Pour bann proklanmater kapab anons sa bon nouvel, zot ti pou bezwen demontre kouraz. Zot ti pou bezwen anons “bon nouvel avek bann ki annan limilite” me osi anons konsernan sa ‘letan kot Bondye pou revanze kont son lennmi.’

Frer J. H. Hoskin, ki ti reste Kanada ti anons sa bon nouvel avek kouraz malgre dimoun ti opoz sa travay. Prentan 1921, i ti zwenn en paster. Frer Hoskin ti konmans sa konversasyon par dir: “Nou devret annan en bon konversasyon konsernan Labib. Menm si nou pa dakor lo serten keksoz, nou kapab fini nou konversasyon lo en bon not.” Me sa pa ti arive. Frer Hoskin i dir: “Nou ti’n koz pour zis detrwa minit ler sa paster ti bis laport sitan for ki mon ti krwar ki vit dan sa laport ti pou kase.”

Sa paster ti dir: “Akoz ou pa al koz avek bann dimoun ki pa Kretyen?” Frer Hoskin pa ti reponn li me anmezir ki i ti ale, i ti dir dan li menm, ‘Mon ti krwar mon pe koz avek enn, mwan!’

Lannmen, ler sa paster ti fer son sermon dan legliz, i ti dir bann move keksoz lo Frer Hoskin. Frer Hoskin ti dir: “I ti dir bann dimoun ki mon ti sa pli gran manter ki’n deza vin dan sa lavil e ki mon devret ganny touye.” Me sa pa ti anpes Frer Hoskin kontinyen fer sa travay predikasyon e i ti koz avek bokou dimoun. I ti dir: “Mon ti vreman kontan fer predikasyon laba. Serten dimoun ti menm dir: ‘Mon konnen ki ou pe fer travay Bondye.’ Zot ti osi ofer pour donn mwan bann keksoz ki mon ti bezwen.”

Pour ed dimoun konn Labib pli byen, bann Etidyan Labib ti pibliy bann progranm pour etidye Labib dan The Golden Age. * I ti annan en progranm ki ti apel The Juvenile Bible Study program ki ti enkli bann kestyon ki paran ti kapab diskite avek zot zanfan. Bann paran ti pou demann zot zanfan sa bann kestyon e ed zot trouv larepons dan Labib. Serten kestyon parey “Konbyen liv i annan dan Labib?,” ti ansenny bann keksoz de baz konsernan Labib. I ti annan  lezot kestyon parey “Eski tou vre Kretyen pou ganny persekite?,” ki ti ed bann zenn pour vin bann proklanmater ki annan kouraz.

I ti annan en lot progranm ki ti apel Advanced Studies in the Divine Plan of the Ages ki ti enkli bann kestyon pour bann dimoun ki ti annan plis konnesans lo Labib. Zot ti kapab trouv larepons dan premye liv Studies in the Scriptures. Bann lekter ti aprann bokou keksoz avek sa bann progranm. Me The Golden Age le 21 Desanm 1921 ti anonse ki zot ti pou nepli pibliy sa bann progranm. Akoz zot ti’n pran sa desizyon?

Bann frer ki ti pe diriz sa travay predikasyon ti realize ki bann dimoun ti bezwen aprann konsernan Labib dan en fason pli organize. Alor an Novanm 1921, zot ti pibliy sa liv The Harp of God. Bann ki ti aksepte sa liv ti osi kapab zwenn The Harp Bible Study Course. Sa ti en letid ki zot ti kapab fer lo zot menm e zot ti aprann konsernan plan Bondye pour fer imen viv pour touzour. Me ki mannyer zot ti fer sa letid?

Ler en dimoun ti aksepte en kopi sa liv, i ti ganny en pti kart ki ti dir li ki paz pour lir dan sa liv. Son semenn answit, i ti ganny en lot kart ki ti annan bann kestyon konsernan sa ki i ti’n lir. Sa kart ti osi dir li ki paz pour lir son semenn apre.

Tou le semenn, sa etidyan ti ganny en nouvo kart par lapos sorti kot sa kongregasyon ki ti pros avek li. Sa ti ale pour 12 semenn. Souvandfwa, sa bann kart ti ganny anvoye par bann frer ek ser aze ouswa bann ki pa ti kapab al kazankaz. Par egzanp, en ser ki apel Anna K. Gardner, ki sorti Millvale, Pennsylvania, Leta-z-ini, i dir: “Ler The Harp of God ti ganny pibliye, sa ti donn mon ser Thayle plis travay pour fer. Thayle ti ganny difikilte pour marse alor i ti kapab anvoy sa bann kart kestyon tou le semenn.” Ler sa dimoun ti fini sa letid, en dimoun dan kongregasyon ti vizit li pour ed li aprann plis konsernan Labib.

A lafen lannen 1921, Frer J. F. Rutherford ti anvoy en let pour tou kongregasyon. I ti dir ki an 1921 bokou plis dimoun ti’n ganny en temwannyaz konsernan Rwayonm e ki sa mesaz ti’n ed bokou plis dimoun ki bann lannen avan. Apre i ti dir: “I ankor annan en kantite travay pour fer. Annou ankouraz lezot pour vin fer sa travay merveye.” I kler ki bann Etidyan Labib ti ekout son konsey. An 1922, zot ti demontre kouraz e anons sa mesaz Rwayonm bokou plis ki avan.