1. Ki Zeova i kapab fer pour akonpli son plan?

ZEOVA i kapab vin nenport kwa ki neseser pour akonpli son plan. Par egzanp, Zeova in vin en Ansenyan, Enn ki donn rekonfor e en Predikater. Sa i zis detrwa keksoz ki Zeova in vini. (Iza. 48:17; 2 Kor. 7:6; Gal. 3:8) Kantmenm sa, souvan i servi bann imen pour akonpli son plan. (Mat. 24:14; 28:19, 20; 2 Kor. 1:3, 4) Zeova i osi kapab donn sakenn ant nou sa lasazes ek lafors ki nou bezwen pour vin nenport kwa ki neseser pour akonpli son lavolonte. Dapre serten spesyalis Labib, sa i form parti sinifikasyon non Zeova.

2. (a) Akoz parfwa nou kapab santi ki nou pa itil pour Zeova? (b) Ki nou pou diskite dan sa lartik?

² Nou tou nou anvi itil pour Zeova, me serten i kapab santi ki zot pa itil pour Zeova. Kwa ki kapab fer zot santi koumsa? Petet zot santi ki zot laz, sirkonstans oubyen abilite pa pe permet zot fer sa kantite ki zot ti a voudre. De lot kote, lezot i kapab santi ki zot deza pe fer ase e zot pa vwar ki zot bezwen kontinyen progrese. Dan sa lartik, nou pou diskit lo ki mannyer Zeova i kapab donn sakenn ant nou sa ki nou bezwen pour akonpli son plan. Apre sa, nou pou diskit lo bann resi Labib e vwar ki mannyer Zeova ti donn bann msye ek madanm ki ti servi li sa dezir ek lafors pour azir. Finalman, nou pou vwar ki mannyer nou kapab les Zeova servi nou.

3. Dapre Filipyen 2:13, ki mannyer Zeova i kapab donn nou sa dezir pour azir?

³ Lir Filipyen 2:13. * Zeova i kapab donn nou sa dezir pour azir. Ki mannyer i kapab fer sa? I kapab ki nou tande ki i annan en dimoun dan kongregasyon ki bezwen led oubyen ki i annan en lot keksoz ki bezwen ganny fer dan kongregasyon. Osi i kapab ki bann ansyen i lir en let sorti kot biro brans ki enform nou ki i annan en bezwen en lot landrwa. Sa i kapab fer nou demann nou lekor, ‘Ki mon kapab fer pour ede?’ Oubyen kekfwa nou’n ganny demande pour fer en travay difisil e nou pa asire si nou pou kapab fer li byen. Osi i kapab arive ki apre ki nou’n lir serten verse Labib, nou demann nou lekor, ‘Ki mannyer mon kapab aplik sa bann verse Labib pour ed lezot?’ Zeova pa pou fors nou pour fer okenn keksoz. Me ler i vwar ki nou pe mazin lo sa ki nou kapab fer, i kapab donn nou sa dezir pour fer sa ki nou’n mazin lo la.

4. Ki mannyer Zeova i kapab donn nou lafors pour azir?

⁴ Zeova i osi kapab donn nou lafors pour azir. (Iza. 40:29) Ki mannyer i kapab fer sa? I kapab donn nou lespri sen pour amelyor bann abilite ki nou deza annan. (Egz. 35:30-35) Zeova i osi kapab servi son lorganizasyon pour ansenny nou ki mannyer pour fer serten keksoz. Nenport ler ou pa asire ki mannyer pour fer en travay ki ou’n ganny donnen, demann led. Osi, pa ezite pour demann nou Papa dan lesyel ki zenere, pour donn ou son “lafors . . . ki pli pwisan ki nou prop lafors.” (2 Kor. 4:7; Lik 11:13) Dan Labib, i annan plizyer legzanp lo ki mannyer Zeova in donn bann msye ek madanm sa dezir ek lafors ki zot bezwen pour azir. Anmezir ki nou diskit lo serten sa bann resi, esey mazinen ki mannyer Zeova i kapab servi ou pour fer menm keksoz.

5. Ki nou aprann avek lafason ek moman ki Zeova ti servi Moiz pour delivre Son pep?

⁵ Zeova ti fer Moiz vin sa enn ki ti delivre bann Izraelit. Me kan ki Zeova ti servi li? I pa ti ler Moiz ti krwar ki i ti’n pare akoz i ti’n “ganny sa pli bon ledikasyon Lezip.” (Akt 7:22-25) O kontrer, Zeova ti servi Moiz apre ki i ti’n ed li vin en zonm dous ki annan limilite. (Akt 7:30, 34-36) Zeova ti donn Moiz kouraz pour koz avek sa dirizan pli pwisan Lezip. (Egz. 9:13-19) Ki nou aprann avek lafason ek moman ki Zeova ti servi Moiz? Zeova i servi bann ki esey imit son bann kalite e ki depan lo li pour ganny lafors.​—Fili. 4:13.

6. Ki nou aprann avek lafason ki Zeova ti servi Barzilay pour ed Lerwa David?

⁶ Plizyer santenn lannen pli tar, Zeova ti servi Barzilay pour ed Lerwa David. Ler David ti pe sove akoz son garson Absalonm, li ek bann dimoun ki ti avek li ti “soufer lafen, lafatig ek laswaf.” Barzilay ki ti’n vye sa letan, ansanm avek lezot ti met zot lavi an danze pour anmenn provizyon pour David ek bann ki ti avek li. Barzilay pa ti krwar ki i ti nepli itil pour Zeova akoz i ti’n vye. O kontrer, i ti zenere e servi sa ki i ti annan pour ed bann serviter Bondye ki ti dan bezwen. (2 Sam. 17:27-29) Ki nou kapab aprann avek sa? Nenport laz ki nou annan, Zeova i kapab servi nou pour ed bann frer  ek ser kot nou reste oubyen dan lezot pei pour ganny bann keksoz de baz ki zot bezwen. (Prov. 3:27, 28; 19:17) Kekfwa nou pa kapab al ed zot nou menm, me nou kapab kontribye anver sa travay mondyal. Koumsa, i pou deza annan larzan pour ed nou bann frer ek ser nenport ler ek landrwa ki neseser.​—2 Kor. 8:14, 15; 9:11.

7. Ki mannyer Zeova ti servi Simeon e akoz sa i ankourazan?

⁷ Zeova ti promet Simeon, en zonm aze e fidel ki ti pe reste Zerizalenm, ki avan i mor, i ti pou vwar Mesi. I bezwen ki sa promes ti’n ankouraz Simeon en kantite parski i ti’n esper plizyer lannen pour vwar Mesi. Zeova ti rekonpans Simeon pour son lafwa ek landirans. En zour, “anba gidans lespri sen,” i ti al kot tanp. Laba, i ti vwar pti baba Zezi e Zeova ti servi Simeon pour donn en profesi konsernan sa zanfan ki ti pou vin Kris. (Lik 2:25-35) Menm si i tre probab ki Simeon ti mor avan ki i ti vwar Zezi konmans son minister lo later, Simeon ti apresye ki Zeova ti’n servi li dan sa fason. An plis, i pou ganny beni dan plizyer fason a lavenir. Dan nouvo lemonn, sa zonm fidel pou vwar ki mannyer dominasyon Zezi pou en gran benediksyon pour tou fanmir lo later. (Zen. 22:18) Nou osi nou kapab rekonesan pour okenn privilez ki Zeova i donn nou dan son servis.

8. Ki mannyer Zeova i kapab servi nou dan menm fason ki i ti servi Barnabas?

⁸ Dan premye syek, en zonm zenere ki ti apel Zozef ti pare pour les Zeova servi li. (Akt 4:36, 37) Bann zapot ti apel li Barnabas ki vedir “Garson Rekonfor.” I tre probab ki sa i akoz i ti vreman rekonfortan pour lezot. Par egzanp, apre ki Sol ti vin en Kretyen, en kantite frer ek ser ti per pour al kot li parski i ti’n persekit bann Kretyen. Me Barnabas ti rekonfort e ed Sol. Nou kapab mazinen ki Sol ti vreman rekonesan pour sa. (Akt 9:21, 26-28) Pli tar, bann ansyen Zerizalenm ti santi ki zot ti bezwen ankouraz bann Kretyen ki ti reste lwen dan lavil Antyos, Siri. Lekel ki zot ti anvoye? Zot ti fer en bon swa e anvoy Barnabas! Labib i dir ki Barnabas ti “ankouraz zot tou pour determinen pour kontinyen servi Senyer avek tou zot leker.” (Akt 11:22-24) Pareyman ozordi, Zeova i kapab ed nou vin en “garson rekonfor” pour nou bann frer ek ser. Par egzanp, i kapab ed nou rekonfort bann ki’n perdi en dimoun ki zot kontan dan lanmor. Oubyen i kapab pous nou pour vizit ouswa telefonn en dimoun ki malad oubyen ki dan depresyon e ankouraz li. Eski ou pou les Zeova servi ou dan menm fason ki i ti servi Barnabas?​—1 Tesa. 5:14.

9. Ki nou aprann avek lafason ki Zeova ti ed en frer ki apel Vasily pour vin en bon ansyen?

⁹ Zeova ti ed en frer ki apel Vasily pour vin en bon berze dan kongregasyon. Ler Vasily ti ganny apwente konman en ansyen a laz 26 an, i ti per ki i pa ti kalifye pour ed bann frer ek ser, sirtou bann ki ti pe pas atraver difikilte. Par kont, i ti ganny en bon formasyon avek bann ansyen eksperyanse e ler i ti asiste Lekol Minister Rwayonm. Vasily ti fer bokou zefor pour amelyore. Par egzanp, i ti fer en lalis bann pti keksoz ki i ti kapab fer. Anmezir ki i ti atenn sak sa bann lobzektif, i ti vin pli konfidan. Aprezan i dir: “Sa ki ti fer mwan per sa letan, konmela i donn mwan bokou lazwa. Ler Zeova i ed mwan pour trouv en verse Labib apropriye pour rekonfort en frer oubyen ser  dan kongregasyon, mon santi mwan ere.” Bann frer dan kongregasyon, si ou swiv legzanp Vasily e ou pare pour les Zeova servi ou, i kapab donn ou sa abilite pour fer plis dan kongregasyon.

10. Ki Abigail ti fer e ki leson ou aprann avek li?

¹⁰ Ler Lerwa Sail ti pe tay deryer David ek bann ki ti dan son kote, zot ti bezwen led. David ti demann en Izraelit ris ki apel Nabal pour donn zot en pe manze. Zot ti santi zot konfortab pour demann Nabal sa, parski zot ti’n ede protez son bann mouton dan dezer. Me Nabal ti egois e i pa ti oule donn zot nanryen. David ti pran en gran lakoler e i ti oule touy Nabal ek tou zonm dan son lakour. (1 Sam. 25:3-13, 22) Par kont, Nabal ti annan en zoli madanm ki apel Abigail e i ti annan bokou disernman. Abigail ti vreman kouraze, i ti al kot David, tonm lafas ater devan li e sipliy li pour pa fer nanryen ki ti pou fer li koupab pour mert. Zantiman, i ti ankouraz David pour kit tou keksoz dan lanmen Zeova. Sa ki Abigail ti dir ti montre ki i ti annan bokou limilite e i ti azir dan en fason pridan. Sa ti tous leker David. I ti realize ki Zeova ki ti’n anvoy li. (1 Sam. 25:23-28, 32-34) Abigail ti’n devlop bann kalite ki ti fer li itil pour Zeova. Pareyman, Zeova i kapab servi bann ser Kretyen ki’n devlop bon zizman ek disernman pour batir zot fanmir ek lezot dan kongregasyon.​—Prov. 24:3, NWT; Tit 2:3-5.

11. Ki bann fiy Saloum ti fer e lekel ki pe swiv zot legzanp ozordi?

¹¹ Plizyer santenn lannen pli tar, Zeova ti servi bann fiy Saloum ansanm avek lezot, pour ede rekonstri miray Zerizalenm. (Nee. 2:20; 3:12) Menm si zot papa ti en prens oubyen sef, bann fiy Saloum ti pare pour fer sa travay difisil e danzere. (Nee. 4:15-18) Zot pa ti parey bann sef lepep Tekoit ki ti “refize” abes zot pour fer sa travay. (Nee. 3:5) Zis mazinen ki mannyer bann fiy Saloum ti santi ler miray ti fini ganny rekonstrir dan zis 52 zour! (Nee. 6:15) Dan nou letan, i annan bann ser ki pare e kontan pour ede dan travay konstriksyon ek mentenans bann batiman ki’n dedye avek Zeova. Sa i en servis spesyal pour Bondye. Pour sa travay reisi, nou bezwen led bann ser fidel ki annan abilite ek lantouzyazm.

12. Ki mannyer Zeova i kapab servi nou dan menm fason ki i ti servi Tabita?

¹² Zeova ti motiv Tabita pour “fer en kantite dibyen pour lezot e ed bann pov,” sirtou bann vev. (Akt 9:36) Vi ki i ti vreman zenere e ranpli avek labonte, en kantite dimoun ti tris ler i ti mor. Me zot ti vreman kontan ler zapot Pyer ti resisit li. (Akt 9:39-41) Ki nou aprann avek legzanp Tabita? Ki swa nou zenn oubyen vye, zonm oubyen fanm, nou tou nou kapab fer bann keksoz pratik pour ed nou bann frer ek ser.​—Ebr. 13:16.

13. Ki mannyer Zeova ti servi en ser timid ki apel Ruth e ki i ti dir apre 80 an?

¹³ En ser timid ki apel Ruth ti anvi vin en misyonner. Ler i ti ankor pli zenn, i ti al kazankaz e distribye bann trak vitman vitman. I dir: “Mon ti vreman kontan fer sa.” Pourtan, i ti vwar li vreman difisil pour koz avek dimoun ki i ti zwenn kot lakour e avek lezot lo Rwayonm Bondye. Menm si Ruth ti timid, i ti vin en pionye ordiner a laz 18 an. An 1946, i ti al Lekol Gilead e pli tar i ti al servi Awai ek Zapon. Zeova ti servi li pour fer en kantite  dan travay predikasyon dan sa bann pei. Apre ki Ruth ti’n partisip dan sa travay predikasyon pour preski 80 an, i ti dir: “Zeova in toultan donn mwan lafors. I’n ed mwan pour aret timid. Mon vreman krwar ki Zeova i kapab servi okenn dimoun ki met konfyans dan li.”

14. Dapre Kolosyen 1:29, ki nou bezwen fer si nou oule ki Zeova i servi nou?

¹⁴ Diran listwar, Zeova in fer son bann serviter vin diferan keksoz pour akonpli son lavolonte. Ki Zeova pou fer ou vini? En bon pe i depan lo ki kantite zefor ou pare pour fer. (Lir Kolosyen 1:29.) Si ou pare pour les Zeova servi ou, i kapab fer ou vin en predikater devoue, en ansenyan efikas, enn ki konnen ki mannyer pour rekonfort lezot, en travayer kalifye, en zanmi ki donn sipor oubyen nenport kwa ki neseser pour akonpli son lavolonte.

15. Dapre 1 Timote 4:12, 15, ki bann zenn frer i devret sipliy Zeova pour ed zot fer?

¹⁵ Ki nou kapab dir avek zot bann zenn frer ki pe vin adilt? I annan en gran bezwen pour bann frer ki annan lenerzi pour ede dan kongregasyon konman bann serviter kongregasyon. Dan plizyer kongregasyon, i annan plis ansyen ki serviter kongregasyon. Eski i annan serten zenn frer parmi zot ki pare pour devlop sa dezir pour fer plis dan kongregasyon? Parfwa serten frer i dir, “Mon kontan pour zis servi konman en proklanmater.” Si ou santi koumsa, sipliy Zeova pour ed ou devlop sa dezir pour vin en serviter kongregasyon e pour donn ou lafors pour fer tou sa ki ou kapab dan son servis. (Ekle. 12:1) Nou bezwen zot led!​—Lir 1 Timote 4:12, 15.

16. Ki nou devret demann Zeova e akoz?

¹⁶ Zeova i kapab fer ou vin nenport kwa ki neseser pour akonpli son plan. Alor, demann li pour donn ou sa dezir pour fer son travay e apre demann li pour donn ou sa lafors ki ou bezwen pour fer li. Ki swa ou zenn oubyen vye, servi ou letan, lenerzi ek keksoz materyel pour onor Zeova ozordi menm. (Ekle. 9:10) Ler ou ganny sa zoli loportinite pour fer plis dan servis Zeova, pa bezwen dir non deswit zis akoz ou krwar ki ou pa kapab fer li. I en privilez pour fer nenport kwa ki nou kapab pour onor nou Papa parey i merite!