1, 2. (a) Ki mannyer bann sanzman ki ariv en sel kou dan lavi i afekte nou? (Vwar portre o konmansman sa lartik.) (b) Dapre Psonm 131, kwa ki kapab ed nou pour annan lape lespri?

APRE ki Lloyd ek Alexandra ti’n servi dan Betel pour plis ki 25 an, zot ti ganny demande pour al servi konman pionye. Premye kou, zot ti sagren. Lloyd i dir: “Mon ti santi ki Betel ek mon travay dan Betel ti’n vin sa ki mon ete. Mon ti konpran akoz i ti annan sa bann sanzman, me pli bann semenn ek mwan ti pase, mon ti santi konmsi mon ti’n ganny rezete.” I annan zour ki Lloyd ti vwar sa sanzman konman en bon keksoz, me i annan zour kot i ti santi li dekouraze.

² Tanzantan, i pou annan bann sanzman dan lavi ki nou pa ti ekspekte e zot kapab fer nou vreman enkyet e strese. (Proverb 12:25) Ler bann sanzman i difisil pour aksepte ouswa aziste avek, ki nou kapab fer pour reste  kalm? (Lir Psonm 131:1-3.) Annou vwar lafason ki serten serviter Zeova dan lepase e dan nou letan ti annan lape lespri, menm ler zot lavi ti sanz en sel kou.

3. Ki mannyer lavi Zozef ti sanz en sel kou?

³ Par egzanp, mazin lo Zozef. Parmi tou bann garson Zakob, Zozef ti son prefere. Sa ti fer son bann frer vreman zalou. Ler Zozef ti annan 17 an, zot ti vann li konman en lesklav. (Zenez 37:2-4, 23-28) Pour apepre 13 an, i ti soufer Lezip, premye kou konman en lesklav e pli tar konman en prizonnyen. Zozef ti vreman lwen avek son papa ki i ti kontan en kantite. Son sityasyon ti’n kapab fer li dezespere e ankoler, me pa sa ki i ti fer. Kwa ki ti ed li?

4. (a) Ki Zozef ti fer ler i ti dan prizon? (b) Ki mannyer Zeova ti reponn lapriyer Zozef?

⁴ Ler Zozef ti pe soufer dan prizon, i bezwen ki i ti pe konsantre lo lafason ki Zeova ti pe ed li. (Zenez 39:21; Psonm 105:17-19, NWT) Petet i ti osi mazin lo sa bann rev profetik ki i ti’n gannyen ler i ti ankor zenn e i kapab ki sa ti reasir li ki Zeova ti avek li. (Zenez 37:5-11) I tre probab ki i ti priy souvan e dir Zeova tou sa ki ti dan son leker. (Psonm 145:18) Zeova ti reponn lapriyer Zozef par donn li plis konfyans ki I ti pou “avek li” malgre nenport kwa ki arive.​—Akt 7:9, 10. * (Vwar not.)

5. Ki mannyer “lape Bondye” i kapab fer nou pli determinen pour servi Zeova?

⁵ Nenport ki sityasyon difisil ki nou ladan, nou kapab annan “lape Bondye” ki protez nou “lespri” e kalme nou. (Lir Filipyen 4:6, 7.) Ler nou enkyet e strese, “lape Bondye” i kapab donn nou lafors pour kontinyen servi Zeova e pour pa abandonnen. Annou aprann konsernan serten frer ek ser dan nou letan ki’n eksperyans sa.

6, 7. Ki mannyer nou lapriyer i ed nou pour reganny nou lape lespri? Donn en legzanp.

⁶ Ler Ryan ek Juliette ti tande ki zot ti pou nepli bann pionye spesyal tanporer, zot ti dekouraze. Ryan i dir: “Deswit nou ti priy Zeova konsernan sa. Nou ti konnen ki nou ti annan en loportinite spesyal pour demontre konfyans dan li. En kantite dan nou kongregasyon ti nouvo dan laverite, alor nou ti priye ki Zeova i ed nou pour kit en bon legzanp lafwa pour zot.”

⁷ Ki mannyer Zeova ti reponn zot lapriyer? Ryan i dir: “Deswit apre ki nou ti’n priye, bann santiman negatif ek lenkyetid ki nou ti annan ti disparet. Lape Bondye ti pe protez nou leker ek lespri. Nou ti realize ki nou kapab kontinyen itil pour Zeova si nou ti gard sa bon latitid.”

8-10. (a) Ki mannyer lespri sen Bondye i kapab ed nou ler nou enkyet? (b) Ki mannyer Zeova i kapab ed nou ler nou konsantre dan nou servis pour Zeova?

⁸ Lespri sen Bondye i kapab fer nou santi nou kalm e i osi kapab ed nou  vwar bann verse Labib ki pou ed nou konpran sa ki vreman enportan dan lavi. (Lir Zan 14:26, 27.) Annou vwar sa ki ti arive avek Philip ek Mary, en koup marye ki ti dan Betel pour preski 25 an. Dan kat mwan, tou le de ti perdi zot manman ek en lot fanmir pros dan lanmor e zot ti bezwen pran swen avek papa Mary, ki annan dementia.

⁹ Philip i dir: “Mon ti krwar ki mon ti pe fer fas avek sa sityasyon ase byen, me en keksoz ti manke. Mon ti vwar Kolosyen 1:11 dan en lartik letid Latour Veyer. I vre ki mon ti pe andire, me pa dan tou keksoz. Mon ti bezwen ‘andir tou keksoz avek pasyans ek lazwa.’ Sa verse ti fer mwan rapel ki mon lazwa dan lavi pa depan lo mon bann sirkonstans, me lo lefe ki lespri sen Bondye i annan dan mon lavi.”

¹⁰ Vi ki Philip ek Mary ti reste konsantre dan zot servis pour Zeova, i ti beni zot dan plizyer fason. Pa lontan apre ki zot ti’n kit Betel, zot tou le de zot ti ganny bann letid Labib ki ti fer bon progre e ki ti anvi etidye plis ki en fwa par semenn. Mary i dir: “Zot ti nou sours lazwa e i ti lafason ki Zeova ti pe dir nou ki tou keksoz pour al byen.”

11, 12. (a) Ki Zozef ti fer ki Zeova ti kapab beni? (b) Ki mannyer Zeova ti rekonpans Zozef?

¹¹ Ler bann sanzman i ariv en sel kou dan lavi, nou kapab sitan enkyet ki nou mazin zis nou problenm. Sa ti’n kapab arive avek Zozef. Me olye fer sa, i ti swazir pour fer son mye dan sa sityasyon. Zis parey Zozef ti’n travay dir pour Potifar, i ti travay dir dan prizon pour fer nenport kwa ki zofisye prizon ti donn li pour fer.​—Zenez 39:21-23.

¹² En zour, Zozef ti ganny demande pour okip de prizonnyen ki ti’n servi dan lakour Faraon. Zozef ti zantiy avek zot e sa bann zonm ti santi zot alez pour dir li zot bann lenkyetid ek bann rev enkyetan ki zot ti’n gannyen lavey. (Zenez 40:5-8) Zozef pa ti konnen ki sa konversasyon ti pou finalman fer li ganny son liberte. De-z-an pli tar, i ti ganny large prizon e vin en dirizan ki ti annan bokou pouvwar Lezip. Zis Faraon ki ti annan plis pouvwar ki Zozef!​—Zenez 41:1, 14-16, 39-41.

13. Ki mannyer nou kapab azir dan en fason ki Zeova pou beni nou, malgre nenport sityasyon ki nou ladan?

 ¹³ Parey Zozef, nou kapab vwar nou dan en sityasyon ki nou pa vreman kapab kontrole. Me si nou annan pasyans e fer nou mye, Zeova pou beni nou. (Psonm 37:5, NWT) Menm ler nou santi nou konfize e enkyet, nou pa pou “dezespere.” (2 Korentyen 4:8; not) Zeova pou avek nou, espesyalman si nou reste konsantre lo nou minister.

14-16. Ki mannyer Filip sa predikater ti reste konsantre lo son minister menm si son lavi ti sanze?

¹⁴ Filip sa predikater ti en bon legzanp en dimoun ki ti reste konsantre lo son minister malgre nenport ki fason son lavi ti sanze. I ti annan en letan kot i ti pe byen desarz en nouvo responsabilite Zerizalenm. (Akt 6:1-6) Me apre tou keksoz ti sanze. Apre ki Etyenn ti’n ganny touye, bann Kretyen ti ganny persekite severman e zot ti sove e kit Zerizalenm. Vi ki Filip ti anvi reste okipe dan servis Zeova, i ti al lavil Samari kot dimoun ti bezwen tann sa bon nouvel.​—Matye 10:5; Akt 8:1, 5.

¹⁵ Filip ti pare pour al nenport landrwa kot lespri sen Bondye ti diriz li. Alor Zeova ti servi li pour pres dan bann landrwa kot dimoun pa ti ankor tann sa bon nouvel. En kantite Zwif ti mepriz bann Samariten e pa tret zot byen. Me Filip pa ti annan prezidis e avek devouman i ti anons sa bon nouvel avek bann Samariten. “Tou dimoun dan lafoul” ti ekout li!​—Akt 8:6-8.

¹⁶ Apre sa, lespri sen Bondye ti diriz Filip pour pres dan bann lavil Asdod ek Sezare, kot i ti annan bokou non Zwif. (Akt 8:39, 40) Apre lavi Filip ti sanz ankor. I ti etabli li dan sa landrwa e fer en fanmir. Me malgre nenport ki fason lavi Filip ti sanze, i ti reste okipe dan son minister e Zeova ti kontinyen beni li ek son fanmir.​—Akt 21:8, 9.

17, 18. Ler nou lavi i sanze, ki mannyer reste konsantre dan predikasyon pou ed nou?

¹⁷ En kantite ki dan servis a plen tan i  dir ki reste konsantre dan zot minister i ed zot reste zwaye e pozitif menm ler zot sirkonstans i sanze. Par egzanp, ler en koup Sid Afriken ki apel Osborne ek Polite ti kit Betel, zot ti krwar ki i ti pou fasil pour trouv en travay a mitan ek en landrwa reste. Me Osborne i dir: “Malerezman, nou pa ti ganny en travay deswit parey nou ti’n swete.” Polite i dir: “Nou pa ti trouv en travay pour trwa mwan e nou ti napa okenn larzan dekote. Sa ti en vre defi.”

¹⁸ Kwa ki ti ed Osborne ek Polite dan sa sityasyon enkyetan? Osborne i dir: “Ler nou ti al predikasyon avek lezot dan kongregasyon sa ti vreman ed nou reste konsantre e pozitif.” Olye zis asiz kot lakour dan traka, zot ti deside pour reste okipe dan predikasyon. Sa ti donn zot en gran lazwa! Osborne i osi azoute: “Nou ti mars partou pour rod en travay e finalman nou ti ganny en travay.”

19-21. (a) Kwa ki pou ed nou gard nou lape lespri? (b) Ki mannyer nou kapab benefisye ler nou aziste avek en sanzman ki nou pa ekspekte?

¹⁹ Parey nou’n vwar, si nou fer nou mye dan nou sirkonstans e met tou nou konfyans dan Zeova, nou pou kapab gard nou lape lespri malgre nenport kwa ki arive. (Lir Mika 7:7.) Avek letan, petet nou pou realize ki lafason ki nou’n aziste avek en sanzman in aktyelman ranforsi nou lanmitye avek Zeova. Polite i eksplike ki ler i’n kit Betel i’n aprann ki savedir pour vreman depan lo Zeova menm ler lavi i paret vreman difisil. I dir: “Mon relasyon avek li in vin pli for.”

²⁰ Mary, ki nou’n koz lo la pli boner, i ankor pe pran swen avek son papa aze e  fer pionye an menm tan. I dir: “Mon’n aprann ki ler mon enkyet, mon bezwen arete, priye e reste kalm. I tre probab ki les keksoz dan lanmen Zeova i sa pli gran leson ki mon’n aprann e mon pou bezwen fer sa plis ankor a lavenir.”

²¹ Lloyd ek Alexandra i admet ki bann sanzman dan zot lavi in teste zot lafwa dan bann fason ki zot pa ti ekspekte. Me zot kapab vwar lafason ki sa bann tes in ed zot. Aprezan zot konnen ki zot lafwa i ase for pour rekonfort zot ler zot annan problenm e zot santi ki zot in vin bann meyer dimoun.

22. Si nou fer nou mye dan nou sirkonstans, ki nou kapab asire?

²² Dan sa lemonn, nou lavi i kapab sanz en sel kou. Nou kapab ganny en lot responsabilite dan servis Zeova, devlop bann problenm lasante oubyen bezwen pran swen avek nou fanmir dan en nouvo fason. Me malgre nenport kwa ki arive, annan konfyans ki Zeova i enterese avek ou e i pou ed ou dan sa moman apropriye. (Ebre 4:16; 1 Pyer 5:6, 7) Pour le moman, fer ou mye dan ou sityasyon. Priy ou Papa Zeova e aprann pour depan lo li konpletman. Dan sa fason, malgre nenport ki fason ou sirkonstans i sanze, ou pou toultan annan lape lespri ki sorti kot Zeova.