LANMIZIK ti en keksoz vreman enportan dan kiltir bann Izraelit. Labib i souvan koz lo bann lanmizik enstrimantal ek bann sanson ki dimoun ti sante. Anfet, en gran parti Labib i bann sanson. Par egzanp liv Psonm, Kantik Salomon ek Lamantasyon ti ganny ekrir konman bann sanson. Dapre Music in Biblical Life, ki en liv konsernan lafason ki dimoun ti viv dan letan Labib, i dir ki Labib i montre klerman ki bann Izraelit ti servi lanmizik dan en kantite aktivite dan zot lavi.

Lanmizik dan lavi toulezour. Bann Izraelit ti zwe bann lenstriman lanmizik e zot ti sante pour eksprim zot santiman. (Iza. 30:29) Bann madanm ti zwe tanbourin, sant bann sanson ki anmenn lazwa e zot ti danse ler en dimoun ti vin lerwa, ler bann solda ti ranport laviktwar e pandan bann lafet. (Ziz 11:34; 1 Sam. 18:6, 7; 1 Rwa. 1:39, 40) Bann Izraelit ti osi sante pour eksprim zot sagrinasyon ler en dimoun ti mor. (2 Kron. 35:25) I kler ki bann Izraelit ti kontan lanmizik en kantite.

Bann lerwa Izrael ti kontan lanmizik. Lerwa Sail ti anmenn David dan pale pour zwe larp pour li. (1 Sam. 16:18, 23) Pli tar ler David ti vin lerwa, i ti envant bann lenstriman lanmizik, ekri bann zoli sanson e i ti organiz sa lorkes ki ti zwe lanmizik kot tanp Zeova. (2 Kron. 7:6; Amos 6:5) Kot pale Lerwa Salomon, i ti annan bann zonm ek madanm ki ti bann santer.—Ekle. 2:8.

Bann Izraelit ti servi lanmizik pour ador Zeova. Anfet, 4,000 zonm ti zwe bann lenstriman lanmizik kot tanp Zerizalenm. (1 Kron. 23:5) Zot ti zwe senbal, bann lenstriman lakord, larp ek tronpet. (2 Kron. 5:12) Me pa zis sa bann mizisyen kalifye ki ti servi lanmizik pour ador Zeova. En kantite Izraelit ti sante anmezir ki zot ti pe vwayaze pour al Zerizalenm pour bann lafet. (Ps. 120-134) Dapre bann lekritir Zwif, bann Izraelit ti sant serten bann Psonm a pandan repa Lapak.

Lanmizik i ankor vreman enportan pour pep Bondye ozordi. (Zak 5:13) Lanmizik i form parti nou ladorasyon pour Zeova. (Efe. 5:19) Nou santi nou pli pros avek nou bann frer ek ser ler nou sant kantik ansanm pour loue Zeova. (Kol. 3:16) Ler nou sante, ekoute oubyen zwe bann sanson ki annan pour fer avek Zeova, sa i donn nou kouraz ler nou pe fer fas avek difikilte. (Akt 16:25) Lanmizik i en bon fason pour montre Zeova ki nou annan lafwa dan li e ki nou kontan li.