Zeova ti donn lafors sa bann proklanmater ki ti eksite pour travay. Pandan sa lannen, lakantite colporteurs oubyen pionye ti ogmante sorti 225 pour vin 350. Pour premye fwa, plis ki 8,000 class workers oubyen proklanmater ti donn biro brans prensipal zot rapor predikasyon. Zeova ti beni zot zefor e en kantite dimoun ti ekout zot.

Le 21 Mars 1920, Joseph Rutherford, ki ti pe organiz travay bann Etidyan Labib sa letan, ti fer en diskour ki ti annan pour tit “Millions Now Living Will Never Die” (Plizyer milyon ki pe viv konmela pa pou zanmen mor). Bann Etidyan Labib ti fer tou sa ki zot kapab pour envit bann dimoun ki enterese pour vin sa levennman. Zot ti lwe enn bann pli gran lasal teat dan lavil New York e zot ti distribye apepre 320,000 lenvitasyon.

Lakantite dimoun ki ti vini ti plis ki sa ki bann Etidyan Labib ti ekspekte. Vi ki sa teat ti annan plas pour zis 5,000 dimoun, zot ti bezwen fer 7,000 dimoun retourn kot zot. Latour Veyer ti dir ki “parmi tou bann renyon ki International Bible Students ti fer, sa ti enn bann renyon ki ti atrakte plis dimoun.”

Tou dimoun ti konn bann Etidyan Labib parski zot ti pe anonse ki “plizyer milyon ki pe viv konmela pa pou zanmen mor.” Sa letan, zot pa ti konpran ki sa mesaz Rwayonm ti pou bezwen ganny anonse bokou plis ankor. Kantmenm sa, zot ti demontre en gran devouman. Ida Olmstead ti konmans asiste renyon an 1902 e i ti dir: “Nou ti konnen ki bann imen ti pou ganny bokou benediksyon a lavenir e nou pa ti zanmen aret dir sa avek bann dimoun ki nou ti zwenn dan predikasyon.”

Pour fer sir ki i ti annan manze spirityel, bann frer dan Betel ti konmans enprim serten piblikasyon zot menm. Zot ti aste bann lekipman pour enprimen e enstal dan en batiman ki zot ti lwe 35 Myrtle Avenue, Brooklyn, New York, ki pa ti lwen avek Betel.

Leo Pelle ek Walter Kessler ti konmans zot servis dan Betel Zanvye 1920. Walter ti dir: “Ler nou ti arive, sa frer ki okip lenprimri ti get nou e i ti dir, ‘I reste enn erdtan edmi avan dezennen.’ Alor i ti demann nou pour al sers bann kartron liv dan soubasman.”

 Leo i rapel sa ki ti arive son lannmen: “Nou ti ganny demande pour lav bann miray lo premye letaz sa batiman. I ti louvraz pli sal ki mon’n deza fer. Me nou ti pe travay pour Zeova e sa ti fer li vo lapenn.”

Dan zis detrwa semenn, bann proklanmater ki ti’n volonter ti pe enprim Latour Veyer. Swasant mil kopi Latour Veyer le 1 Fevriye 1920 an Angle, ti ganny enprimen lo dezyenm letaz. Tandis ki dan soubasman, bann frer ti’n met en masin enprimen ki zot ti apel Battleship. Sa lenprimri ti konmans enprim The Golden Age apartir sa nimero ki date le 14 Avril 1920. I kler ki Zeova ti beni zefor sa bann volonter.

Pep Zeova ti pe rekonmans anons sa bon nouvel avek devouman e dan linite. Par kont, pandan bann lannen difisil, ant 1917 ek 1919, serten Etidyan Labib ti kit lorganizasyon. Kwa ki ti ganny fer pour ed zot?

Dan Latour Veyer le 1 Avril 1920 an Angle, i ti annan en lartik ki ti annan pour tit “Let Us Dwell in Peace” (Annou viv dan lape). Sa lartik ti ankouraz zot: “Nou asire ki tou bann ki anvi obei Zeova pou oubliy bann fot ki zot in fer dan lepase e zot pou zwenn ansanm avek pep Bondye pour fer Son travay.”

En kantite dimoun ti reazir byen ler zot ti lir sa bann parol. En koup marye ti dir ki sa lartik ti ed zot konpran ki i ti mal ki zot pa ti’n partisip dan predikasyon sa bann dernyen lannen e ki apre sa, zot ti determinen pour rekonmans anons sa bon nouvel avek devouman. Sa bann proklanmater ti annan bokou travay pour zot fer.

Le 21 Zen 1920, bann Etidyan Labib ti konmans en kanpanny entans pour distribye liv “ZG,” en edisyon sa liv ki ti annan pour tit The Finished Mystery. * Ler sa liv ti ganny enterdi an 1918, en gran kantite ti ganny anmase.

 Tou proklanmater, pa zis bann pionye, ti ganny demande pour donn lanmen distribye sa liv. Lorganizasyon ti ankouraz tou proklanmater ki’n batize pour partisip dan sa kanpanny e adopte sa slogan: “Mon fer en sel keksoz,” setadir distribye liv ZG. Edmund Hooper ti dir ki pour bokou dimoun sa kanpanny ti premye fwa ki zot ti anons sa bon nouvel kazankaz. I ti osi dir: “Nou ti konmans konpran kwa ki ti enplike dan sa travay ki ti pou al pli lwen ki sa ki nou ti pe ekspekte.”

Vi ki i ti difisil pour bann Etidyan Labib kominik avek bann frer dan lezot pei pandan Premye Lager Mondyal, Frer Rutherford ti anvi ankouraz sa bann frer e reorganiz sa travay predikasyon. Alor le 12 Out 1920, Frer Rutherford ansanm avek kat lezot frer ti fer en gran vwayaz pour al Langleter ek plizyer lezot pei.

Ler Frer Rutherford ti vizit Langleter, bann Etidyan Labib ti organiz trwa lasanble e 12 renyon piblik. I ti annan apepre 50,000 dimoun ki ti asiste. Pour dekri sa vizit, Latour Veyer ti dir: “Bann frer ek ser ti ganny ankouraze. Zot ti pas letan avek kanmarad e travay ansanm e sa ti fer zot zwaye.” Ler Frer Rutherford ti Pari, ankor enn fwa i ti fer sa diskour“Millions Now Living Will Never Die.” Lasal ti ranpli avek dimoun ler sa diskour ti konmanse. Apre sa, trwa san dimoun ti anvi ganny plis lenformasyon.

Dan bann semenn ki ti swiv, serten frer ti vizit Atenn, Cairo ek Zerizalenm. Pour swiv lentere sa bann dimoun dan sa bann landrwa, Frer Rutherford ti organiz en landrwa pour stok bann piblikasyon dan lavil Ramallah, o bor Zerizalenm. Apre i ti retourn Lerop e i ti etablir Central European Office. I ti fer laranzman pour bann piblikasyon ganny enprimen laba.

An Septanm 1920, bann Etidyan Labib ti pibliy Nimero 27 The Golden Age. Sa ti en edisyon spesyal ki ti devwal persekisyon ki bann Etidyan Labib ti gannyen pandan lannen 1918. The Battleship, ki’n ganny mansyonnen pli boner, ti travay lizour konman aswar pour enprim plis ki kat milyon kopi sa magazin.

Bann dimoun ki ti lir sa magazin ti aprann konsernan sa ki ti arive avek Emma  Martin. Ser Martin ti en pionye ki ti reste San Bernardino, Kaliforni. Le 17 Mars 1918, Ser Martin ansanm avek trwa frer, E. Hamm, E. J. Sonnenburg ek E. A. Stevens ti asiste en renyon pour bann Etidyan Labib.

I ti annan en zonm ki ti asiste sa renyon ki pa ti’n vin pour aprann sa ki Labib i dir. Pli tar i ti dir ankour: “Mon ti al sa renyon . . . akoz biro prosekiter ti demann mwan pour fer li. Mon ti al laba pour al rod levidans.” I ti ganny “levidans” ki i ti pe rode, setadir en kopi liv The Finished Mystery. Detrwa zour pli tar, Ser Martin ek sa trwa frer ti ganny arete. Zot ti ganny sarze pour kas lalwa akoz zot ti’n distribye en liv ki ti’n ganny enterdi.

Emma ek sa trwa frer ti ganny trouve koupab e zot ti ganny kondannen trwa-z-an prizon. Zot ti esey fer lapel plizyer fwa me sa ti anven, alor le 17 Me 1920, zot ti konmans zot santans. Me pa bokou letan apre, keksoz ti sanze pour lemeyer.

Dan en lasanble ki ti ganny fer le 20 Zen 1920 an San Francisco, Frer Rutherford ti rakont zot leksperyans. Bann dimoun ki ti asiste sa lasanble ti sitan pa kontan sa ki ti’n arive avek sa bann Kretyen, ki zot ti anvoy en telegranm kot prezidan Leta-z-ini. Dan zot telegranm zot ti dir ki zot ti konsider kondannasyon Madanm Martin konman enzis e ki zot ti krwar ki gouvernman ti’n abiz son lotorite parski i ti’n fer en latrap zis pour met Madanm Martin dan prizon.

Son lannmen, Prezidan Woodrow Wilson ti sanz santans Ser Martin, Frer Hamm, Sonnenburg ek Stevens. Zot ti ganny large prizon.

A lafen lannen 1920, bann Etidyan Labib ti annan bokou rezon pour zot zwaye. Travay ti kontinyen ogmante kot biro prensipal e plis ki zanmen oparavan, bann Etidyan Labib ti anons sa bon nouvel konsernan Rwayonm Bondye, ki solisyon tou problenm limanite. (Mat. 24:14) Son lannen answit an 1921, i ti pou en pli bon lannen pour anons laverite lo Rwayonm Bondye.