1-2. (a) Ki mannyer serten gouvernman in opoz pep Bondye me ki mannyer pep Bondye in reazir? (b) Akoz nou kapab zwaye menm ler nou pe ganny persekite? (Fer komanter lo portre ki lo kouvertir.)

 OZORDI, nou travay predikasyon i anba restriksyon oubyen i’n ganny enterdi dan plis ki 30 pei. Dan serten pei, bann lotorite in met nou bann frer ek ser dan prizon. Ki zot in fer mal? Dapre pwennvi Zeova, sa bann frer ek ser pa’n fer nanryen mal. Zot in zis lir e etidye Labib, koz lo zot krwayans avek lezot e asiste renyon. Zot in osi refize pour pran kote dan bann zafer politik. Menm si dimoun ti opoz zot, sa bann serviter Bondye ti reste san defo e fidel avek Zeova, setadir zot ti montre ki zot devoue pour Zeova e siport son drwa pour dirize. Sa i fer zot vreman zwaye.

² I tre probab ki ou’n vwar portre serten serviter Bondye ki’n demontre kouraz e ki’n reste fidel e ou’n remarke ki zot pe sourir. Zot zwaye parski zot in reste fidel avek Zeova e zot konnen ki sa i fer li plezir. (1 Kron. 29:17a) Zezi ti dir: “Ere bann ki’n ganny persekite akoz zot fer sa ki drwat . . . Zot devret kontan e dan lazwa, parski zot rekonpans i gran.”​—Mat. 5:10-12.

3. Dapre Akt 4:19, 20, ki mannyer bann zapot dan premye syek ti reazir ler zot ti ganny persekite e akoz?

³ Nou bann frer ek ser pe fer fas avek bann menm keksoz ki bann zapot Zezi ti fer fas avek dan premye syek.  Bann zapot ti ganny persekite parski zot ti pe anons sa bon nouvel konsernan Zezi. Plizyer fwa, bann ziz dan lakour siprenm Zwif ti “donn zot lord pour aret koz lo non Zezi.” (Akt 4:18; 5:27, 28, 40) Ki mannyer bann zapot ti reazir? (Lir Akt 4:19, 20.) Zot ti konnen ki sa enn ki annan plis lotorite ti’n ‘donn zot lord pour prese e rann en bon temwannyaz’ lo Kris. (Akt 10:42) Alor Pyer ek Zan, ki ti pe reprezant bann zapot, ti dir avek kouraz ki zot pou obei Bondye plito ki sa bann ziz e ki zot pa pou aret koz lo Zezi. I ti konmsi zot pe demann sa bann ziz, ‘Eski ou krwar ki ou annan plis lotorite ki Bondye?’

4. Dapre Akt 5:27-29, ki bann zapot ti fer e ki mannyer nou kapab swiv zot legzanp?

⁴ Bann zapot in kit en bon legzanp ki tou bann vre Kretyen in swiv ziska aprezan. Sa bann zapot ti determinen pour “obei Bondye plito ki zonm.” (Lir Akt 5:27-29.) Bann zapot ti ganny bate akoz zot ti’n reste fidel avek Bondye. Me kantmenm sa, zot ti kit lakour siprenm Zwif “byen kontan akoz zot ti’n ganny konsidere diny pour ganny maltrete o non Zezi.” Apre sa, zot ti kontinyen anons sa bon nouvel.​—Akt 5:40-42.

5. Ki kestyon nou bezwen reponn?

⁵ Sa ki bann zapot ti fer i fer nou demann serten kestyon. Par egzanp, ki mannyer bann zapot ti kapab obei Bondye plito ki zonm e an menm tan obei sa lord ki dan Labib ki dir ki tou dimoun i “devret soumet avek bann lotorite”? (Rom. 13:1) Ki mannyer nou kapab “obei bann gouvernman ek lotorite,” parey zapot Pol ti dir e kontinyen reste fidel avek Bondye ki nou pli gran Sef?​—Tit 3:1.

6. (a) Lekel sa “lotorite” ki ganny mansyonnen dan Romen 13:1 e ki mannyer nou devret tret zot? (b) Ki nou kapab dir konsernan lotorite ki tou dirizan imen i annan?

⁶ Lir Romen 13:1. Dan sa verse, sa lekspresyon “bann lotorite” i refer avek bann dirizan imen ki annan pouvwar  lo lezot. Bann Kretyen i devret soumet avek sa bann lotorite. Sa bann lotorite i fer ki i annan lape, zot fer sir ki dimoun i obei lalwa e parfwa zot menm protez pep Zeova. (Rev. 12:16) Alor, nou devret pey taks, annan respe pour zot e donn zot sa loner ki zot demande. (Rom. 13:7) Me sa bann gouvernman i annan lotorite parski Zeova ki permet zot annan lotorite. Zezi ti fer sa prensip kler ler Gouverner Romen, Pons Pilat ti pe kestyonn li. Ler Pilat ti dir ki i annan lotorite pour larg Zezi oubyen pour met li amor, Zezi ti dir li: “Ou ti pou napa okenn lotorite lo mwan si Bondye pa ti’n donn ou sa lotorite.” (Zan 19:11) Zis parey lotorite ki Pilat ti annan, ti annan en limit, lotorite ki bann dirizan imen ek politisyen i annan ozordi, i annan en limit.

7. Kan ki nou pa devret obei bann dirizan e ki sa bann dirizan i bezwen gard antet?

⁷ Bann Kretyen i devret obei bann lalwa gouvernman tan ki sa bann lalwa pa pe fer zot dezobei bann lalwa Bondye. Nou pa devret obei bann lalwa imen ler zot demann nou pour fer en keksoz ki Bondye i enterdi oubyen ler zot enterdi en keksoz ki Bondye i dir nou devret fer. Par egzanp, zot kapab donn lord bann zenn garson pour servi zarm e lager pour zot pei. * Ouswa zot kapab enterdi nou Labib ek nou bann piblikasyon ki baze lo Labib e enterdi ki nou anons sa bon nouvel e zwenn ansanm pour ador Zeova. Ler bann dirizan i mal servi zot lotorite, par egzanp ler zot persekit bann disip Kris, zot pou bezwen rann kont avek Bondye parski Bondye pe obzerv zot!​—Ekle. 5:8.

8. Ki diferans i annan ant “bann lotorite” ek “sa Bondye Siprenm”?

⁸ Bann lotorite i kapab fer en kantite bon keksoz e annan pouvwar lo lezot. Me sa pa vedir ki zot parfe e ki zot sa lotorite ki pli bon. I annan Enn ki parfe e ki pli siperyer ki tou e sa i Zeova. Kat fwa Labib in dir ki Zeova i “sa Bondye Siprenm.”​—Dan. 7:18, 22, 25, 27.

9. Ki profet Danyel ti vwar dan bann vizyon?

⁹ Profet Danyel ti vwar plizyer vizyon ki montre ki Zeova i pli siperyer ki tou lezot lotorite. Premyerman Danyel ti vwar kat gro bebet ki ti reprezant bann pouvwar mondyal dan lepase, setadir Babilonn, Med ek Pers, Lagres ek Ronm e pouvwar mondyal ki pe dirize ozordi, setadir Pouvwar Mondyal Angle ek Ameriken. (Dan. 7:1-3, 17) Apre Danyel ti vwar Zeova pe asize lo tronn dan lesyel. (Dan. 7:9, 10) Sa ki sa profet fidel ti vwar apre i devret en lavertisman pour bann dirizan ozordi.

10. Dapre Danyel 7:13, 14, 27, avek lekel ki Zeova i donn lotorite pour diriz later e ki sa i montre lo Zeova?

¹⁰ Lir Danyel 7:13, 14, 27. Bondye i pran tou pouvwar ek lotorite avek bann gouvernman imen e i donn avek lezot ki merite e ki pli pwisan. Avek lekel ki Zeova i donn tou pouvwar ek lotorite? I donn avek “en dimoun [ki] parey en garson zonm,” setadir Zezi Kri e avek “bann sen sa Bondye Siprenm,” setadir sa 144,000 ki pou dirize “pour touzour e  touzour.” (Dan. 7:18) I kler ki Zeova i “sa Bondye Siprenm” parski zis li tousel ki annan sa lotorite pour fer sa bann keksoz.

11. Ki lezot keksoz Danyel ti ekri ki montre ki Zeova i pli siperyer ki bann nasyon?

¹¹ Sa ki Danyel ti vwar dan sa vizyon i konfirm sa ki i ti dir pli boner. Danyel ti dir: “Sa Bondye ki dan lesyel . . . i tir bann lerwa e apwent bann lerwa.” I ti osi ekri ki “sa Enn Tre O [i] Sef dan rwayonm bann imen e i donn lotorite avek sa enn ki i oule.” (Dan. 2:19-21; 4:17) Eski in annan letan kot Zeova in tir oubyen apwent bann dirizan? Definitivman!

12. Donn en legzanp pour montre ki mannyer Zeova ti tir bann lerwa lo zot tronn dan lepase. (Vwar portre.)

¹² Zeova in klerman montre ki i par lao tou “bann lotorite.” Annou vwar trwa legzanp. Faraon, ki ti dirizan Lezip, ti fer pep Zeova vin lesklav e plizyer fwa i ti refize liber zot. Me Bondye ti liber son pep e i ti noy Faraon dan Lanmer Rouz. (Egz. 14:26-28; Ps. 136:15) Lerwa Belsazar, dirizan Babilonn, ti fer en gran lafet. I ti “krwar ki [i] pli enportan ki Senyer lesyel” e i ti “loue bann bondye annor e annarzan,” olye loue Zeova. (Dan. 5:22, 23) Me Bondye ti abes sa zonm arogan. “Sa menm lannwit,” Belsazar ti ganny touye e son rwayonm ti ganny donnen avek bann Med ek Pers. (Dan. 5:28, 30, 31) Lerwa Erod Agripa 1, dirizan Palestin, ti fer touy zapot Zak e i ti met zapot Pyer dan prizon avek lentansyon pour touy li. Me Zeova ti anpes Erod fer sa ki i ti’n plàn. “Lanz Zeova ti frap li” e i ti mor.​—Akt 12:1-5, 21-23.

13. Donn en legzanp pour montre ki mannyer Zeova ti ranport laviktwar lo bann dirizan ki ti’n rasanble ansanm.

¹³ Zeova in osi montre ki i pli siperyer ki bann dirizan ki’n rasanble ansanm. I ti lager pour Izrael e ed zot pour detri 31 lerwa Kananeen ki ti’n rasanble ansanm, pour ki bann Izraelit i kapab pran posesyon Later Promiz. (Zoz. 11:4-6, 20; 12:1, 7, 24) Zeova ti ed bann Izraelit pour ranport laviktwar lo Lerwa Benn-Adad ek 32 lezot  lerwa Siryen ki ti vin lager avek Izrael.​—1 Rwa. 20:1, 26-29.

14-15. (a) Ki Lerwa Neboukadnezar ek Lerwa Daryis ti dir konsernan drwa Zeova pour dirize? (b) Ki en psalmis ti dir konsernan Zeova ek Son pep?

¹⁴ Plizyer fwa Zeova in montre ki i sa Bondye Siprenm! Ler Lerwa Neboukadnezar ti fer vantar konsernan son ‘lafors, pouvwar, laglwar ek grander’ olye demontre limilite e rekonnet ki Zeova i sa enn ki devret ganny loue, Bondye ti fer li vin fou. Apre ki Neboukadnezar ti’n byen, i ti “konmans loue sa Enn Tre O” e i ti rekonnet ki dominasyon Zeova “i en dominasyon eternel.” Neboukadnezar ti dir: “Napa personn ki kapab anpes li fer en keksoz.” (Dan. 4:30, 33-35) Apre ki fidelite Danyel ti’n ganny teste e Zeova ti’n sov li dan trou lyon, Lerwa Daryis ti dir: “Tou dimoun i devret tranble avek lafreyer devan sa Bondye Danyel. Parski i sa Bondye vivan ki egziste pour touzour. Son rwayonm pa pou zanmen ganny detrir e son dominasyon i eternel.”​—Dan. 6:7-10, 19-22, 26, 27.

¹⁵ En psalmis ti dir: “Zeova in kas konplo bann nasyon, i’n anpes bann plan lepep marse.” I ti osi dir: “Ere sa nasyon ki son Bondye i Zeova, sa pep ki i’n swazir konman son propriyete.” (Ps. 33:10, 12) Sa i en bon rezon pour nou reste fidel avek Zeova.

16. Ki nou kapab asire pou arive pandan “gran ladetres” e akoz? (Vwar portre.)

¹⁶ Nou’n lir konsernan sa ki Zeova in fer dan lepase. Ki nou ekspekte pou arive dan lavenir? Nou kapab asire ki Zeova pou sov son bann serviter fidel pandan sa “gran ladetres” ki pe vini. (Mat. 24:21; Dan. 12:1) I pou fer sa ler Gog sorti Magog, ki en group nasyon ki’n rasanble ansanm, i atak pep  Bondye ki partou lo later. Menm si sa group nasyon i enkli tou le 193 pei ki en manm Nasyon-z-ini, zot pa pou kapab lager kont sa Bondye Siprenm ek son larme ki dan lesyel! Zeova i promet: “Mon non pou sirman vin gran. Mon pou sanktifye mon non, bokou nasyon pou konn mwan e zot pou bezwen konnen ki mwan mon Zeova.”​—Ezek. 38:14-16, 23; Ps. 46:10.

17. Ki Labib i dir pou arive avek bann lerwa lo later e avek bann ki reste fidel avek Zeova?

¹⁷ Ler Gog pou atak pep Bondye, sa pou konmans lager Armagedon kot Zeova pou detri “bann lerwa partou lo later.” (Rev. 16:14, 16; 19:19-21) De lot kote, “zis bann dimoun drwat ki pou viv lo later e zis bann dimoun san repros ki pou reste lo la.”​—Prov. 2:21.

18. Ki en kantite vre Kretyen in pare pour fer e akoz? (Danyel 3:28)

¹⁸ Tou dilon listwar, en kantite vre Kretyen in riske zot liberte ek zot lavi parski zot kontan Zeova e zot kontan ki i zot Dirizan. Sa bann vre Kretyen i determinen pour reste fidel avek Zeova. Zot parey sa trwa Ebre ki ti reste fidel avek sa Bondye Siprenm ki ti sov zot dan sa four dife.​—Lir Danyel 3:28.

19. Dapre kwa ki Zeova pou ziz son pep e ki nou devret fer la konmela?

¹⁹ Psalmis David ti dir akoz i enportan pour reste fidel avek Bondye. I ti dir: “Zeova pou pas santans lo bann pep. Ziz mwan, O Zeova, dapre mon bann aksyon drwat, e dapre mon fidelite.” (Ps. 7:8) David ti osi dir: “Les mon fidelite e ladrwatir protez mwan.” (Ps. 25:21) Sa pli bon fason pour viv nou lavi i pour reste fidel avek Zeova malgre nenport keksoz ki kapab arive. Sa pou fer nou santi parey sa psalmis ki ti dir: “Ere bann ki fidel e ki obei lalwa Zeova.”​—Ps. 119:1.