Pour plis ki enn an, bann frer dan Betel ti’n travay dir pour konstri stasyon radyo WBBR lo Staten Island, New York City. Apre ki zot ti’n netway sa bout later, zot ti konstri en gran lakaz pour bann travayer e en lot batiman kot zot ti pou met bann lekipman. Ler sa travay ti’n fini, bann frer ti konmans rod bann lekipman ki zot ti pou bezwen pour zot kapab transmet bann progranm lo radyo. Me zot ti pou bezwen rezourd plizyer problenm.

I ti vreman difisil pour bann frer enstal en lantenn pour sa stasyon. Sa lantenn ki ti mezir 91 met, ti bezwen ganny met anpandan ant de bout dibwa ki ti mezir 61 met. Sa premye fwa ki zot ti esey met li anpandan, zot pa ti reisi. Sa bann frer ti annan konfyans dan Zeova e finalman zot ti reisi. En frer ki apel Calvin Prosser ki ti travay lo sa proze, ti dir: “Si sa premye fwa ki nou ti’n eseye, nou ti reisi met sa poto, nou ti pou’n kapab fer vantar e dir, ‘Get ki nou’n fer!’” O kontrer, bann frer ti donn laglwar Zeova parski i ti’n ed zot. Me zot bann problenm pa ti ankor fini.

Sa letan, transmet bann progranm par radyo ti ankor en nouvo keksoz e i pa ti fasil pour aste bann lekipman neseser. Alor bann frer ti rod bann lekipman dezyenmmen pa tro lwen, ki en dimoun ti’n fer li menm. Olye aste en mikro, zot ti servi en telefonn. En zour swar pandan mwan Fevriye, bann frer ti deside pour teste tou sa bann lekipman. Pour fer sa, zot ti bezwen en keksoz pour transmet. Alor bann frer ti sant en kantik. Ernest Lowe ki ti enn parmi sa bann frer i rakont en keksoz fer  riye ki ti arive sa zour. I ti dir ki pandan ki zot ti pe sante, Judge Rutherford b ti telefonn zot. Frer Rutherford ki ti reste dan lavil Brooklyn, ki ti 25 kilomet avek kot zot ti ete, ti’n tann zot atraver son radyo.

Frer Rutherford ti dir zot: “Aret fer tapaz. Zot pe sante konmsi zot pe irle!” Sa bann frer ti vreman anbarase e deswit zot ti aret sa progranm. Me zot ti konnen ki sa stasyon radyo ti marse e ki zot ti’n pare pour konmans pas bann progranm.

Le 24 Fevriye 1924, pandan nou premye transmisyon, Frer Rutherford ti dir ki sa stasyon radyo pou ganny servi pour fer sa travay Rwayonm ki Kris nou Lerwa in donn nou pour fer. I ti dir ki sa stasyon radyo ti pou osi “ed dimoun konpran sa ki Labib i dir e konpran ki nou pe viv dan en letan enportan.”

Sa premye transmisyon ti en sikse. Pour sa prosen 33 an, sa radyo WBBR ti ganny servi pour transmet bann progranm radyo pour pep Zeova.

An Zilyet 1924, bann Etidyan Labib ti fer en lasanble Columbus, Ohio. Bann Etidyan Labib sorti partou dan lemonn ti asiste sa lasanble e bann diskour ti ganny fer dan langaz Alman, Angle, Arab, Franse, Grek, Hungarian, Italyen, Larisi, Lithuanian, Polish, bann langaz Scandinavian ek Ukrainian. Serten bout sa lasanble ti ganny transmet par radyo e bann frer ti demann Ohio State Journal pour ekri en lartik toulezour konsernan progranm lasanble.

Zedi le 24 Zilyet, plis ki 5,000 frer ek ser ti al predikasyon dan sa lavil kot sa lasanble ti pe ganny fer. Zot ti donn preski 30,000 liv e zot ti konmans plizyer milye letid Labib. The Watch Tower ti dir ki sa zour ti “sa moman pli zwaye dan sa lasanble.”

En lot keksoz enteresan ti arive Vandredi le 25 Zilyet pandan sa lasanble. Pandan en diskour ki Frer Rutherford ti fer, i ti demontre kouraz e i ti lir en dokiman ki ti kondann sa ki bann sef larelizyon ti pe fer. Sa dokiman ti’n ganny ekrir parey en dokiman legal e i ti dir ki bann politisyen, sef larelizyon ek bann sef dan bann lakonpannyen ti pe anpes bann dimoun  aprann laverite konsernan Rwayonm Bondye, ki sa mwayen ki Bondye pou servi pour beni bann imen. Frer Rutherford ti osi dir ki sa bann zonm ti pe mal fer parski zot ti pe siport Lasosyete bann Nasyon e zot ti pe dir ki Bondye ti pe servi Lasosyete bann Nasyon pour diriz later. Bann Etidyan Labib ti bezwen annan kouraz pour zot kapab anons sa mesaz avek bann dimoun.

Pli tar, en lartik dan The Watch Tower ti dir ki sa lasanble ki ti ganny fer Columbus ti batir lafwa bann frer ek ser ki ti laba e ki sa ti donn zot sa kouraz pour anons sa mesaz menm si dimoun ti opoz zot. En frer ki apel Leo Claus ki ti asiste sa lasanble, ti dir: “Apre sa lasanble, nou ti vreman eksite pour partaz sa mesaz dan nou teritwar.”

An Oktob, bann Etidyan Labib ti konmans distribye en trak ki ti apel Ecclesiastics Indicted ki ti annan sa mesaz ki Frer Rutherford ti’n lir konsernan bann sef larelizyon. Dan lavil Cleveland, ki en pti lavil Oklahoma, Leta-z-ini Lanmerik, Frank Johnson ti fini distribye bann trak e i ti bezwen esper 20 minit pour bann frer ek ser vin zwenn li. I pa ti kapab esper zot an piblik parski bann zonm dan sa lavil ki ti ankoler akoz i ti pe prese, ti pe rod li. Alor Frer Johnson ti deside pour al kasyet dan en legliz ki pa ti tro lwen. I ti napa personn dan legliz alor i ti kit en kopi sa trak dan Labib sa pret e kot tou plas asize dan legliz. I ti fer sa vitman e kit legliz. Vi ki i ti ankor annan letan, i ti al dan de lezot legliz e fer menm zafer.

Apre sa Frank ti degaze pour al dan sa landrwa kot bann frer ek ser ti sipoze zwenn li. I ti kasyet deryer en stasyon petrol e an menm tan veye si i pa ti vwar sa bann zonm ki ti pe rod li. Sa bann zonm ti pase dan zot transpor me zot pa ti vwar li. Pa bokou letan apre ki sa bann zonm ti’n ale, bann frer ek ser ki ti pe prese pa tro lwen, ti vini e vin zwenn Frank. Apre sa, zot tou zot ti ale.

Enn parmi bann frer ki ti la sa zour i dir: “Ler nou ti pe kit sa lavil, nou ti pas o bor sa trwa legliz. I ti annan apepre 50 dimoun ki ti pe debout an deor sak sa bann legliz. Serten ti pe lir sa bann trak e lezot ti pe montre sa pret sa ki pour zot. Nou ti’n kit sa landrwa zis a tan! Me nou remersye nou Bondye, Zeova, parski i ti’n ed nou konnen ki pour fer pour nou anons sa mesaz e an menm tan pour nou pa ganny atrape.”

Bann Etidyan Labib dan lezot pei ti osi anons sa mesaz avek kouraz. Dan nor Lafrans, Józef Krett ti anons sa mesaz avek bann dimoun sorti Lapolonny ki ti travay dan min. I ti’n fer laranzman pour fer en diskour ki annan pour tit “The Resurrection of the Dead Soon” (Byento bann mor pou ganny resisite). Ler bann dimoun dan sa lavil ti ganny lenvitasyon pour vin sa diskour, en pret ti dir bann dimoun pa bezwen al ekoute. Sa ki i ti dir ti annan en lot lefe. Plis ki 5,000 dimoun ti vin ekout sa diskour, enkli sa pret! Frer Krett ti dir sa pret ki i ti kapab defann son krwayans me sa pret ti refize. Apre son diskour, Frer Krett ti donn bann dimoun tou bann piblikasyon ki i ti annan parski zot ti vreman anvi konn plis konsernan Parol Bondye.—Amos 8:11.

Claude Brown ti al Lafrik dan sa pei ki ozordi i apel Gana pour anons sa bon nouvel. En kantite dimoun ti tann sa laverite ki sorti dan Labib parski i ti fer plizyer diskour e donn bann piblikasyon avek en kantite dimoun laba.  En zonm ki ti apel John Blankson, ki ti etidye pour li kapab travay dan farmasi, ti asiste enn bann diskour ki Frer Krett ti fer. I pa ti tarde pour realize ki i ti’n trouv laverite. John i dir: “Sa laverite ti fer mwan vreman zwaye e mon ti koz lo la avek plizyer dimoun kot mon lekol.”

John ti aprann ki Labib pa ansennyen ki Bondye i form parti Trinite. Alor en zour i ti al kot en legliz Anglikan e i ti demann en pret konsernan sa. Sa pret ti ankoler e i ti kriy avek li e dir: “Ou pa en Kretyen ou, ou swiv Dyab. Sorti la ale!”

Ler John ti ariv kot li, i ti ekri en let pour sa pret e i ti demann li pour zwenn li an piblik pour zot koz lo sa lansennyman Trinite. Sa pret ti dir John al dan lofis sa ansenyan prensipal kot son lekol. Sa ansenyan ti demann John si li ki ti’n ekri sa let pour sa pret.

John ti reponn: “Wi, Sir. Mwan ki’n ekri.”

Sa ansenyan ti demann John pour ekri en let sa pret pour demann li leskiz. Alor John ti ekri:

“Sir, mon ansenyan in demann mwan pour ekri ou en let pour demann ou leskiz. Mon pou fer sa si ou admet ki sa ki ou pe ansennyen pa vre.”

Sa ansenyan ti soke e i ti dir: “Blankson, eski sanmenm sa ki ou oule ekri?”

“Wi, Sir. Sanmenm tou ki mon kapab ekri.”

“Ou pou ganny pouse lekol. Ou pa kapab reste dan sa lekol si ou kontinyen koz kont pret en larelizyon ki gouvernman i siporte.”

“Me, Sir, . . . ler ou fer ou leson dan laklas e i annan bann keksoz ki nou pa konpran, pa nou demann ou kestyon?”

“Wi, zot kapab.”

“Me, Sir, sanmenm sa ki’n arive. Sa msye ti pe ansenny en keksoz sorti dan Labib e mon’n demann li en kestyon. Akoz mon bezwen ekri li en let pour demann leskiz, si i pa’n kapab reponn sa kestyon ki mon’n demann li?”

Blankson pa ti ganny pouse dan sa lekol e i pa ti bezwen ekri en let pour demann leskiz.

The Watch Tower ti dir sa konsernan bann keksoz ki’n pase pandan lannen 1924: “Nou kapab dir sa ki David ti dir: ‘Ou pou donn mwan lafors pour lager.’ (Psonm 18:39) Sa lannen in enn ki vreman ankourazan parski nou’n vwar ki mannyer Zeova in ed nou pour fer son travay. Son bann serviter fidel in anons sa bon nouvel avek lazwa.”

Pli tar an 1924, bann frer ti fer plan pour konmans en lot stasyon radyo e zot ti konstri li pros avek Chicago. Sa nouvo stasyon ti apel WORD, (ki vedir parol) parski sa stasyon ti pou ganny servi pour anons sa mesaz ki dan Parol Bondye. Safwasi zot ti servi bann lekipman ki pli pwisan e sa ti pou permet ki dimoun ki reste pli lwen, menm dimoun ki reste Kanada, ti pou kapab tann sa stasyon radyo.

Pandan lannen 1925, Zeova ti ed bann frer pour konpran pli byen Revelasyon sapit 12. Sa nouvo leklersisman ti fer ki serten ti aret servi Zeova. Me en kantite frer ek ser ti kontan pour konpran pli byen sa ki ti arive dan lesyel e ki lefe sa ti annan lo pep Bondye lo later.