1. Ki sa pli bon desizyon en dimoun i kapab fer?

SOUVANDFWA, bann desizyon ki bann paran i fer i annan en lefe lo zot zanfan pour en kantite letan. Si zot fer bann move desizyon, sa i kapab anmenn problenm pour zot zanfan. Me si zot fer bann bon desizyon, zot kapab ed zot zanfan pour annan en lavi ere. Byensir, bann zanfan osi i bezwen fer bann bon desizyon. Sa pli bon desizyon ki en dimoun i kapab fer i pour servi Zeova, nou Papa ki dan lesyel, ki kontan nou.​—Ps. 73:28.

2. Ki serten bon desizyon Zezi ek son paran ti fer?

² Bann paran Zezi ti anvi ed zot zanfan pour servi Zeova e bann desizyon ki zot ti fer ti montre ki servi Zeova ti sa keksoz pli enportan dan zot lavi. (Lik 2:40, 41, 52) Pareyman, Zezi ti fer bann bon desizyon ki ti ed li pour fer sa ki Zeova ti anvi i fer. (Mat. 4:1-10) Zezi ti vin en bon dimoun, ki ti annan kouraz e ki ti fidel. Tou paran ki kontan Zeova ti pou kontan e fyer pour annan en garson parey li.

3. Ki kestyon nou pou reponn dan sa lartik?

³ Dan sa lartik, nou pour vwar larepons sa bann kestyon swivan: Ki bann bon desizyon Zeova ti fer konsernan Zezi? Ki bann paran Kretyen i kapab aprann avek bann desizyon ki paran Zezi ti fer? Osi, ki bann zenn Kretyen i kapab aprann avek bann desizyon ki Zezi ti fer?

4. Ki desizyon enportan Zeova ti fer konsernan son Garson?

⁴ Zeova ti swazir bann bon paran pour Zezi. (Mat. 1:18-23; Lik 1:26-38) Bann parol senser ki Mari ti dir in ganny ekrir dan Labib e i montre ki i ti vreman kontan Zeova ek son Parol. (Lik 1:46-55) Osi, lafason ki Zozef ti obei bann lenstriksyon ki Zeova ti donn li, i montre ki i ti kontan Bondye e i ti anvi fer Li plezir.​—Mat. 1:24.

5-6. Ki Zeova ti les son garson eksperyanse?

⁵ Zeova pa ti swazir bann dimoun ris pour vin paran Zezi. Sakrifis ki Zozef ek Mari ti ofer apre nesans Zezi ti montre ki zot ti pov. (Lik 2:24) I kapab ki Zozef ti fer son travay sarpantye dan en pti latelye o bor son lakour Nazaret. I tre probab ki zot ti napa bokou larzan oubyen keksoz materyel, vi ki avek letan zot ti annan set oubyen plis zanfan.​—Mat. 13:55, 56.

⁶ Zeova ti protez Zezi kont plizyer danze me I pa ti protez li kont tou problenm ki i ti rankontre. (Mat. 2:13-15) Par egzanp, Zezi ti annan fanmir ki pa ti krwar li. Nou kapab mazinen ki Zezi ti dezapwente ler o konmansman serten son fanmir pa ti aksepte li konman Mesi. (Mark 3:21; Zan 7:5) Osi, i kapab ki Zozef ti mor ler Zezi ti ankor zenn e sa ti’n kapab difisil pour li. Vi ki Zezi ti premye garson, i kapab ki apre lanmor Zozef, Zezi ti bezwen okip biznes son papa. (Mark 6:3) Anmezir ki Zezi ti grandi, i ti aprann pour pran swen avek son fanmir. I tre probab ki i ti bezwen travay dir pour ganny larzan ek bann keksoz ki zot ti bezwen. Zezi ti konnen ki savedir fatige apre en gran lazournen travay.

7. (a) Ki kestyon bann koup marye i kapab demann zot lekor konsernan elve zanfan? (b) Ki mannyer Proverb 2:1-6 i kapab ed bann paran pour ansenny zot zanfan?

⁷ Si ou en koup marye e ou anvi annan zanfan, demann ou lekor: ‘Eski nou bann dimoun ki annan limilite, ki kontan Zeova ek son Parol? Eski parey Zozef ek Mari, Zeova ti’n kapab swazir nou pour pran swen avek en pti baba ki presye?’ (Ps. 127:3, 4, NWT) Si ou deza en paran, demann ou lekor: ‘Eski mon pe ansenny mon  zanfan ki i enportan pour travay dir?’ (Ekle. 3:12, 13) ‘Eski mon fer mon mye pour protez mon zanfan kont bann danze ki zot kapab rankontre dan lemonn Satan?’ (Prov. 22:3) Ou pa kapab protez ou zanfan kont tou problenm ki zot gannyen. I enposib pour fer sa. Avek lanmour, ou kapab prepar zot pour bann problenm ki zot pou rankontre dan lavi par kontinyen ansenny zot ki mannyer pour rod konsey dan Labib. (Lir Proverb 2:1-6.) Par egzanp, si en manm fanmir i aret servi Zeova, servi Parol Bondye pour ed ou zanfan konpran akoz i enportan pour reste fidel avek Zeova. (Ps. 31:23) Oubyen, si en dimoun ki ou kontan i mor, montre ou zanfan bann verse Labib ki kapab ed li pour sirmont son sagrinasyon e ganny lape.​—2 Kor. 1:3, 4; 2 Tim. 3:16.

8. Dapre Deterononm 6:6, 7, ki Zozef ek Mari ti bezwen fer?

⁸ Zozef ek Mari ti kapab ed Zezi vin en adilt ki ti annan laprouvasyon Zeova parski zot ti swiv bann lenstriksyon ki Zeova i donn bann paran. (Lir Deterononm 6:6, 7.) Zozef ek Mari ti vreman kontan Zeova e zot lobzektif ti pou ed zot zanfan devlop sa menm kalite lanmour.

9. Ki bann desizyon enportan Zozef ek Mari ti fer?

⁹ Zozef ek Mari ti swazir pour ador Zeova regilyerman ansanm avek zot bann zanfan. San dout, zot ti al ador Zeova kot sinagog Nazaret tou le semenn e zot ti osi al lafet Lapak Zerizalenm tou le lannen. (Lik 2:41; 4:16) I kapab ki pandan sa vwayaz pour al Zerizalenm, zot ti ansenny Zezi ek zot bann lezot zanfan konsernan sa ki ti arive avek pep Zeova dan lepase. Petet zot ti vizit bann diferan landrwa ki ganny mansyonnen dan Lekritir ler zot ti pe fer sa bann voyaz. Anmezir ki Zozef ek Mari ti ganny plis zanfan, i kapab ki i ti vin pli difisil pour zot kontinyen ador Zeova regilyerman. Me zot ti ganny bokou byenfe! Vi ki zot ladorasyon ti sa keksoz pli enportan, zot fanmir ti reste pros avek Zeova.

10. Ki leson bann paran Kretyen i kapab aprann avek Zozef ek Mari?

¹⁰ Ki bann paran ki annan gran respe  pour Bondye i kapab aprann avek legzanp Zozef ek Mari? Keksoz pli enportan ou kapab fer i pour montre ou zanfan par ou parol ek aksyon ki ou kontan Zeova en kantite. Sa pli bon kado ou kapab donn ou zanfan i pour ed zot kontan Zeova. Osi, enn bann leson pli enportan ki ou kapab ansenny zot i ki mannyer zot kapab etidye Labib regilyerman, priye, asiste renyon e partisip dan predikasyon. (1 Tim. 6:6) Byensir, ou bezwen donn ou zanfan bann keksoz materyel ki zot bezwen. (1 Tim. 5:8) Gard antet ki i pa larzan ek keksoz materyel ki pou ed ou zanfan sirviv destriksyon sa lemonn e antre dan nouvo lemonn. Me i sa lanmitye ki ou zanfan i annan avek Zeova ki pou ed li. *​—Ezek. 7:19; 1 Tim. 4:8.

11. (a) Ki mannyer sa konsey dan 1 Timote 6:17-19, i ed bann paran Kretyen fer bann bon desizyon ler zot pe elve zot zanfan? (b) Ki serten lobzektif ou fanmir i kapab annan e ki benediksyon zot pou gannyen? (Vwar bwat “ Ki lobzektif ou annan?”)

¹¹ I vreman ankourazan pour vwar bann paran Kretyen pe fer bann bon desizyon pour zot kapab ed zot zanfan vin pli pros avek Zeova. Zot regilyerman ador Zeova ansanm. Zot asiste renyon ek lasanble e zot anons sa bon nouvel. Serten fanmir i menm kapab anons sa bon nouvel dan en teritwar ki pa souvan ganny prese. Lezot i vizit Betel oubyen travay lo bann proze konstriksyon ki pour lorganizasyon Temwen Zeova. Bann fanmir ki swazir pour fer sa bann keksoz i bezwen depans larzan e sa i kapab difisil pour zot. Me Zeova pou rekonpans zot zenerezman pour sa. (Lir 1 Timote 6:17-19.) Bann zanfan ki grandi dan bann fanmir koumsa, i souvan kontinyen annan sa bann bon labitid e zot napa okenn regre! *​—Prov. 10:22.

12. Ki Zezi ti bezwen fer anmezir i ti pe grandi?

¹² Zeova i toultan fer bann bon desizyon. Zozef ek Mari ti osi fer bann desizyon ki saz. Me anmezir ki Zezi ti grandi i ti bezwen fer son bann prop desizyon. (Gal. 6:5) Parey nou tou, Zezi ti annan sa liberte pour swazir. I ti’n kapab swazir pour rod son prop lentere avan. O kontrer, i ti swazir pour gard en bon lanmitye avek Zeova. (Zan 8:29) Ki mannyer legzanp Zezi i kapab ed bann zenn ozordi?

13. Ki desizyon enportan Zezi ti fer ler i ti ankor zenn?

¹³ Ler Zezi ti ankor zenn, i ti swazir pour  obei son paran. I pa ti krwar i pli konnen ki son paran e i pa ti zanmen dezobei zot. O kontrer, i ti “kontinyen soumet avek zot.” (Lik 2:51) Zezi ti premye zanfan, ki vedir i ti annan serten responsabilite. San dout, i ti fer son mye pour desarz byen son bann responsabilite. I ti travay dir pour aprann sarpantye avek Zozef pour li kapab ede siport son fanmir.

14. Ki mannyer nou konnen Zezi ti etidye byen Parol Bondye?

¹⁴ I tre probab ki Zozef ek Mari ti koz avek Zezi lo son nesans e lo sa ki bann mesaze Bondye ti’n dir lo li. (Lik 2:8-19, 25-38) Zezi pa ti zis ekout sa ki zot ti dir me i ti osi etidye Lekritir pour li menm. Ki mannyer nou konnen Zezi ti etidye byen Parol Bondye? Parski ler i ti ankor zenn, bann ansenyan Zerizalenm ti “vreman etonnen par son larepons ek son lentelizans.” (Lik 2:46, 47) Osi, ler Zezi ti annan 12 an, i ti’n fini konvenki ki Zeova i son Papa.​—Lik 2:42, 43, 49.

15. Ki mannyer Zezi ti montre ki i ti’n swazir pour fer lavolonte Zeova?

¹⁵ Ler Zezi ti aprann konsernan sa ki Zeova i anvi i fer, i ti swazir pour fer lavolonte Zeova. (Zan 6:38) I ti konnen ki bokou dimoun ti pou ay li. Menm si i pa ti anvi ki dimoun i ay li, i ti swazir pour obei Zeova. Lannen 29, ler Zezi ti batize, i ti swazir pour fer lavolonte Zeova vin sa keksoz pli enportan pour li. (Ebr. 10:5-7) Menm ler i ti pe mor lo poto, i ti ankor determinen pour fer lavolonte son Papa.​—Zan 19:30.

16. Ki en leson zanfan i kapab aprann avek Zezi?

¹⁶ Obei ou paran. Parey Zozef ek Mari, ou paran i enparfe. Par kont, Zeova in donn ou paran sa responsabilite pour protez, ansenny e gid ou. Si ou ekout zot konsey e ou respekte zot lotorite, keksoz pou “al byen pour [ou].”​—Efe. 6:1-4.

17. Dapre Zozye 24:15, ki desizyon bann zenn i bezwen fer pour zot menm?

¹⁷ Deside lekel ki ou pou servi. Ou menm ou bezwen asire lekel Zeova, ki son plan e ki sa i annan pour fer avek ou. (Rom. 12:2) Apre ou pou kapab fer sa desizyon pli enportan dan ou lavi e sa i pour servi Zeova. (Lir Zozye 24:15; Ekle. 12:1) Si ou lir e etidye Labib regilyerman, ou  lanmour pour kontinyen ogmante e ou lafwa dan li pou vin pli for.

18. Ki desizyon bann zenn i bezwen fer e ki rezilta sa pou anmennen?

¹⁸ Swazir pour fer lavolonte Zeova premye dan ou lavi. Lemonn Satan i promet ki si ou servi ou bann abilite pour ou prop byenfe ou pou ere. Me nou konnen ki bann ki konsantre lo bann keksoz materyel i ganny “en kantite douler.” (1 Tim. 6:9, 10) De lot kote, si ou ekout Zeova e swazir pour fer son lavolonte premye, ou pou “azir avek lasazes” e ou pou ere.​—Zoz. 1:8, NWT.

19. Ki bann paran i bezwen rapel?

¹⁹ Paran, fer ou mye pour ed ou zanfan servi Zeova. Depan lo Zeova e i pou ed ou fer bann bon desizyon. (Prov. 3:5, 6) Rapel ki sa ki ou fer pou annan plis lefe lo ou zanfan ki sa ki ou dir. Alor, fer bann desizyon ki pou ed ou zanfan ganny laprouvasyon Zeova.

20. Ki benediksyon bann zenn pou gannyen si zot swazir pour servi Zeova?

²⁰ Zenn, ou paran i kapab ed ou fer bann bon desizyon. Me ou ki bezwen fer bann bon desizyon pour fer plezir Bondye. Alor, swiv legzanp Zezi e swazir pour servi ou Papa ki dan lesyel, ki kontan ou. Si ou fer sa, la konmela ou pou annan en lavi ki gou, satisfezan e ou pou annan bokou keksoz pour fer. (1 Tim. 4:16) A lavenir, ou pou annan en lavi ki pli satisfezan ankor!