1. Akoz nou kontan e nou fyer ki nou en Temwen Zeova?

NOU vreman kontan e nou fyer ki nou en Temwen Zeova! Nou pep Zeova e nou montre ki nou son bann Temwen par anons sa bon nouvel e ansenny lezot konsernan Zeova. Nou kontan ler nou kapab ed en dimoun ki annan “sa bon kondisyon leker” pour ganny lavi eternel pour vin disip. (Akt 13:48) Nou annan menm santiman avek Zezi. I ti “ranpli avek lespri sen ek lazwa” ler son bann disip ti rakont li konsernan bann leksperyans ki zot ti’n gannyen dan predikasyon.​—Lik 10:1, 17, 21.

2. Ki mannyer nou kapab montre ki sa travay predikasyon i enportan pour nou?

² Sa travay predikasyon i vreman enportan pour nou. Zapot Pol ti dir Timote: “Toultan vey ou fason viv ek ou lansennyman.” I ti osi dir: “Si ou fer sa, ou pou sov ou prop lekor ek sa bann ki ekout ou.” (1 Tim. 4:16) Sa travay predikasyon i sov lavi dimoun. Nou toultan vey nou fason viv akoz nou bann sitwayen Rwayonm Bondye. Nou toultan anvi konport nou dan en fason ki anmenn loner pour Zeova e ki montre ki nou krwar dan sa bon nouvel ki nou anonse. (Fili. 1:27) Nou montre ki nou ‘vey nou lansennyman’ ler nou prepar byen pour predikasyon e ler nou demann Zeova led avan ki nou anons sa bon nouvel avek lezot.

3. Eski tou dimoun pou enterese avek sa mesaz Rwayonm? Donn en legzanp.

³ Menm ler nou fer nou mye pour anons sa bon nouvel avek lezot, i kapab ki en kantite dimoun dan nou teritwar pa enterese avek sa bon nouvel lo Rwayonm. Annou vwar leksperyans Frer Georg Lindal. Ant 1929 ek 1947, Frer Lindal ti anons sa bon nouvel li tousel dan diferan  parti Ayslenn. I ti distribye plizyer milye liv me personn pa ti vin en Temwen Zeova. I dir: “I paret ki serten sa bann dimoun ti opoz mesaz Labib me laplipar zot pa ti enterese.” Bann misyonner ki ti sorti Lekol Gilead ti osi al laba pour al ede. Me zot ti anons sa bon nouvel pour plizyer lannen san ganny bann bon rezilta. Finalman apre nef an, serten dimoun dan sa pei ti dedye zot lavi avek Zeova e batize. *

4. Ki mannyer nou kapab santi ler dimoun pa enterese pour etidye Labib?

⁴ Nou dezapwente ler dimoun pa enterese pour etidye Labib. Nou kapab santi parey zapot Pol ki ti dan en “gran latristes” parski laplipar Zwif pa ti anvi krwar ki Zezi ti sa Mesi. (Rom. 9:1-3) Petet ou pe fer letid Labib avek en dimoun. Ou fer bokou zefor pour vin en bon ansenyan e ou priy en kantite pour ou etidyan, me i pa aplik sa ki i pe aprann e ou bezwen aret fer letid avek li. Oubyen petet ou pa’n zanmen fer letid avek en dimoun ziska ki i batize. Eski sa i vedir ki i ou lafot e ki Zeova pa pe beni ou travay predikasyon? Dan sa lartik, nou pou reponn de kestyon: (1) Kwa ki montre ki nou pe reisi dan nou travay predikasyon? (2) Ki nou devret ekspekte ler nou pe anons sa bon nouvel avek lezot?

5. Akoz i kapab ki nou travay predikasyon pa toultan vin parey nou ti ava kontan?

⁵ Labib i dir ki en dimoun ki fer lavolonte Bondye “pou reisi dan tou sa ki i fer.” (Ps. 1:3, NWT) Me sa pa vedir ki tou sa ki nou fer pour Zeova pou vin parey nou ti ava kontan. Lavi i “ranpli avek problenm” akoz nou tou nou enparfe. (Zob 14:1, NWT) Osi bann ki opoz nou, i kapab parfwa anpes nou fer nou travay predikasyon an piblik. (1 Kor. 16:9; 1 Tesa. 2:18) Alor, ki mannyer Zeova i deside si nou pe reisi dan nou travay predikasyon? Annou vwar serten prensip Labib ki kapab ed nou reponn sa kestyon.

6. Ki mannyer Zeova i deside si nou pe reisi dan nou travay predikasyon?

⁶ Zeova i get nou zefor ek nou landirans. Zeova i kontan ler nou anons sa bon nouvel avek devouman akoz nou kontan li. Nou fer sa, menm si dimoun pa anvi ekout nou. Pol ti dir: “Bondye pa enzis pour oubliy sa ki zot in fer e lanmour ki zot in demontre pour son non par servi e kontinyen servi bann sen.” (Ebr. 6:10) Menm si nou zefor pa anmenn bann bon rezilta, Zeova i mazin nou zefor ek lanmour ki nou’n demontre. Parey Pol ti dir bann Kretyen dan lavil Korent: “Zot travay pour Senyer i pa anven.” Sa bann parol i kapab aplik pour  nou menm si nou pa ganny bann rezilta ki nou ti a kontan.​—1 Kor. 15:58.

7. Ki nou kapab aprann avek sa ki zapot Pol ti dir konsernan son travay predikasyon?

⁷ Zapot Pol ti en bon misyonner. I ti form bann nouvo kongregasyon dan en kantite lavil. Me ler serten dimoun ti kritik li e dir ki i pa ti en bon ansenyan, i pa ti koz lo lakantite dimoun ki i’n ede pour vin Kretyen. O kontrer, Pol ti dir: “Mon’n travay plis ki zot.” (2 Kor. 11:23) Parey Pol, rapel ki sa ki pli enportan pour Zeova, i ki nou travay dir e nou pa abandonnen.

8. Ki nou devret rapel konsernan nou travay predikasyon?

⁸ Nou travay predikasyon i fer Zeova kontan. Zezi ti anvoy 70 disip pour anons sa bon nouvel lo Rwayonm e zot ti “retournen dan lazwa.” Akoz zot ti dan lazwa? Zot dir: “Menm bann demon in soumet avek nou ler nou’n servi ou non.” Me Zezi ti koriz zot fason panse ler i ti dir zot: “Pa bezwen rezouir akoz bann demon in soumet avek zot, plito, rezouir akoz zot non in ganny ekrir dan lesyel.” (Lik 10:17-20) Zezi ti konnen ki zot pa ti pou toultan ganny bann bon leksperyans dan predikasyon. Anfet nou pa konnen ki kantite dimoun ki bann disip Zezi ti koz avek ki ti vin Kretyen. Bann disip ti bezwen annan lazwa pa zis akoz dimoun ti ekout zot me pli enportan i akoz Zeova i kontan sa travay ki zot ti fer.

9. Dapre Galat 6:7-9, ki pou arive si nou pa aret fer sa travay predikasyon?

⁹ Si nou kontinyen fer sa travay predikasyon, nou pou ganny lavi eternel. Anmezir nou fer nou mye pour ansenny e anons sa bon nouvel, nou pe “senm pour fer plezir lespri sen” parski nou pe les lespri sen ed nou. Si nou pa ‘arete’ oubyen “abandonnen,” Zeova i promet ki i pou donn nou lavi eternel menm si nou pa’n fer en letid avek en dimoun ziska ki i batize.​—Lir Galat 6:7-9.

10. Akoz serten dimoun i ekoute ler nou anons sa bon nouvel avek zot e lezot pa ekoute?

¹⁰ Si dimoun i aksepte laverite oubyen non, sa i depan prensipalman lo zot. Zezi ti eksplik sa laverite dan sa legzanp ki i ti donnen konsernan sa fermye ki senm lagrenn lo diferan kalite later. Me zis lagrenn ki ti tonm lo bon later ki ti pouse e raport fri. (Lik 8:5-8) Zezi ti dir ki sa bann diferan later i reprezant leker bann dimoun ki reazir dan diferan fason anver “parol Bondye.” (Lik 8:11-15) Parey sa fermye, nou pa kapab fer en keksoz pouse dan leker bann dimoun ki nou’n anons sa bon nouvel avek. Nou responsabilite i pour kontinyen senm sa bon lagrenn setadir mesaz Rwayonm. Zapot Pol ti dir: “Sakenn pou ganny son rekonpans dapre son travay,” non pa dapre rezilta son travay.​—1 Kor. 3:8.

11. Akoz Zeova ti kontan sa travay predikasyon ki Noe ti fer menm si dimoun pa ti ekout li? (Vwar portre lo kouvertir.)

¹¹ Tou dilon listwar, en kantite dimoun pa’n ekout mesaz ki bann serviter Zeova ti anonse. Par egzanp, Noe ti “en zonm ki ti pe pres lo ladrwatir” e i tre probab ki i ti fer sa pour apepre 40 ouswa 50 an. (2 Pyer 2:5) San dout, i ti swete ki bann dimoun ti pou ekout li. Me Zeova pa ti dir ki sa ti pou arive. O kontrer ler Zeova ti dir Noe konstrir lars, Zeova ti dir: “Ou devret antre dan lars, ou, ou bann  garson, ou madanm ek madanm ou bann garson.” (Zen. 6:18, NWT) Ler Zeova ti dir Noe ki grander pour fer lars, i kapab ki Noe ti realize ki pa bokou dimoun ki pou ekout li parski i ti pou napa plas pour zot dan lars. (Zen. 6:15) Parey nou konnen, personn pa ti ekout Noe. (Zen. 7:7) Eski Zeova ti krwar ki Noe pa ti’n fer en bon travay predikasyon? Non, Zeova pa ti krwar sa! Zeova ti vreman kontan sa ki Noe ti’n fer akoz i ti’n fer tou sa ki Zeova ti’n demann li pour fer.​—Zen. 6:22.

12. Ki mannyer Zeremi ti trouv lazwa menm si dimoun pa ti ekout li e zot ti opoz li?

¹² Profet Zeremi ti anons mesaz Bondye pour plis ki 40 an menm si dimoun pa ti ekout li e zot ti opoz li. Dimoun ti ‘ensilte e monk’ li e sa ti fer li sitan dekouraze ki i ti anvi aret anons mesaz Bondye. (Zer. 20:8, 9, NWT) Me Zeremi pa ti abandonnen. Kwa ki ti ed li pour kontinyen e pour trouv lazwa? I ti konsantre lo de keksoz. Premyerman, ki sa mesaz ki i ti pe anons sa pep ti pou donn zot “en lavenir ek en lespwar.” (Zer. 29:11, NWT) Dezyenmman, Zeova ti’n swazir Zeremi pour port son non e pour anons son mesaz avek bann dimoun. (Zer. 15:16, NWT) Nou osi nou anons en mesaz lespwar e nou port non Zeova. Ler nou konsantre lo sa de keksoz enportan, nou kapab zwaye ki swa dimoun i ekout nou oubyen non.

13. Ki nou aprann avek sa legzanp ki Zezi ti donnen dan Mark 4:26-29?

¹³ I pran letan pour en dimoun devlop lafwa. Zezi ti ansenny sa dan legzanp ki i ti donnen konsernan sa fermye ki dormi. (Lir Mark 4:26-29.) Apre ki sa fermye in senm lagrenn, ptitapti sa bann lagrenn i pouse e sa fermye pa kapab fer nanryen pour fer zot pous pli vitman. I kapab ki ou osi ou bezwen esper en kantite letan avan ki ou etidyan Labib i aplik sa ki i pe aprann. En fermye pa kapab fer son plant pous vitman parey i ti a kontan. Nou osi nou pa kapab fer nou etidyan Labib fer progre spirityel vitman parey nou ti ava kontan. Alor, pa dekouraze ouswa abandonnen si i pe pran plis letan ki ou ti pe ekspekte. Parey en fermye, nou bezwen annan pasyans e espere ziska ki nou etidyan i deside pour servi Zeova.​—Zak 5:7, 8.

14. Ki legzanp ki montre ki i kapab pran en kantite letan avan ki dimoun i ekout nou?

¹⁴ Dan serten landrwa, i pran en kantite letan avan ki en dimoun i batize. Annou vwar leksperyans de ser ki apel Gladys ek Ruby Allen. An 1959, zot ti al servi konman pionye ordiner dan lavil Quebec, Kanada. * Dimoun laba ti per sa ki zot vwazen ek bann pret ti pou fer ouswa dir zot, si zot ti koz avek Temwen Zeova. Alor, zot pa ti ekout sa de ser. Gladys i dir: “Pour de-z-an, nou ti fer predikasyon kazankaz pour wit er-d-tan toulezour me personn pa ti ekout nou. Bann dimoun ti vin kot laport, zot ti vwar nou e zot ti tourn menm bor. Me nou pa ti abandonnen.” Ptitapti, bann dimoun ti vin pli amikal e zot ti konmans ekoute. Ozordi, i annan trwa kongregasyon dan sa lavil.​—Iza. 60:22, NWT.

15. Ki 1 Korentyen 3:6, 7 i ansenny nou konsernan sa travay pour fer disip?

¹⁵ I pran en kantite dimoun pour ed en dimoun vin en disip. I’n ganny dir ki i pran en kongregasyon pour ed en  dimoun ziska ki i vin en disip. (Lir 1 Korentyen 3:6, 7.) Par egzanp, en frer i kit en trak ouswa en magazin avek en dimoun ki enterese. Me i pa pou kapab retourn kot sa dimoun en letan ki konvenab pour sa dimoun. Alor i demann en lot frer pour fer sa retourn vizit. Sa frer ki’n retourn kot sa dimoun i konmans fer letid Labib. Apre, i envit diferan frer ek ser pour asiste sa letid. Sa bann frer ek ser i ankouraz sa etidyan dan diferan fason e zot ed li pour aprann plis konsernan Zeova. Dan sa fason, tou sa bann frer ek ser ki’n ed sa etidye i zwaye ler sa etidyan i batize.​—Zan 4:35-38.

16. Akoz ou kapab trouv lazwa dan sa travay predikasyon menm si ou lasante nepli bon e ou nepli annan bokou lafors?

¹⁶ Petet ou pa kapab anons e ansenny sa bon nouvel parey oparavan akoz ou lasante nepli bon e ou nepli annan bokou lafors. Kantmenm sa, ou kapab zwaye akoz sa ki ou kapab fer dan sa travay predikasyon. Annou vwar ki Lerwa David ti fer apre ki li ek son bann zonm ti al sers zot bann zafer e sov zot fanmir apre ki bann Amalekit ti’n atak zot. De san son bann zonm ti tro fatige pour lager alor zot ti reste deryer pour vey bagaz. Apre ki David ek son bann zonm ti’n ranport laviktwar dan sa lager, zot ti pran en kantite keksoz ki annan valer avek bann Amalekit. Ler sa bann keksoz ti ganny partaze, David ti donn lord ki sa bann ki’n al lager ek sa bann ki’n reste deryer i ganny menm lakantite keksoz. (1 Sam. 30:21-25) Sa ki ti arive i ansenny nou en keksoz konsernan nou travay pour fer disip. Petet ou pa kapab anons e ansenny sa bon nouvel parey ou ti ava kontan. Me si ou fer tou sa ki ou kapab, ou kapab annan lazwa sak fwa ki en dimoun i aprann konn Zeova e i batize.

17. Akoz nou devret remersye Zeova?

¹⁷ Nou remersye Zeova pour lafason ki i vwar nou servis pour li. I konnen ki nou pa kapab fors dimoun pour ekout nou ouswa pour ador li. Me i vwar ki nou travay dir e ki nou kontan li en kantite e i rekonpans nou pour sa. I osi ansenny nou pour trouv lazwa dan sa ki nou kapab fer dan sa travay predikasyon. (Zan 14:12) Si nou pa abandonnen, nou kapab asire ki nou annan laprouvasyon Zeova!