Akoz personn pa ganny drwa poste bann piblikasyon Temwen Zeova lo lezot sit Enternet oubyen lo rezo sosyal?

Vi ki nou ofer nou bann piblikasyon pour nanryen, serten dimoun i krwar ki zot kapab kopye oubyen poste zot lo lezot sit Enternet oubyen lo rezo sosyal. Me sa i kapab fer bann problenm grav e i al kont Regilasyon Lizaz * (vwar not) pour nou bann sit Enternet. Sa bann Regilasyon i dir klerman ki personn pa ganny drwa “poste okenn konteni lo sa sit Enternet (lo okenn sit, partaz sa fayl oubyen lo sit sosyal).” Akoz nou bezwen annan sa bann lareg?

Tou keksoz lo nou bann sit Enternet i copyright, ki vedir ki i ganny proteze par lalwa. Sa i enportan parski i anpese ki i mal ganny servi. Par ler, bann aposta ek lezot dimoun ki pa anvi ki nou travay i reisi i met nou bann piblikasyon lo zot bann sit Enternet pour atir latansyon bann Temwen Zeova ek lezot. Me lo sa bann sit zot osi met bann piblikasyon ki kree bann dout dan lespri dimoun. (Psonm 26:4; Proverb 22:5) Lezot dimoun in servi nou bann piblikasyon, portre, video, logo jw.org ek lezot keksoz ankor dan zot bann piblisite, app lo telefonn ek lezot prodwi ki zot vann. Me vi ki nou bann piblikasyon, portre, video, logo ek lezot keksoz i ganny proteze par lalwa, nou kapab al ankour e fer zot aret fer sa. (Proverb 27:12) Me i kapab arive ki nou pa ganny sipor ankour si nou permet serten dimoun, menm nou bann frer ek ser, pour poste nou bann piblikasyon lo lezot sit Enternet oubyen pour servi nou logo jw.org pour vann zot prodwi.

Si nou download nou bann piblikasyon lo okenn lezot sit apard ki jw.org, sa i kapab danzere. Zeova i donn nou manze spirityel selman atraver “lesklav fidel e pridan.” (Matye 24:45) Sa “lesklav” i servi zis son bann sit ofisyel pour donn manze spirityel​—www.pr418.com, tv.pr418.com ek wol.pr418.com. An plis, nou annan zis trwa app ofisyel pour bann lekipman elektronik​—JW Language^®, JW Library^® ek JW Library Sign Language^®. Lo sa bann sit e dan sa bann app, ou pa pou trouv okenn piblisite oubyen okenn keksoz ki annan pour fer avek lemonn Satan. Me si nou ganny nou bann piblikasyon lo en lot sit Enternet oubyen app, i annan sa danze ki sa bann piblikasyon in ganny sanze dan en kek fason.​—Psonm 18:26; 19:8.

An plis, si nou poste nou bann piblikasyon, portre, video ek lezot keksoz lo bann sit kot lezot i kapab fer bann komanter, sa i permet bann aposta ek lezot pour kritik lorganizasyon Zeova. Apre sa, serten frer ek ser i fer deba avek sa bann dimoun e sa i anmenn plis dezoner lo Zeova. Sa bann kalite diskisyon lo Enternet pa sa bon fason pour koriz fason panse en dimoun e ed li pour konpran laverite. (1 Timote 6:3-5; 2 Timote 2:23-25) Deplis, serten dimoun i fer bann sit Enternet ek bann kont lo rezo sosyal ki fer li paret ki sa bann sit ek kont lo rezo sosyal i sorti kot lorganizasyon oubyen bann frer ki lo Konsey Direkter. Me sa bann keksoz i fo. Napa en manm Konsey Direkter ki annan son prop sit Enternet oubyen son prop kont lo nenport ki rezo sosyal.

Ler nou ankouraz dimoun pour al lo jw.org, nou pe siport sa travay pour anons “sa bon nouvel.” (Matye 24:14) Nou bann sit Enternet ek nou bann app, pe kontinyen amelyore. Nou anvi ki tou dimoun i benefisye avek zot. Alor nou ganny drwa imel lezot kopi en piblikasyon oubyen anvoy zot en link pour al lo nou sit Enternet. Dan sa fason, nou gid dimoun kot sa sel sours ki Zeova pe servi pour donn manze spirityel, setadir, “lesklav fidel e pridan.”