PANDAN Dezyenm Lager Mondyal, en solda Nazi ti dir avek en group Temwen Zeova: “Si enn parmi zot i refize lager kont Lafrans oubyen Langleter, nou pou touy zot tou!” Menm si bann solda Nazi ti pe debout pa tro lwen avek zot, sa bann frer ti refize pour lager. Sa bann frer ti demontre kouraz. Sa i en bon legzanp ki montre lafason ki Temwen Zeova i vwar lager. Nou refize partisip dan lager. Menm ler dimoun i menase pour touy nou, nou refize pran kote dan bann lager.

1. PEP BONDYE TI EN SEL NASYON

Dan lepase, Zeova ti swazir en nasyon pour vin son pep. Sa ti nasyon Izrael. Bondye ti dir ki bann Izraelit ti son “pep spesyal parmi tou pep.” (Egz. 19:5) Bondye ti donn zot en pei. Alor ler Bondye ti donn bann Izraelit lord pour al lager avek lezot nasyon, zot pa ti pe lager oubyen touy lezot adorater Zeova. *

Ozordi, bann serviter Zeova i sorti dan “tou nasyon, tribi, pep ek langaz.” (Rev. 7:9) Alor si pep Bondye ti pou partisip dan lager, zot ti pou pe lager e touy lezot serviter Zeova.

 2. ZEOVA KI TI DONN LORD BANN IZRAELIT POUR AL LAGER

Dan lepase, Zeova ki ti deside kan e akoz bann Izraelit ti pou al lager. Par egzanp, Bondye ti donn lord bann Izraelit pour al lager pour egzekit son zizman lo bann Kananeen, ki ti ador bann demon, komet bann aksyon imoral degoutan e sakrifye bann zanfan. Zeova ti donn lord bann Izraelit pour touy bann dimoun ki ti pe fer sa bann move keksoz dan Later Promiz, pour ki zot pa enfliyans bann Izraelit pour fer sa bann move keksoz zot osi. (Lev. 18:24, 25) Apre ki bann Izraelit ti’n antre dan Later Promiz, Zeova ti les zot al lager pour zot protez zot pei kont bann lennmi. (2 Sam. 5:17-25) Me Zeova pa ti zanmen les bann Izraelit deside pour zot menm si zot pou al lager. Ler zot ti deside pour al lager san permisyon Zeova, souvandfwa sa ti anmenn bann move konsekans.​—Nom. 14:41-45; 2 Kron. 35:20-24.

Ozordi, Zeova pa donn lord bann imen pour lager. Bann pei i lager avek kanmarad pour zot prop lentere me pa sa ki pour Bondye. Zot lager parski zot oule plis later, pour fer plis larzan oubyen pour promot zot bann lopinyon politik. Me ki nou pou dir konsernan bann ki dir ki zot pe lager pour Bondye pour protez zot bann krwayans relizye oubyen pour touy bann lennmi Bondye? Zeova pou protez son bann vre adorater e detri son bann lennmi dan en lager ki pou arive dan lavenir e sa i pandan lager Armagedon. (Rev. 16:14, 16) Pandan sa lager, zis bann lanz dan lesyel ki pou lager, pa bann adorater Zeova ki lo later.​—Rev. 19:11-15.

3. BANN IZRAELIT PA TI TOUY BANN KI TI DEMONTRE LAFWA DAN ZEOVA

Dan lepase, larme Izraelit ti pran pitye pour bann ki ti demontre lafwa dan Zeova e zot ti touy zis bann ki Zeova ti dir i merit lanmor. Annou vwar de legzanp. Menm si Zeova ti donn lord pour bann Izraelit detri Zeriko, zot pa ti touy Raab ek son fanmir  parski Raab ti annan lafwa dan Zeova. (Zoz. 2:9-16; 6:16, 17) Pli tar, bann Izraelit pa ti detri lavil Gibeonn parski bann Gibeonnit ti’n montre ki zot annan en gran respe pour Bondye.​—Zoz. 9:3-9, 17-19.

Ozordi, bann larme pa ezite pour touy bann ki demontre lafwa dan Bondye oubyen menm bann ki pa solda.

4. BANN IZRAELIT TI BEZWEN SWIV BANN LENSTRIKSYON BONDYE KONSERNAN LAGER

Dan lepase, Zeova ti dir ki bann Izraelit ti devret swiv son bann lenstriksyon konsernan lager. Par egzanp, parfwa Bondye ti demann bann Izraelit pour dir sa lavil ki zot ti pe atake “ki zot devret fer pour fer lape.” (Det. 20:10) Zeova ti osi ekspekte ki bann solda Izraelit i gard zot lekor prop fizikman e moralman. (Det. 23:9-14) Menm si bann solda sorti dan lezot nasyon ti souvandfwa vyol bann madanm dan bann pei kot zot ti’n ranport laviktwar, Zeova ti enterdi bann Izraelit fer sa. Anfet, si zot ti anvi marye avek en madanm sorti dan en pei kot zot ti’n ranport laviktwar, zot ti bezwen esper en mwan apre ki zot ti’n ranport laviktwar lo sa pei pour zot kapab marye avek sa madanm.​—Det. 21:10-13.

Ozordi, laplipar pei in siny bann lagreman enternasyonal ki dir lafason ki bann lager i devret ganny fer. Menm si sa bann lagreman i la pour protez bann dimoun ki pa solda, malerezman souvandfwa bann pei pa obei sa bann lagreman.

5. BONDYE TI LAGER POUR NASYON IZRAEL

Dan lepase, Zeova ti lager pour bann Izraelit e souvandfwa i ti fer bann mirak pour zot ranport laviktwar. Par egzanp, Zeova ti ed bann Izraelit ranport laviktwar lo lavil Zeriko. Parey Zeova ti’n dir, ler bann Izraelit ti ‘kriye pour fer konnen ki zot ti pe al lager, miray ti tonm plat ater’ e sa ti fer li pli fasil pour bann Izraelit pran lavil Zeriko. (Zoz. 6:20) Zeova ti osi ed bann Izraelit ranport laviktwar lo bann Amorit. “Zeova ti fer bann gro lagrel tonm lo zot . . . Anfet, i ti annan plis dimoun ki ti mor akoz lagrel ki avek lepe bann Izraelit.”​—Zoz. 10:6-11.

BANN VRE KRETYEN I FER LAPE AVEK LEZOT

Parey nou’n vwar, nou sityasyon ozordi i diferan avek sa ki pour bann Izraelit dan letan lontan. Me sa pa sel rezon akoz nou pa lager. Par egzanp, Bondye ti predir ki dan bann dernyen zour, bann ki i pou ansennyen pou “nepli aprann lager” e zot pa pou partisip dan lager. (Iza. 2:2-4) Osi, Kris ti dir ki son bann disip “pa form parti sa lemonn,” setadir ki zot pa ti pou pran kote dan bann lager.​—Zan 15:19.

Kris ti osi ankouraz son bann disip pour fer plis ki sa. I ti dir ki zot pa devret annan okenn latitid ki kapab fer lezot gard rankin, ankoler e lager. (Mat. 5:21, 22) I ti osi dir ki son bann disip i devret “fer lape” e kontan zot bann lennmi.​—Mat. 5:9, 44.

Ki mannyer nou kapab fer sa? Nou pa anvi partisip dan en lager me eski i kapab ki nou vwar en dimoun dan kongregasyon konman nou lennmi? Annou kontinyen fer bokou zefor pour nou tir bann santiman koumsa dan nou leker.​—Zak 4:1, 11.

Olye partisip dan bann lager, nou travay dir pour fer ki i annan lape ek lanmour antre nou. (Zan 13:34, 35) Annou determinen pour pa pran kote dan okenn lager sa lemonn e esper sa zour kot Zeova pou fer ki i nepli annan lager.​—Ps. 46:9.