1. Ki bann Kretyen ki’n batize i bezwen kontinyen fer?

ESKI ou’n batize? Si wi, ler ou ti batize, ou ti montre piblikman ki ou annan lafwa dan Zeova e ki ou anvi servi li ansanm avek son lorganizasyon. * Byensir, ou lafwa dan Zeova i bezwen kontinyen ogmante. Ou bezwen kontinyen annan konfyans ki Zeova pe servi son lorganizasyon ozordi.

2-3. Dan ki fason Zeova i diriz son lorganizasyon ozordi? Donn legzanp.

² Ozordi, Zeova i diriz son lorganizasyon dan en fason ki montre son personnalite, son plan ek son bann standar. Aprezan, annou diskit lo trwa kalite ki Zeova i annan ki nou kapab vwar dan son lorganizasyon.

³ Premyerman, “Bondye pa fer lapreferans.” (Akt 10:34) Lanmour ki Zeova i annan ti motiv li pour donn son Garson konman “en ranson pour tou dimoun.” (1 Tim. 2:6; Zan 3:16) Zeova i servi son pep pour anons sa bon nouvel avek tou sa ki pare pour ekoute koumsa zot a kapab ganny bann byenfe ki sa ranson i anmennen. Dezyenmman, Zeova i en Bondye ki kontan ler keksoz i annord e anpe. (1 Kor. 14:33, 40) Alor, nou devret ekspekte ki bann ki ador li i fer li dan en fason organize e dan lape. Trwazyenmman, Zeova i sa “Gran Ansenyan.” (Iza. 30:20, 21, NWT) I pour sa rezon ki son lorganizasyon i travay dir pour ansenny dimoun konsernan son Parol dan kongregasyon e dan predikasyon. Ki mannyer bann Kretyen dan premye syek ti demontre sa trwa kalite ki Zeova i annan? Ki mannyer pep Zeova pe demontre sa trwa kalite ozordi? Osi, ki mannyer lespri sen i kapab ed ou anmezir ki ou servi dan lorganizasyon Zeova ozordi?

4. Dapre Akt 1:8, ki lord Zezi ti donn son bann disip e ki led zot ti pou gannyen?

⁴ Dan premye syek. Sa mesaz ki Zezi ti anonse ti donn dimoun lespwar. (Lik 4:43) I ti donn son bann disip lord pour kontinyen sa travay ki i’n konmanse. I ti dir zot rann temwannyaz “dan bann landrwa pli elwannyen lo later.” (Lir Akt 1:8.) Byensir, zot pa ti pou kapab fer sa travay avek zot prop lafors. Zot ti pou bezwen lespri sen, “sa led” ki Zezi ti’n promet zot.​—Zan 14:26; Zek. 4:6.

5-6. Dan ki fason lespri sen ti ed bann disip Zezi?

⁵ Bann disip ti ganny lespri sen Lapannkot lannen 33. Avek led lespri sen, zot pa ti tarde pour konmans anons sa bon nouvel e dan en ptigin letan, plizyer milye dimoun ti aksepte sa bon nouvel. (Akt 2:41; 4:4) Ler dimoun ti konmans persekit sa bann disip, zot pa ti per. O kontrer zot ti demann Zeova led e zot ti kontinyen anons sa bon nouvel. Zot ti priye: “Ed ou bann lesklav pour kontinyen anons ou parol avek lardyes.” Apre sa, zot ti ganny led lespri sen e zot ti kontinyen “anons parol Bondye avek lardyes.”​—Akt 4:18-20, 29, 31.

⁶ Bann disip Zezi ti osi fer fas avek lezot problenm. Par egzanp, i ti napa bokou kopi Lekritir. Bann disip ti napa bann piblikasyon ki eksplik Labib, parey nou annan ozordi. Zot ti bezwen anons sa bon nouvel avek dimoun ki koz diferan langaz. Malgre tou sa bann problenm, sa bann disip devoue ti fer en keksoz ki ti paret enposib pour fer. Dan apepre 30 an, zot ti’n anons sa bon nouvel “avek dimoun partou lo later.”​—Kol. 1:6, 23.

7. Ki mannyer bann serviter Zeova plis ki 100 an pase ti konnen ki Bondye i ekspekte avek zot e ki zot ti fer?

⁷ Dan nou letan. Zeova i ankor pe diriz son pep e i pe donn zot lafors ki zot bezwen pour fer son lavolonte. I prensipalman servi Labib ki’n ganny ekrir avek led lespri sen, pour gid son pep. Dan Labib, nou lir konsernan minister Zezi ek sa lord ki i ti donn son bann disip pour kontinyen sa travay ki i’n konmanse. (Mat. 28:19, 20) Latour Veyer Zilyet 1881 an Angle ti dir: “Zeova pa’n swazir nou pour nou ganny onore par bann imen ouswa pour vin ris me pour ki nou servi tou sa ki nou annan pour anons sa bon nouvel.” En pti liv ki apel To Whom the Work Is Entrusted ki ti ganny pibliye an 1919 i dir: “I annan en kantite travay pour fer me sa i travay Senyer e i pou donn nou sa lafors pour fer li.” Parey bann Kretyen dan premye syek, sa bann frer ti demontre kouraz e travay vreman dir akoz zot ti annan konfyans ki lespri sen ti pou ed zot anons sa bon nouvel avek tou sort kalite dimoun. Nou osi nou annan konfyans ki lespri sen pou ed nou.

8-9. Ki lezot metod lorganizasyon Zeova in servi pour anons sa bon nouvel?

⁸ Lorganizasyon Zeova in servi bann pli bon zouti ki disponib pour anons sa bon nouvel. Sa bann zouti i enkli bann piblikasyon ki ganny enprimen, “Photo-Drama of Creation,” granmofonn, bann sound cars, bann progranm lo radyo e pli resaman bann piblikasyon lo Enternet ek bann lekipman elektronik. Osi, lorganizasyon Bondye pe tradwi lenformasyon dan plis langaz ki zanmen oparavan! Akoz? Pour ed tou sort kalite dimoun tann sa bon nouvel dan zot prop langaz. Zeova pa fer lapreferans. I ti predir ki sa bon nouvel pou ganny anonse “avek tou nasyon, tribi, langaz ek pep.” (Rev. 14:6, 7) I anvi ki tou dimoun i tann sa mesaz Rwayonm.

⁹ I annan dimoun ki reste dan bann  landrwa ki difisil pour nou arive, petet akoz zot reste dan bann landrwa kot i annan bann gran baro oubyen i annan bann sekirite. Ki mannyer nou anons sa bon nouvel avek sa bann dimoun? Avek lobzektif pour zwenn sa bann dimoun, Zeova in ed son lorganizasyon pour konmans servi diferan form temwannyaz an piblik. Par egzanp, an 2001 Konsey Direkter ti donn bann frer ek ser Lafrans laprouvasyon pour konmans servi prezantwar ek lezot metod pour montre nou bann piblikasyon. Pli tar, bann frer ek ser dan lezot pei osi ti konmans servi sa bann metod. Zot ti ganny bann bon rezilta. An 2011, i ti annan en nouvo progranm temwannyaz an piblik ki ti konmanse Leta-z-ini dan enn bann landrwa pli bizi dan lavil New York. Pandan sa premye lannen, 102,129 liv ek 68,911 magazin ti ganny distribye. Osi, i ti annan 4,701 dimoun ki ti demann en letid Labib! I kler ki Zeova ti pe servi son lespri sen pour siport sa travay. Alor, Konsey Direkter ti donn laprouvasyon bann frer ek ser partou dan lemonn pour servi prezantwar ek lezot metod pour montre nou bann piblikasyon.

10. Ki nou kapab fer pour vin en pli bon proklanmater ek ansenyan?

¹⁰ Sa ki ou kapab fer. Servi sa ki nou aprann dan bann formasyon ki Zeova i donn nou dan nou bann renyon. Regilyerman partisip dan predikasyon avek ou group. Bann frer ek ser dan ou group predikasyon i kapab ed ou pour vin en pli bon proklanmater ek ansenyan e zot kapab ankouraz ou atraver zot bon legzanp. Kontinyen anons sa bon nouvel menm si ou fer fas avek difikilte. Zis parey teks tenm pour sa lartik i rapel nou, nou kapab fer lavolonte Bondye, pa akoz nou for me akoz nou ganny lafors avek lespri sen. (Zek. 4:6) Nou kapab asire ki Zeova pou donn nou sa lafors ki nou bezwen parski nou pe fer son travay.

11. Ki mannyer konsey direkter dan premye syek ti travay ansanm pour fer ki pep Bondye i reste organize?

¹¹ Dan premye syek. Konsey direkter Zerizalenm ti travay ansanm pour ki pep Bondye i reste organize e anpe. (Akt 2:42) Par egzanp, apepre lannen 49, bann Kretyen ti  annan diferan lopinyon konsernan si tou dimoun ti bezwen ganny sirkonsi pour kapab servi Zeova. Anba gidans lespri sen, konsey direkter ti diskit lo sa sityasyon. Si kongregasyon ti reste divize lo sa sityasyon, zot pa ti pou kapab kontinyen fer predikasyon. Menm si bann zapot ek bann ansyen ti Zwif, zot pa ti les zot ganny enfliyanse par bann tradisyon Zwif oubyen par bann ki ti pe ansenny sa bann tradisyon. O kontrer, zot ti fer resers dan Parol Bondye e demann led lespri sen pour zot kapab fer sa bon desizyon. (Akt 15:1, 2, 5-20, 28) Ki ti rezilta? Zeova ti beni zot desizyon. I ti annan lape ek linite dan kongregasyon e sa travay predikasyon ti kontinyen.​—Akt 15:30, 31; 16:4, 5.

12. Kwa ki montre ki lorganizasyon Zeova i byen organize e anpe?

¹² Dan nou letan. Lorganizasyon Zeova in travay dir pour fer sir ki pep Bondye i reste organize e anpe. An 1895, i ti annan en lartik dan Zion’s Watch Tower and Herald of Christ’s Presence le 15 Novanm ki ti annan pour tit “Decently and in Order” (Annord e avek dinyite) e ki ti baze lo 1 Korentyen 14:40. Sa lartik ti dir: “Bann zapot ti dir bann premye kongregasyon bokou keksoz konsernan reste organize . . . Alor i enportan ki nou kontinyen obei ‘bann keksoz ki’n ganny ekrir dan lepase . . . pour ansenny nou.’” (Rom. 15:4) Ozordi, lorganizasyon Zeova i travay dir pour fer sir ki bann kongregasyon i byen organize e anpe zis parey i ti ete dan premye syek. Par egzanp: Si ou al Letid Latour Veyer dan en lot kongregasyon, menm dan en lot pei, ou pou konnen ki mannyer letid pour ganny fer e ou pou osi konnen ki lartik ki pou ganny etidye. Pa ou pou santi ou konfortab! Zis lespri sen Bondye ki kapab fer sa arive!​—Zef. 3:9, NWT.

13. Anliny avek Zak 3:17, ki kestyon nou devret demann nou lekor?

¹³ Sa ki ou kapab fer. Zeova i anvi ki son pep i “gard sa linite ki zot annan gras a lespri sen e ki lape i ini zot tou ansanm.” (Efe. 4:1-3) Alor ou kapab demann ou lekor: ‘Eski mon pe promot linite ek lape dan kongregasyon? Eski mon obei bann ki pe diriz kongregasyon? Eski lezot i kapab depan lo mwan, sirtou si mon  annan responsabilite dan kongregasyon? Eski mon ariv aler, mon kontan pour ed lezot e pare pour servi lezot?’ (Lir Zak 3:17.) Si ou vwar ki ou kapab amelyore, priye e demann led lespri sen. Pli ou les lespri sen enfliyans ou personnalite ek ou bann aksyon, pli ou bann frer ek ser pou kontan ou e zot pou apresye sa ki ou fer.

14. Ki mannyer Zeova ti ansenny son pep dan premye syek? (Kolosyen 1:9, 10)

¹⁴ Dan premye syek. Zeova i kontan pour ansenny son pep. (Ps. 32:8) I anvi ki zot konn li, kontan li e viv pour touzour konman son bann zanfan ki i kontan. Tousala pa ti pou posib si Zeova pa ti ansenny nou. (Zan 17:3) Zeova ti servi kongregasyon dan premye syek pour ansenny son pep. (Lir Kolosyen 1:9, 10.) Bann disip ti osi ganny led lespri sen, sa “led” ki Zezi ti’n promet. (Zan 14:16) Lespri sen ti ed bann disip konpran Parol Bondye. I ti osi ed zot pour rapel tou sa ki Zezi ti dir e fer e sanmenm sa ki pli tar ti ganny ekrir dan bann Levanzil. Sa konnesans ti ranforsi lafwa bann Kretyen dan premye syek e i ti osi ranforsi zot lanmour pour Bondye, pour son Garson e pour kanmarad.

15. Ki mannyer Zeova in akonplir son promes dan Izai 2:2, 3?

¹⁵ Dan nou letan. Zeova ti predir ki “dan bann dernyen zour” dimoun sorti dan tou nasyon ti pou vin kot son “montanny,” setadir zot pou zwenn ansanm avek son bann serviter pour zot ganny ansennyen konsernan son fason fer. (Lir Izai 2:2, 3, NWT.) * Nou vwar ki sa profesi pe ganny akonplir.  Nou kapab vwar ki vre ladorasyon i bokou pli bon ki bann fo ladorasyon. Zeova pe donn son pep en kantite manze spirityel! (Iza. 25:6, NWT) I servi “lesklav fidel e pridan” pour donn nou sa kantite manze spirityel ki vin dan diferan form. Par egzanp, nou ganny bann lartik pour lir, bann diskour pour ekoute e bann kartoun ek video pour gete. (Mat. 24:45) Nou santi parey Eliou, zanmi Zob, ki ti dir: “Lekel ki kapab ansenny parey [Bondye]?”​—Zob 36:22.

16. Ki ou kapab fer pour ou progrese spirityelman?

¹⁶ Sa ki ou kapab fer. Lespri sen Bondye pou ed ou aplik sa ki ou lir e etidye dan Parol Bondye. Parey sa psalmis, ou kapab priye: “Ansenny mwan konsernan ou semen, O Zeova. Mon pou mars dan ou laverite. Ed mwan pour annan en gran respe pour ou non avek tou mon leker.” (Ps. 86:11, NWT) Alor, kontinyen lir e etidye Labib ek lezot piblikasyon ki lorganizasyon Zeova i donnen. Byensir, ou pa zis anvi ganny konnesans me ou anvi konvenk ou lekor ki sa ki dan Labib i laverite e aplik li dan ou lavi. Lespri sen Zeova i kapab ed ou fer sa. Ou osi anvi ankouraz ou bann frer ek ser. (Ebr. 10:24, 25) Akoz? Parski zot form parti ou fanmir spirityel. Priye pour ou kapab ganny led lespri sen Bondye pour ou fer bann komanter senser dan renyon e pour ou fer ou mye ler ou annan en size. Ler ou fer sa, ou montre Zeova ek son Garson ki ou kontan zot bann “mouton” ki presye.​—Zan 21:15-17.

17. Dan ki fason ou kapab montre ki ou pe fidelman siport lorganizasyon Zeova?

¹⁷ Byento, sel lorganizasyon ki pou reste lo later i sa enn ki ganny dirize par lespri sen Bondye. Alor, travay ansanm avek lorganizasyon Zeova. Parey Zeova, montre ki ou kontan tou dimoun e anons sa bon nouvel avek tou sa ki ou zwenn. Parey li, montre ki ou kontan ler keksoz i ganny fer dan en fason annord e anpe par ede pour ki i annan lape dan kongregasyon. Osi, ekout ou Gran Enstrikter par aprann avek tou bann lenformasyon ki i donn nou. Koumsa, ou pa pou per ler lemonn Satan i ganny detrir. O kontrer, ou pou annan kouraz e ou pou debout ansanm avek bann ki pe fidelman siport lorganizasyon Zeova.