1. Ki bann Kretyen i bezwen fer pour fini zot lakours?

NOU tou nou dan en lakours! Labib i dir ki dan en sans, bann Kretyen pe partisip dan en lakours kot tou bann ki fini sa lakours pou ganny lavi eternel. Ki swa nou fek konmanse oubyen nou dan sa lakours pour plizyer lannen, nou bezwen kontinyen taye ziska ki nou fini sa lakours. Sa konsey ki zapot Pol ti donn bann Kretyen dan lavil Filip i kapab donn nou lafors pour fini sa lakours. Ler Pol ti ekri kongregasyon Filip, serten frer ek ser ti’n deza servi Zeova pour plizyer lannen. Menm si zot ti pe fer byen dan sa lakours, setadir zot ti deza pe servi Zeova fidelman, Pol ti pe fer zot rapel ki zot bezwen kontinyen tay dan sa lakours avek landirans. I ti anvi ki zot kontinyen swiv son legzanp e “lite pour atenn [zot] bi.”​—Fili. 3:14.

2. Akoz konsey Pol pour bann Filipyen ti vin zis a tan?

² Konsey Pol pour bann Filipyen ti vin zis a tan. Depi ler sa kongregasyon ti’n formen, bann dimoun dan lavil Filip ti opoz bann frer ek ser. Apepre lannen 50, Pol ek Silas ti ganny en lenvitasyon sorti kot Zeova pour “vin . . . Masedwann.” Alor, zot ti al Filip ki ti lavil prensipal dan distrik Masedwann, pour anons sa bon nouvel dan sa lavil. (Akt 16:9) Ler zot ti ariv laba, zot ti zwenn en madanm ki apel Lidi ki ti “ekout [zot]. Zeova ti ouver gran son leker” pour li aksepte sa bon nouvel. (Akt 16:14) Pa bokou letan apre, Lidi ek tou dimoun dan son lakour ti batize. Me deswit Dyab ti konmans fer problenm pour Pol ek Silas. Bann zonm sa lavil ti trenn zot devan bann o zofisye sa lavil e akiz zot konmkwa zot ti pe fer dezord. Akoz sa, Pol ek Silas ti ganny bate, met dan prizon e pli tar zot ti ganny demande pour kit sa lavil. (Akt 16:16-40) Me eski zot ti abandonnen? Pa ditou! Me ki bann frer ek ser dan sa kongregasyon ki ti’n fek formen ti fer? Zot osi zot ti andire! San dout, legzanp Pol ek Silas ti’n ankouraz zot.

3. Ki Pol ti realize e ki kestyon nou pou reponn?

 ³ Pol ti determinen pour andire e pa abandonnen. (2 Kor. 4:16, not) Par kont, i ti konnen ki pour li kapab fini son lakours Kretyen, setadir servi Zeova fidelman ziska son lanmor, i ti pou bezwen reste konsantre lo son bi. Ki nou kapab aprann avek legzanp Pol? Ki bann frer ek ser ozordi pe fer ki montre ki nou kapab andire malgre okenn problenm ki nou fer fas avek? Ki mannyer nou lespwar i kapab ed nou pour andire e pa zanmen abandonnen?

4. Ki mannyer Pol ti kapab reste okipe dan son servis malgre okenn keksoz ki ti arive?

⁴ Ki Pol ti pe fer ler i ti ekri sa let pour bann Filipyen? I ti en prizonnyen dan son lakaz Ronm. I pa ti kapab al prese. Kantmenm sa, i ti reste okipe dan servis Zeova. I ti anons sa bon nouvel avek tou dimoun ki ti vin vizit li e i ti anvoy bann let pour bann kongregasyon ki ti lwen. Pareyman ozordi, bokou Kretyen ki pa kapab kit zot lakour akoz maladi ouswa lavyeyes, i servi tou loportinite ki zot gannyen pour anons sa bon nouvel avek bann ki vizit zot. Zot osi ekri let pour ankouraz bann dimoun ki nou pa zwenn zot kot zot.

5. Dapre parol Pol dan Filipyen 3:12-14, kwa ki ti ed li pour reste konsantre lo son bi?

⁵ Pol pa ti les bann keksoz ki i ti’n akonpli oubyen bann fot ki i ti’n fer dan lepase anpes li servi Zeova. Anfet, i ti dir ki i bezwen “bliy sa ki deryer” pour li kapab “donn tou pour tou pour ganny bann keksoz ki devan,” setadir pour li kapab fini sa lakours. (Lir Filipyen 3:12-14.) Ki serten keksoz ki ti’n kapab anpes Pol servi Zeova? Premyerman, Pol ti’n akonpli bokou dan larelizyon Zwif. Kantmenm sa, i ti vwar tou sa bann keksoz “konman salte.” (Fili. 3:3-8) Dezyenmman, menm si Pol ti’n kapab santi li koupab akoz i ti’n persekit bann Kretyen, i pa ti les sa anpes li servi Zeova. Trwazyenmman, i pa ti mazinen ki i ti’n deza fer ase pour Zeova. Pol ti’n fer bokou dan son minister menm si i ti’n ganny anprizonnen, bate, saboule avek ros, fer nofraz e menm ler i ti napa manze ek lenz. (2 Kor. 11:23-27) Par kont, malgre nenport keksoz ki Pol ti’n akonpli oubyen pas ladan, i ti konnen ki i bezwen kontinyen servi Zeova. Nou osi nou bezwen fer parey.

6. Ki serten keksoz “ki deryer” nou bezwen oubliye?

⁶ Ki mannyer nou kapab swiv legzanp Pol e “bliy sa ki deryer”? Petet i annan serten parmi nou ki ankor santi koupab pour bann pese ki nou’n fer dan lepase. Si sa i leka, nou kapab etidye lo sakrifis Kris pandan nou letid personnel. Si nou etidye, medite e priy lo sa topik, sa i kapab ankouraz nou e ed nou pour aret santi nou koupab ler i pa neseser. Sa i menm kapab fer nou aret pini nou lekor pour bann pese ki Zeova in fini pardonnen. Annou vwar en lot leson nou kapab aprann avek Pol. I kapab ki serten parmi nou in kit en bon louvraz ki ti’n kapab fer nou ganny en kantite larzan, pour nou kapab fer plis pour Zeova. Si sa i leka, nou kapab bliy bann keksoz deryer ler nou pa mazin lo tou bann keksoz materyel ki nou ti’n kapab gannyen. (Nom. 11:4-6; Ekle. 7:10) “Sa ki deryer” i menm kapab enkli bann keksoz ki nou’n akonpli dan nou servis pour Zeova oubyen bann problenm ki nou’n pas atraver dan lepase. Byensir, ler nou mazin lo lafason ki Zeova in ed nou dan lepase, sa pou ed nou vin pli pros  avek nou Papa. Par kont, nou pa zanmen anvi krwar ki nou’n fer ase pour Zeova.​—1 Kor. 15:58.

7. Dapre 1 Korentyen 9:24-27, ki nou bezwen fer pour ganny sa lakours Kretyen? Donn en legzanp.

⁷ Zezi ti dir son bann disip: “Fer bokou zefor.” (Lik 13:23, 24) Pol ti konpran ki sa i vedir. I ti konnen ki parey Kris, i bezwen fer zefor tou dilon son lavi. Alor i ti konpar nou lavi konman Kretyen avek en lakours. (Lir 1 Korentyen 9:24-27.) En atlet ki dan en lakours i konsantre lo laliny finisyon e i pa les li ganny distrer avek okenn keksoz. Par egzanp, bann atlet ki partisip dan en maraton i bezwen tay lo gran semen kot i annan bann laboutik oubyen lezot keksoz ki kapab distrer zot. Eski ou krwar ki en atlet ti pou arete e get dan vitrin bann laboutik? Non, akoz i anvi ganny sa lakours! Pour nou kapab fini nou lakours Kretyen, nou osi nou bezwen evite ganny distrer. Parey Pol, si nou reste konsantre lo nou bi e fer bokou zefor dan nou servis pour Zeova, nou pou ranport sa pri!

8. Ki trwa difikilte nou pou diskit lo la?

⁸ Annou vwar trwa difikilte ki kapab fer nou fer mwens pour Zeova. Sa premye difikilte i si keksoz pa ariv ler ki nou ekspekte. Dezyenm difikilte i ler nou lafors i diminyen anmezir ki laz i monte. Sa trwazyenm i ler nou fer fas avek bann problenm ki dire. Annou vwar ki leson nou kapab aprann avek lafason ki lezot in fer fas avek sa bann difikilte.​—Fili. 3:17.

9. Ki i kapab arive si keksoz pa ariv ler ki nou ekspekte?

⁹ Si keksoz pa ariv ler ki nou ekspekte. I normal pour nou anvi vwar bann bon keksoz ki Zeova in promet. Anfet, ler profet Abakouk ti dir ki i vreman anvi ki Zeova i met en lafen avek bann move keksoz ki ti pe arive Zida, Zeova ti dir li “espere.” (Aba. 2:3) Par kont, si i paret ki bann keksoz ki nou pe ekspekte pe tarde arive, sa i kapab fer nou konmans fer mwens pour Zeova. Nou menm kapab dekouraze. (Prov. 13:12) Sa ti arive avek  nou bann frer ek ser ver 1914. Sa letan, bokou Kretyen swazir ti ekspekte ki zot ti pou al dan lesyel an 1914. Ler sa pa ti arive, ki sa bann frer ek ser ti fer?

10. Ki en koup ti fer ler keksoz pa ti ariv ler ki zot ti ekspekte?

¹⁰ Annou vwar legzanp de Kretyen fidel ki ti sirmont sa difikilte. Frer Royal Spatz ti batize an 1908 ler i ti annan 20 an. I ti asire ki byento i ti pou al dan lesyel. Anfet, an 1911 ler i ti demann en ser ki apel Pearl pour marye avek li, i ti dir li: “Ou konnen ki pou arive an 1914. Si nou anvi marye, nou pa kapab tarde!” Eski sa koup ti aret zot lakours Kretyen ler zot pa ti al dan lesyel an 1914? Non, parski zot ti pe pli konsantre lo servi Zeova fidelman ki lo zot rekonpans pour al dan lesyel. Zot ti determinen pour tay dan sa lakours avek landirans. Alor, Royal ek Pearl ti reste okipe dan zot servis e kontinyen servi Zeova fidelman ziska zot ti mor plizyer lannen pli tar e al dan lesyel. San dout, ou vreman anvi vwar sa letan kot Zeova pou zistifye son non ek son drwa pour dirize e akonpli tou son bann promes. Ou kapab asire ki sa bann keksoz pou vin vre dan sa moman ki Zeova in swazir. Ziska ki sa i arive, annou reste okipe dan servis Bondye e pa zanmen dekouraze ler keksoz pa ariv ler ki nou ekspekte.

11-12. Akoz nou kapab kontinyen servi Zeova fidelman, menm si nou lafors i diminyen anmezir ki laz i monte? Donn en legzanp.

¹¹ Ler nou lafors i diminyen anmezir ki laz i monte. En atlet i bezwen en kantite lenerzi pour tay dan en lakours. Me ou pa bezwen for fizikman pour ou kapab annan plis lafwa dan Zeova e pour ou devoue dan son servis. Anfet, bokou frer ek ser ki zot lafors in diminyen i ankor anvi donn Zeova zot meyer. (2 Kor. 4:16) Par egzanp, Frer Arthur Secord * ti annan 88 an e i ti’n deza servi dan Betel pour 55 an. I ti napa en bon lasante e i ti tou fay fay. En zour, en ners ti vin kot son lili pour pran swen avek li. Sa ners ki ti kontan li en kantite, ti get li e dir li: “Frer Secord, ou’n fer en kantite pour Zeova.” Par kont, Arthur pa ti pe konsantre lo sa ki i ti’n fer dan lepase. I ti get sa ners, fer en pti sourir e dir li: “Wi, sa i vre. Me i pa sa ki nou’n fer ki enportan. Sa ki enportan i ki nou kontinyen reste fidel.”

¹² Petet ou’n servi Zeova pour plizyer lannen e aprezan vi ki ou napa en bon lasante, ou nepli kapab fer menm kantite dan servis Zeova. Si sa i leka, pa dekouraze. Ou kapab asire ki Zeova i rapel e apresye tou bann bon keksoz ki ou’n fer dan  lepase. (Ebr. 6:10) Gard antet ki i pa lakantite nou fer ki montre ki kantite nou kontan Zeova. O kontrer, nou montre ki nou kontan e nou devoue pour Zeova ler nou reste zwaye, konsantre lo nou lespwar e fer tou sa ki nou kapab dan servis Zeova. (Kol. 3:23) Zeova i konpran nou, i konn nou limit e i pa ekspekte ki nou fer plis ki nou kapab.​—Mark 12:43, 44.

13. Ki ti arive avek Anatoly ek Lidiya e ki mannyer sa i ankouraz nou pour kontinyen servi Zeova menm si nou pas dan bokou difikilte?

¹³ Fer fas avek bann problenm ki dire. Serten serviter Zeova in fer fas avek difikilte ek persekisyon pour plizyer dizenn lannen. Par egzanp, Anatoly Melnik * ti annan zis 12 an ler son papa ti ganny arete, met dan prizon e ganny egzile Siberi ki plis ki 7,000 kilomet avek kot son fanmir ti reste Moldova. Enn an pli tar, Anatoly, son manman ek son granparan ti ganny egzile Siberi zot osi. Pli tar, zot ti kapab asiste renyon dan en lot vilaz, me zot ti bezwen mars 30 kilomet dan lanez ek lafreser. Pli tar, Frer Melnik ti pas trwa-z-an dan prizon lwen avek son madanm Lidiya ek son pti fiy, ki ti annan zis enn an sa letan. Malgre tou sa bann lannen ki Anatoly ek son fanmir ti pas dan difikilte, zot ti kontinyen al annavan dan zot lakours Kretyen e servi Zeova fidelman. Aprezan Anatoly i annan 82 an e i servi lo Komite Biro Brans Sant Lazi. Parey Anatoly ek Lidiya, annou fer tou sa ki nou kapab dan servis Zeova e kontinyen andire parey nou’n fer dan lepase.​—Gal. 6:9.

14. Ki Pol ti bezwen fer pour atenn son bi?

¹⁴ Pol ti annan konfyans ki i ti pou fini son lakours Kretyen e atenn son bi. Konman en Kretyen swazir, i ti annan lespwar pour “ganny sa pri, setadir lavi dan lesyel ki Bondye i donnen.” Par kont, i ti realize ki i ti bezwen kontinyen “lite” pour li atenn sa bi. (Fili. 3:14) Pol ti servi en legzanp enteresan pour ed bann Filipyen reste konsantre lo zot bi.

15. Ki mannyer Pol ti servi legzanp sitwayennte pour ankouraz bann Kretyen Filip pour kontinyen “lite”?

¹⁵ Pol ti fer bann Filipyen rapel ki zot sitwayennte ti dan lesyel, setadir ki zot ti pou al viv dan lesyel. (Fili. 3:20) Akoz zot ti bezwen gard sa antet? Sa letan, dimoun ti vreman anvi vin en sitwayen Romen  akoz sa ti pou donn zot bokou byenfe. * Par kont, bann Kretyen swazir ti sitwayen Rwayonm Bondye, en pli bon gouvernman ki ti pou donn zot bokou plis byenfe. Ler ou konpar sitwayennte dan lesyel avek sitwayennte Romen, i kler ki sitwayennte Romen ti napa gran valer. Alor, Pol ti annan rezon ankouraz bann Filipyen pour “konport zot konman bann sitwayen ki diny an sa ki konsern sa bon nouvel lo Kris.” (Fili. 1:27, not) Bann Kretyen swazir ozordi i kit en bon legzanp akoz zot lite pour atenn zot bi, setadir lavi eternel dan lesyel.

16. Dapre Filipyen 4:6, 7, ki nou bezwen kontinyen fer ki swa nou annan lespwar pour al viv dan lesyel ouswa lo later?

¹⁶ Ki swa nou annan lespwar pour al viv dan lesyel oubyen pour viv dan paradi lo later, nou bezwen kontinyen lite pour atenn nou bi. Nenport ki keksoz ki nou fer fas avek, nou pa devret get bann keksoz deryer e nou pa devret les okenn keksoz anpes nou servi Zeova. (Fili. 3:16) Petet i fer en kantite letan depi ki nou pe espere pour vwar bann promes Zeova vin vre oubyen i kapab ki nou nepli zenn e for. Petet nou’n fer fas avek difikilte ek persekisyon pour bokou lannen. Nenport ki sityasyon ou ladan, “pa bezwen trakas pour nanryen.” O kontrer, fer Bondye konn ou bann demann dan lapriyer ek siplikasyon e i pou donn ou lape ki depas tou sa ki ou kapab konpran.​—Lir Filipyen 4:6, 7.

17. Ki nou pou diskite dan sa lot lartik?

¹⁷ Ler en atlet i pros pour fini sa lakours, i fer bokou plis zefor e i konsantre lo laliny finisyon. Pareyman, anmezir ki nou ariv ver lafen nou lakours Kretyen, nou konsantre lo bann zoli promes pour lavenir e fer tou sa ki nou kapab pour fini nou lakours. Ki mannyer nou kapab kontinyen andire dan sa lakours? Dan sa lot lartik, nou pou vwar kwa ki devret premye dan nou lavi e ki mannyer nou kapab “verifye sa ki pli enportan.”​—Fili. 1:9, 10.