Eksplike ki mannyer pour servi sa trak Kisisa Rwayonm Bondye?

⁹ Bann trak. Nou annan wit trak parmi nou bann zouti. I fasil pour servi zot e zot vreman itil pour konmans en konversasyon. Depi ki bann premye parmi sa bann trak ti ganny lanse an 2013, plis ki senk milyon in ganny enprimen! Tou sa bann trak i annan menm forma. Alor enn fwa ki ou’n aprann servi enn, ou kapab servi tou lezot! Ki mannyer ou kapab servi en trak pour konmans en konversasyon avek en dimoun?

¹⁰ Petet ou anvi servi sa trak Kisisa Rwayonm Bondye? Montre sa dimoun sa kestyon ki devan e demann li: “Eski ou’n deza demann ou lekor Kisisa Rwayonm Bondye? Eski ou ti pou dir . . . ?” Apre demann li pour swazir enn parmi sa trwa larepons. Dan plas dir li si son larepons i bon ouswa mal, ouver sa trak kot sa seksyon “Sa ki Labib i dir” e lir sa bann verse ki’n ganny mete, Danyel 2:44 ek Izai 9:6. A lafen ou konversasyon, demann sa kestyon ki lo dernyen paz anba sa soutit “Pour reflesir lo la”: “Ki mannyer lavi pou ete avek sa dirizan Rwayonm Bondye?” Ou kapab reponn sa kestyon laprosenn fwa. Ler ou rezwenn sa dimoun, ou kapab servi leson 7 dan sa brosir Bon nouvel sorti kot Bondye! ki enn parmi bann zouti ki ed nou konmans en letid Labib.

11. Pour ki rezon nou bann magazin in ganny fer e ki nou devret konnen lo zot?

¹¹ Bann magazin. Latour Veyer ek Veye! i sa de magazin ki’n pli ganny pibliye e tradwir dan lemonn! Vi ki dimoun dan diferan pei i lir sa bann magazin, bann topik lo son kouvertir i ganny fer pour ki i enteresan pour dimoun dan lemonn antye. Nou devret servi sa bann magazin pour ed dimoun konsantre lo sa ki pli enportan dan lavi ozordi. Me avan sa, nou bezwen konnen ki magazin ki’n ganny fer pour ki kalite dimoun.

12. (a) Pour lekel magazin Veye! in ganny fer e ki son lobzektif? (b) Ki bon leksperyans ou’n gannyen resaman avek sa zouti?

¹² Veye! in ganny fer pour bann dimoun ki pa konn nanryen oubyen ki pa konn bokou lo Labib. Petet zot pa konn nanryen lo bann lansennyman Kretyen, zot pa tro annan konfyans dan larelizyon oubyen zot pa realize ki Labib i kapab ed zot dan zot lavi personnel. Enn bann lobzektif prensipal sa magazin Veye! se pour konvenk sa lekter ki Bondye i egziste. (Romen 1:20; Ebre 11:6) I osi esey ed sa lekter pour annan lafwa ki Labib i “parol Bondye parey i vreman ete.” (1 Tesalonisyen 2:13) Sa trwa magazin Veye! pour 2018 i annan sa bann tit: “Ou  kapab ere!,” “12 sekre pour en fanmir ere” e “Led pour bann ki dan dey.”

13. (a) Pour lekel magazin Latour Veyer edisyon piblik in ganny fer? (b) Ki bon leksperyans ou’n gannyen resaman avek sa zouti?

¹³ Lobzektif prensipal pour Latour Veyer edisyon piblik se pour eksplik bann lansennyman Labib avek dimoun ki deza annan en serten respe pour Bondye ek Labib. I kapab ki zot deza konn serten keksoz lo Labib, me zot pa konpran egzakteman sa ki Labib i dir. (Romen 10:2; 1 Timote 2:3, 4) Sa trwa magazin Latour Veyer pour 2018 i reponn sa bann kestyon: “Eski Labib i ankor kapab ed nou ozordi?” “Ki pou arive dan lavenir?” e “Eski Bondye i enterese avek ou?”

14. (a) Ki lobzektif sa kat video ki form parti nou bann zouti predikasyon? (b) Ki bon leksperyans ou’n gannyen ler ou’n montre sa bann video?

¹⁴ Video. Dan letan Zezi, bann sarpantye ti annan zis bann zouti mannyel. Me ozordi, bann sarpantye i annan bann zouti elektrik, tel parey lansar, dril ek masin pour poli. Ler nou prese ozordi, nou pa annan zis bann piblikasyon enprimen, nou osi annan bann zoli video pour montre dimoun. I annan kat video ki form parti nou bann zouti predikasyon: Akoz i bon etidye Labib?, Kwa ki pase dan en letid Labib?, Kwa ki pase dan Lasal Rwayonm? e Lekel Temwen Zeova? Versyon kourt sa bann video i mwens ki de minit e i bon pour servi pandan nou premye konversasyon. Nou kapab servi bann versyon long ler nou fer bann retourn vizit e avek bann ki annan plis letan. Bann video i bann zouti efikas parski zot kapab motiv bann dimoun pour etidye Labib e vin nou bann renyon.

15. Ler dimoun i get en video dan zot prop langaz, ki lefe sa i kapab annan? Donn legzanp.

¹⁵ Annou vwar en legzanp. En ser ti zwenn en madanm sorti Micronesia e son langaz maternel ti Yapese. Sa ser ti montre li sa video Akoz i bon etidye Labib? dan langaz Yapese. Ler sa video ti konmanse, sa madanm ti dir: “Mon langaz sa. Mon pa le krwar! Son aksan i fer mwan konnen ki i sorti lo mon zil. I koz mon langaz!” Apre sa, i ti dir ki i pou lir e get tou video ki dan son langaz lo jw.org. (Konpar Akt 2:8, 11.) En lot legzanp i en ser Leta-z-ini ki annan en neve ki reste lo en lot kontinan. I ti anvoy li en link pour sa menm video dan son langaz. Son neve ti get sa video e anvoy li sa imel: “Sa bout ki dir ki Dyab pe diriz lemonn i vreman enteresan. Mon’n demande pour ganny en letid Labib.” Sa i eksitan parski i reste dan en pei kot nou travay i anba restriksyon!

16. Eksplik lobzektif sak brosir: (a) Ekout Bondye e viv pour touzour. (b) Bon nouvel sorti kot Bondye! (c) Lekel ki pe fer lavolonte Zeova ozordi?

¹⁶ Brosir. Ki mannyer nou kapab ansenny laverite avek en dimoun ki pa konn lir oubyen ki napa okenn piblikasyon baze lo Labib dan son langaz? Nou kapab servi sa brosir Ekout Bondye e viv pour touzour. En bon zouti pour konmans bann letid Labib i sa  brosir Bon nouvel sorti kot Bondye! Ou kapab montre sa dimoun sa 14 topik lo dernyen paz e demann li pour swazir sa topik ki pli enteres li. Apre konmans sa letid dan sa leson. Eski ou’n esey fer sa lo ou retourn vizit? Sa trwazyenm brosir ki form parti nou zouti predikasyon i sa brosir Lekel ki pe fer lavolonte Zeova ozordi? I’n ganny fer pour ed bann etidyan Labib aprann lo nou lorganizasyon. Pour aprann ki mannyer pour servi sa brosir lo sak letid Labib, vwar Nou minister ek lavi Kretyen​—Kaye renyon pour Mars 2017.

17. (a) Ki lobzektif spesifik sak liv? (b) Kwa ki tou dimoun ki batize i bezwen fer e akoz?

¹⁷ Liv. Apre ki ou’n konmans en letid dan en brosir, nenport keler ou kapab sanze e servi sa liv Ki Labib i dir? Sa zouti i kapab ed bann dimoun aprann bann lansennyman de baz sorti dan Labib. Si sa etidyan i fer progre e i fini sa liv, ou kapab kontiny son letid dan sa liv Annou reste dan lanmour Bondye. Sa zouti pou ed sa etidyan aprann ki mannyer pour aplik bann prensip Labib dan son lavi toulezour. Rapel ki menm apre ki i batize, i bezwen kontinyen etidye ziska ler i fini tou le de liv. Sa pou ed li pour annan en lafwa for dan Zeova e reste fidel avek li.​—Lir Kolosyen 2:6, 7.

18. (a) Ki 1 Timote 4:16 i ankouraz nou pour fer konman bann ansenyan laverite e ki rezilta sa i anmennen? (b) Ki nou lobzektif anmezir ki nou servi Zouti predikasyon?

¹⁸ Konman Temwen Zeova, nou annan sa responsabilite pour ansenny dimoun “mesaz laverite konsernan sa bon nouvel” ki kapab ed zot pour ganny lavi eternel. (Kolosyen 1:5; lir 1 Timote 4:16.) Pour ed nou fer sa, nou annan Zouti predikasyon. (Vwar sa bwat “ Zouti predikasyon.”) Annou servi sa bann zouti dan sa pli bon fason ki nou kapab. Nou tou nou kapab deside ki zouti predikasyon nou anvi servi e kan ki nou pou servi li. Me rapel ki nou pa pe zis esey distribye piblikasyon e nou pa anvi donn nou bann piblikasyon avek bann dimoun ki pa enterese dan nou mesaz. Nou lobzektif se pour fer bann dimoun ki “annan sa bon kondisyon leker pour ganny lavi eternel,” setadir bann dimoun ki senser, annan limilite e ki vreman anvi konn Bondye, vin bann disip.​—Akt 13:48; Matye 28:19, 20.