1, 2. Ki Dyab ti fer ki’n fer limanite plis ditor?

SERTEN keksoz ki dimoun in envante, tel parey telefonn, glob pour lalimyer, loto ek refrizerater in amelyor lavi. Lezot keksoz ki’n ganny envante, tel parey fizi, eksplozif, sigaret ek bonm atomik, in fer lavi vin pli danzere. Me i annan en keksoz ki’n egziste avan tou sa bann keksoz e ki’n fer limanite plis ditor. Kwa sa? Koz manti! Dimoun i koz manti ler zot dir en keksoz ki zot konnen pa vre pour zot kapab anbet oubyen trik lezot. Lekel ki ti premye pour koz manti? Dyab! Zezi Kri ti apel li “papa mansonz.” (Lir Zan 8:44.) Kan ki i ti koz manti pour premye fwa?

² I ti fer sa plizyer milye lannen pase dan zarden Edenn. Adan ek Ev ti pe byen viv zot lavi dan sa zoli Paradi ki Zeova ti’n kree pour zot. Bondye ti’n dir zot ki zot ti pou mor si zot ti manz “fri sa pye ki donn konnesans lebyen ek lemal.” Menm si Satan ti konn sa, i ti servi en serpan pour dir Ev: “Zot pa pou mor.” Sa ti sa premye mansonz. Satan ti osi dir: “Bondye i konnen ki letan zot pou manz  sa fri, zot lizye pou ouver, zot pou vin parey Bondye, e zot pou konn lebyen ek lemal.”​—Zenez 2:15-17; 3:1-5.

3. Akoz nou kapab dir ki Satan ti annan en move lentansyon ler i ti koz manti e ki ti arive akoz sa?

³ Satan ti annan en move lentansyon ler i ti koz manti parski i ti konnen ki si Ev ti krwar li e manz sa fri, Ev ti pou mor. Sanmenm sa ki ti arive. Ev ti dezobei lord Zeova e pli tar Adan osi ti fer parey e avek letan zot tou le de ti mor. (Zenez 3:6; 5:5) An plis ki sa, “tou dimoun i mor” akoz Adan ti’n fer pese. Anfet, “lanmor in osi domin lo sa bann ki ti fer pese menm si zot pa ti fer pese parey Adan.” (Romen 5:12, 14) I pour sa rezon ki nou pa parfe e nou pa viv pour touzour parey Bondye ti anvi. Okontrer, nou viv zis pour apepre “70 an, parfwa 80 an pour bann ki pli for” e dan lavi “nou konn zis traka ek lapenn.” (Psonm 90:10) Tousala in arive akoz Satan ti koz manti!

4. (a) Ki bann kestyon nou bezwen reponn? (b) Dapre Psonm 15:1, 2, zis lekel ki kapab vin zanmi Zeova?

⁴ Zezi ti dir sa lo Satan: “I ti kit laverite parski laverite pa dan li.” Satan pa’n sanze. I ankor pe “anbet dimoun lo later antye” avek son bann mansonz. (Revelasyon 12:9) Me nou nou pa anvi ki Satan i anbet nou. Alor nou bezwen konn larepons trwa kestyon. Ki mannyer Satan pe anbet dimoun ozordi? Akoz dimoun i koz manti? Ki mannyer nou kapab toultan koz laverite pour ki nou pa perdi nou lanmitye avek Zeova parey Adan ek Ev?​—Lir Psonm 15:1, 2.

5. Ki mannyer Satan pe anbet dimoun ozordi?

⁵ Nou kapab evite ganny anbete par Satan. Zapot Pol ti dir: “Nou konn byen son bann lentansyon.” (2 Korentyen 2:11, not) Nou konnen ki Satan i kontrol lemonn antye, enkli bann fo larelizyon, gouvernman koronpi ek biznes ki profit lo dimoun. (1 Zan 5:19) Alor nou pa sirprann ki Satan ek son bann demon i enfliyans bann dimoun ki annan pouvwar pour koz “mansonz.” (1 Timote 4:1, 2) Par egzanp, serten dimoun ki fer biznes i koz manti dan zot bann piblisite pour vann bann prodwi ki pa bon pour nou oubyen pour trik bann dimoun e pran zot larzan.

6, 7. (a) Akoz i pli pir ler bann sef relizye i koz manti? (b) Ki bann mansonz ou’n tann bann sef relizye dir?

⁶ I pli pir ankor ler bann sef relizye i koz manti. Akoz? Parski si en dimoun i krwar zot bann fo lansennyman e fer bann keksoz ki Bondye i deteste, sa dimoun i kapab perdi sa loportinite pour viv pour touzour. (Osea 4:9) Ler Zezi ti lo later i ti konnen ki bann sef relizye ti pe anbet bann dimoun. I pa ti ezite pour dir zot: “Maler lo zot, profeser lalwa ek Farizyen, ipokrit! akoz zot vwayaz lo lanmer ek later pour konverti en dimoun e ler i’n konverti, zot fer li riske ganny zete dan Zeenn,” setadir, destriksyon eternel. (Matye 23:15; not) Zezi ti dir ki sa bann sef fo larelizyon ti zis parey zot papa Dyab, ki en “mertriye.”​—Zan 8:44.

 ⁷ Ozordi osi i annan bokou sef relizye. I kapab ki zot ganny apele paster, pret, rabi ouswa lezot tit. Parey bann Farizyen, zot pa ansenny laverite ki sorti dan Parol Bondye me “zot in swazir pour krwar dan mansonz plito ki laverite lo Bondye.” (Romen 1:18, 25) Serten zot mansonz i lansennyman lo lanfer, ki bann imen i annan en nanm imortel, ki bann mor pou ne ankor e reganny lavi konman en lot dimoun ouswa en zannimo e ki Bondye i aksepte fason viv bann omoseksyel ek maryaz dimoun menm sèks.

8. Ki mansonz bann dirizan politik pou dir byento, me ki mannyer nou devret reakte?

⁸ Bann politisyen osi in koz manti pour anbet bann dimoun. Enn bann pli gro mansonz ki zot pou dir byento, se ki zot in anmenn “lape ek sekirite” dan lemonn. Me “en destriksyon pou vin lo zot en sel kou.” Alor nou pa devret krwar sa bann dirizan politik ki dir ki keksoz pe amelyore. Me nou nou “konn tre byen ki zour Zeova pe vin egzakteman parey en voler dan lannwit.”​—1 Tesalonisyen 5:1-4.

9, 10. (a) Akoz dimoun i koz manti e ki konsekans sa in anmennen? (b) Ki nou devret rapel lo Zeova?

⁹ Ozordi, pa zis bann dimoun ki annan pouvwar ki koz manti. Sa lartik “Why We Lie” ki’n ganny ekrir par Y. Bhattacharjee, i dir ki “koz manti in ganny rekonnet konman en tre ki byen anrasinen dan bann imen.” Andotmo, bann dimoun i krwar ki i normal e natirel pour koz manti. Souvandfwa dimoun i koz manti pour protez zot lekor, petet pour kasyet bann fot oubyen krim ki zot in fer. Zot osi koz manti pour fer larzan oubyen pour benefisye zot lekor dan en kek fason. Sa lartik i osi dir ki serten dimoun pa vwar li mal pour koz manti avek “bann dimoun ki zot pa konnen, zot koleg travay, zot zanmi ek bann dimoun ki zot kontan.”

¹⁰ Ki konsekans sa bann mansonz in anmennen? Dimoun i nepli annan konfyans dan kanmarad e sa i gat bann relasyon. Par egzanp, mazinen ki mannyer en msye marye ki fidel i santi ler i aprann ki son madanm in tronp li e ki apre i’n koz manti avek li pour kasyet sa ki i’n fer. Oubyen mazinen ki kantite i mal ler en msye i tret son madanm ek zanfan dan en move fason kot lakour, me devan lezot i fer krwar ki i kontan zot e ki i pran byen swen avek zot. Sa bann dimoun i kapab anbet lezot imen me nou devret rapel ki zot pa kapab anbet Zeova. Labib i dir ki “tou keksoz i touni e o kler devan” Bondye.​—Ebre 4:13.

11. Ki nou aprann avek move legzanp Ananyas ek Safira? (Vwar portre o konmansman sa lartik.)

¹¹ Dan Labib, i annan legzanp en  koup Kretyen ki ti ganny enfliyanse par Satan pour koz manti avek Bondye. Ananyas ek Safira ti esey anbet bann zapot. Zot ti vann en bout later e apre donn zis en porsyon sa larzan avek bann zapot. Ananyas ek Safira ti anvi enpresyonn lezot dan kongregasyon, alor zot ti dir bann zapot ki zot ti’n donn tou sa larzan. Me Zeova ti konnen ki zot pe koz manti e i ti pini zot.​—Akt 5:1-10.

12. Ki pou arive avek bann dimoun ki koz manti avek en move lentansyon e ki pa repantir? Akoz?

¹² Ki mannyer Zeova i santi konsernan bann dimoun ki koz manti? Tou dimoun ki koz manti avek en move lentansyon e ki pa repantir, pou ganny zete dan “lak dife,” zis parey Satan. Andotmo, zot pou ganny detrir pour touzour. (Revelasyon 20:10; 21:8; Psonm 5:6) Akoz? Parski Zeova i konsider sa bann dimoun ki koz manti dan menm fason ki i konsider tou bann “ki fer bann keksoz degoutan devan Bondye.”​—Revelasyon 22:15, not.

13. Ki nou konnen lo Zeova e ki sa i pous nou pour fer?

¹³ Nou konnen ki Zeova “pa parey zonm pour li koz manti” e ki i “enposib pour li koz manti.” (Nonm 23:19; Ebre 6:18) “[Zeova] i deteste . . . en labous mansonz.” (Proverb 6:16, 17) Si nou anvi fer li plezir, nou bezwen koz laverite. Alor nou “pa koz manti avek kanmarad.”​—Kolosyen 3:9.

14. (a) Kwa ki fer bann vre Kretyen diferan avek bann manm fo larelizyon? (b) Eksplik sa prensip ki dan Lik 6:45.

¹⁴ En fason ki bann vre Kretyen i diferan avek bann manm fo larelizyon se ki  zot “koz laverite.” (Lir Zekarya 8:16, 17.) Pol ti dir: “Nou montre ki nou bann serviter Bondye . . . par koz laverite.” (2 Korentyen 6:4, 7) Zezi ti dir ki dimoun “i koz sa ki deborde dan leker.” (Lik 6:45) Sa i vedir ki en dimoun onnet pou koz laverite. I pou koz laverite avek bann dimoun ki i pa konnen, bann koleg travay, zanmi ek bann dimoun ki i kontan. Aprezan nou pou diskit lo serten fason ki nou kapab montre ki nou pe esey onnet dan tou keksoz.

15. (a) Akoz i mal pour viv de kalite lavi? (b) Kwa ki kapab ed bann zenn pour reziste presyon lezot? (Vwar not.)

¹⁵ Si ou en zenn, petet ou anvi ganny aksepte par lezot zenn ou laz. Me sa dezir pour ganny aksepte par lezot i fer ki serten zenn pe viv de kalite lavi. Ler zot avek zot fanmir ek kongregasyon, zot fer krwar ki zot pe viv dapre bann standar Zeova lo moralite, me zot konpletman diferan ler zot lo rezo sosyal ouswa avek bann dimoun ki pa servi Zeova. Petet zot pou servi langaz obsenn, met bann lenz ki pa apropriye, ekout bann sanson ki annan parol sal, bwar pour sou, servi drog, pwente an sekre oubyen lezot move keksoz. Zot pe koz manti avek zot paran, zot bann frer ek ser e avek Zeova. (Psonm 26:4, 5) Me Zeova i konnen ler nou dir ki nou onor li me apre fer bann keksoz ki i deteste. (Mark 7:6) I pli bon pour aplik sa proverb: “Pa zalou bann peser dan ou leker; me touzour annan respe anver [Zeova].”​—Proverb 23:17. * (Vwar not.)

16. Ki mannyer nou devret reponn bann kestyon ler nou pe fer laplikasyon pour servis a plen tan?

¹⁶ Si ou anvi vin en pionye ordiner oubyen konmans en form servis spesyal a plen tan, par egzanp servi dan Betel, ou bezwen ranpli en form laplikasyon. I vreman enportan ki ou reponn onnetman bann kestyon konsernan ou lasante, kalite divertisman ki ou swazir e bann kestyon ki annan pour fer avek moralite. (Ebre 13:18) Me ki ou kapab fer si ou’n fer en keksoz ki Zeova i deteste ouswa ki pe fatig ou konsyans e ou pa’n koz lo la avek bann ansyen? Demann zot pour ed ou, koumsa ou kapab servi Zeova avek en konsyans kler.​—Romen 9:1; Galat 6:1.

17. Ki nou devret fer ler bann ki pe persekit nou i kestyonn nou lo nou bann frer ek ser?

¹⁷ Ki ou devret fer si nou travay i ganny enterdi kot ou reste e lotorite i aret ou e kestyonn ou lo ou bann frer ek ser? Eski ou devret dir zot tou keksoz ki ou konnen? Ki Zezi ti fer ler en  gouverner Romen ti kestyonn li? Zezi ti aplik sa prensip Labib ki dir ki i annan “en letan pour reste trankil e en letan pour koze” e parfwa i pa ti dir nanryen! (Eklezyast 3:1, 7; Matye 27:11-14) Si nou dan en sityasyon parey, nou bezwen pridan pour ki nou pa met nou bann frer ek ser an danze.​—Proverb 10:19; 11:12.

18. Ki nou responsabilite si bann ansyen i demann nou kestyon lo nou bann frer ek ser?

¹⁸ Ki ou pou fer si en dimoun dan kongregasyon in fer en pese grav e ou ou konnen? Bann ansyen i annan sa responsabilite pour gard kongregasyon moralman pir, alor petet zot pou demann ou lenformasyon lo la. Ki ou pou fer, sirtou si sa dimoun i enn ou bon zanmi oubyen ou fanmir? Labib i dir: “Sa enn ki dir laverite i rann en temwannyaz onnet.” (Proverb 12:17; 21:28) Alor ou annan sa responsabilite pour dir bann ansyen tou laverite san kasyet nanryen. Bann ansyen i annan sa drwa pour konn tou lenformasyon egzakt pour ki zot kapab trouv sa pli bon fason pour ed sa dimoun repar son relasyon avek Zeova.​—Zak 5:14, 15.

19. Ki nou pou diskite dan sa lot lartik?

¹⁹ David ti priy Zeova: “Ou kontan laverite ki dan fon leker.” (Psonm 51:6) David ti konnen ki sa ki enportan, i sa ki nou ete anndan. A tou moman, bann vre Kretyen i “koz laverite avek [zot] prosen.” En lot fason ki nou montre ki nou diferan avek bann manm fo larelizyon i ler nou ansenny laverite ki dan Labib. Dan sa lot lartik, nou pou diskit lo ki mannyer nou kapab fer sa dan predikasyon.