MON ti ne an 1934. Mon paran, Fred ek Edna Molohan, ti deza bann Etidyan Labib (Temwen Zeova) pour 20 an. Mon apresye bokou ki zot in ansenny mwan pour kontan Zeova. Nou ti reste dan en pti lavil ki apel Parsons ki dan sides Kansas. Preski tou dimoun dan kongregasyon ti bann Kretyen swazir. Nou fanmir ti asiste renyon regilyerman e zot ti aktif dan predikasyon. Dan Sanmdi apremidi nou ti abitye rann temwannyaz lo semen, ki nou apel temwannyaz an piblik ozordi. Par ler nou ti fatige, me Papa ti toultan donn nou ayskrim ler nou ti fini.

Nou pti kongregasyon ti annan en gran teritwar, nou ti bezwen kouver plizyer pti lavil ek bokou laferm. Dan plas donn nou larzan pour nou bann piblikasyon, serten fermye ti donn nou bann legim ki zot ti’n plante, dizef (ki zot ti’n fek anmase dan kazo) oubyen menm bann poul ki ti ankor vivan. Vi ki Papa ti’n deza kontribye pour bann piblikasyon, sa bann manze ki zot ti donnen ti ede nouri nou fanmir.

Mon paran ti rod en granmofonn pour servi dan predikasyon. Mon ti tro pti pour servi sa granmofonn, me mon ti kontan ed Papa ek Manman pour zwe bann diskour Frer Rutherford pandan bann retourn vizit ek letid Labib.

Papa ti met en gran spiker anler lo nou loto ki ti en 1936 Ford e i ti fer li vin en sound car. I ti tre bon pour predikasyon. Ordinerman, nou ti konmans par zwe lanmizik pour atir latansyon bann dimoun e apre nou ti zwe en diskour baze lo Labib. Apre sa, nou ti ofer bann piblikasyon avek bann dimoun ki ti enterese.

Dan en pti lavil ki apel Cherryvale ki dan leta Kansas, Papa ti dray sa sound car dan laplenn lavil kot bokou dimoun ti rilaks dan Dimans. Me apre, lapolis ti dir li ki i pa kapab servi son sound car dan laplenn, me i kapab fer li an deor. Papa ti bouz loto e park lo en semen akote sa laplenn, koumsa bann dimoun ti ankor kapab tann sa progranm. I ti toultan eksitan pour avek  Papa ek mon gran frer Jerry dan bann moman koumsa.

Pandan sa bann lannen, nou ti fer bann kanpanny spesyal dan bann teritwar kot bann dimoun ti vreman opoze. Parey mon’n dir o konmansman, nou ti leve dan milye lannwit e met bann trak oubyen brosir anba laport bann dimoun san fer okenn tapaz. Apre, nou tou nou ti zwenn an deor lavil pour vwar si personn pa ti’n ganny arete avek lapolis.

En lot form nou predikasyon ki ti eksitan ti ler nou ti fer bann lamars. Nou ti met bann gran plakar ki ti annan bann mesaz lo la e nou ti mars dan en lavil antye. Mon rapel en fwa ki bann frer ek ser ti vin dan nou lavil e mars avek bann plakar ki ti dir “Larelizyon i en pyez e i malonnet.” Zot ti konmans kot nou lakour, mars pour apepre en demi kilomet dan nou lavil e apre zot ti retourn kot nou. Erezman, personn pa ti ganny arete, me en kantite dimoun ti anvi konnen kwa ki ti pe arive.

Souvandfwa nou fanmir ti al Texas pour bann lasanble. Papa ti travay avek lakonpannyen tren, alor nou ti kapab vwayaz dan tren pour nanryen pour al bann lasanble e vizit nou fanmir. Gran frer Manman, ki apel Fred Wismar ek son madanm Eulalie, ti reste Temple, Texas. Tonton Fred ti konn laverite dan bann lannen 1900 ler i ti ankor zenn, i ti batize e dir son bann frer ek ser, enkli mon manman, sa ki i ti’n aprann. Bann frer ek ser dan Texas santral ti konn Tonton Fred tre byen parski i ti abitye servi konman sirveyan rezyonal. I ti zantiy, ere e devoue. I ti en bon legzanp pour mwan.

An 1941, nou ti vwayaz par tren pour asiste en gran lasanble ki ti pe ganny fer St. Louis, Missouri. Tou bann zenn ti ganny envite pour asiz ansanm o bor lestrad pour ekout diskour Frer Rutherford ki ti annan pour tit “Children of the King.” A lafen sa diskour, tou sa 15,000 zenn ti ganny en gran sirpriz. Frer Rutherford ek son bann asistan ti donn sakenn nou sa nouvo liv ki apel Children.

An Avril 1943, nou ti asiste sa lasanble ki ti annan pour tenm “Call to Action” ki ti ganny fer Coffeyville, Kansas. Laba, i ti annan en lanons ki tou kongregasyon ti pou annan en nouvo lekol, Lekol Minister Teokratik. Nou ti osi ganny en pti liv ki ti annan 52 leson ki ti pou ganny servi dan sa lekol. Pli tar sa menm lannen, mon ti fer mon premye demonstrasyon dan sa lekol. Sa lasanble ti osi spesyal pour mwan parski detrwa nou ti ganny batize dan en pti lak fre dan en laferm pa tro lwen.

Mon ti fini lekol segonder an 1951 e mon ti bezwen deside ki mon ti pou fer avek mon lavi. Mon frer Jerry ti’n servi dan Betel. Mwan osi mon ti vreman anvi al Betel, alor mon ti fer laplikasyon. Pa tro lontan apre, mon ti ganny envite pour al Betel e mon ti konmans servi laba le 10 Mars 1952. Sa ti en bon desizyon ki’n ed mwan pour servi Bondye pli plennman.

Mon ti anvi travay dan lenprimri pour ede prodwir nou bann magazin ek lezot piblikasyon. Me mon pa’n zanmen ganny sans fer sa. O kontrer, mon ti ganny anvoye pour servi konman en server e pli tar dan lakwizin. Mon ti kontan sa travay e mon ti aprann en kantite keksoz. Nou ti travay shift e mon ti annan en pe letan lib pandan lazournen. Souvandfwa mon ti al dan libreri Betel e servi sa kantite liv laba pour fer letid personnel. Sa ti ede ranforsi mon lafwa ek lanmitye avek Zeova. Mon ti vin pli determinen pour servi Zeova dan Betel pour pli lontan posib. Jerry ti’n kit Betel an 1949 e marye avek Patricia, me zot ti reste Brooklyn ki pa ti tro lwen avek Betel e zot ti ed e ankouraz mwan ler mon ti ankor nouvo dan Betel.

Pa tro lontan apre ki mon ti vin Betel, bann frer ti konmans rod bann Betelit ki zot ti kapab azout lo lalis bann orater sorti dan Betel. Bann frer ki ti lo sa lalis ti ganny anvoye pour al vizit bann kongregasyon ziska en zistans 320 kilomet avek  Brooklyn. Laba zot ti pou fer en diskour piblik e travay avek kongregasyon dan predikasyon. Mon ti enn bann frer ki ti ganny swazir. Byen per, mon ti konmans fer sa bann vizit e fer bann diskour piblik. Sa letan bann diskour piblik ti dire pour enn erdtan. Mon ti abitye vwayaz par tren pour al kot sa bann kongregasyon. Mon byen rapel en Dimans apremidi dan liver an 1954. Mon ti anbark dan en tren pour retourn New York e mon ti sipoze ariv Betel avan set er diswar. Me letan mon ti pe retournen, i ti annan en tanpet, divan for e lanez ti konmans tonbe. Masin tren ki ti mars avek elektrisite ti aret marse e mon ti ariv New York City senk er bomaten son Lendi. Mon ti pran en lot tren pour al Brooklyn e deswit mon ti al travay dan lakwizin. Mon ti en pti pe an retar e byen fatige parski mon pa ti’n dormi lannwit antye. Me sa lazwa ki mon ti gannyen pour servi bann kongregasyon e zwenn en kantite nouvo frer ek ser ti vo plis ki okenn sakrifis.

Pandan mon bann premye lannen Betel, mon ti osi konmans partisip dan en progranm letid Labib ki ti ganny zwe tou le semenn lo nou stasyon radyo WBBR. Bann stoudyo ti lo dezyenm letaz batiman 124 Columbia Heights. Frer Alexander H. Macmillan ki ti’n servi dan Betel pour plizyer lannen, ti regilyerman partisip dan sa bann progranm radyo. Nou ti abitye apel li Frer Mac. I ti en bon legzanp pour nou bann zenn frer dan Betel parski i ti’n reste fidel malgre bokou difikilte.

An 1958, mon ti ganny en lot responsabilite e mon ti konmans travay avek bann frer ki ti’n asiste Lekol Gilead. Mon ti ed sa bann frer ek ser devoue pour ganny zot viza e mon ti osi fer laranzman pour zot vwayaz. Vi ki sa letan vwayaz par avyon ti vreman ser, laplipar bann frer ki ti pe al Lafrik ek Lazi apre ki zot ti’n asiste sa lekol ti bezwen vwayaz par bato kargo. Plizyer lannen pli tar, ler pri pour vwayaz par avyon ti desann, laplipar bann misyonner ti vwayaz par avyon pour al kot zot ti’n ganny anvoye.

An 1960, mon ti fer laranzman pour lwe bann avyon sorti Leta-z-ini pour bann lasanble enternasyonal ki ti pe ganny fer Lerop an 1961. Mon ti pran avyon pour al enn sa bann lasanble Hamburg, Lalmanny. Apre sa lasanble, mwan ek trwa lezot frer dan Betel ti lwe en transpor e dray depi Lalmanny pour al Itali e vizit biro brans Ronm. Sorti Ronm nou ti al Lafrans, pas atraver bann montanny Pyrenees e ariv Lespanny kot nou travay ti enterdi. Nou ti kapab donn bann frer Barcelona serten piblikasyon ki nou ti’n met dan papye kado pour fer li paret konman bann kado. I ti eksitan pour zwenn zot! Sorti laba, nou ti dray ziska Amsterdam e apre pran avyon pour retourn New York.

An 1962, mon ti ganny sa responsabilite pour fer laranzman pour sa 583 frer ek ser ki ti pou asiste en seri lasanble enternasyonal dan lemonn  antye. Sa lasanble ti ganny fer an 1963 e i ti annan pour tenm “Everlasting Good News.” Bann delege ti pou asiste bann lasanble Lerop, Lazi ek Sid Pasifik e apre zot ti pou al Honolulu, Awai e finalman Pasadena, Kaliforni. Zot ti pou osi vizit Liban ek Zordani pour vizit bann landrwa ki ganny mansyonnen dan Labib. Nou departman ti fer bann rezervasyon avyon ek lotel e pour tou bann viza neseser.

I ti osi annan en lot rezon akoz lannen 1963 ti en lannen vreman enportan pour mwan. Le 29 Zen mon ti marye avek Lila Rogers ki sorti Missouri, ki ti’n vin dan Betel an 1960. En semenn apre nou maryaz, nou ti zwenn sa bann frer ek ser ki ti pou asiste bann lasanble ki ti pe ganny fer dan lemonn antye e nou ti vizit Lagres, Lezip ek Liban. Apre nou ti pran en avyon ki pa ti pran bokou letan pour nou al Zordani. Par kont, nou travay ti enterdi laba e lotorite pa ti donn Temwen Zeova viza. Alor nou pa ti asire ki ti pou arive ler nou ariv laba. Zis mazinen ki degre nou ti kontan e sirprann ler nou ti vwar en group frer ek ser pe debout anler lo terminal sa pti erport avek en gran lansenny ki dir “Byenveni Temwen Zeova”! I ti gou pour vizit bann landrwa dan Labib e vwar bann landrwa kot Abraam, Izaak ek Zakob ti reste, kot Zezi ek bann zapot ti prese e kot larelizyon Kretyen ti konmans propaz “dan bann landrwa pli lwen lo later.”​—Akt 13:47.

Pour 55 an, Lila in toultan mon konpanyon fidel dan tou responsabilite ki nou’n gannyen. Nou ti vizit Lespanny ek Portigal plizyer fwa pandan ki nou travay laba ti enterdi. Nou ti kapab ankouraz bann frer ek ser e anmenn bann piblikasyon ek lezot keksoz ki zot ti bezwen. Nou ti menm kapab vizit serten nou bann frer ki ti dan prizon Cádiz, Lespanny. Mon ti vreman kontan ki mon ti kapab fer en diskour ankourazan pour zot.

Dan bann lannen depi 1963, mon’n fer laranzman pour bann frer ek ser vwayaze pour al bann lasanble enternasyonal Lafrik, Lostrali, Lanmerik Santral, Sid Lanmerik, Lerop, Far East, Awai, Nouvel Zelann ek Puerto Rico. Nou de Lila nou’n asiste plizyer lasanble inoubliyab, parey sa enn Warsaw, Lapolonny ki ti ganny fer an 1989. Plizyer frer ek ser sorti Larisi ti kapab asiste sa gran lasanble. Sa ti zot premye lasanble ki zot ti asiste! Nou ti zwenn bann frer ek ser ki ti’n al dan prizon Linyon Sovyetik pour plizyer lannen akoz zot lafwa.

Mon ti osi vreman kontan pour vizit e ankouraz bann lafanmir Betel ek bann misyonner partou dan lemonn. Dernyen fwa ki mon ti ganny sa responsabilite nou ti al Sid Kore e nou ti kapab al vizit 50 nou bann frer ki ti dan prizon Suwon. Zot tou zot ti vreman pozitif e zot ti pe esper avek enpasyans pour servi Zeova san okenn restriksyon ankor enn fwa. Sa bann frer ti vreman ankouraz nou!​—Romen 1:11, 12.

Diran bann lannen mon’n vwar ki mannyer Zeova in beni son pep. Ler mon ti batize an 1943, i ti annan apepre 100,000 proklanmater. Ozordi i annan plis ki wit milyon ki pe servi Zeova dan 240 pei. Sa travay ki bann frer ek ser ki’n asiste Lekol Gilead in fer in vreman ede pour annan sa logmantasyon. Mon’n ganny bokou lazwa pour travay avek en kantite sa bann misyonner e pour ed zot ariv kot zot pe al servi.

Mon rekonesan ki depi zenn mon ti deside servi mon lavi pour servi Zeova e fer laplikasyon pour servi dan Betel. Zeova in beni mwan en kantite diran sa bann lannen. Apard ki tou bann keksoz ki nou kontan dan nou servis Betel, pour plis ki 50 an nou de Lila nou’n kontan pour form parti plizyer kongregasyon Brooklyn e travay ansanm avek bann frer ek ser dan predikasyon. Nou’n osi fer bann vre zanmi.

Mon ankor pe servi dan Betel avek sipor Lila sak zour. Menm si aprezan mon annan 84 an, mon kontan ki mon ankor kapab fer bann travay itil e ede avek bann let ki vin kot Betel.

I en gran lazwa pour form parti lorganizasyon Zeova e pour vwar ki mannyer sa parol dan Malaki 3:18 i vre: “Ankor en fwa, zot ava war diferans ant sa enn ki zis ek en malfeter, ant sa enn ki servi Bondye ek sa enn ki pa servi li.” Sak zour nou vwar ki lemonn Satan i vin pli pir e ki bann dimoun napa okenn lespwar e ki zot pa vreman ere. Menm si nou pe viv dan bann letan difisil, bann ki kontan e servi Zeova i annan en lavi ki ere e en bon lespwar pour lavenir. I en vre privilez pour anons sa bon nouvel avek lezot! (Matye 24:14) Byento Rwayonm Bondye pou ranplas sa vye lemonn avek paradi. Pa nou anvi ki sa zour i vini. Koumsa tou dimoun lo later pour an bonn sante, ere e viv pour touzour.