1. Ki Zeova in donn son bann serviter fidel?

AVEK lanmour, Zeova in permet tou son bann serviter fidel pour form parti son kongregasyon. Menm si nou annan en rol diferan dan kongregasyon, nou tou nou presye e nou bezwen kanmarad. Zapot Pol i ed nou konpran sa leson enportan. Ki mannyer?

2. Dapre Efezyen 4:16, akoz nou bezwen apresye kanmarad e travay ansanm?

² Dan verse tenm pour sa lartik, Pol i montre klerman ki personn antre nou pa kapab get en lot serviter Zeova e dir: “Mon pa bezwen ou.” (1 Kor. 12:21) Si nou anvi ki i annan lape dan kongregasyon, nou devret apresye kanmarad e travay ansanm. (Lir Efezyen 4:16.) Ler nou travay ansanm dan linite, tou dimoun pou santi ki lezot i kontan zot e kongregasyon pou vin pli for.

3. Ki nou pou diskite dan sa lartik?

³ Ki serten fason nou kapab demontre respe pour bann frer ek ser dan kongregasyon? Dan sa lartik, nou pou vwar ki mannyer bann ansyen i kapab demontre respe pour lezot ansyen. Apre, nou pou vwar ki mannyer nou tou nou kapab montre ki nou apresye nou bann frer ek ser selibater. Finalman, nou pou aprann ki mannyer nou kapab demontre respe pour bann ki petet pa kapab koz byen nou langaz.

4. Ki konsey Pol i donnen dan Romen 12:10 ki bann ansyen i devret swiv?

⁴ Tou ansyen dan kongregasyon i ganny apwente par lespri sen Zeova. Me zot annan diferan abilite. (1 Kor. 12:17, 18) I kapab ki serten fek vin ansyen alor zot napa sa menm kantite leksperyans ki lezot ansyen i annan. Petet i annan ki pa kapab fer bokou akoz zot laz oubyen zot annan bann problenm lasante. Kantmenm sa, en ansyen pa devret krwar ki en lot ansyen pa itil. I pou konmsi sa ansyen pe dir: “Mon pa bezwen ou.” O kontrer, tou ansyen i devret swiv sa konsey ki Pol i donnen dan Romen 12:10.​—Lir.

5. Ki mannyer en ansyen i demontre respe pour lezot ansyen e akoz i enportan pour zot fer sa?

⁵ En ansyen i demontre respe pour lezot ansyen ler i ekout zot atantivman. Zot fer sa sirtou ler konsey ansyen i zwenn pour koz lo bann keksoz vreman enportan konsernan zot kongregasyon. Akoz? Remark sa ki Latour Veyer le 1 Oktob 1988 an Angle i dir: “Bann ansyen pou rekonnet ki Zezi i kapab servi lespri sen pour ed nenport ansyen dan sa kongregasyon pour rapel en prensip Labib ki pou ed konsey ansyen konnen ki pour fer dan en sityasyon oubyen pour pran en desizyon enportan. (Akt 15:6-15) Lespri sen pa ed zis en ansyen dan kongregasyon me i ed zot tou.”

6. Kwa ki ed bann ansyen pour travay ansanm dan linite e ki byenfe kongregasyon i gannyen?

⁶ En ansyen ki demontre respe pour lezot ansyen, pa toultan esey koz premye dan renyon ansyen. I pa esey koz tou li menm e i pa mazinen ki son lopinyon i toultan byen. O kontrer, avek limilite i dir sa ki i panse e i ekout byen lopinyon lezot ansyen. Pli enportan, i pare pour koz lo bann prensip Labib e i swiv direksyon “lesklav fidel e pridan.” (Mat. 24:45-47) Anmezir ki bann ansyen i diskit lo bann zafer kongregasyon, zot demontre lanmour ek respe pour kanmarad. Sa pou fer  ki zot ganny led lespri sen Zeova ki pou gid zot pour pran bann desizyon ki pou ranforsi kongregasyon.​—Zak 3:17, 18.

7. Ki mannyer Zezi ti konsider bann selibater?

⁷ Ozordi, dan bann kongregasyon i annan bann koup marye ek bann fanmir. I osi annan plizyer frer ek ser selibater. Ki mannyer nou devret vwar sa bann frer ek ser selibater? Annou vwar ki mannyer Zezi i konsider bann selibater. Ler Zezi ti lo later, i pa ti marye. I ti reste selibater e i ti servi son letan pour konsantre lo son servis. Zezi pa ti zanmen ansennyen ki i ti neseser pour en Kretyen marye oubyen pour li reste selibater. Par kont, i ti dir ki serten Kretyen ti pou swazir pour pa marye. (Mat. 19:11, 12; vwar not letid dan nwtsty dan Matye 19:12) Zezi ti annan respe pour bann selibater. I pa ti krwar ki bann selibater ti pli enferyer oubyen ki i ti annan en keksoz mal avek zot.

8. Dapre 1 Korentyen 7:7-9, ki Pol ti ankouraz bann Kretyen pour reflesir lo la?

⁸ Parey Zezi, zapot Pol ti reste selibater pandan son minister. Pol pa ti zanmen ansennyen ki i ti mal pour en Kretyen marye. I ti rekonnet ki sa ti en desizyon personnel. Kantmenm sa, Pol ti ankouraz bann Kretyen ki pa marye pour reflesir lo si zot kapab kontinyen servi Zeova konman selibater. (Lir 1 Korentyen 7:7-9.) Nou asire ki Pol pa ti krwar ki bann Kretyen selibater ti bann dimoun enferyer. Anfet, i ti swazir Timote, en zenn frer selibater, pour fer bann travay enportan. * (Fili. 2:19-22) Alor, i ti pou mal pour gete si en frer in marye oubyen i selibater pour deside si i kalifye pour en responsabilite dan kongregasyon.​—1 Kor. 7:32-35, 38.

9. Ki nou kapab dir konsernan maryaz e konsernan reste selibater?

⁹ Zezi ek Pol pa ti ansennyen ki bann Kretyen i devret marye oubyen ki zot devret reste selibater. Alor, ki nou kapab dir konsernan maryaz e konsernan reste selibater? Latour Veyer le 1 Oktob 2012 an Angle, i dir: “Anfet, tou le de [maryaz ek selibater] i kapab ganny vwar konman en kado sorti kot Bondye. . . . Zeova pa krwar ki bann dimoun selibater i devret onte oubyen sagren akoz zot pa marye.”  Alor, nou bezwen demontre respe pour nou bann frer ek ser selibater dan kongregasyon.

10. Ki mannyer nou kapab demontre respe pour nou bann frer ek ser selibater?

¹⁰ Ki mannyer nou kapab demontre respe pour santiman e sirkonstans nou bann frer ek ser selibater? Nou devret rapel ki serten frer ek ser in deside pour pa marye. Lezot Kretyen selibater ti a kontan marye me zot pa ankor zwenn sa dimoun ki zot ti a kontan marye avek. I kapab ki i annan lezot ankor ki’n perdi zot konzwen dan lanmor. Nenport rezon ki en Kretyen i annan, eski i byen pour lezot dan kongregasyon demann en Kretyen selibater akoz i pa ankor marye oubyen pour ofer pour ed li trouv en konzwen? Byensir, serten Kretyen selibater i kapab demann lezot led pour trouv en konzwen. Me si en frer oubyen ser selibater pa’n demann led, ki mannyer i kapab santi si en dimoun i ofer pour ed li trouv en konzwen? (1 Tesa. 4:11; 1 Tim. 5:13) Annou vwar sa ki serten frer ek ser selibater in dir lo sa size.

11-12. Kwa ki kapab dekouraz bann selibater?

¹¹ En sirveyan rezyonal ki selibater e ki fer byen son servis, i santi ki konman en selibater i ganny bokou byenfe. Me i dir ki i kapab dekourazan ler serten frer ek ser i esey ede e zot demann li: “Akoz ou pa ankor marye?” En lot frer selibater ki servi kot en Biro Brans Temwen Zeova i dir: “Parfwa, bann frer ek ser i fer mwan santi ki bann selibater i fer lapenn. Sa i kapab fer li paret ki lavi selibater i en problenm olye en kado.”

¹² En ser selibater ki servi dan Betel i dir: “Serten frer ek ser i panse ki tou selibater pe rod en konzwen oubyen ki sak fwa i annan en rankont sa i en loportinite pour zot trouv en konzwen. En zour mon ti al fer en travay pour Betel dan en lot rezyon. Mon ti ariv laba sa zour swar ki i ti annan renyon. Sa ser kot mon ti pe reste ti dir mwan ki i annan de frer ki menm laz avek mwan dan sa kongregasyon. I ti asir mwan ki i pa ti pe esey ed mwan trouv en konzwen. Me zis konman nou ti antre dan Lasal Rwayonm, i ti anmenn mwan kot sa de frer. Nou tou le trwa nou ti anbarase.”

13. Ki legzanp ki ti ankouraz en ser selibater?

¹³ En lot ser ki servi dan Betel i dir: “Mon konn bann selibater pli aze ki pionye. Zot byen rezonnab, annan bann bon lobzektif e zot pare pour ed lezot. Sa bann selibater i zwaye e zot en gran led pour kongregasyon. Zot annan en bon pwennvi lo lavi selibater. Zot pa krwar ki zot pli siperyer ki lezot akoz zot selibater oubyen ki zot pa kapab ere akoz zot pa’n marye e zot napa zanfan.” I gou pour dan bann kongregasyon kot bann frer ek ser i annan respe e apresye kanmarad. Dan en kongregasyon koumsa, ou konnen ki ou bann frer ek ser pa zalou ou oubyen santi ki ou fer lapenn, zot pa inyor ou e zot pa krwar ki ou en pli bon dimoun ki zot. Ou konnen ki zot kontan ou.

14. Ki mannyer nou kapab montre ki nou annan respe pour bann selibater?

¹⁴ Nou bann frer ek ser selibater pou vreman kontan si nou apresye zot pour zot bann zoli kalite e pa pran lapenn pour zot akoz zot selibater. Olye pran lapenn pour zot, nou devret apresye zot fidelite. Sa pou fer ki nou bann fer ek ser selibater pa pou zanmen santi ki nou pe dir avek zot: “Mon pa bezwen ou.” (1 Kor. 12:21) O kontrer, zot pou konnen ki nou annan  respe pour zot e ki nou apresye ki zot la, dan kongregasyon.

15. Ki sanzman serten in fer pour zot kapab fer plis dan predikasyon?

¹⁵ Dan sa bann dernyen lannen, bokou proklanmater in fer li en lobzektif pour aprann en lot langaz pour zot kapab fer plis dan predikasyon. Pour kapab fer sa, zot in bezwen fer serten sanzman. Sa bann frer ek ser in kit zot kongregasyon, pour al servi dan en kongregasyon ki koz en lot langaz kot i annan bezwen pour plis proklanmater. (Akt 16:9) Sa i en desizyon ki sa bann Kretyen in fer pour zot kapab servi Zeova plis. Menm si i kapab pran plizyer lannen pour zot kapab koz sa langaz byen, zot ed kongregasyon dan plizyer fason. Zot bann zoli kalite ek zot leksperyans i ranforsi bann frer ek ser dan kongregasyon. Nou vreman apresye sa bann frer ek ser ki’n fer bokou sakrifis!

16. Ki mannyer bann ansyen i deside si en frer i kalifye pour vin en ansyen oubyen en serviter kongregasyon?

¹⁶ Bann ansyen pa devret deside ki en frer pa kapab vin ansyen oubyen serviter kongregasyon zis akoz i pa konn koz langaz ki zot koze dan sa kongregasyon. Zot pou servi sa ki Labib i dir pour deside si en frer i kalifye pour vin en ansyen oubyen serviter kongregasyon. Zot desizyon pa pou baze lo si i konn koz byen langaz sa kongregasyon.​—1 Tim. 3:1-10, 12, 13; Tit 1:5-9.

17. Ki bann kestyon serten fanmir i bezwen reflesir lo la ler zot al reste dan en lot pei?

¹⁷ Serten fanmir Kretyen in al reste dan en lot pei akoz i annan problenm dan zot prop pei oubyen pour zot al rod en travay. Dan serten ka, bann zanfan i al lekol dan bann lekol ki koz langaz prensipal sa nouvo pei. I kapab ki sa bann paran pou bezwen aprann langaz prensipal sa pei pour zot kapab trouv en travay. Me si i annan en kongregasyon oubyen group dan zot langaz maternel? Ki kongregasyon sa fanmir pou asosye avek? Eski zot devret al dan en kongregasyon ki koz langaz prensipal sa pei oubyen dan en kongregasyon ki koz zot langaz maternel?

18. Anliny avek Galat 6:5, ki mannyer nou kapab demontre respe pour desizyon en sef fanmir?

¹⁸ En sef fanmir i bezwen deside ki kongregasyon son fanmir pou asosye avek. Vi ki sa i en desizyon personnel, i bezwen deside kwa ki pli bon pour son fanmir. (Lir Galat 6:5.) Nou bezwen respekte desizyon sa sef fanmir. Nenport kwa ki i deside, annou aksepte son desizyon e demontre lanmour anver son fanmir anmezir ki nou akeyir zot dan kongregasyon.​—Rom. 15:7.

19. Ki bann sef fanmir i devret reflesir byen lo la?

 ¹⁹ I kapab ki en fanmir i dan en kongregasyon ki koz langaz sa paran me bann zanfan pa vreman koz sa langaz. Si kongregasyon ki sa fanmir i ladan i dan en landrwa kot bann dimoun i koz langaz prensipal sa pei, sa i kapab fer li difisil pour bann zanfan konpran renyon e zot pa pou progrese spirityelman. Akoz? Parski i kapab ki sa bann zanfan i dan en lekol ki koz langaz prensipal sa pei e pa langaz zot paran. Si sa i arive, bann sef fanmir i devret reflesir byen e priye pour ganny lasazes pour zot kapab deside ki zot pou fer pour ed zot zanfan vin pli pros avek Zeova ek son pep. Paran pou bezwen ansenny zot zanfan pour koz byen zot langaz oubyen zot pou bezwen al dan en lot kongregasyon ki koz en langaz ki zot zanfan i konpran byen. Nenport desizyon ki sa sef fanmir i fer, sa kongregasyon ki i swazir i bezwen fer sa fanmir santi ki zot ganny respekte e zot kontan ki zot la, dan kongregasyon.

20. Ki mannyer nou kapab demontre respe pour nou bann frer ek ser ki pe aprann en nouvo langaz?

²⁰ Parey nou’n diskite dan sa bann paragraf avan, i pou toultan annan bann frer ek ser dan plizyer kongregasyon ki pe fer zefor pour aprann en nouvo langaz. I kapab difisil pour zot eksprim zot santiman. Me si nou pa konsantre lo lafason ki zot koz sa nouvo langaz, nou pou vwar ki zot kontan Zeova e zot anvi servi li. Ler nou vwar bann zoli kalite ki sa bann frer ek ser i annan, nou pou vreman apresye e respekte zot. Nou pa pou dir “Mon pa bezwen ou” zis akoz zot pa koz byen nou langaz.

21-22. Ki privilez ekstraordiner nou annan?

²¹ Nou vreman rekonesan anver Zeova akoz in donn nou tou en privilez ekstraordiner, setadir ki nou annan en plas dan son kongregasyon. Ki swa nou en frer oubyen ser, selibater oubyen marye, zenn oubyen aze ouswa nou koz byen en langaz oubyen nou pa tro konnen, nou tou nou presye pour Zeova e pour kanmarad.​—Rom. 12:4, 5; Kol. 3:10, 11.

²² Annou kontinyen aplik bann zoli leson ki nou’n aprann dan sa legzanp ki Pol ti servi konsernan lekor imen. Sa pou ed nou pour konnen ki nou kapab fer pour ankouraz nou bann frer ek ser. I pou osi ed nou pour toultan kontan e respekte zot.