1. Akoz nou ere ler nou rekonnet ki nou bezwen gidans Bondye?

 EN DIMOUN ki vreman ere, pa zis santi li zwaye tanzantan. Sa santiman i kapab dire tou son lavi. Ki mannyer sa? Dan Sermon lo Montanny, Zezi ti dir: “Ere bann ki rekonnet ki zot bezwen gidans Bondye.” (Mat. 5:3) Zezi ti konnen ki bann imen in ganny kree avek sa dezir pour konn zot Kreater Zeova e pour ador li. Vi ki Zeova i “sa Bondye ere,” bann ki ador li i kapab ere zot osi.​—1 Tim. 1:11.

2-3. (a) Dapre Zezi, lekel ankor ki kapab ere? (b) Ki nou pou diskite dan sa lartik e akoz nou bezwen diskit lo la?

² Eski tou keksoz i bezwen pe mars byen dan nou lavi pour nou ere? Non. Dan Sermon lo Montanny, Zezi ti dir en keksoz ki kapab sirprann nou. Zezi ti dir ki menm “bann ki dan en gran latristes” petet akoz zot santi zot koupab pour bann pese ki zot in fer oubyen akoz zot annan bann problenm grav, zot kapab ere. Zezi ti dir menm keksoz konsernan “bann ki’n ganny persekite akoz zot fer sa ki drwat” e bann ki ganny “ensilte” akoz zot bann disip Kris. (Mat. 5:4, 10, 11) Me eski i vreman posib pour nou ere dan sa bann sityasyon?

³ Zezi ti pe ansenny nou ki menm si nou annan problenm, nou kapab ere. I ti pe dir ki nou pou ere si nou satisfer nou bezwen spirityel e vin pros avek Bondye. (Zak 4:8) Ki mannyer nou fer sa? Dan sa lartik, nou pou vwar  trwa keksoz ki nou bezwen fer pour nou vreman ere.

4. Ki sa premye keksoz nou bezwen fer pour nou vreman ere? (Psonm 1:1-3)

⁴ PREMYE LETAP: Pour nou vreman ere, nou bezwen lir e etidye Labib. Zezi ti konpar Parol Bondye avek manze. Bann imen ek bann zannimo i bezwen manze pour viv me zis bann imen ki kapab lir Parol Bondye e zot bezwen fer sa. I pour sa rezon ki Zezi ti dir: “Zonm pa devret viv zis lo dipen tousel me lo tou parol ki sorti dan labous Zeova.” (Mat. 4:4) Alor, nou pa devret les en zour pase san ki nou lir Parol Bondye. En psalmis ti dir: ‘Ere sa zonm ki pran plezir dan lalwa Zeova e ki lir li lizour konman aswar.’​—Lir Psonm 1:1-3.

5-6. (a) Ki nou aprann dan Labib? (b) Ki mannyer lektir Labib i kapab ed nou?

⁵ Dan Labib, Zeova in montre nou sa ki nou bezwen fer pour nou vreman ere. I’n fer sa akoz i kontan nou. Dan Labib, nou aprann konsernan plan Bondye pour bann imen. Nou aprann ki mannyer nou kapab vin pros avek li e ki nou bezwen fer pour li pardonn nou pese. Nou osi aprann konsernan promes ki in fer pour lavenir. (Zer. 29:11) Sa bann laverite ki nou aprann ler nou etidye Labib, i fer nou vreman zwaye.

⁶ Nou konnen ki dan Labib i annan bann konsey pratik ki nou kapab aplike dan nou lavi toulezour. Ler nou swiv sa bann konsey, nou pou ere. Nenport ler ki ou santi ou dekouraze akoz bann problenm, pran plis letan pour lir Parol Zeova e pour medit lo la. Zezi ti dir: “Ere sa  bann ki tann parol Bondye e obei li!”​—Lik 11:28.

7. Ki ou kapab fer pour ou apresye sa letan ki ou pase pour lir Parol Bondye?

⁷ Anmezir ki ou lir Parol Bondye, pran letan pour apresye sa ki ou pe lir. Pour nou kapab konpran sa, annou vwar en legzanp. Eski en dimoun in deza kwi ou manze prefere? Petet sa zour ou ti napa ase letan pour manze oubyen ou ti pe mazin lezot keksoz e ou ti zis anval sa manze vitman san ki ou apresye sak kwiyer ou pe manze. Ler ou’n fini manze, ou realize ki ou’n manz vitman e ou swete ki ou ti’n manz pli dousman e apresye sak kwiyer ki ou’n manze. I kapab ariv en keksoz en pe parey ler nou lir Labib. Parfwa nou lir Labib sitan vit ki nou pa vreman konpran sa ki nou pe lir e nou pa apresye sa mesaz ki dan Labib. Alor, ler ou lir Parol Bondye, pran letan pour apresye sa ki ou pe lir par imazin sa ki pe arive, imazin bann lavwa e reflesir lo sa ki ou’n lir. Ler ou fer sa, ou pou pli zwaye.

8. Ki mannyer “sa lesklav fidel e pridan” pe desarz son responsabilite? (Vwar osi not anba lo paz.)

⁸ Zezi in apwent “sa lesklav fidel e pridan” pour donn nou manze spirityel dan sa moman apropriye e nou ganny tou sa ki nou bezwen. * (Mat. 24:45) Sa lesklav i servi Labib konman sa zengredyen prensipal dan nou manze spirityel. (1 Tesa. 2:13) Sa manze spirityel i ed nou pour konn fason panse Zeova ki dan Labib. I pour sa rezon ki nou lir bann magazin Latour Veyer ek Awake! e bann lartik ki lo jw.org. Nou prepare pour bann renyon kongregasyon ki ganny fer dan lasemenn e dan wikenn. Nou osi get progranm ki nou gannyen tou le mwan lo Televizyon JW^® si i disponib dan nou langaz. Si nou kontinyen lir e etidye Labib, nou pou kapab fer sa dezyenm keksoz ki nou bezwen fer pour nou vreman ere.

9. Ki sa dezyenm keksoz nou bezwen fer pour nou vreman ere?

⁹ DEZYENM LETAP: Pour nou vreman ere, nou bezwen obei bann standar Zeova. En psalmis ti dir: “Ere tou bann ki annan en gran respe pour Zeova, ki mars lo Son bann semen.” (Ps. 128:1) Ler nou annan en gran respe pour Zeova, nou evite fer okenn keksoz ki pa fer li plezir. (Prov. 16:6) Alor, nou kontinyen fer nou mye pour swiv bann standar Zeova konsernan sa ki byen e sa ki mal parey in ganny eksplike dan Labib. (2 Kor. 7:1) Nou pou ere si nou fer bann keksoz ki Zeova i kontan e nou rezet bann keksoz ki i pa kontan.​—Ps. 37:27; 97:10; Rom. 12:9.

10. Dapre Romen 12:2, ki nou devret fer?

¹⁰ Lir Romen 12:2. I kapab ki en dimoun i konnen ki Zeova i annan drwa deside kwa ki byen e kwa ki mal. Me sa dimoun i bezwen aksepte e anvi swiv bann standar Zeova. Par egzanp, i kapab ki en dimoun i konnen ki gouvernman i annan drwa pour met bann lalwa konsernan lavites ki en transpor i devret roule lo semen. Me i kapab ki i pa anvi aksepte e obei sa bann lalwa. Sa i fer ki i dray pli vit ki i sipoze. Alor, par sa ki nou fer, nou montre ki nou vreman krwar ki swiv bann standar Zeova i sa pli bon fason pour viv nou lavi. (Prov. 12:28) David ti santi koumsa. I pour sa rezon ki i ti dir  Zeova: “Ou fer mwan konn sa santye ki donn lavi. Devan ou, i annan bokou lazwa, dan ou kote drwat, i annan lazwa pour touzour.”​—Ps. 16:11.

11-12. (a) Ki nou bezwen fer atansyon ler nou enkyet oubyen dekouraze? (b) Ki mannyer sa ki Filipyen 4:8 i dir, i kapab ed nou ler nou pe swazir divertisman?

¹¹ Ler nou enkyet oubyen dekouraze, petet nou kapab santi ki nou bezwen fer en keksoz pour nou aret mazin lo nou problenm. I normal pour nou santi koumsa. Me nou bezwen fer atansyon pour pa fer en keksoz ki Zeova pa kontan.​—Efe. 5:10-12, 15-17.

¹² Dan let ki zapot Pol ti ekri pour bann Kretyen dan lavil Filip, i ti ankouraz zot pour kontinyen mazin bann keksoz ki “drwat, . . . ki pir, . . . ki ankouraz [nou] pour annan lanmour . . . [e] ki byen.” (Lir Filipyen 4:8.) Menm si Pol pa ti pe ekri konsernan divertisman, sa ki i ti ekri i devret ed nou ler nou pe swazir nou divertisman. Par egzanp, sak fwa ki nou vwar sa lekspresyon “tou sa” dan Filipyen 4:8, ranplas li avek bann mo parey “sanson,” “film,” “liv” oubyen “zwe video.” Sa pou ed nou konnen ki sanson, film, liv oubyen zwe video ki akseptab pour Bondye e bann ki pa akseptab pour Bondye. Nou anvi swiv bann standar Zeova ki o. (Ps. 119:1-3) Sa pou fer nou annan en konsyans kler e nou pou kapab fer sa lot keksoz ki nou bezwen fer pour nou vreman ere.​—Akt 23:1.

13. Ki sa trwazyenm keksoz ki kapab fer nou vreman ere? (Zan 4:23, 24)

¹³ TRWAZYENM LETAP: Fer sir ki ou met ladorasyon Zeova premye dan ou lavi. Konman nou Kreater, Zeova i merite ki nou ador li. (Rev. 4:11; 14:6, 7) Alor sa keksoz pli enportan dan nou lavi i ki nou devret ador Zeova lafason ki i anvi nou ador li, setadir “an armoni avek lespri sen ek laverite.” (Lir Zan 4:23, 24.) Pour nou ador Zeova an armoni avek laverite ki dan son Parol, nou bezwen gidans lespri sen. Nou ladorasyon i devret premye dan nou lavi menm si nou reste dan en pei kot nou travay i anba restriksyon oubyen i ganny enterdi. Ozordi, i annan plis ki 100 nou bann frer ek ser ki dan prizon zis akoz zot Temwen Zeova. * Kantmenm sa, zot fer tou sa ki zot kapab pour priye, etidye e koz avek lezot lo Bondye ek son Rwayonm. Ler dimoun i kritik ouswa persekit nou, nou kontan parski Zeova i ed nou pour andire e i pou rekonpans nou.​—Zak 1:12; 1 Pyer 4:14.

14. Ki ti arive avek en zenn frer ki reste Tajikistan e akoz?

¹⁴ Serten frer ek ser in pas dan bann sityasyon vreman difisil me zot in vreman zwaye parski zot in fer sa trwa keksoz ki nou’n diskite. Annou vwar ki ti arive avek en frer 19 an ki apel Jovidon Bobojonov ki reste Tajikistan, ki ti refize antre dan larme. Le 4 Oktob 2019, i ti ganny pran dan son lakour e ganny anmennen prizon pardfors. I ti reste laba pour plizyer mwan e ganny trete konman en kriminel. Sa ti en keksoz enzis e i ti ganny raporte dan medya dan plizyer pei. Medya ti raporte ki i ti ganny bate avek bi pour met presyon lo li pour fer serman ki i pou fidel avek larme sa pei e ki i pou met en liniform larme. Apre sa,  i ti ganny kondannen e ganny anvoye dan en kan kot i ti ganny forse pour travay ziska ki prezidan sa pei ti pardonn li e donn lord pour larg li. Pandan sa letan, Jovidon ti reste fidel avek Zeova e i ti zwaye. Akoz? Jovidon ti toultan rekonnet ki i bezwen gidans Bondye.

15. Ki mannyer Jovidon ti kontinyen aprann lo Zeova ler i ti dan prizon?

¹⁵ Ler Jovidon ti dan prizon, i ti kontinyen aprann konsernan Zeova menm si i ti napa en Labib ouswa nou bann piblikasyon. Ki mannyer i ti fer sa? Bann frer ek ser ti anmenn manze pour li e zot ti ekri teks pour lazournen lo bann sak ki zot ti anmenn konmisyon ladan. Sa i fer ki i ti kapab lir Labib e medit lo la toulezour. Apre ki i ti’n ganny large dan prizon, i ti donn sa konsey avek bann ki pa ankor fer fas avek bann sityasyon vreman difisil. I ti dir: “I vreman enportan ki ou servi sa liberte ki ou annan la konmela pour aprann plis lo Zeova atraver son Parol ek nou bann piblikasyon.”

16. Ki Jovidon ti konsantre lo la?

¹⁶ Jovidon ti obei bann standar Zeova. I pa ti kontinyen mazin lo bann move dezir e i pa ti fer bann move keksoz, o kontrer  i ti konsantre lo Zeova e lo sa ki Zeova i kontan. Jovidon ti apresye labote kreasyon Bondye. Tou le bomaten ler i ti leve, i ti tann bann zwazo pe sante. Aswar, i ti get lalin ek zetwal. I ti dir: “Sa bann kado sorti kot Zeova ti ankouraz mwan e fer mwan zwaye.” Ler nou apresye tou bann provizyon ki Zeova in donn nou ki swa fizik oubyen spirityel, nou pou ere e sa lazwa i kapab ed nou pour andire.

17. Ki mannyer 1 Pyer 1:6, 7 i kapab aplik pour en dimoun ki son sityasyon i en pe parey avek pour Jovidon?

¹⁷ Jovidon ti osi met ladorasyon Zeova premye dan son lavi. I ti konnen ki i vreman enportan pour reste fidel avek sa vre Bondye. Zezi ti dir: “Se Zeova ou Bondye ki ou devret adore e zis li tousel ki ou devret servi.” (Lik 4:8) Bann komandan ek solda ti anvi ki Jovidon i arete konman en Temwen Zeova. Me Jovidon ti priye lizour konman aswar e demann Zeova pour ed li reste fidel. Menm si Jovidon pa ti ganny trete byen, i ti reste fidel. Aprezan Jovidon i kapab vreman zwaye parski i annan en keksoz ki i ti napa avan i ganny tyonbo, bate e ganny met dan prizon. Son lafwa in vin pli for parski son lafwa in ganny teste.​—Lir 1 Pyer 1:6, 7.

18. Ki mannyer nou kapab vreman ere?

¹⁸ Zeova i konnen ki nou bezwen pour nou vreman zwaye. Si ou fer sa trwa keksoz ki kapab fer ou zwaye, ou pou zwaye menm si ou pas dan difikilte. Koumsa ou osi ou pou kapab dir: “Ere sa pep ki Zeova i zot Bondye!”​—Ps. 144:15.