LARTIK LETID 43
KANTIK 90 Ankouraz kanmarad
Ki mannyer nou kapab sirmont nou bann dout?
“Verifye tou keksoz.”—1 TESA. 5:21.
TOPIK
Nou pou vwar sa ki nou kapab fer si nou annan bann dout ki kapab annan en lefe lo nou servis pour Zeova.
1-2. (a) Ki serten dout bann serviter Zeova i kapab annan? (b) Ki nou pou vwar dan sa lartik?
NOU tou, ki swa nou zenn oubyen aze, nou annan bann dout a parfwa. Par egzanp, en zenn frer oubyen ser i kapab annan dout konsernan si Zeova i vreman enterese avek li. Petet i pa asire si i devret batize. Oubyen imazin legzanp en frer ki ler i ti ankor zenn i ti swazir pour met Rwayonm premye dan son lavi olye en karyer dan sa lemonn. Aprezan i pli vye e i vwar ki i annan larzan zis pour pran swen avek son fanmir. Petet i annan dout konsernan si i ti fer sa bon desizyon ler i ti zenn. Imazin en ser aze ki napa bokou lafors. Petet i dekouraze parski i nepli kapab fer parey i ti fer avan. Eski ou’n deza demann ou lekor bann kestyon parey sa bann kestyon swivan: ‘Eski Zeova i vreman enterese avek mwan? Eski bann sakrifis ki mon’n fer pour servi Zeova ti vreman vo lapenn? Eski mon ankor itil pour Zeova?’
2 Si ou pa rod larepons pour bann kestyon koumsa, sa i kapab afeblir ou lafwa e menm fer ou aret servi Zeova. Dan sa lartik, nou pou vwar ki mannyer bann prensip Labib i kapab ed nou si nou annan dout konsernan (1) si Zeova i enterese avek nou, (2) si bann desizyon ki nou ti fer dan lepase ti vreman bann bon desizyon oubyen (3) si nou ankor itil pour Zeova.
KI MANNYER OU KAPAB SIRMONT OU BANN DOUT?
3. Ki en fason ki nou kapab sirmont nou bann dout?
3 En fason ki nou kapab sirmont nou bann dout, i par rod larepons pour nou bann kestyon dan Parol Bondye. Si nou fer sa, nou lafwa pou vin pli for, nou pou vin pli pros avek Zeova e nou pou pli byen kapab “reste ferm dan lafwa.”—1 Kor. 16:13.
4. Ki mannyer nou kapab “verifye tou keksoz”? (1 Tesalonisyen 5:21)
4 Lir 1 Tesalonisyen 5:21. Remarke ki Labib i ankouraz nou pour “verifye tou keksoz.” Ki mannyer nou kapab fer sa? Nou kapab fer sir ki sa ki nou krwar ladan i laverite par gete si sanmenm sa ki Labib i dir. Par egzanp, mazin sa zenn frer oubyen ser ki’n ganny mansyonnen pli boner, ki pa ti asire si Zeova i vreman enterese avek li. Eski i devret krwar ki lefet ki i annan sa dout, sa i vedir ki Zeova pa enterese avek li? Non, i devret “verifye tou keksoz” par etidye Labib pour konn pwennvi Zeova lo sa size.
5. Ki mannyer nou kapab trouv larepons Zeova pour bann kestyon ki nou annan?
5 Anmezir nou lir Parol Bondye, i konmsi Zeova pe koz avek nou. Me pour nou ganny pwennvi Zeova lo en kestyon spesifik, nou bezwen fer plis ki zis lir Labib. Nou bezwen rod e etidye bann verse Labib ki pou ed nou reponn sa kestyon ki nou annan. Nou kapab fer resers lo sa size par servi bann zouti resers ki lorganizasyon Zeova i donnen. (Prov. 2:3-6) Nou bezwen priy Zeova e demann li pour ed nou pour trouv son larepons pour sa kestyon ki nou annan. Apre nou kapab rod bann prensip Labib ek bann lenformasyon ki pou ed nou dan nou sityasyon. I ti pou byen ki nou osi lir bann resi dan Labib konsernan bann serviter fidel ki ti pas dan bann sityasyon en pe parey sa ki pour nou.
6. Ki mannyer renyon i ed nou sirmont nou bann dout?
6 Ler nou asiste renyon, sa osi i konmsi Zeova pe koz avek nou. Si nou asiste renyon regilyerman, petet nou pou tann en keksoz dan en diskour oubyen dan larepons en dimoun, ki pou ed nou sirmont nou bann dout. (Prov. 27:17) Aprezan annou vwar ki mannyer nou kapab sirmont serten dout spesifik.
LER OU ANNAN DOUT KONSERNAN SI ZEOVA I ENTERESE AVEK OU
7. Ki kestyon serten i kapab demande?
7 Eski ou’n deza demann ou lekor sa kestyon swivan: ‘Eski Zeova i vreman enterese avek mwan?’ Si ou santi ki ou pa vo nanryen, ou kapab krwar ki i enposib pour ou vin zanmi avek Kreater liniver. I kapab ki Lerwa David ti santi koumsa li osi. I ti vwar li ekstraordiner ki Zeova i enterese avek bann imen. I ti dir: “O Zeova, ki imen i ete pour ki ou remark li? Ki garson zonm i ete pour ki ou pran swen avek li?” (Ps. 144:3) Alor, si ou annan dout konsernan si Zeova i enterese avek sak dimoun endividyelman, kote ou kapab trouv pwennvi Zeova lo sa size?
8. Dapre 1 Samyel 16:6, 7, 10-12, ki Zeova i vwar dan dimoun?
8 Dan Labib, nou aprann ki Zeova i enterese avek bann ki pa paret enportan pour lezot. Par egzanp, Zeova ti anvoy Samyel kot lakaz Zese pour swazir enn son garson pour vin lerwa Izrael. Zese ti anmenn set parmi son wit garson kot Samyel me i pa ti enkli David, ki ti pli zenn. b Me Zeova ti swazir David. (Lir 1 Samyel 16:6, 7, 10-12.) Zeova ti vwar ki kalite dimoun David ti vreman ete. I ti konnen ki sa zenn garson ti kontan li en kantite.
9. Akoz ou kapab asire ki Zeova i enterese avek ou? (Vwar portre.)
9 Mazin lafason ki Zeova in montre ou ki i enterese avek ou. I donn ou konsey ki ou bezwen dan en sityasyon spesifik. (Ps. 32:8) Sa i montre ki i konn ou byen e ki i konn egzakteman sa ki ou bezwen. (Ps. 139:1) Ler ou aplik bann konsey ki Zeova i donn ou e ou vwar lafason ki sa konsey i ed ou, sa pou fer ou asire ki Zeova i enterese avek ou. (1 Kron. 28:9; Akt 17:26, 27) Zeova i vwar tou sa ki ou fer pour servi li e pour obei li. I osi vwar bann bon kalite ki ou annan e i anvi vin ou zanmi. (Zer. 17:10) I anvi ki ou osi ou vin son zanmi.—1 Zan 4:19.
“Si ou rod [Zeova], i pou les ou vwar li.”—1 Kron. 28:9 (Vwar paragraf 9) c
LER OU ANNAN DOUT KONSERNAN SI BANN DESIZYON KI OU’N FER DAN LEPASE TI SA BON DESIZYON
10. Ler nou mazin bann desizyon ki nou’n fer dan lepase, ki kestyon sa i kapab fer nou demande?
10 Parfwa serten i kapab mazin bann desizyon ki zot in fer dan lepase e zot pa asire si zot ti fer sa bon desizyon. Petet zot ti deside pour kit en bon travay ki pey byen oubyen zot ti deside pour pa konmans en biznes, pour zot kapab fer plis dan servis Zeova. Me aprezan bann lannen in pase e petet zot vwar serten dimoun ki pa’n fer menm desizyon avek zot e sa bann dimoun i annan en kantite larzan ek en lavi konfortab. Sa i kapab fer zot demande, ‘Eski bann sakrifis ki mon’n fer pour Zeova ti vo lapenn oubyen sa in fer mwan mank lezot loportinite?’
11. Kwa ki ti fer sa ekriven Psonm 73 enkyet?
11 Si ou osi ou annan bann dout koumsa, remark sa ki Labib i dir konsernan lafason ki ekriven Psonm 73 ti santi. I ti vwar ki bann dimoun ki pa ti servi Zeova ti an bonn sante, ris e i paret ki zot ti napa problenm. (Ps. 73:3-5, 12) Ler i ti vwar ki sa bann dimoun ti paret pe reisi dan lavi, sa ti fer li santi ki son bann zefor ki i ti pe fer pour servi Zeova pa ti vo lapenn. Sa fason panse ti fer li enkyet “tou dilon lazournen.” (Ps. 73:13, 14) Ki mannyer i ti fer fas avek sa bann santiman negatif?
12. Dapre Psonm 73:16-18, kwa ki ti ed sa psalmis pour aret enkyet?
12 Lir Psonm 73:16-18. Sa psalmis ti al dan landrwa sen Zeova. Laba, i ti anpe e i ti kapab reflesir byen. I ti konpran ki menm si serten sa bann dimoun ti pe viv en lavi konfortab, zot ti napa en lespwar pour lavenir. Apre ki i ti’n konpran sa, i ti ganny lape lespri parski i ti asire ki sa desizyon ki i ti’n fer pour servi Zeova, ti sa pli bon desizyon. Osi, i ti vin pli determinen pour kontinyen servi Zeova.—Ps. 73:23-28.
13. Ki ou kapab fer si ou pa asire ki ou’n fer bann bon desizyon dan lepase? (Vwar portre.)
13 Parey sa psalmis, ou osi ou kapab ganny lape lespri avek led Parol Bondye. Ki mannyer? Reflesir lo bann bon keksoz ki ou annan e lo lafason ki Zeova in beni ou e rapel ki bann ki pa servi Zeova, pa ganny son led. Laplipar dimoun ki pa servi Zeova, napa lespwar pour lavenir. Alor bann keksoz ki zot in akonpli dan sa lemonn i sa ki pli enportan pour zot. Me Zeova i promet ki i pou donn nou bann bon keksoz la konmela e bokou plis ankor dan lavenir. (Ps. 145:16) Reflesir lo sa: Personn pa konnen ki mannyer son lavi ti pou ete si i ti’n fer en desizyon ki diferan. Me en keksoz ki nou kapab asire i ki ler nou fer desizyon baze lo nou lanmour pour Bondye e pour lezot, nou pou toultan annan sa ki fer nou pli zwaye.
Mazin bann benediksyon ki ou pou gannyen dan Paradi (Vwar paragraf 13) d
LER OU ANNAN DOUT KONSERNAN SI OU ANKOR ITIL POUR ZEOVA
14. Ki kestyon serten i kapab demann zot lekor e akoz?
14 Serten serviter Zeova pa kapab fer sa kantite ki zot ti ava kontan fer dan servis Zeova parski laz in antre, zot annan problenm lasante oubyen zot annan en dezabilite. Sa i kapab fer zot krwar ki zot napa valer pour Zeova. Zot kapab demande, ‘Eski mon ankor itil pour Zeova?’
15. Ki sa ekriven Psonm 71 ti asire?
15 Ekriven Psonm 71 ti enkyet parski i ti napa ase lafors. I ti priye: “Pa abandonn mwan ler mon nepli annan lafors.” (Ps. 71:9, 18) Kantmenm sa, sa psalmis ti asire ki si i kontinyen reste fidel avek Zeova, Zeova pou gid li e siport li. Sa psalmis ti aprann ki Zeova i kontan ler i vwar sa bann ki pe fer zot mye pour servi li, menm si zot pa kapab fer parey zot ti ava kontan.—Ps. 37:23-25.
16. Dan ki fason bann ki pli aze i itil pour Zeova? (Psonm 92:12-15)
16 Bann frer ek ser aze, vwar ou sityasyon parey Zeova i vwar ou. Zeova i kapab ed ou pour kontinyen servi li fidelman menm si ou pa kapab fer parey ou ti abitye fer avan. (Lir Psonm 92:12-15.) Olye konsantre lo sa ki ou nepli kapab fer, konsantre lo sa ki ou kapab fer. Ou pe kontinyen reste fidel avek Zeova e sa i kapab ankouraz lezot. Ou kapab osi ankouraz lezot par demontre en lentere personnel dan zot. Ou kapab koz avek lezot lo lafason ki Zeova in ed ou pandan bann lannen ki’n pase e lo bann promes dan Labib ki ou vreman anvi vwar ganny akonplir dan lavenir. Pa zanmen oubliye ki bann lapriyer ki ou fer pour lezot i vreman pwisan. (1 Pyer 3:12) Nenport sirkonstans ki nou annan, nou tou nou kapab fer en keksoz pour Zeova e pour lezot.
17. Akoz nou pa devret konpar nou avek lezot?
17 Si ou fristre akoz ou pa kapab fer plis dan ou servis pour Zeova, ou kapab asire ki Zeova i apresye sa ki ou kapab fer pour li. Petet ou annan sa tandans pour konpar sa ki ou pe fer avek sa ki lezot pe fer. Pa fer sa! Akoz? Parski Zeova pa konpar nou avek lezot. (Gal. 6:4) Par egzanp, Mari ti fer Zezi kado en delwil parfimen ki ti ser. (Zan 12:3-5) De lot kote, en vev pov ti met de pti sou ki napa bokou valer dan bwat kontribisyon kot tanp. (Lik 21:1-4) Me Zezi pa ti konpar sa de madanm. O konter, i ti vwar ki Mari ek sa vev ti’n demontre lafwa. Zezi i swiv legzanp son Papa dan en fason parfe. Alor, ou kapab asire ki Zeova i vwar tou sa ki ou fer pour li akoz ou annan lafwa dan li e ou kontan li. Sa ki ou fer, i vreman presye pour li menm si ou krwar ki i pa bokou.
18. Kwa ki pou ed nou pour sirmont nou bann dout? (Vwar bwat “ Parol Zeova i kapab ed ou sirmont ou bann dout.”)
18 Parfwa nou tou nou annan dout. Me parey nou’n vwar, Labib i kapab ed nou pour sirmont sa bann dout. Alor, fer zefor pour trouv larepons pour ou bann kestyon parski sa pou fer ki olye santi ou enkyet, ou pou santi ou pli konfidan. Zeova i konn ou personnelman. I apresye bann sakrifis ki ou’n fer pour met li premye dan ou lavi e parey in promet, i pou rekonpans ou. Ou kapab asire ki Zeova i kontan e i pran swen avek sakenn son bann serviter fidel.
KANTIK 111 Rezon pour nou zwaye
a KI SA I VEDIR? Dan sa lartik, nou pe koz lo bann dout ki fer en dimoun pa asire si i annan valer pour Zeova oubyen si bann desizyon ki in fer dan lepase ti vreman saz. Nou pa pe koz lo bann dout ki Labib i koz lo la ki montre ki en dimoun napa ase lafwa dan Zeova ek son bann promes.
b Menm si Labib pa dir nou ki laz David ti annan ler Zeova ti swazir li pour vin lerwa, i kapab ki David ti ankor en adolesan.—Vwar Latour Veyer le 1 Septanm 2011, paz 29, paragraf 2 an Angle.
