1-2. (a) Ki bann dirizan lemonn pou anonse byento? (b) Ki bann kestyon nou bezwen reponn?

ZIS mazinen ki bann dirizan lemonn i fek fer sa lanons konmkwa i annan “lape ek sekirite” parey Labib in predir. I kapab ki zot fyer pour dir ki lemonn pa’n zanmen sitan anpe. Zot pou anvi fer nou krwar ki zot annan tou keksoz anba kontrol. Kan salerla, zot napa okenn kontrol lo sa ki pe al arive! Akoz non? Dapre en profesi, “en destriksyon pou vin lo zot en sel kou . . . e zot pa pou kapab sape.”​—1 Tesa. 5:3.

² I annan bann kestyon enportan ki nou bezwen reponn: Ki pou arive pandan “gran ladetres”? Ki Zeova pou ekspekte nou fer pandan gran ladetres? Ki mannyer nou kapab prepar nou depi la konmela pour nou kapab reste fidel pandan gran ladetres?​—Mat. 24:21.

3. Dapre Revelasyon 17:5, 15-18, ki mannyer Bondye pou detri “Gran Babilonn”?

³ Lir Revelasyon 17:5, 15-18. “Gran Babilonn” pou ganny detrir! Parey i’n ganny mansyonnen pli boner, sa letan bann dirizan lemonn pou napa okenn kontrol lo sa ki arive. Akoz non? Parski “Bondye [pou] met dan zot leker son nide pour ki zot fer son lavolonte.” Ki nide sa? Pour detri tou fo larelizyon, enkli bann larelizyon swadizan Kretyen. Bondye pou met son nide dan leker “dis korn” sa “bebet sovaz rouz.” “Sa bebet sovaz” i reprezant  Nasyon-z-ini e sa dis korn i reprezant tou bann pouvwar politik ki pe siport li. (Rev. 17:3, 11-13; 18:8) Ler sa bann pouvwar politik i atak fo larelizyon, sa pou montre ki gran ladetres in konmanse. Sa pou en levennman terib ki ariv en sel kou e i pou afekte tou dimoun lo later.

4. (a) Ki bann nasyon pou dir pour eksplike akoz zot in atak bann fo larelizyon? (b) Ki bann ki ti form parti sa bann larelizyon pou fer?

⁴ Nou pa konnen ki bann nasyon pou dir pour eksplike akoz zot in atak Gran Babilonn. I kapab ki zot dir ki bann larelizyon i anpes bann pei annan lape e ki zot toultan esey mel dan politik. Oubyen zot kapab dir ki bann larelizyon i annan tro bokou larzan ek propriyete. (Rev. 18:3, 7) I tre probab ki ler bann nasyon i atak fo larelizyon, zot pa pou detri tou dimoun ki form parti sa bann larelizyon. O kontrer, i paret ki bann nasyon pou detri bann lorganizasyon relizye. Enn fwa ki sa bann lorganizasyon in ganny detrir, bann ki ti form parti sa bann larelizyon pou realize ki zot bann sef relizye pa’n kapab gard zot promes. Alor, i tre probab ki sa bann dimoun pou dir ki zot napa nanryen pour fer avek sa bann larelizyon.

5. Ki Zeova in promet konsernan gran ladetres e akoz?

⁵ Labib pa dir ki kantite letan i pou pran pour Gran Babilonn ganny detrir, me nou konnen ki i pa pou pran en kantite letan. (Rev. 18:10, 21) Zeova in promet ki i pou “akoursi sa letan” pour ki “bann ki’n ganny swazir” pa ganny detrir e vre larelizyon i ganny proteze. (Mark 13:19, 20) Me ki Zeova pou ekspekte nou fer dan sa peryod letan ant ler gran ladetres i konmanse ziska lager Armagedon?

6. Akoz i pa ase pour separ nou avek fo larelizyon?

⁶ Parey nou’n diskite dan sa lartik avan, Zeova i ekspekte ki son bann serviter i separ zot avek fo larelizyon. Me sa pa ase. Nou bezwen determinen pour kontinyen  servi Zeova e siport vre larelizyon. Annou vwar de fason ki nou kapab fer sa.

7. (a) Ki mannyer nou kapab kontinyen obei bann standar moral Zeova? (b) Dapre Ebre 10:24, 25, akoz nou bezwen zwenn ansanm e akoz i vreman enportan pour fer sa la konmela?

⁷ Premyerman, nou bezwen kontinyen obei bann standar moral Zeova. Nou pa devret zanmen vwar kondwit imoral bann dimoun dan lemonn konman akseptab. Par egzanp, nou vwar tou sort kalite imoralite seksyel konman en keksoz ki mal. Sa i enkli maryaz ant de dimoun menm sèks oubyen okenn lezot kondwit omoseksyel. (Mat. 19:4, 5; Rom. 1:26, 27) Dezyenmman, nou bezwen kontinyen ador Zeova ansanm avek lezot frer ek ser. Nou fer sa nenport landrwa kot nou kapab, ki swa kot Lasal Rwayonm, dan lakour en lot Kretyen kan i neseser oubyen menm an sekre. Nenport kwa ki arive, nou pa pou zanmen aret zwenn ansanm pour ador Zeova. Anfet, nou bezwen zwenn ansanm “plis ankor la ki [nou] vwar sa zour pe aprose.”​—Lir Ebre 10:24, 25.

8. Ki mannyer sa mesaz ki nou anonse pou probableman sanze a lavenir?

⁸ I tre probab ki pandan gran ladetres, sa mesaz ki nou anonse pou sanze. Ozordi, nou pe anons sa bon nouvel Rwayonm e nou pe esey fer disip. Me pandan gran ladetres, i kapab ki nou pou anons en mesaz zizman. Labib i dir ki sa mesaz pou parey en gro lagrel. (Rev. 16:21) Petet nou pou anonse ki byento lemonn Satan pou ganny detrir konpletman. Pour le moman nou pa konnen kwa egzakteman ki nou pou anonse e ki mannyer nou pou fer li, nou pou konn sa pli tar. Eski nou pou pres e ansenny dan menm fason ki nou’n fer dan sa dernyen san-t-an? Oubyen eski nou bann metod pou sanze? Nou pa konnen. An tou ka, i paret ki nou pou annan sa privilez pour anons mesaz zizman Zeova. I pou demann kouraz pour fer sa!​—Ezek. 2:3-5.

9. Ki mannyer bann nasyon i kapab reakte anver nou mesaz me ki nou kapab asire?

⁹ I tre probab ki nou mesaz pou fer bann nasyon esey fer nou aret prese enn fwa pour tou. Zis parey nou depan lo Zeova la konmela dan nou minister, nou pou bezwen depan lo li pour anons sa mesaz. Nou kapab asire ki nou Bondye pou donn nou sa lafors ki nou bezwen pour fer son lavolonte.​—Mik. 3:8.

10. Parey in ganny predir dan Lik 21:25-28, ki mannyer laplipar dimoun pou santi pandan gran ladetres?

¹⁰ Lir Lik 21:25-28. Pandan gran ladetres, bann dimoun pou soke ler zot vwar ki ptitapti tou keksoz ki zot ti depan lo la, parey sistenm politik e komersyal, i nepli marse. I pou sa moman pli difisil dan listwar imen, alor bann dimoun pou dan “langwas” e zot pou per pour zot lavi. (Zef. 1:14, 15) I tre probab ki lavi pou vin pli difisil pour bann serviter Zeova pandan sa letan. Vi ki nou pou kontinyen reste separe avek sa lemonn, i kapab ki nou pas atraver serten difikilte. Petet nou pou menm napa bann keksoz de baz.

11. (a) Akoz bann dimoun ek bann dirizan lemonn pou vir zot latansyon lo Temwen Zeova? (b) Akoz nou pa bezwen per sa gran ladetres?

¹¹ I kapab ki a en serten moman, bann dimoun ki zot larelizyon in ganny detrir pou ankoler ki Temwen Zeova i ankor  pe pratik zot larelizyon. Zot pou fer lezot konnen ki kantite zot pa kontan sa, enkli lo rezo sosyal. Bann nasyon ek zot sef Satan, pou ay nou parski nou pou sa sel larelizyon ki pa’n ganny detrir. Zot pa pou’n akonpli zot lobzektif pour detri tou larelizyon. Alor, zot pou vir zot latansyon lo nou. A sa moman, bann nasyon pou vin Gog, dan pei Magog. * Sa bann nasyon pou ralye ansanm e servi tou zot lafors pour atak pep Zeova. (Ezek. 38:2, 14-16) Vi ki nou pa konn egzakteman ki pou arive, i kapab ki nou konmans enkyet. Par kont, en keksoz ki nou kapab asire, se ki nou pa bezwen per sa gran ladetres. Zeova pou dir nou ki nou bezwen fer pour ganny proteze. (Ps. 34:19) Nou pou kapab “debout drwat e lev [nou] latet” akoz nou pou konnen ki nou “delivrans pe aprose.” *

12. Ki mannyer “lesklav fidel e pridan” pe ed nou prepare pour sa ki pou arive dan lavenir?

¹² “Lesklav fidel e pridan” pe ed nou prepare pour nou kapab reste fidel pandan gran ladetres. (Mat. 24:45) Zot in fer sa dan plizyer fason, me annou vwar en legzanp. Sa i atraver bann lasanble ki nou’n gannyen an 2016-2018. Bann diskour dan sa bann lasanble in ankouraz nou pour ranforsi bann kalite ki nou bezwen anmezir ki zour Zeova i aprose. Annou repas lo serten sa bann kalite.

13. Ki mannyer nou kapab ranforsi nou fidelite anver Zeova e akoz nou devret fer li la konmela?

¹³ Fidelite: Lasanble 2016 ti annan pour tenm, “Reste fidel anver Zeova!” Atraver bann diskour dan sa lasanble, nou ti aprann ki si nou annan en relasyon pros avek Zeova, nou pou reste fidel avek li. Sa bann diskour ti osi fer nou rapel ki nou kapab apros avek Zeova atraver lapriyer senser ek letid Labib o profon. Ler nou fer sa, nou pou ganny lafors pour fer fas avek bann problenm difisil. Anmezir ki gran ladetres i aprose, nou kapab ekspekte ki nou fidelite anver Bondye ek son Rwayonm pou ganny teste plis ankor. I tre probab ki nou pou kontinyen ganny kritike. (2 Pyer 3:3, 4) Enn bann rezon sa pou arive i akoz nou pa pran par dan okenn zafer politik. Alor, nou bezwen ranforsi nou fidelite depi la konmela pour nou kapab reste fidel pandan gran ladetres.

14. (a) Ki sanzman i pou annan an rapor avek bann frer ki diriz lorganizasyon Zeova lo later? (b) Akoz nou pou bezwen demontre fidelite sa letan?

¹⁴ Pandan gran ladetres, i pou annan en sanzman an rapor avek bann frer ki pe diriz lorganizasyon Zeova lo later. I pou ariv en moman kot tou Kretyen swazir ki ankor lo later pou ganny rasanble dan lesyel pour zot partisip dan lager Armagedon. (Mat. 24:31; Rev. 2:26, 27) Sa i vedir ki Konsey Direkter pou nepli lo later ansanm avek nou. Par kont, sa gran lafoul pou ankor byen organize. Bann frer kalifye parmi lezot mouton pou diriz lorganizasyon. Nou pou bezwen demontre nou fidelite anver Zeova par siport sa  bann frer e par swiv bann lenstriksyon ki zot gannyen sorti kot Bondye. Pour nou pa ganny detrir, nou pou bezwen swiv zot lenstriksyon!

15. Ki mannyer nou kapab ranforsi nou landirans e akoz i enportan pour fer li depi la konmela?

¹⁵ Landirans: Lasanble 2017 ti annan pour tenm, “Pa abandonnen!” Atraver bann diskour, nou ti aprann ki mannyer pour ranforsi nou landirans pour nou kapab fer fas avek problenm. Nou ti osi aprann ki nou landirans pa depan lo si nou sityasyon pou amelyore oubyen non. O kontrer, nou kapab ranforsi nou landirans par depan lo Zeova. (Rom. 12:12) Annou pa zanmen oubliy sa ki Zezi ti promet: “Sa enn ki andire ziska lafen pou ganny sove.” (Mat. 24:13, not) Sa promes i montre ki nou bezwen reste fidel malgre okenn difikilte. Si nou andir tou nou problenm depi la konmela, nou lafwa pou vin pli for avan gran ladetres i konmanse.

16. Kwa ki fer nou annan kouraz e ki mannyer nou kapab devlop plis kouraz depi la konmela?

¹⁶ Kouraz: Lasanble 2018 ti annan pour tenm, “Pran kouraz”! Bann diskour dan sa lasanble ti ed nou rapel ki pa nou bann abilite ki fer nou demontre kouraz. Zis parey nou bezwen depan lo Zeova pour andire, nou bezwen depan lo Zeova pour annan vre kouraz. Ki mannyer nou kapab aprann pour depan lo Zeova plis ankor? Nou fer sa ler nou lir son Parol toulezour e medit lo lafason ki Zeova ti sov son pep dan lepase. (Ps. 68:20; 2 Pyer 2:9) Ler bann nasyon i atak nou pandan gran ladetres, nou pou bezwen demontre kouraz e annan konfyans dan Zeova plis ki oparavan. (Ps. 112:7, 8; Ebr. 13:6) Si nou depan lo Zeova depi la konmela, nou pou annan sa kouraz ki nou bezwen pour fer fas avek latak Gog. *

17. Akoz nou pa bezwen per lager Armagedon? (Vwar portre lo kouvertir.)

¹⁷ Parey i’n ganny mansyonnen dan sa lartik avan, laplipar nou in viv nou lavi antye dan bann dernyen zour. Me nou osi annan sa lespwar pour pas atraver  gran ladetres. Lager Armagedon pou met en lafen avek sa lemonn. Par kont, napa nanryen pour nou per. Akoz? Parski sa i lager Zeova e nou pa pou bezwen lager. (Prov. 1:33; Ezek. 38:18-20; Zek. 14:3) Ler Zeova i donn lord, Zezi Kri ansanm avek larme Bondye pou al lager. Ansanm avek li, i pou annan bann Kretyen swazir ki’n ganny resisite e plizyer dizenn milye lanz. Zot pou lager kont Satan, bann demon ek bann larme lo later.​—Dan. 12:1; Rev. 6:2; 17:14.

18. (a) Ki Zeova in promet nou? (b) Ki mannyer Revelasyon 7:9, 13-17 i ed ou annan konfyans konsernan lavenir?

¹⁸ Zeova in promet: “Tou zarm ki’n ganny fabrike kont ou pa pou servi nanryen.” (Iza. 54:17) “En gran lafoul” bann serviter fidel Bondye pou “pas atraver sa gran ladetres.” Apre sa, zot pou kontinyen servi Zeova. (Lir Revelasyon 7:9, 13-17.) Pa Labib i donn nou bokou rezon pour annan konfyans ki nou pou ganny sove a lavenir! Nou konnen ki Zeova “i protez sa enn ki fidel anver li.” (Ps. 31:23) Tou dimoun ki kontan e loue Zeova pou vreman kontan pour vwar Zeova zistifye son non sen.​—Ezek. 38:23.

19. Ki sa zoli lespwar nou pe espere?

¹⁹ Mazinen ki i ti pou dir dan 2 Timote 3:2-5, si i ti pe dekrir bann dimoun dan nouvo lemonn ki pa ganny enfliyanse par Satan. (Vwar sa bwat “ Lafason ki dimoun pou ete a lavenir.”) Frer George Gangas, * ki ti servi lo Konsey Direkter, ti dekrir nouvo lemonn koumsa: “Lemonn pou en zoli landrwa ler tou dimoun i servi Zeova! Byento ou pou annan sa privilez pour viv dan nouvo lemonn. Ou pou viv menm kantite letan avek Zeova. Nou pou viv pour touzour.” Pa sa i en zoli lespwar!