1, 2. Ki sa gro responsabilite Zozye ti gannyen apre ki Moiz ti’n mor?

ZEOVA ti dir Zozye: “Mon serviter Moiz in mor. Aprezan, leve, travers larivyer Zourden, ou avek tou sa pep e antre dan sa pei ki mon pe donn bann Izraelit.” (Zozye 1:1, 2) Sa ti en gran sanzman pour Zozye ki ti’n servi konman asistan Moiz pour preski 40 an!

² Moiz ti’n gid bann Izraelit pour en kantite letan, me aprezan Zozye ki ti pou gid zot. Alor petet i ti’n mazinen si sa pep ti pou aksepte li konman zot sef. (Deterononm 34:8, 10-12) En liv referans lo Labib i refer avek Zozye 1:1, 2 e dir ki enn bann moman pli difisil e danzere pour en nasyon, ki swa dan lepase ouswa ozordi, i ler en sef pe ganny ranplase par en lot.

3, 4. Ki mannyer Bondye ti beni Zozye vi ki i ti’n met konfyans dan li e ki kestyon nou kapab demande?

³ Zozye ti annan rezon pour li enkyet. Me i ti met son konfyans dan Zeova e i pa ti tarde pour swiv son bann  lenstriksyon. (Zozye 1:9-11) Bondye ti beni Zozye akoz i ti’n met konfyans dan li e i ti servi en lanz pour gid Zozye ek bann Izraelit. I tre probab ki sa lanz ti Parol, setadir Garson premye ne Bondye.​—Egzod 23:20-23; Zan 1:1.

⁴ Zeova ti ed nasyon Izrael pour byen adapte avek bann sanzman ki i ti annan ler Zozye ti vin zot nouvo sef. Dan nou letan osi i annan bokou gran sanzman ki pe arive. Petet nou pe mazinen, ‘Anmezir ki lorganizasyon Bondye i kontinyen progrese, eski nou annan rezon pour met nou konfyans dan Zezi ki’n ganny apwente konman nou Sef?’ (Lir Matye 23:10.) Pour reponn sa kestyon, nou pou egzamin lafason ki Zeova ti gid son pep dan lepase ler i ti annan bann sanzman.

5. Ki leksperyans drol Zozye ti gannyen o bor Zeriko? (Vwar portre o konmansman sa lartik.)

⁵ Pa bokou letan apre ki bann Izraelit ti’n travers Larivyer Zourden, Zozye ti ganny en leksperyans drol. I ti zwenn en zonm avek en lepe “o bor Zeriko” (NWT) e i ti demann sa zonm: “Eski ou pour nou, oubyen pour nou lennmi?” Zozye ti sirprann ler sa zonm ti dir ki i ti “sef larme [Zeova],” en lanz ki ti’n pare pour defann pep Bondye. (Lir Zozye 5:13-15.) Menm si lezot resi Labib i dir ki Zeova ti pe koz direkteman avek Zozye, i paret ki Bondye ti pe servi en lanz pour koz dan son plas, parey i ti fer souvan dan lepase.​—Egzod 3:2-4; Zozye 4:1, 15; 5:2, 9; Akt 7:38; Galat 3:19.

6-8. (a) Akoz serten lenstriksyon ki sa lanz ti donnen ti kapab paret drol? (b) Ki mannyer nou konnen ki bann lenstriksyon ti saz e ganny donnen a sa bon moman? (Vwar osi not.)

⁶ Sa lanz ti dir Zozye egzakteman sa ki i ti bezwen fer pour konkerir Zeriko. O konmansman, serten sa bann lenstriksyon ti kapab paret drol. Par egzanp, sa lanz ti dir Zozye sirkonsi tou bann solda. Sa ti vedir ki pour detrwa zour zot pa ti pou kapab lager. Eski sa ti sa pli bon moman pour sirkonsi sa bann zonm?​—Zenez 34:24, 25; Zozye 5:2, 8.

⁷ Petet bann solda ti pe mazinen, ‘Ki mannyer nou pou protez nou fanmir si bann lennmi i atak nou kan?’ Me en keksoz ti arive ki zot pa ti pe ekspekte! Olye atak bann Izraelit, bann zonm Zeriko ti konmans per zot. Nou lir: “Lavil Zeriko ti konpletman fermen devan pep Izrael. Personn pa ti ni antre, ni sorti.” (Zozye 6:1) I bezwen ki sa nouvel ti fer bann Izraelit met plis konfyans dan gidans Bondye!

⁸ Sa lanz ti dir Zozye ki bann Izraelit pa devret atak Zeriko. O kontrer, zot ti bezwen mars otour sa lavil en fwa par zour pandan sis zour e setyenm zour, zot ti pou bezwen fer set letour. I kapab ki bann solda ti’n mazinen, ‘Sa i en gaspiyaz letan ek lenerzi!’ Me Sef envizib bann Izraelit ti konn egzakteman sa ki i ti pe fer! Lefet ki bann Izraelit ti swiv sa bann lenstriksyon, zot lafwa ti vin pli for e zot pa ti bezwen al lager  avek bann solda Zeriko.​—Zozye 6:2-5; Ebre 11:30. * (Vwar not.)

9. Akoz nou devret swiv tou lenstriksyon ki nou gannyen avek lorganizasyon Bondye? Donn en legzanp.

⁹ Ki nou aprann avek sa resi? Parfwa lorganizasyon Zeova i fer bann keksoz dan en nouvo fason e pa toultan ki nou konpran akoz. Par egzanp, petet nou pa’n toultan mazinen ki i en bon nide pour servi bann lekipman elektronik pour letid personnel, predikasyon ouswa renyon. Me aprezan i tre probab ki nou vwar bann byenfe ki nou gannyen ler nou servi sa bann keksoz si i posib. Ler nou vwar bann rezilta pozitif ki sa bann sanzman i anmennen, nou lafwa i vin pli for e nou vin pli ini avek nou bann frer ek ser.

10. Lekel vreman ki ti fer laranzman pour sa renyon enportan ki konsey direkter ti fer an Zerizalenm konsernan sirkonsizyon?

¹⁰ Apepre 13 an apre ki Korney, en non Zwif ki pa ti sirkonsi ti vin en Kretyen, serten Kretyen Zwif ti ankor pe dir ki sirkonsizyon ti neseser. (Akt 15:1, 2) Dan lavil Antyos, bann frer ti ankor pe diskit konsernan sa. Alor bann ansyen ti fer laranzman pour Pol al demann konsey direkter Zerizalenm lo sa size. Me lekel ki ti pe vreman fer laranzman pour li ale? Pol ti eksplike: “Se  Senyer ki ti dir mwan retourn laba.” I kler ki Kris ki ti pe diriz bann keksoz pour ki sa kestyon i ganny reponn par konsey direkter.​—Galat 2:1-3.

11. (a) Ki serten Kretyen Zwif ti ankor krwar konsernan sirkonsizyon? (b) Ki mannyer Pol ti montre ki i siport bann ansyen Zerizalenm? (Vwar osi not.)

¹¹ Kris ti diriz konsey direkter pour fer li kler ki bann Kretyen non Zwif pa ti bezwen ganny sirkonsi. (Akt 15:19, 20) Kantmenm sa, plizyer lannen pli tar, en kantite Kretyen Zwif ti kontinyen sirkonsi zot garson. Apre sa, bann ansyen Zerizalenm ti tann sa rimer ki Pol ti napa respe pour Lalwa Moiz. Alor, bann ansyen ti demann Pol pour fer en keksoz ki ti pou montre ki i annan respe pour Lalwa. * (Vwar not.) (Akt 21:20-26) Zot ti dir Pol anmenn kat zonm avek li kot tanp pour ki dimoun i vwar ki i annan respe pour Lalwa. Pol ti’n kapab dir: ‘Sa pa fer sans! Akoz zot demann mwan pour fer sa? Bann Kretyen Zwif ki pa konpran sa zafer sirkonsizyon i sa bann ki annan problenm.’ Me Pol ti konpran ki bann ansyen ti anvi ki tou Kretyen i ini, alor avek limilite i ti swiv zot lenstriksyon. Pourtan, petet nou pe mazinen akoz Zezi ti permet sirkonsizyon pour kontinyen vin en problenm tou sa letan, menm si Lalwa Moiz ti’n ganny aboli ler Zezi ti mor.​—Kolosyen 2:13, 14.

12. Petet, akoz Kris ti les letan pase avan ki i ti konpletman reponn sa kestyon lo sirkonsizyon?

¹² I kapab pran letan pour aziste avek en nouvo konprenezon. Serten Kretyen Zwif ti bezwen letan pour aksepte ki zot ti nepli anba Lalwa. (Zan 16:12) Zot ti abitye krwar ki sirkonsizyon ti en siny ki zot ti annan en relasyon spesyal avek Bondye. (Zenez 17:9-12) Lezot ti per ki zot ti pou ganny persekite dan zot kominote si zot ti diferan. (Galat 6:12) Me avek letan, Kris ti donn zot plis lenstriksyon atraver bann let sorti kot Pol.​—Romen 2:28, 29; Galat 3:23-25.

13. Kwa ki kapab ed nou pour siport fason ki Kris pe gid nou ozordi?

¹³ Kris i ankor Sef kongregasyon Kretyen ozordi. Alor si lorganizasyon i fer en sanzman ki ou pa konpran, mazin lo lafason ki Kris ti gid pep Bondye dan lepase. Ki swa dan letan Zozye ouswa dan letan bann zapot, Kris in toultan donn bann lenstriksyon saz pour protez pep Bondye, fer zot lafwa for e ed zot reste ini.​—Ebre 13:8.

14-16. Ki mannyer lenstriksyon sorti kot “lesklav fidel e pridan” i prouve ki Kris i anvi ed nou gard nou lafwa for?

¹⁴ Ozordi, “lesklav fidel e pridan” i donn nou lenstriksyon ki nou bezwen dan sa moman apropriye. (Matye  24:45) Sa lenstriksyon i prouve ki Zezi i enterese avek nou. Marc, ki annan kat zanfan i dir: “Satan pe esey afebli bann kongregasyon par atak bann fanmir. La aprezan ki bann sef fanmir i ganny ankouraze pour fer ladorasyon fanmir sak semenn, i kler ki zot bezwen protez zot fanmir!”

¹⁵ Ler nou vwar lafason ki Kris pe gid nou, nou pou konpran ki i anvi ed nou pour gard nou lafwa for. Par egzanp, en ansyen ki apel Patrick i dir: “Premye kou, serten ti vwar li dekourazan pour zwenn dan bann pti group pour predikasyon dan wikenn.” Me i dir ki sa sanzman i montre lafason ki Zezi i pran swen avek tou dimoun dan kongregasyon. Par egzanp, serten frer ek ser ki timid ouswa ki pa ti tro al predikasyon i santi ki aprezan zot prezans i pli konte e ki zot pli itil. Sa in fer zot lafwa vin pli for.

¹⁶ Kris i osi ed nou pour reste konsantre dan nou travay predikasyon ki sa travay pli enportan ki pe ganny fer lo later ozordi. (Lir Mark 13:10.) En nouvo ansyen ki apel André in toultan esey swiv tou nouvo lenstriksyon ki lorganizasyon Zeova i donnen. I dir: “Lefet ki lakantite dimoun ki pe travay dan bann biro brans in ganny redwir, sa i fer nou rapel ki letan i kourt e ki nou bezwen konsantre lo sa travay predikasyon.”

17, 18. Akoz nou devret konsantre lo bann fason ki nou benefisye ler nou aziste avek bann sanzman?

¹⁷ Lenstriksyon ki nou gannyen sorti kot Zezi Kri nou Lerwa ki pe dirize, pou ed nou la konmela e dan lavenir. Esey konsantre lo bann fason ki ou’n benefisye akoz ou’n aziste avek bann  sanzman ki’n arive dernyenman. Pandan ladorasyon fanmir, ou kapab diskit lo lafason ki bann sanzman dan renyon ouswa dan predikasyon in ed ou fanmir.

¹⁸ Si nou rapel ki ler nou swiv bann lenstriksyon ki sorti kot lorganizasyon Zeova sa i anmenn bann bon rezilta, i pou pli fasil pour swiv sa lenstriksyon e vin ere. Par egzanp, vi ki nou pa enprim sa kantite piblikasyon parey avan, nou pe depans mwens larzan. Osi, vi ki nou servi bann nouvo teknolozi nou kapab pres sa bon nouvel avek plis dimoun. Eski nou kapab servi plis bann piblikasyon dan forma elektronik ek bann video? Sa i en fason ki nou kapab siport Kris ki anvi ki nou byen servi bann resours lorganizasyon.

19. Akoz nou devret swiv lenstriksyon Kris?

¹⁹ Ler nou swiv lenstriksyon Kris, nou ed nou bann frer ek ser pour annan en lafwa pli for e pour pli ini. André i osi dir sa konsernan sanzman dan grander lafanmir Betel partou dan lemonn: “Sa bon leta lespri ki bann ansyen Betelit ki’n adapte avek sa bann sanzman in demontre, in fer mwan annan plis konfyans dan Kris e annan respe pour sa bann Betelit. Zot reste azour avek saret Zeova par trouv lazwa dan nenport ki responsabilite ki zot ganny donnen.”

20, 21. (a) Akoz nou kapab met konfyans dan Kris konman nou Sef? (b) Ki kestyon nou pou reponn dan sa lot lartik?

²⁰ Byento, nou Sef Zezi Kri, pou “fini ranport laviktwar” e “akonpli bann keksoz ekstraordiner.” (Revelasyon 6:2; Psonm 45:4, NWT) Me menm ozordi i pe prepar nou pour viv dan nouvo lemonn e osi pour sa travay ki nou pou fer a lavenir ler nou ansenny bann ki’n resisite e ede pour fer later vin en paradi.

²¹ O tan ki nou met konfyans dan nou Sef ek Lerwa malgre nenport kwa ki arive, i pou gid nou pour antre dan sa nouvo lemonn. (Lir Psonm 46:1-3.) Ozordi, i kapab difisil pour aksepte bann sanzman, espesyalman ler zot afekte nou dan bann fason ki nou pa pe ekspekte. Ler sa i arive, ki mannyer nou kapab gard nou lape lespri e gard nou lafwa for dan Zeova? Nou pou reponn sa kestyon dan sa lot lartik.