1. Ki Izai ti predir lo Zezi e akoz sa profesi i ankourazan?

PROFESI Izai lo Kris i ankouraz nou e donn nou lespwar. Izai ti predir ki Zezi “pa [ti] pou ziz dapre sa ki son lizye i war oubyen deside dapre sa ki son zorey i tande” e ki i ti pou “ziz bann pov dapre lazistis.” (Izai 11:3, 4) Akoz sa i ankourazan? Parski nou viv dan en lemonn kot bokou dimoun i annan prezidis anver lezot e ziz kanmarad par laparans. Nou vreman bezwen Zezi, sa Ziz parfe ki pa pou zanmen ziz nou par laparans!

2. Ki Zezi ti donn nou lord pour fer e ki nou pou diskite dan sa lartik?

² Toulezour, nou form bann lopinyon lo lezot. Me nou pa parey Zezi ki parfe, alor nou lopinyon pa kapab parfe. Nou fasilman ganny enfliyanse par sa ki nou vwar. Pourtan, Zezi ti donn nou sa lord: “Aret ziz par laparans, me ziz avek lazistis.” (Zan 7:24) Alor Zezi i anvi ki nou vin parey li e pa ziz lezot par zot laparans. Dan sa lartik, nou pou diskit lo trwa keksoz ki kapab enfliyans nou lopinyon lo en dimoun: son ras oubyen nasyonalite, lakantite  larzan ki i annan ek son laz. Dan tou le trwa ka, nou pou aprann ki mannyer nou kapab obei lord Zezi e pa ziz lezot par laparans.

3, 4. (a) Akoz Pyer ti sanz son pwennvi lo bann non Zwif? (Vwar portre o konmansman sa lartik.) (b) Ki nouvo laverite Zeova ti ansenny Pyer?

³ Zis mazinen ki mannyer zapot Pyer ti santi ler i ti ganny demande pour al Sezare kot lakour en non Zwif ki apel Korney. (Akt 10:17-29) Tou son lavi Pyer ti’n krwar ki bann non Zwif ti bann dimoun enpir. Me pa bokou letan avan sa, serten keksoz ti’n arive ki ti fer li vwar keksoz dan en lot fason. Par egzanp, i ti’n ganny en vizyon sorti kot Bondye. (Akt 10:9-16) Dan sa vizyon, Pyer ti vwar en keksoz parey en tapi pe desann sorti dan lesyel, ranpli avek bann zannimo ki ti ganny konsidere konman enpir. Apre en lavwa ti dir li: “Leve Pyer, touye e manze!” Pyer ti refize. Apre, sa lavwa ti dir: “Pa bezwen konsider sal sa ki Bondye in pirifye.” Apre sa vizyon, Pyer pa ti konpran sa ki sa lavwa ti pe esey dir li. A sa menm moman, bann zonm ki Korney ti’n anvoye ti ariv kot li. Lespri sen ti dir Pyer al kot lakour Korney, alor i ti al avek sa bann zonm.

⁴ Si Pyer ti’n ziz “par laparans,” i pa ti pou’n zanmen al kot lakour Korney. Bann Zwif pa ti zanmen al kot lakour bann non Zwif. Alor, akoz Pyer ti ale? Menm si i ti annan bann prezidis anver bann non Zwif, sa vizyon ki i ti’n gannyen e sa ki lespri sen ti’n dir li ti sanz son fason panse. Apre ki Pyer ti’n ekout Korney, i ti dir: “La aprezan mon vreman konpran ki Bondye pa fer lapreferans, me dan tou nasyon, sa ki annan en gran respe pour li e ki fer sa ki drwat i ganny son laprouvasyon.” (Akt 10:34, 35) Sa nouvo konprenezon ti eksitan pour Pyer e i ti pou annan en lefe lo tou Kretyen. Ki mannyer sa?

5. (a) Ki Zeova i oule tou Kretyen i konpran? (b) Menm si nou konn laverite, ki santiman nou kapab ankor annan?

⁵ Zeova ti servi Pyer pour ed tou Kretyen konpran ki I pa fer lapreferans. Pour Zeova, nou ras, nasyonalite, tribi oubyen langaz pa enportan. O tan ki nou annan en gran respe pour Bondye e fer sa ki drwat, nou ganny son laprouvasyon. (Galat 3:26-28; Revelasyon 7:9, 10) I tre probab ki ou deza konn sa. Me petet ou’n grandi dan en pei oubyen fanmir kot i ti annan bokou prezidis. Alor, menm si ou krwar ki ou pa fer lapreferans, eski i posib ki ou ankor annan bann santiman prezidis? Menm apre ki Pyer ti’n ed lezot pour vwar ki Bondye pa fer lapreferans, Pyer ti ankor demontre prezidis. (Galat 2:11-14)  Alor ki mannyer nou kapab obei Zezi e aret ziz lezot par laparans?

6. (a) Kwa ki kapab ed nou pour retir bann santiman prezidis? (b) Ki rapor en frer responsab ti revele lo li?

⁶ Pour konnen si nou annan okenn santiman prezidis, nou bezwen egzamin nou lekor. Nou bezwen konpar nou latitid avek sa ki nou aprann dan Parol Bondye. (Psonm 119:105) Nou osi kapab demann en zanmi si i’n remarke ki nou annan bann santiman prezidis ki nou pa kapab vwar dan nou menm. (Galat 2:11, 14) Nou kapab telman abitye avek sa bann santiman ki nou pa ni menm realize ki nou annan prezidis! Sanmenm sa ki ti arive avek en frer responsab. I ti ekri en rapor lo en koup ki fer bokou dan servis a plen tan. Sa msye ti sorti dan en group etnik ki bokou dimoun ti vwar konman enferyer. Sa frer responsab ti ekri bann bon keksoz lo sa msye, me i ti azoute: “Menm si i annan [sa nasyonalite], son konportman ek fason viv i ed lezot pour konpran ki sorti [dan sa group etnik] pa neseserman vedir ki zot kosonnyen, ki zot fason viv i enferyer, parey bokou dimoun ki sorti dan sa landrwa.” Ki leson nou kapab aprann? Nenport ki kantite responsabilite nou annan dan lorganizasyon Zeova, nou bezwen egzamin nou lekor e aksepte led pour nou kapab vwar si nou ankor annan okenn santiman prezidis. Kwa ankor ki nou kapab fer?

7. Ki mannyer nou kapab montre ki “nou’n ouver gran nou leker”?

⁷ Si “nou’n ouver gran nou leker,” nou pou ranplas bann santiman prezidis avek lanmour. (2 Korentyen 6:11-13) Eski ou prefere pas letan avek bann dimoun ou ras, nasyonalite, tribi oubyen ki koz menm langaz avek ou? Si wi, esey pas letan avek lezot osi. Ou kapab demann bann frer ek ser ki sorti dan diferan landrwa pour travay avek ou dan predikasyon. Oubyen ou kapab envit zot pour en repa ouswa pour en pti parti. (Akt 16:14, 15) Avek letan, ou leker pou telman ranpli avek lanmour ki ou pou napa okenn plas pour bann santiman prezidis. Aprezan annou diskit lo en lot keksoz ki kapab fer nou “ziz par laparans.”

8. Ki nou aprann dan Levitik 19:15 lo lafason ki larises ouswa lapovrete i kapab afekte nou pwennvi lo lezot?

⁸ I kapab arive ki nou form bann pwennvi lo lezot dapre si zot ris oubyen pov. Levitik 19:15 i dir: “Pa fer preferans pour sa enn ki pov, ni favoriz sa enn ki [“ris,” NWT]. Ou ava ziz ou prosen avek lazistis.” Ki mannyer larises ouswa lapovrete en dimoun i kapab afekte lafason ki nou vwar li?

9. Ki Salomon ti ekri e ki sa i ansenny nou?

 ⁹ Salomon ti ganny enspire pour ekri sa laverite: “En pov i ganny meprize menm par son bann pros; me en zonm ris i annan bokou zanmi.” (Proverb 14:20) Pa sa i tris! Ki nou aprann avek sa proverb? Si nou pa fer atansyon, i kapab arive ki nou pou anvi fer zanmi avek bann frer ek ser ris e pa avek bann ki pov. Akoz i sitan danzere pour ziz dimoun dapre sa ki zot annan ouswa napa.

10. Ki problenm Zak ti averti bann Kretyen lo la?

¹⁰ Si nou ziz nou bann frer ek ser dapre si zot ris ouswa pov, sa i kapab kree divizyon dan kongregasyon. Sa ti arive dan serten kongregasyon dan premye syek e disip Zak ti averti zot lo sa size. (Lir Zak 2:1-4.) Nou pa kapab les bann divizyon egziste dan nou kongregasyon. Alor, ki mannyer nou kapab evite ziz lezot dapre sa ki zot annan?

11. Eski bann keksoz materyel i annan en lefe lo relasyon ki en dimoun i annan avek Zeova? Eksplike.

¹¹ Nou bezwen vwar nou bann frer ek ser parey Zeova i vwar zot. En dimoun pa presye dan lizye Zeova akoz i ris oubyen i pov. Nou relasyon avek Zeova napa nanryen pour fer avek lakantite larzan oubyen keksoz materyel ki nou annan. I vre ki Zezi ti dir ki “i pou difisil  pour en zonm ris antre dan Rwayonm lesyel,” me i pa ti dir ki sa ti pou enposib. (Matye 19:23) Zezi ti osi dir: “Ere zot ki pov, parski Rwayonm Bondye i pour zot.” (Lik 6:20) Me sa pa ti vedir ki tou dimoun pov ti pou ekout Zezi e ganny bann benediksyon spesyal. I ti annan en kantite dimoun pov ki pa ti swiv Zezi. Nou pa kapab ziz relasyon en dimoun avek Zeova dapre bann keksoz materyel ki i annan.

12. Ki Labib i ansenny bann dimoun ris ek pov?

¹² Parmi pep Bondye, i annan bann frer ek ser ki ris ek bann ki pov. Me zot tou zot kontan Zeova e servi li avek en leker konplet. Labib i demann bann dimoun ris pour “pa met zot konfyans dan larises ki tanporer, me plito pour met zot konfyans dan Bondye.” (Lir 1 Timote 6:17-19.) Parol Bondye i osi averti tou serviter Zeova, ki swa zot ris ouswa pov, ki i danzere pour kontan larzan. (1 Timote 6:9, 10) Ler nou vwar nou bann frer ek ser parey Zeova i vwar zot, nou pa pou ziz zot dapre sa ki zot annan ouswa napa. Me ki nou pou dir lo laz en dimoun? Eski sa i en rezon pour ziz lezot?

13. Ki Labib i dir nou konsernan demontre respe anver bann dimoun aze?

¹³ Plizyer fwa Labib i mansyonnen ki nou bezwen annan respe pour bann dimoun aze. Levitik 19:32 i dir: “Ou ava lev debout devan en dimoun aze e respekte en vyeyar; ou ava annan respe pour ou Bondye.” Proverb 16:31 i dir ki “seve blan i en kouronn laglwar ki sa enn ki’n mars lo semen lazistis i gannyen.” Pol ti dir Timote pa kritik bann zonm aze me tret zot parey i ti pou fer avek son papa. (1 Timote 5:1, 2) Menm si Timote ti annan serten lotorite lo bann frer pli aze ki li, i ti bezwen toultan demontre konpasyon ek respe anver zot.

14. Petet, kan ki nou pou bezwen koriz en dimoun ki pli vye ki nou?

¹⁴ Ki arive si en dimoun ki pli aze i volonterman fer pese oubyen promot en keksoz ki Zeova pa kontan? Zeova pa pou toler en dimoun ki’n fer pese volonterman, menm si sa dimoun i pli vye e bokou dimoun i annan respe pour li. Vwar sa prensip ki dan Izai 65:20 (NWT): “Sa enn ki fer pese pou ganny modi menm si i annan san-t-an.” Dan en vizyon ki Ezekyel ti gannyen nou trouv menm prensip. (Ezekyel 9:5-7) Alor, i pli enportan pour nou annan respe pour Zeova, Ansyen bann Zour. (Danyel 7:9, 10, 13, 14) Ler nou annan respe pour Zeova, nou pou ganny sa kouraz ki neseser pour koriz en dimoun ki bezwen led, nenport ki laz ki i annan.​—Galat 6:1.

15. Ki nou aprann avek zapot Pol konsernan demontre respe pour bann zenn frer?

¹⁵ Me ki pwennvi nou annan lo en zenn frer? Eski nou krwar ki nou pa bezwen annan respe pour li? Non. Pol ti ekri Timote: “Pa les personn mepriz ou akoz ou zenn. Plito, vin en legzanp pour sa bann ki fidel par ou fason koze, kondwit, lanmour, lafwa ek lapirte.” (1 Timote 4:12) Ler Pol ti ekri sa, i tre probab ki Timote ti annan apepre 30 an. Pourtan, Pol ti’n donn li bann  responsabilite vreman enportan. Ki leson nou kapab aprann? Nou pa devret ziz bann zenn frer par zot laz. Mazin lo legzanp Zezi. Ler i ti’n ariv 33 an i ti’n deza fer en kantite keksoz!

16, 17. (a) Ki mannyer bann ansyen i deside si en frer i kalifye pour vin en serviter kongregasyon oubyen en ansyen? (b) Ki mannyer bann lopinyon personnel oubyen koutim en pei i kapab al kont sa ki Labib i dir?

¹⁶ Dan serten kiltir, dimoun napa respe pour bann zenn onm. Alor, i kapab arive ki serten ansyen pa rekomann en zenn onm pour servi konman serviter kongregasyon ouswa ansyen, menm si i kalifye. Me Labib pa dir ki en frer i bezwen annan en serten laz avan ki i ganny apwente konman serviter kongregasyon oubyen ansyen. (1 Timote 3:1-10, 12, 13; Tit 1:5-9) Si en ansyen i les li ganny enfliyanse par son kiltir e i fer en lareg lo laz ki en frer i bezwen annan, i pa pe swiv Parol Bondye. Bann ansyen pa devret ziz bann zenn onm dapre zot prop lopinyon ouswa koutim, me dapre bann standar ki dan Parol Bondye.​—2 Timote 3:16, 17.

¹⁷ Si bann ansyen pa swiv bann standar Labib pour apwent bann serviter kongregasyon oubyen ansyen, sa i kapab anpes bann frer ki kalifye pour ganny apwente. Dan en pei, en serviter kongregasyon ti desarz byen son bann responsabilite e bann ansyen ti dakor ki dapre Labib i ti kalifye pour servi konman en ansyen. Par kont, serten ansyen pli vye ti dir ki i ti paret tro zenn pour vin ansyen, alor zot pa ti rekomann li. Malerezman, sa frer pa ti ganny apwente zis akoz son laparans. I paret ki sa fason panse i popiler dan plizyer parti lemonn. I vreman enportan ki nou depan lo Labib olye lo nou prop lopinyon ek koutim. Koumsa, nou pou obei Zezi e aret ziz lezot par laparans.

18, 19. Kwa ki pou ed nou vwar nou bann frer ek ser parey Zeova?

¹⁸ Nou enparfe, me toudmenm nou kapab aprann pour retir bann santiman prezidis e vwar lezot parey Zeova i vwar zot. (Akt 10:34, 35) Alor nou toultan bezwen port latansyon lo bann rapel ki dan Parol Bondye. Ler nou aplik sa bann rapel, nou pe obei lord Zezi pour “aret ziz par laparans.”​—Zan 7:24.

¹⁹ Byento, nou Lerwa Zezi Kri pou ziz tou dimoun. Son zizman pou baze lo bann standar drwat Bondye, pa lo sa ki i vwar ouswa tande. (Izai 11:3, 4) Nou pe esper sa letan merveye avek enpasyans!