1. Ki mannyer ou pou dekri en dimoun ki annan konpasyon e ki legzanp ki ansenny nou konsernan en dimoun ki ti demontre konpasyon?

LER nou mazin en dimoun ki demontre konpasyon, i kapab ki nou mazin en dimoun ki demontre labonte, ki zenere e ki pran pitye pour lezot. I kapab ki nou osi mazin sa legzanp ki Zezi ti donnen konsernan en bon Samariten. Sa zonm ki ti sorti dan en lot nasyon ti “pran pitye pour” en Zwif ki ti’n ganny bate e vole. Sa Samariten ti pran pitye pour sa Zwif e i ti pran swen avek li. (Lik 10:29-37) Sa legzanp i ansenny nou konsernan konpasyon ouswa pitye, * ki en zoli kalite ki nou Bondye i annan. Bondye i demontre konpasyon parski i kontan nou. Toulezour i demontre konpasyon anver nou dan diferan fason.

2. Ki en lot fason en dimoun i kapab demontre konpasyon?

² I annan en lot fason ki en dimoun i kapab demontre konpasyon. En dimoun ki demontre konpasyon i kapab deside pour pa pini en dimoun ki devret ganny pini. Zeova i fer sanmenm anver nou. En psalmis ti dir: “I pa’n tret nou dapre nou bann pese.” (Ps. 103:10, NWT) Me i annan lezot fwa ki Zeova i disiplin en dimoun ki’n fer en pese grav dan en fason ki sever.

3. Ki kestyon nou pou diskite dan sa lartik?

³ Dan sa lartik, nou pou reponn trwa kestyon: Akoz Zeova i demontre konpasyon? Eski i posib pour disiplin en dimoun ki’n fer en pese grav dan en fason ki sever e an menm tan demontre konpasyon anver li? Kwa ki kapab ed nou pour demontre konpasyon? Annou vwar  ki mannyer Parol Bondye i reponn sa bann kestyon.

4. Akoz Zeova i demontre konpasyon?

⁴ Zeova i kontan demontre konpasyon. Zapot Pol ti ekri ki Bondye i annan “en kantite konpasyon.” Dan sa verse, Pol ti eksplike ki Bondye i annan konpasyon parski menm si bann Kretyen swazir i enparfe, i donn zot sa lespwar pour viv dan lesyel. (Efe. 2:4-7) Me Zeova pa zis demontre konpasyon anver bann Kretyen swazir. Psalmis David ti ekrir: “Zeova i bon avek tou dimoun e i demontre konpasyon dan tou sa ki i fer.” (Ps. 145:9, NWT) Vi ki Zeova i kontan son bann serviter, i demontre konpasyon anver zot sak fwa i vwar en rezon pour fer li.

5. Ki mannyer Zezi ti aprann konsernan lafason ki Zeova i demontre konpasyon?

⁵ Zezi i konn plis ki okenn dimoun, ki kantite Zeova i kontan demontre konpasyon. Zeova ek Zezi ti ansanm dan lesyel pour plizyer milye lannen avan Zezi ti vin lo later. (Prov. 8:30, 31, NWT) Plizyer fwa, Zezi ti vwar son Papa demontre konpasyon anver bann imen enparfe. (Ps. 78:37-42) Ler Zezi ti ansennyen, souvan i ti koz lo sa zoli kalite ki son Papa i annan.

6. Ki mannyer Zezi i ed nou konpran lafason ki son Papa i demontre konpasyon?

⁶ Parey nou’n vwar dan sa lartik avan, Zezi i servi en legzanp konsernan en garson perdi pour ed nou konpran ki kantite Zeova i kontan demontre konpasyon. Sa garson ti’n kit lakour e “i ti gaspiy tou son byen par viv en lavi dezordonnen.” (Lik 15:13) Pli tar, i ti repantir, abes son lekor e retourn kot lakour. Ki mannyer son papa ti reakte? Sa garson pa ti bezwen esper lontan pour li konnen. Zezi i dir: “Ler [sa garson] ti ankor en bon pti zistans dan semen, son papa ti vwar li e son leker ti fermal. Son papa ti tay kot li, may li e anbras li.” Sa papa pa ti imilye son garson. O kontrer, i ti demontre konpasyon e pardonn son garson e i ti aksepte li dan fanmir. Sa garson ti’n fer en kantite keksoz mal me vi ki i ti repantir, son papa ti pardonn li. Sa papa dan sa legzanp i reprezant Zeova. Atraver sa legzanp, Zezi i montre nou ki Zeova i anvi pardonn bann ki repantir senserman.​—Lik 15:17-24.

7. Ki mannyer lafason ki Zeova i demontre konpasyon i montre ki i vreman saz?

⁷ Zeova i demontre konpasyon akoz i vreman saz. Zeova i toultan fer bann desizyon ki bon pour son kreasyon. Labib i dir ki “lasazes ki sorti dan lesyel” i annan “bokou  pitye” e i “fer bann bon aksyon.” (Zak 3:17) Parey en paran, Zeova i konnen ki ler i demontre konpasyon pour son bann serviter, sa i anmenn byenfe pour zot. (Ps. 103:13; Iza. 49:15) Zeova i demontre konpasyon anver son bann serviter par donn zot en lespwar pour lavenir menm si zot enparfe. Vi ki Zeova i vreman saz, i demontre konpasyon zis ler i annan en rezon pour fer li. I konnen kan ki i pa pou demontre konpasyon e i pa zanmen soutir bann move aksyon.

8. Kwa ki neseser pour fer parfwa e akoz?

⁸ Meton en serviter Bondye i deside pour viv en lavi imoral. Ki nou devret fer? Zeova ti dir zapot Pol dir kongregasyon “ki zot devret aret frekant” sa dimoun. (1 Kor. 5:11) En dimoun ki kontinyen fer sa ki mal i ganny ekskli dan kongregasyon. Sa i neseser pour protez bann frer ek ser ki fidel e pour obei bann standar Zeova ki sen. Me serten i krwar ki ler en dimoun i ganny ekskli dan kongregasyon, sa i montre Bondye pa’n demontre konpasyon anver li. Eski sa i vre? Annou vwar.

9-10. Dapre Ebre 12:5, 6, akoz nou kapab dir ki ler en dimoun i ganny ekskli dan kongregasyon, sa i en fason pour demontre konpasyon? Donn en legzanp.

⁹ Nou vreman sagren ler i anonse dan kongregasyon ki en dimoun ki nou kontan “i nepli en Temwen Zeova.” Petet nou kapab demande si i ti neseser pour sa dimoun ganny ekskli. Ler en dimoun i ganny ekskli dan kongregasyon, eski sa i en fason pour demontre konpasyon anver li? Wi. I saz pour disiplin en dimoun ki bezwen ganny disiplinen. I osi en fason pour demontre konpasyon ek lanmour pour sa dimoun. (Prov. 13:24) Ler en dimoun i ganny ekskli dan kongregasyon, eski sa i kapab ed li pour sanze e repantir? Wi. En kantite frer ek ser ki ti fer bann pese grav i dir ki ler zot ti ganny ekskli dan kongregasyon, sa ti ed zot pour realize ki sa ki zot ti pe fer ti vreman mal. Zot ti repantir, sanz zot konportman e retourn kot Zeova.​—Lir Ebre 12:5, 6.

¹⁰ Annou vwar en legzanp. Meton en berze i remarke ki enn son mouton i malad. I konnen ki pour li kapab sonny sa mouton, i bezwen separ sa mouton ki malad avek troupo. Par kont, mouton i en zannimo ki kontan parmi troupo e i kapab ki ler zot ganny separe avek troupo, zot per. Eski sa i vedir ki sa berze i kriyel ler i separ sa mouton avek troupo? Non. I konnen ki si i les sa mouton ki malad parmi troupo, sa maladi pou propaze. Ler i separ sa enn ki malad i protez troupo antye.​—Konpar Levitik 13:3, 4.

11. (a) Dan ki fason en dimoun ki’n ganny ekskli dan kongregasyon i parey en mouton ki malad? (b) Ki bann ki’n ganny ekskli i kapab fer e ki led zot gannyen?

¹¹ Nou kapab konpar en dimoun ki’n ganny ekskli dan kongregasyon avek en mouton ki malad. Vi ki i nepli annan en bon lanmitye avek Zeova, i parey en dimoun ki malad. (Zak 5:14) Parey en dimoun ki annan en maladi kontazyez, en dimoun ki napa en bon lanmitye avek Zeova i kapab enfliyans lezot pour fer sa ki mal. Alor, parfwa i neseser pour en dimoun ki’n fer en keksoz mal ganny ekskli dan kongregasyon. Sa laranzman i montre ki Zeova i kontan bann dimoun ki fidel dan kongregasyon e i kapab ed sa enn ki’n fer en pese grav pour repantir. Menm si sa dimoun in ganny ekskli, i kapab asiste renyon pour li ganny lenstriksyon sorti dan Labib e pour ranforsi son lafwa. I kapab osi ganny bann  piblikasyon pour lir e pour etidye e i kapab get Televizyon JW. Ler bann ansyen i vwar ki i pe fer bann sanzman, zot kapab tanzantan donn li bann konsey pour ed li revin zanmi avek Zeova e pour li revin en Temwen Zeova. *

12. Ki mannyer bann ansyen i kapab demontre lanmour ek konpasyon pour en dimoun ki pa oule repantir?

¹² I enportan pour rapel ki zis bann dimoun ki pa oule repantir ki ganny ekskli. Bann ansyen i konnen ki sa i en keksoz serye alor zot reflesir byen avan zot deside pour ekskli en dimoun. Zot konnen ki Zeova i disiplin “lo en degre apropriye.” (Zer. 30:11, NWT) Zot kontan zot bann frer ek ser e zot pa anvi fer nanryen pour gat lanmitye bann frer ek ser avek Zeova. Me parfwa, pour bann ansyen demontre lanmour ek konpasyon pour bann frer ek ser, zot bezwen ekskli en dimoun dan kongregasyon.

13. Akoz en Kretyen dan lavil Korent ti bezwen ganny ekskli dan kongregasyon?

¹³ Annou vwar ki zapot Pol ti fer konsernan en dimoun ki pa ti oule repantir. Dan premye syek, i ti annan en Kretyen dan lavil Korent ki ti avek madanm son papa. Sa ti degoutan! Pol ti konnen ki Zeova ti’n deza dir bann Izraelit: “En zonm ki dormi avek madanm son papa pou anmenn laont lo son papa. Tou le de i devret ganny met amor.” (Lev. 20:11, NWT) Byensir Pol pa ti dir kongregasyon ki sa zonm i devret ganny touye me i ti dir zot ekskli li. Sa ki sa zonm ti pe fer ti annan en move lenfliyans lo lezot dan kongregasyon akoz serten pa ti krwar ki sa ki sa zonm ti’n fer ti vreman mal!​—1 Kor. 5:1, 2, 13.

14. Ki mannyer Pol ti demontre konpasyon anver sa zonm ki ti’n ganny ekskli e akoz? (2 Korentyen 2:5-8, 11)

¹⁴ En pe letan apre, Pol ti aprann ki sa zonm ti’n fer bann gran sanzman e i ti’n repantir senserman. Menm si sa zonm ti’n anmenn laont lo kongregasyon, Pol ti dir bann ansyen ki i pa anvi vin “tro dir” avek li. I ti dir zot: “Zot devret plito pare pour pardonn e rekonfort li.” Remarke akoz Pol ti dir ki zot devret fer sa. I ti dir: “Pour ki i pa sitan tris e dekouraz net.” Zapot Pol ti pran pitye pour sa zonm ki ti’n repantir. Pol pa ti anvi ki sa zonm i sitan tris konsernan sa ki i ti’n fer ki i aret fer zefor pour aranz son lanmitye avek Zeova.​—Lir 2 Korentyen 2:5-8, 11.

15. Ki mannyer bann ansyen i kapab disiplin dan en fason sever me an menm tan demontre konpasyon?

 ¹⁵ Parey Zeova, bann ansyen i kontan pour demontre konpasyon. Si i neseser, zot pou disiplin sa dimoun ki’n fer en pese grav dan en fason ki sever me zot pou osi demontre konpasyon ler i posib. Si bann ansyen pa disiplin sa dimoun, zot pa pe demontre konpasyon. O kontrer, zot pe soutir li. Me eski zis bann ansyen ki bezwen demontre konpasyon?

16. Dapre Proverb 21:13, ki Zeova pou fer avek bann ki pa demontre konpasyon?

¹⁶ Tou Kretyen i bezwen demontre konpasyon parey Zeova. Akoz? En rezon i akoz Zeova pa pou ekout bann ki pa demontre konpasyon anver lezot. (Lir Proverb 21:13, NWT.) Personn pa anvi ki Zeova i refize ekout son lapriyer. Alor nou pa devret vin en dimoun ki annan en leker dir. Olye refize ekout en frer oubyen en ser ki pe soufer, nou toultan pare pour ekoute ler “en malere i kriy osekour.” Pareyman, nou fer nou mye pour ekout sa konsey ki dan sa verse Labib ki dir: “Sa enn ki napa pitye pou ganny zize san pitye.” (Zak 2:13) Nou tou nou bezwen ki lezot i demontre konpasyon anver nou, alor si nou gard sa antet, i tre probab ki nou pou demontre konpasyon anver lezot. Nou sirtou anvi demontre konpasyon ler en dimoun ki’n ganny ekskli dan kongregasyon i revin en Temwen Zeova.

17. Ki mannyer Lerwa David ti demontre konpasyon?

¹⁷ Bann legzanp dan Labib i kapab ed nou pour demontre konpasyon e pour evite azir dan en fason ki dir. Annou vwar legzanp Lerwa David. I ti souvan demontre konpasyon anver lezot. Menm si Sail ti anvi touy li, David ti demontre konpasyon anver sa lerwa ki Bondye ti’n swazir. I pa ti zanmen esey pran revanz lo Sail oubyen fer li ditor.​—1 Sam. 24:9-12, 18, 19.

18-19. Ki de moman ki David pa ti demontre konpasyon?

¹⁸ David pa ti toultan demontre konpasyon. Par egzanp, ler Nabal, ki ti en zonm difisil, ti ensilte David e refize donn David ek son bann zonm manze, David ti vreman ankoler e i ti deside pour touy Nabal ek tou bann zonm dan son lakour. Me madanm Nabal, ki ti apel Abigel, ti en bon dimoun e i ti annan pasyans. I ti degaze pour al anmenn manze pour David. Sa ti fer ki David pa ti touy Nabal ek son bann zonm.​—1 Sam. 25:9-22, 32-35.

¹⁹ En lot fwa, profet Natann ti rakont David konsernan en zonm ris ki ti vol mouton en zonm pov. David ti vreman ankoler e i ti dir: “Mon fer serman o non Zeova sa Bondye vivan, ki sa zonm ki’n fer sa i devret mor!” (2 Sam. 12:1-6, NWT) David ti konn Lalwa Moiz ki dir ki en dimoun ki vol en mouton ti bezwen rann sa dimoun ki i’n vole, kat mouton. (Egz. 22:1) Sa voler pa ti merit lanmor parski sa ti pou en pinisyon ki tro dir pour li. Natann ti pe servi sa legzanp pour ed David konpran ki i’n fer bann krim  pli grav ki sa zonm. Me Zeova ti annan plis konpasyon anver David ki David ti annan anver sa zonm dan legzanp Natann.​—2 Sam. 12:7-13.

20. Ki nou kapab aprann avek sa ki ti arive avek David?

²⁰ Ler David ti vreman ankoler i ti deside ki Nabal ek tou son bann zonm i devret ganny touye. Pli tar, David ti dir ki sa zonm ris dan sa legzanp ki Natann ti’n servi, ti merit ganny touye pour sa ki i’n fer. Me David ti en bon dimoun. Alor, akoz i ti ziz sa zonm ki’n vol mouton dan en fason ki dir? Mazin sa ki ti’n fek arive avek David. Sa letan, David ti pe santi li koupab. Si en dimoun i ziz en lot dimoun dan en fason ki dir, sa i montre ki i napa en bon lanmitye avek Zeova. Zezi ti averti son bann disip: “Aret zize pour ki zot pa ganny zize. Parski zot pou ganny zize dan menm fason ki zot pe ziz lezot.” (Mat. 7:1, 2) Nou devret fer nou mye pour pa azir dan en fason ki dir. O kontrer, nou devret annan “en kantite konpasyon” parey nou Bondye.

21-22. Ki serten fason nou kapab demontre konpasyon?

²¹ Konpasyon pa zis en santiman. En dimoun ki annan konpasyon i bezwen fer keksoz pour ed lezot. Nou tou nou kapab rode lekel ki bezwen led dan nou fanmir, dan kongregasyon e dan kominote. Nou pou vwar ki i annan en kantite loportinite pour demontre konpasyon. Eski i annan en dimoun ki bezwen ganny rekonforte? Nou kapab ed li par donn li en pe manze oubyen fer en keksoz pour ed li. Eski en dimoun ki’n revin Temwen Zeova i bezwen en bon zanmi pour ankouraz li? Eski nou kapab rekonfort lezot par anons sa bon nouvel avek zot? Sa i enn bann pli bon fason pour demontre konpasyon anver tou dimoun ki nou zwenn.​—Zob 29:12, 13, NWT: Rom. 10:14, 15; Zak 1:27.

²² Si nou gard antet ki i annan serten dimoun ki bezwen rekonfor, nou pou vwar ki i annan bann loportinite pour demontre konpasyon. Ler nou demontre konpasyon, nou pou fer nou Papa ki dan lesyel kontan parski i annan “en kantite konpasyon”!