1. Ki serten kado Zezi in donn nou?

 I NAPA okenn dimoun ki pli zenere ki Zezi. Ler i ti lo later, i ti servi son pouvwar pour ed lezot. (Lik 9:12-17) I ti donn son lavi pour nou e sa, i sa pli gro kado ki en dimoun in deza donnen. (Zan 15:13) Apre ki Zezi ti resisite, i ti kontinyen demontre zenerozite. Zis parey i ti promet, i ti demann Zeova pour anvoy lespri sen pour ansenny e rekonfort nou. (Zan 14:16, 17, not; 16:13) Osi, atraver bann renyon, Zezi i kontinyen donn nou sa ki nou bezwen pour nou kapab fer dimoun partou dan lemonn vin son disip.—Mat. 28:18-20.

2. Lekel sa “bann zonm konman kado” ki Efezyen 4:7, 8 i koz lo la?

² Annou vwar en lot kado ki Zezi in donn nou. Zapot Pol ti ekri ki apre ki Zezi ti’n al dan lesyel, “i ti donn bann zonm konman kado.” (Lir Efezyen 4:7, 8.) Pol ti dir ki Zezi ti donn sa “bann zonm konman kado” pour siport kongregasyon dan diferan fason. (Efe. 1:22, 23; 4:11-13) Ozordi, sa i enkli bann serviter kongregasyon, ansyen ek sirveyan rezyonal. a Byensir sa bann zonm i enparfe, alor zot fer fot. (Zak 3:2) Me zot bann kado ki nou Senyer Zezi Kri in donn nou e i servi zot pour ed nou.

3. Ki mannyer nou kapab siport sa travay ki sa bann zonm ki Zezi in donnen konman kado pe fer? Donn en legzanp.

³ Zezi ti donn sa “bann zonm konman kado” en travay enportan pour fer, setadir pour ankouraz kongregasyon. (Efe. 4:12) Me nou tou nou kapab ed zot desarz sa responsabilite  enportan. Nou kapab konpar sa avek ler en Lasal Rwayonm pe ganny konstri. Serten i ede dan sa travay konstriksyon tandis ki lezot i siport sa travay par anmenn manze pour bann travayer, anmenn bann materyo konstriksyon e ede dan lezot fason. Pareyman, nou tou nou kapab ed bann serviter kongregasyon, bann ansyen ek bann sirveyan rezyonal pour batir kongregasyon par sa ki nou dir e fer. Annou vwar bann byenfe ki nou gannyen avek sa travay ki zot fer e lafason ki nou kapab demontre nou lapresyasyon anver zot e anver Zezi, ki’n donn nou sa “bann zonm konman kado.”

BANN SERVITER KONGREGASYON PE “ED LEZOT”

4. Ki serten keksoz bann serviter kongregasyon dan premye syek ti fer pour “ed lezot”?

⁴ Dan premye syek, serten frer ti ganny apwente konman serviter kongregasyon. (1 Tim. 3:8) I paret ki dan 1 Korentyen 12:28, Pol ti pe refer avek bann serviter kongregasyon, ler i ti mansyonn bann ki ti “ed lezot.” Bann serviter kongregasyon ti fer bann travay enportan, ki neseser pour ki bann ansyen i kapab konsantre lo ansenny kongregasyon e pran swen avek zot. Par egzanp, i kapab ki bann serviter kongregasyon ti ede kopye Lekritir oubyen zot ti aste bann keksoz ki zot ti bezwen pour fer sa bann kopi.

5. Ki serten keksoz bann serviter kongregasyon dan nou letan i fer pour ed lezot?

⁵ Annou vwar serten keksoz ki bann serviter kongregasyon dan ou kongregasyon i fer pour ed lezot. (1 Pyer 4:10) I kapab ki zot ganny bann responsabilite, par egzanp pour okip kont oubyen teritwar, pour fer demann pour kongregasyon ganny piblikasyon, pour okip sistenm sonorizasyon, pour okip servis lakey oubyen ede mentenir Lasal Rwayonm. Tou sa bann servis i enportan pour kongregasyon mars byen. (1 Kor. 14:40) Serten serviter kongregasyon i osi annan bann partisipasyon dan renyon Nou minister ek lavi Kretyen e zot fer diskour piblik. En serviter kongregasyon i kapab osi ganny apwente konman asistan en sirveyan group predikasyon. Parfwa, serten serviter kongregasyon i kapab al avek en ansyen pour fer bann vizit lankourazman.

6. Ki serten rezon akoz nou apresye nou bann serviter kongregasyon ki pe travay dir dan kongregasyon?

⁶ Ki byenfe kongregasyon i gannyen avek sa travay ki bann serviter kongregasyon i fer? En ser ki apel Beberly b ki reste Bolivi, i dir: “Gras a sa travay ki bann serviter kongregasyon i fer, mon kapab profit byen bann renyon. Gras a zot travay, mon kapab sante, partisipe pandan renyon, ekout bann diskour e aprann avek bann video ek portre. Zot ede pour fer sir ki bann ki asiste renyon i an sekirite e zot ed bann ki pa kapab asiste renyon pour swiv renyon atraver video konferans. Apre renyon, zot ede pour netway Lasal Rwayonm e zot ede avek kont e zot fer sir ki nou annan bann piblikasyon ki nou bezwen. Mon rekonesan ki nou annan zot.” Leslie, ki reste Lakolonbi e ki son msye i en ansyen, i dir: “Mon msye i depan lo bann serviter kongregasyon pour ede desarz plizyer responsabilite. Si i ti napa bann serviter kongregasyon, i ti pou pli bizi. Alor mon rekonesan pour zot devouman e ki zot pare pour ede.” San dout, ou osi ou santi koumsa anver sa travay ki bann serviter kongregasyon i fer.—1 Tim. 3:13.

7. Ki mannyer nou kapab demontre lapresyasyon pour bann serviter kongregasyon? (Vwar portre.)

⁷ Menm si nou rekonesan pour annan bann serviter kongregasyon, Labib i dir: “Toultan montre zot rekonesans.” (Kol. 3:15) En ansyen ki apel Krzysztof ki reste  Finlenn, i demontre son lapresyasyon dan sa fason. I dir: “Mon anvoy en kart oubyen en mesaz kot mon sit en verse Labib e mon mansyonn en fason spesifik ki sa serviter kongregasyon in ankouraz mwan oubyen akoz mon apresye sa travay ki in fer.” Pascal ek Jael, ki reste Nouvel Kaledoni, ti priy spesifikman pour bann serviter kongregasyon. Pascal i dir: “Resaman nou’n priy en kantite pour nou bann serviter kongregasyon. Nou’n remersye Zeova ki nou annan zot e nou demann Zeova pour toultan ed zot.” Zeova i tann bann lapriyer koumsa e sa i fer ki kongregasyon antye i ganny bann byenfe.—2 Kor. 1:11.

BANN ANSYEN “PE TRAVAY DIR PARMI ZOT”

8. Akoz Pol ti dir ki bann ansyen dan premye syek ti “pe travay dir”? (1 Tesalonisyen 5:12, 13)

⁸ Bann ansyen dan premye syek ti travay dir pour ed bann frer ek ser. (Lir 1 Tesalonisyen 5:12, 13; 1 Tim. 5:17) Zot ti “pe diriz” kongregasyon, setadir zot ti pe kondwir bann renyon e fer bann desizyon konman en konsey ansyen. Zot ti “konsey” bann frer ek ser par donn zot bann konsey spesifik me avek lanmour, pour protez kongregasyon. (1 Tesa. 2:11, 12; 2 Tim. 4:2) Byensir, sa bann zonm ti osi travay dir pour pran swen avek zot fanmir e pour ed zot gard zot lafwa for e reste pros avek Zeova.—1 Tim. 3:2, 4; Tit 1:6-9.

9. Ki serten responsabilite bann ansyen dan nou letan i annan?

⁹ Bann ansyen dan nou letan i annan en kantite keksoz pour fer. Zot bann proklanmater. (2 Tim. 4:5) Zot kit en bon legzanp parski zot devoue dan predikasyon, zot organiz predikasyon dan zot teritwar e zot form nou pour nou kapab anons e ansenny sa bon nouvel byen. Zot osi servi dan kongregasyon konman bann ziz ki pran pitye e ki pa fer lapreferans. Ler en frer oubyen en ser i fer en pese grav, bann ansyen i fer tou sa ki zot kapab pour ed li aranz son lanmitye avek Zeova. An menm tan, zot fer sir ki zot gard kongregasyon prop. (1 Kor. 5:12, 13; Gal. 6:1) Pli enportan ankor, bann ansyen i bann berze. (1 Pyer 5:1-3) Zot fer bann diskour baze lo Labib ki’n ganny byen prepare, zot fer zefor pour aprann konn tou dimoun dan kongregasyon e zot fer bann vizit lankourazman. Serten ansyen i osi ede pour konstri e mentenir Lasal Rwayonm. Zot ede pour organiz bann lasanble, zot ede avek sa travay ki Komite Lyezon Lopital (HLC) ek Patient Visitation Groups (bann group ki al vizit bann frer ek ser ki lopital) i fer e an plis ki sa, zot annan lezot responsabilite. Bann ansyen i travay dir pour ed nou!

10. Ki serten rezon akoz nou apresye nou bann ansyen ki travay dir?

¹⁰ Zeova ti predir ki bann berze ti pou pran swen avek nou e ki nou ti pou “nepli per oubyen panik.” (Zer. 23:4) I sanmenm ki en ser ki apel Johanna, ki reste Finlenn, ti eksperyanse ler son manman ti ganny en maladi grav. I dir: “Menm si mon vwar li difisil pour koz avek lezot lo mon santiman, en ansyen ki mon pa ti tro abitye avek ti demontre pasyans anver mwan. I ti fer lapriyer avek mwan e i ti asir mwan ki Zeova i kontan mwan. Mon pa rapel egzakteman sa ki i ti dir mwan me mon rapel ki mon ti aret enkyet. Mon krwar ki Zeova ti anvoy li pour ed mwan dan sa bon moman.” Ki mannyer bann ansyen dan ou kongregasyon in ed ou?

11. Ki mannyer nou kapab demontre lapresyasyon anver bann ansyen? (Vwar portre.)

¹¹ Zeova i anvi ki nou demontre lapresyasyon anver bann ansyen pour sa travay ki zot fer. (1 Tesa. 5:12, 13) En ser ki apel Henrietta, ki reste Finlenn, i dir: “Bann ansyen i pare pour ed lezot me sa pa vedir ki zot annan  plis letan ek lenerzi ki lezot dimoun i annan oubyen ki zot napa problenm. Parfwa mon dir zot: ‘Ou vreman en bon ansyen. Mon zis anvi ki ou konn sa.’” En ser ki apel Sera ki reste Latirki, i dir: “Bann ansyen i bezwen lankourazman pour zot kapab kontinyen fer zot travay. Alor, nou kapab ekri en kart pour zot, envit zot pour en repa oubyen travay avek zot dan predikasyon.” Eski i annan en ansyen spesifik ki ou vreman apresye sa travay ki i pe fer dan kongregasyon? Rod fason pour demontre lapresyasyon anver li.—1 Kor. 16:18.

BANN SIRVEYAN REZYONAL I ANKOURAZ NOU

12. Lekel ankor ki Zezi ti donnen pour ankouraz kongregasyon? (1 Tesalonisyen 2:7, 8)

¹² Zezi in osi donn serten “zonm konman kado” pour ed kongregasyon dan en lot fason. Anba gidans Zezi, bann ansyen Zerizalenm ti anvoy Pol, Barnabas ek lezot, konman bann sirveyan pour vizit bann kongregasyon. (Akt 11:22) Akoz? Pour menm rezon ki bann serviter kongregasyon ek bann ansyen ti ganny apwente, setadir pour ankouraz bann kongregasyon. (Akt 15:40, 41) Sa bann zonm ti fer en kantite sakrifis pour zot kapab fer sa travay. Parfwa zot ti menm riske zot lavi pour ansenny e ankouraz lezot.—Lir 1 Tesalonisyen 2:7, 8.

13. Ki serten responsabilite bann sirveyan rezyonal i annan?

¹³ Bann sirveyan rezyonal i bezwen vwayaz en kantite. Serten i bezwen vwayaz plizyer santenn kilomet pour vizit bann kongregasyon. Sak semenn en sirveyan rezyonal i fer plizyer diskour. I fer bann vizit lankourazman, i fer en renyon avek bann pionye, enn avek bann ansyen e i fer plizyer renyon predikasyon. I prepar bann diskour e i organiz bann lasanble. I en formater dan  lekol pionye e i organiz en renyon spesyal avek bann pionye dan son rezyon. An plis ki sa, biro brans i osi donn li lezot keksoz enportan pour li fer e parfwa sa bann keksoz i irzan.

14. Ki serten rezon akoz nou apresye nou bann sirveyan rezyonal ki travay dir?

¹⁴ Ki mannyer sa travay enportan ki bann sirveyan rezyonal i fer i anmenn byenfe pour bann kongregasyon? En frer ki reste Latirki i dir sa konsernan ler bann sirveyan rezyonal i vizit son kongregasyon: “Sak fwa zot vizit nou kongregasyon, sa i motiv mwan pour pas plis letan pour ed mon bann frer ek ser. Mon’n zwenn en kantite sirveyan rezyonal me ni enn parmi zot pa’n zanmen fer mwan santi ki zot tro bizi oubyen ki zot pa anvi koz avek mwan.” Johanna, ki’n ganny mansyonnen pli boner, ti travay avek en sirveyan rezyonal dan predikasyon me zot pa ti zwenn personn kot lakour. Johanna i dir: “Menm si nou pa ti zwenn personn kot lakour, mon pa pou zanmen oubliy sa zour. Mon de ser ti’n fek al reste dan en lot landrwa e mon ti mank zot en kantite. Sa sirveyan rezyonal ti ankouraz mwan e ed mwan pour vwar ki menm si la konmela nou pa kapab reste o bor nou fanmir ek zanmi, dan nouvo lemonn, nou pou toultan annan loportinite pour pas letan avek zot.” En kantite parmi nou i vreman apresye bann sirveyan rezyonal e lafason ki zot in ed nou.—Akt 20:37–21:1.

15. (a) Dapre 3 Zan 5-8, ki mannyer nou kapab demontre lapresyasyon pour bann sirveyan rezyonal? (Vwar portre.) (b) Akoz nou devret demontre lapresyasyon pour madanm bann serviter kongregasyon, ansyen ek sirveyan rezyonal e ki mannyer nou kapab fer sa? (Vwar bwat “ Pa oubliy zot bann madanm.”)

¹⁵ Zapot Zan ti ankouraz Gais pour demontre lospitalite anver bann frer ki ti vin ankouraz kongregasyon e i ti dir li ki “ler zot ale, . . . ed zot dan en fason ki fer  plezir Bondye.” (Lir 3 Zan 5-8.) En fason ki nou kapab fer sa i par envit sirveyan rezyonal pour en repa. En lot fason i par asiste bann renyon predikasyon ki i fer. Leslie, ki’n ganny mansyonnen pli boner i montre son lapresyasyon dan lezot fason. I dir: “Mon priye ki Zeova i donn zot sa ki zot bezwen. Mwan ek mon msye, nou ti osi ekri let pour dir zot ki kantite zot bann vizit in ed nou.” Rapel ki bann sirveyan rezyonal osi i annan problenm e zot fatige zis parey nou. Parfwa zot malad, enkyet e menm dekouraze. Petet ou sirveyan rezyonal pe priy Zeova pour ganny led e i kapab ki ou parol ankourazan oubyen en pti kado i larepons pour son lapriyer.—Prov. 12:25.

NOU BEZWEN “BANN ZONM KONMAN KADO”

16. Anliny avek Proverb 3:27, ki kestyon bann frer i kapab demann zot lekor?

¹⁶ Nou bezwen bann frer partou dan lemonn pour servi konman “bann zonm konman kado.” Si ou en frer, eski ou kapab ede dan sa fason? (Lir Proverb 3:27.) Eski ou pare pour fer zefor pour kalifye pour vin en serviter kongregasyon? Si ou en serviter kongregasyon, eski ou pare pour fer zefor pour vin en ansyen pour ed ou bann frer ek ser plis? c Eski ou kapab fer bann sanzman dan ou lavi pour ou kapab fer laplikasyon pour asiste Lekol pour bann predikater Rwayonm? Sa lekol pou form ou e ed ou pour ki Zezi i kapab servi ou dan lezot fason. Si ou santi ki ou pa alaoter, priy Zeova. Demann li son lespri sen pour ou kapab desarz byen okenn responsabilite ki ou ganny donnen.—Lik 11:13; Akt 20:28.

17. Ki sa “bann zonm konman kado” i montre nou konsernan nou Lerwa Zezi Kri?

¹⁷ Sa bann zonm ki Zezi in apwente konman “bann zonm konman kado” pe travay dir e sa i laprev ki Zezi ki pe diriz nou pandan sa bann dernyen zour. (Mat. 28:20) Nou vreman rekonesan pour annan en Lerwa ki kontan nou, ki zenere, ki konnen ki nou bezwen e ki donn nou bann frer pour ed nou. Alor rod loportinite pour montre ou lapresyasyon pour sa bann zonm ki pe travay dir. Osi pa zanmen oubliye pour remersye Zeova parski i sa Enn ki donn nou “tou don ki bon e tou kado parfe.”—Zak 1:17.