VI KI lavi i telman difisil dan sa “bann dernyen zour,” nou bezwen annan plis pasyans ki avan. (2 Timote 3:1-5) En kantite dimoun otour nou napa pasyans. Zot egois, kontan dispit e zot napa kontrol lo zot lekor. Alor nou bezwen demann nou lekor: ‘Eski mon’n vin enpasyan parey sa bann dimoun otour mwan? Ki savedir vre pasyans? Ki mon kapab fer pour fer pasyans vin en laspe mon personnalite?’

Ki sa mo “pasyans” i vedir ler i ganny servi dan Labib? I vedir plis ki zis siport en problenm. En dimoun ki annan pasyans i andir pour en rezon, setadir, i annan lespwar ki keksoz pour amelyore. I pa mazin zis son prop lekor, me i osi enterese avek santiman lezot, menm bann ki’n irit li ouswa mal azir anver li. I kontinyen annan lespwar ki zot relasyon pou amelyore. Nou pa sirprann ki Labib i dir ki lanmour ki fer nou demontre pasyans. * (Vwar not.) (1 Korentyen 13:4) Pasyans i osi en laspe “fri lespri sen.” (Galat 5:22, 23) Alor, ki nou bezwen fer pour montre ki nou vreman annan pasyans?

Pour devlop pasyans, nou bezwen priye pour ganny led lespri sen Zeova, ki Zeova i donn bann ki annan konfyans dan li. (Lik 11:13) Lespri sen i vreman pwisan, me nou bezwen azir an armoni avek nou lapriyer. (Psonm 86:10, 11) Sa i vedir ki nou bezwen fer nou mye pour demontre pasyans sak zour e fer li form parti nou personnalite. Me petet parfwa, nou pa reisi. Kwa ki kapab ed nou?

Nou bezwen etidye e imit legzanp parfe Zezi. Ler zapot Pol ti koz lo “sa nouvo personnalite,” ki enkli pasyans, i ti ankouraz nou: “Ki lape Kris i kontrol zot leker.” (Kolosyen 3:10, 12, 15) Pour fer sa, nou bezwen swiv legzanp Zezi e annan konfyans total ki Bondye pour aranz keksoz dan son letan apropriye. Si nou annan sa kalite konfyans, nou pa pou vin enpasyan malgre nenport kwa ki pe arive otour nou.​—Zan 14:27; 16:33.

Nou tou nou anvi ki nouvo lemonn i vini o pli vit posib. Me nou aprann pour annan plis pasyans ler nou mazin lo lafason ki Zeova in demontre pasyans anver nou. Labib i asir nou ki: “Zeova pa tarde pour akonpli son promes, parey serten i panse i tarde, me i pasyan avek zot akoz i pa oule ki personn i ganny detrir, me i oule ki zot tou zot arive repantir.” (2 Pyer 3:9) Alor ler nou mazin lo lafason ki Zeova in demontre pasyans anver nou, nou osi nou pou anvi demontre plis pasyans anver lezot. (Romen 2:4) Ki serten sityasyon kot nou bezwen demontre pasyans?

I annan plizyer sityasyon dan nou lavi toulezour kot nou bezwen demontre pasyans. Par egzanp, i demann pasyans pour nou pa enteronp lezot si nou santi ki nou annan en keksoz enportan pour dir. (Zak 1:19) Nou osi bezwen pasyans ler en dimoun i irit nou. Olye reazir avek enpasyans, i bon pour nou rapel lafason ki Zeova ek Zezi i reazir anver nou bann pwen feb. Zot pa konsantre lo sa kantite pti keksoz mal ki nou fer. O kontrer, zot vwar bann bon kalite ki nou annan e avek pasyans zot donn nou letan pour amelyore.​—1 Timote 1:16; 1 Pyer 3:12.

Nou osi bezwen pasyans ler en dimoun i dir nou ki nou’n dir ouswa fer en keksoz mal. Petet nou pou ofanse e anvi defann nou lekor. Me Parol Bondye i dir nou ki nou bezwen reakte dan en lot fason. I dir: “Vomye en dimoun ki pasyan ki enn ki annan lespri arogan. Pa taye pour ou ofanse, akoz en enbesil ki ofans vitman dan son leker.” (Eklezyast 7:8, 9, NWT) Alor menm si en lakizasyon i konpletman fo, nou bezwen demontre pasyans e reflesi seryezman avan nou reazir. Sanmenm ki Zezi ti fer ler lezot ti fer bann fo lakizasyon lo li.​—Matye 11:19.

Bann paran i espesyalman bezwen demontre pasyans ler zot ed zot zanfan pour koriz zot latitid oubyen pour evit bann move dezir. Pran legzanp Mattias, ki pe servi dan en Betel Skandinavi, Lerop. Ler Mattias ti en adolesan, son bann kanmarad lekol ti pe kontinyelman sikann li akoz son krwayans. Premye kou, son paran pa ti konnen ki sa pe arive. Me apre zot ti vwar ki i ti pe konmans annan dout konsernan son bann krwayans. Son papa, Gillis, i dir ki li ek son madanm ti bezwen annan bokou pasyans dan sa sityasyon. Mattias ti abitye demann bann kestyon tel parey: “Lekel Bondye? Ki mannyer nou konnen Labib i Parol Bondye? Ki mannyer nou konnen ki Bondye li menm ki oule nou fer serten keksoz?” I ti osi demann son papa: “Akoz mon bezwen ganny zize si mon pa santi parey ou e annan menm krwayans avek ou?”

Gillis i eksplike: “Parfwa nou garson ti demann nou bann kestyon dan lakoler, pa kont  son manman oubyen mwan, me kont laverite ki i ti santi pe fer son lavi difisil.” Ki mannyer Gillis ti ed son garson? “Mwan ek mon garson nou ti abitye asize e koze pour plizyer erdtan.” Souvandfwa, Gillis ti zis ekout Mattias e demann li bann kestyon pour esey konpran son santiman ek lopinyon. Par ler Gillis ti eksplik son garson en keksoz e dir li reflesi lo la pour enn ou de zour avan zot koz lo la ankor. Lezot fwa, Gillis ti dir ki i ti bezwen enn de zour pour reflesi lo en keksoz ki son garson ti’n dir. Atraver sa bann konversasyon ki souvan zot ti fer, Mattias ti konmans konpran sinifikasyon ranson e ki Zeova i kontan nou e ki i annan drwa pour diriz nou. Son papa i dir: “I ti pran letan e souvan i ti difisil, me ptitapti, lanmour pour Zeova ti devlope dan son leker. Mwan ek mon madanm nou vreman kontan ki nou pasyans ek zefor pour ed nou garson pandan son bann lannen adolesan in marse e tous son leker.”

Anmezir ki Gillis ek son madanm ti demontre pasyans e ed zot garson, zot ti annan konfyans ki Zeova ti pou ed zot. Gillis i dir: “Souvandfwa mon ti dir Mattias ki nou gran lanmour pour li ti pous mwan ek son manman pour priy plis pour ki Zeova i ed li konpran pli byen.” Son paran i vreman kontan ki zot in demontre pasyans e pa’n bes lebra!

Nou osi bezwen demontre pasyans ler nou pe pran swen avek en manm fanmir ouswa en zanmi ki annan en maladi ki dir pour bokou letan. Pran legzanp Ellen * (vwar not), ki li osi i reste Skandinavi, Lerop.

Apepre wit an pase, msye Ellen ti ganny de latak ki ti andomaz son laservel. Akoz sa, i nepli kapab santi lazwa, sagrinasyon ouswa pitye. Sa sityasyon i vreman difisil pour Ellen. I dir: “I’n demann bokou pasyans ek en kantite lapriyer.” I azoute: “Mon verse prefere ki donn mwan rekonfor i Filipyen 4:13 ki dir: ‘Parski dan tou sirkonstans, mon annan lafors gras a sa enn ki donn mwan son pwisans.’” Gras a pwisans ek sipor Zeova, Ellen i fer fas avek sa sityasyon avek pasyans.​—Psonm 62:5, 6, NWT.

Byensir, Zeova i sa pli bon legzanp lo konman pour demontre pasyans. (2 Pyer 3:15) Dan Labib, souvandfwa nou lir konsernan gran pasyans Zeova. (Neemya 9:30; Izai 30:18, NWT) Eski ou rapel ki mannyer Zeova ti reazir ler Abraam ti demann li plizyer kestyon konsernan Son desizyon pour detri Sodonm? Zeova pa ti enteronp Abraam. Avek pasyans i ti ekout sak kestyon ki Abraam ti demande ek tou son lenkyetid. Apre, Zeova ti montre ki i ti’n ekout bann lenkyetid Abraam e reasir li ki I pa ti pou detri Sodonm menm si i ti annan zis dis zonm drwat dan sa lavil. (Zenez 18:22-33) Zeova i toultan ekout avek pasyans e i toultan rezonnab.

Pasyans i en laspe vreman enportan dan sa nouvo personnalite ki tou Kretyen i bezwen annan. Si nou fer nou mye pour demontre pasyans, nou pe onor nou Papa Zeova ki pran byen swen avek nou e ki annan pasyans. Nou pou osi parmi “bann ki Bondye ti fer bann promes avek, akoz zot lafwa ek pasyans.”​—Ebre 6:10-12.