1. Dan ki fason nou kapab travay avek Zeova?

 LER Zeova ti kree bann imen, i ti anvi ki zot travay ansanm avek li. Ozordi, menm si bann imen i enparfe, bann dimoun fidel i ankor kapab travay avek Zeova sak zour. Par egzanp, nou “travay ansanm avek Bondye” ler nou anons sa bon nouvel Rwayonm e fer disip. (1 Korentyen 3:5-9) I vreman en gran loner ki nou Kreater tou pwisan in swazir nou pour fer sa travay sitan enportan! Kantmenm sa, predikasyon pa sel fason ki nou travay avek Zeova. Dan sa lartik, nou pou aprann ki mannyer nou osi travay avek Zeova ler nou ed nou fanmir ek bann ki dan kongregasyon, ler nou demontre lospitalite, ler nou ede dan bann proze ki lorganizasyon pe fer partou dan lemonn e ler nou fer plis dan nou servis pour Zeova.​—Kolosyen 3:23.

2. Akoz nou pa devret zanmen konpar sa ki nou fer pour Zeova avek sa ki lezot i fer?

² Anmezir nou etidye sa lartik, i enportan pour nou  rapel ki tou dimoun i diferan. Nou laz, lasante, sirkonstans ek abilite i diferan. Alor pa konpar sa ki ou kapab fer pour Zeova avek sa ki lezot i kapab fer. Zapot Pol ti dir: “Sakenn i devret egzamin son prop aksyon e apre sa, i pou kontan akoz sa ki li menm in fer e pa akoz i pe konpar li avek en lot dimoun.”​—Galat 6:4.

3. Akoz nou kapab dir ki tou dimoun ki pran swen avek son fanmir pe travay avek Bondye?

³ Zeova i ekspekte ki nou pran swen avek nou fanmir. Par egzanp, petet ou bezwen travay pour ganny larzan pour pran swen avek ou fanmir. En kantite manman i bezwen reste kot lakour avek zot zanfan ler zot ankor ptipti. Osi, ler nou paran pa kapab okip zot prop lekor, petet nou ki bezwen pran swen avek zot. Sa i bann keksoz ki neseser. Labib i dir: “Si en dimoun pa pran swen avek son prop fanmir e sirtou avek bann ki dan son prop lakour, i’n abandonn lafwa e i pli pir ki en dimoun ki napa lafwa.” (1 Timote 5:8) Si ou annan bann responsabilite fanmir, petet ou pa pe fer sa kantite ki ou ti a kontan fer pour Zeova. Me pa dekouraze! Zeova i kontan ler ou pran swen avek ou fanmir.​—1 Korentyen 10:31.

4. Ki mannyer bann paran i kapab met lentere Rwayonm premye e ki arive ler zot fer sa?

⁴ Bann paran Kretyen i kapab travay avek Zeova ler zot ed zot zanfan pour annan bann lobzektif dan servis Zeova. En kantite paran in fer sa. Akoz sa, zot bann garson ek fiy in pli tar deside servi Zeova a plen tan, menm lwen avek lakour. Serten pe servi konman misyonner, lezot konman pionye kot i annan en gran bezwen pour plis proklanmater e lezot pe servi dan Betel. Byensir, ler bann zanfan i lwen, bann paran pa kapab pas sa kantite letan ki zot ti ava kontan avek zot. Me zot pa mazin zis zot prop lentere, o kontrer zot ankouraz zot zanfan pour kontinyen servi Zeova nenport landrwa kot zot ete. Akoz? Parski zot vreman kontan ki zot zanfan pe met Zeova premye dan zot lavi. (3 Zan 4) Plizyer parmi sa bann paran i annan menm santiman avek Ana ki ti dir ki i “pret” son garson Samyel avek Zeova. Zot santi ki i en gran loner pour travay avek Zeova dan sa fason.​—1 Samyel 1:28.

5. Ki mannyer ou kapab ed bann frer ek ser dan ou kongregasyon? (Vwar portre o konmansman sa lartik.)

⁵ Si ou napa bann responsabilite fanmir ki ou bezwen fer toudswit, eski ou kapab ed bann frer ek ser malad, aze oubyen ki annan lezot bezwen? Oubyen eski ou kapab ed bann ki pran swen avek zot? Rod bann dan ou kongregasyon ki bezwen sa bann kalite led. Par egzanp, petet i annan en ser ki pe pran swen avek son paran aze. Eski ou kapab pas letan avek son paran pour ki i kapab ganny sans fer lezot keksoz? Oubyen petet ou kapab ofer ou led en dimoun pour anmenn li renyon, pour al fer son konmisyon ouswa pour vizit en dimoun ki lopital. Ler ou fer sa, petet ou pe travay avek Zeova pour reponn en lapriyer.​—Lir 1 Korentyen 10:24.

6. Ki mannyer nou kapab demontre lospitalite?

⁶ Bann ki travay ansanm avek Bondye i byen koni konman bann dimoun ki demontre lospitalite. Dan Labib, sa mo Grek ki ganny servi pour “lospitalite” i vedir “lanmour anver bann etranze.” (Ebre 13:2, not) Dan Parol Bondye, nou kapab lir lo bann legzanp ki ansenny nou lo lafason ki nou kapab demontre sa kalite lanmour. (Zenez 18:1-5) Nou kapab e nou devret ed lezot sak fwa nou annan en loportinite pour fer li, ki swa zot “nou bann frer ek ser dan lafwa” ouswa non.​—Galat 6:10.

7. Ki byenfe ou gannyen ler ou demontre lospitalite anver bann ki dan servis a plen tan?

⁷ Eski ou kapab travay avek Zeova par demontre lospitalite anver bann serviter a plen tan ki bezwen en landrwa reste? (Lir 3 Zan 5, 8.) Ler nou fer sa, sa i benefisye zot e nou osi. Dapre Labib, ler nou fer sa nou pe “ankouraz kanmarad.” (Romen 1:11, 12) Annou vwar legzanp Olaf. Ler i ti ankor zenn, en sirveyan rezyonal ki ti selibater, ti vizit son kongregasyon e i ti bezwen en landrwa reste, me personn dan son kongregasyon pa ti kapab ed li. Olaf ti demann son paran, ki pa ti Temwen, si sa sirveyan rezyonal ti pou kapab reste kot zot. Zot ti dir wi, me Olaf ti pou bezwen dormi dan sofa. Sanmenm ki Olaf ti fer e i pa ti regret sa. I ti pas en bon lasemenn avek sa sirveyan rezyonal! Toulezour zot ti lev granmaten e diskit lo plizyer topik enteresan pandan ki zot ti pe pran gadyak. Sa sirveyan rezyonal ti telman ankouraz Olaf ki i ti deside pour konmans servi Zeova a plen tan. Pour sa dernyen 40 an, Olaf in servi konman misyonner dan plizyer diferan pei.

8. Akoz nou devret demontre lanmour menm ler lezot pa apresye o konmansman? Donn en legzanp.

⁸ Nou kapab demontre lanmour anver bann etranze dan plizyer fason, menm si o konmansman zot pa montre lapresyasyon. Par egzanp, en ser Lespanny ti etidye Labib avek en madanm sorti Ekwador ki apel Yesica. En zour pandan son letid Labib, Yesica ti pe zis plere. Alor sa ser ti demann li akoz i pe plere. Yesica ti dir ki avan i vin Lespanny i ti vreman pov. En zour i ti napa manze pour donn son fiy, i ti annan zis en pe delo. Yesica ti priye pour ganny led pandan ki i ti pe esey fer son pti baba dormi. Pa lontan apre, de Temwen ti vizit Yesica e donn li en magazin. Me i ti brit avek zot, desir sa magazin e dir zot: “Eski ou anvi mon donn mon fiy sa pour li manze?” Sa bann ser ti esey rekonfort li, me Yesica pa ti ekout zot. Pli tar, sa bann ser ti kit en pannyen ranpli avek manze devan son laport. Aprezan, pandan son letid, i ti pe plere parski i ti realize ki i ti’n inyor larepons Bondye pour son lapriyer. Me  Yesica ti determinen pour servi Zeova. I kler ki zenerozite sa bann ser in anmenn bann bon rezilta.​—Eklezyast 11:1, 6.

9, 10. (a) Ki bann diferan loportinite bann Izraelit ti annan pour port zot volonter? (b) Dan ki fason bann frer i kapab ede dan kongregasyon ozordi?

⁹ Dan lepase, bann Izraelit ti annan diferan loportinite pour port zot volonter. (Egzod 36:2; 1 Kronik 29:5; Neemya 11:2) Ozordi, ou osi ou annan en kantite loportinite pour donn volonterman ou letan, keksoz materyel ek ou bann abilite pour ed ou bann frer ek ser. Ler ou fer sa, ou pou vreman zwaye e Zeova pou beni ou.

¹⁰ Parol Bondye i ankouraz bann zonm dan kongregasyon pour travay avek Zeova par servi lezot konman serviter kongregasyon ek ansyen. (1 Timote 3:1, 8, 9; 1 Pyer 5:2, 3) Bann ki fer sa i anvi ed lezot dan bann fason pratik e osi ed zot avek zot ladorasyon pour Zeova. (Akt 6:1-4) Eski bann ansyen in demann ou pour ede dan servis lakey, avek bann piblikasyon, teritwar, mentenans ouswa lezot keksoz? Bann frer ki’n ede dan sa bann fason i dir ki zot ganny bokou lazwa.

11. Ki mannyer en ser in benefisye ler in travay lo bann proze konstriksyon?

¹¹ Souvandfwa, bann ki volonter pour travay lo bann proze konstriksyon i fer bann nouvo zanmi. En ser ki apel Margie in travay lo bann proze konstriksyon Lasal Rwayonm pour 18 an. Lo sa bann proze, i’n demontre lentere dan bann zenn ser e ede pour form zot. I dir ki sa i en bon fason pour bann  volonter ankouraz kanmarad. (Romen 1:12) Anfet, ler i ti fer fas avek bann difikilte dan son lavi, sa bann zanmi ki i’n fer lo sa bann proze ti ankouraz li. Eski ou’n deza port ou volonter pour travay lo en proze konstriksyon? Ou kapab travay lo en proze konstriksyon menm si ou napa en abilite spesifik.

12. Ki mannyer ou kapab ede apre en dezas?

¹² Nou osi kapab travay avek Zeova ler nou ed nou bann frer ek ser apre en dezas. Par egzanp, nou kapab kontribye larzan. (Zan 13:34, 35; Akt 11:27-30) En lot fason ki nou kapab ede i ler nou netwaye oubyen fer bann reparasyon apre en dezas. Gabriela, en ser sorti Polonny ki son lakaz ti’n severman ganny andomaze apre en linondasyon ti vreman kontan pour vwar bann frer ek ser sorti dan bann kongregasyon ki pa tro lwen vin ed li. Ler i mazin lo sa leksperyans, i dir ki i pa enkyet pour sa bann keksoz materyel ki i’n perdi, me o kontrer i konsantre lo sa ki i’n gannyen. I dir: “Sa leksperyans in reasir mwan ki ler ou form parti kongregasyon Kretyen sa i en privilez inik e osi en sours lazwa ek lakontantman.” Plizyer ki’n ganny led apre en dezas, i dir ki zot santi menm fason. Osi, bann ki travay avek Zeova pour ed sa bann frer ek ser i santi zot ere e satisfe.​—Lir Akt 20:35; 2 Korentyen 9:6, 7.

13. Ki mannyer nou ranforsi nou lanmour pour Zeova ler nou port nou volonter? Donn en legzanp.

¹³ En ser ki apel Stephanie ek lezot proklanmater kot i ti reste, ti travay avek Bondye par ed bann Temwen ki ti’n sove pour al Leta-z-ini akoz lager dan zot pei. Zot ti ed sa bann refizye pour ganny en landrwa reste ek bann meb. I dir: “Zot lazwa ek lapresyasyon ki zot ti eksprimen pour sa lanmour ki nou lasosyasyon frer ek ser dan lemonn antye ti pe demontre anver zot ti tous nou en kantite. Sa bann fanmir i krwar ki nou ki’n ed zot, me an realite, zot in ed nou bokou plis. Ler nou’n vwar zot lanmour, linite, lafwa ek lafason ki zot depan lo Zeova, sa in vreman ranforsi nou lanmour pour Zeova e sa in donn nou en profon lapresyasyon pour tou sa ki nou gannyen atraver son lorganizasyon.”

14, 15. (a) Ki latitid profet Izai ti annan? (b) Ki mannyer bann Kretyen i kapab imit latitid Izai?

¹⁴ Eski ou ti a kontan travay avek Zeova plis ankor? Eski ou pare pour al  reste dan en landrwa kot i annan en bezwen pour plis proklanmater? Byensir, nou pa bezwen al lwen pour demontre zenerozite. Me i annan bann frer ek ser ki kapab fer sa. Zot annan menm latitid avek profet Izai. Ler Zeova ti demande: “Lekel mon pou anvoye? Lekel ki pou al dan nou plas?” I ti dir: “La mon la! Anvoy mwan!” (Izai 6:8) Eski ou pare e kapab ede dan lorganizasyon Zeova? Ki serten fason ou kapab ede?

¹⁵ Ler Zezi ti pe koz lo predikasyon e sa travay pour fer disip, i ti dir: “Rekolt i gran, me i annan en ptigin travayer. Pour sa rezon, sipliy Met rekolt pour anvoy plis travayer pour anmas son rekolt.” (Matye 9:37, 38) Eski ou kapab servi konman en pionye dan en landrwa kot i annan en bezwen pour plis proklanmater? Oubyen eski ou kapab ed en lot dimoun pour fer sa? En kantite frer ek ser i santi ki sa pli bon fason pour demontre zot lanmour pour Bondye ek zot prosen i ler zot servi konman pionye dan en landrwa kot i annan en bezwen pour plis proklanmater. Eski ou kapab mazin lezot fason ki ou kapab fer plis dan ou servis? Si ou fer sa, ou pou vreman ere.

16, 17. Ki serten fason ou kapab fer plis dan ou servis pour Zeova?

¹⁶ Eski ou pare pour servi dan Betel ouswa ede dan bann proze konstriksyon, ki swa konman en travayer tanporer ouswa pour enn de zour par semenn? Lorganizasyon Zeova i toultan bezwen dimoun ki pare pour servi kot i annan bezwen e ki pou fer nenport kwa ki zot ganny demande pour fer menm si zot abitye fer en lot kalite travay. Zeova i apresye tou dimoun ki pare pour fer sakrifis e servi kot i annan en bezwen.​—Psonm 110:3, NWT.

¹⁷ Eski ou ti pou kontan ganny plis formasyon pour ki ou kapab servi Zeova plis? Petet ou kapab fer laplikasyon pour asiste Lekol pour bann Predikater Rwayonm. Sa lekol i form bann frer ek ser martir ki deza pe servi Zeova a plen tan pour ki lorganizasyon Zeova i kapab servi zot pour fer plis ankor. Bann ki asiste sa lekol i bezwen pare pour servi dan nenport landrwa ki zot ganny anvoye. Eski ou ti pou pare pour fer plis pour Zeova dan sa fason?​—1 Korentyen 9:23.

18. Ki bann byenfe nou gannyen ler nou travay avek Zeova sak zour?

¹⁸ Konman pep Zeova, nou zenere, bon, zantiy e annan lanmour pour lezot. Nou toultan annan lentere lezot a ker. Sa i donn nou lazwa, lape ek lakontantman. (Galat 5:22, 23) Nenport ki sityasyon ou ladan, si ou kontinyen imit personnalite Zeova e demontre zenerozite, ou pou ere e ou pou kapab travay ansanm avek li konman enn dan ki I trouv bokou plezir!​—Proverb 3:9, 10.