1. Akoz Zeova ti konmans kree?

I TI annan en letan ki Zeova ti li tousel me sa pa ti fer li sagren. Zeova pa bezwen ki personn i avek li pour li ere. Kantmenm sa, Bondye ti anvi ki lezot i apresye lavi. Son lanmour ti pous li pour konmans kree.​—Ps. 36:9; 1 Zan 4:19.

2. Ki mannyer Zezi ek bann lanz ti santi ler Zeova ti kree lezot keksoz?

² Premyerman, Zeova ti kree son Garson, Zezi. Apre, Zeova ti kree “tou lezot keksoz,” enkli bann lanz, avek led son Garson. (Kol. 1:16) Zezi ti vreman kontan pour travay avek son Papa. (Prov. 8:30, NWT) Bann lanz osi ti kontan. Bann lanz ti vwar ler Zeova ti pe fer lesyel ek later avek led Zezi. Ki bann lanz ti fer? Zot ti “kriye avek lazwa” ler later ti ganny kree. San dout, zot ti kontinyen loue Bondye ler zot ti vwar tou sa ki i ti kree, espesyalman bann imen. (Zob 38:7; Prov. 8:31, not dan NWT) Atraver bann keksoz ki Zeova in kree, nou kapab vwar son lanmour ek lasazes.​—Ps. 104:24; Rom. 1:20.

3. Dapre 1 Korentyen 15:21, 22, kwa ki posib gras a sakrifis Zezi?

³ Zeova ti anvi ki bann imen i viv pour touzour lo sa zoli plannet ki i’n kree. Me Adan ek Ev ti fer pese kont Zeova e zot ti nepli kapab viv pour touzour. Avek letan, Adan, Ev ansanm avek tou zot desandans ti pou mor. (Rom. 5:12) Ki Zeova ti fer? Deswit, i ti dir ki mannyer i pou sov limanite. (Zen. 3:15) Zeova ti pou donn son Garson konman en sakrifis pour sov bann desandans Adan ek Ev dan pese ek lanmor. Koumsa, tou bann ki swazir pour servi Zeova, i annan sa posibilite pour viv pour touzour.​—Zan 3:16; Rom. 6:23; lir 1 Korentyen 15:21, 22.

4. Ki kestyon nou pou reponn dan sa lartik?

 ⁴ I annan en kantite kestyon nou kapab demande lo promes Bondye konsernan rezireksyon. Par egzanp, nou kapab demande: Petet ki mannyer rezireksyon pou arive? Eski nou pou kapab rekonnet nou bann defen ler zot ganny resisite? Dan ki fason rezireksyon pou fer nou ere? Osi, ki sa promes konsernan rezireksyon i ansenny nou konsernan lanmour, lasazes ek pasyans Zeova? Aprezan, annou diskit lo sak sa bann kestyon.

5. Akoz i fer sans pour krwar ki dimoun pa pou ganny resisite an menm tan?

⁵ Nou kapab ekspekte ki ler Zeova i servi Zezi pour resisit plizyer milyon dimoun, sa bann dimoun pa pou ganny resisite an menm tan. Akoz non? Parski si i annan en kantite dimoun en sel kou lo later, i tre probab ki sa pou fer en kantite dezord. Zeova pa zanmen fer keksoz dan en fason dezord. I konnen ki keksoz i bezwen ganny fer dan en fason annord pour ki i annan lape. (1 Kor. 14:33) Zeova ti demontre lasazes ek pasyans ler i ti travay ansanm avek Zezi pour prepar later pour bann imen reste lo la. Pandan son Renny Mil an, Zezi pou osi demontre lasazes ek pasyans ler i pou travay ansanm avek bann ki pou sirviv Armagedon pour prepar later pour bann ki pou resisite.

6. Dapre Akt 24:15, lekel ki Zeova pou resisite?

⁶ En keksoz pli enportan pou arive. Bann ki sirviv Armagedon pou ansenny bann ki resisite konsernan Rwayonm Bondye e sa ki Zeova i demann bann imen pour fer. Akoz? Parski laplipar bann ki pou resisite pou form parti sa group ki Labib i apel bann “move” dimoun. (Lir Akt 24:15.) Zot pou bezwen fer bann  sanzman dan zot lavi pour zot kapab ganny benediksyon ki sakrifis Zezi i anmennen. Zis mazin sa kantite travay ki pou bezwen ganny fer pour ansenny plizyer milyon dimoun ki pa konn nanryen konsernan Zeova. Eski letid Labib pou ganny fer avek sak dimoun endividyelman, parey nou fer ozordi? Eski bann ki fek ganny resisite pou ganny mete dan bann kongregasyon e ganny formen pour zot osi ansenny bann ki pou resisite apre zot? Nou pou bezwen espere pour nou konnen. Par kont, nou konnen ki a lafen Renny Mil an Kris, “konnesans [Zeova] pou ranpli later.” (Iza. 11:9) Nou pou annan en kantite bon keksoz pour nou fer pandan sa mil an.

7. Akoz pep Bondye pou konpran santiman bann ki’n resisite?

⁷ Pandan Renny Mil an Kris, tou bann serviter Zeova pou bezwen kontinyen fer bann sanzman pour fer plezir Zeova. Koumsa, zot pou vreman kapab konpran santiman bann dimoun ki pe resisite anmezir ki zot pe ed sa bann dimoun pour lalit avek bann move tandans e pour viv dapre bann standar Zeova. (1 Pyer 3:8) San dout, bann ki ganny resisite pou vwar ki bann serviter Zeova i annan limilite e ki zot pe ‘kontinyen travay dir pour zot ganny sove.’ Sa pou fer bann ki ganny resisite anvi ador Zeova ansanm avek sa bann serviter.​—Fili. 2:12.

8. Akoz nou kapab ekspekte ki nou pou rekonnet nou bann manm fanmir ek zanmi ki resisite?

⁸ I annan plizyer rezon akoz nou krwar ki petet nou pou kapab rekonnet bann ki’n resisite. Si nou get lafason ki Zeova ti resisit dimoun dan lepase, nou kapab ekspekte ki Zeova pou resisit dimoun parey zot ti ete avek menm fason koze e menm fason panse. Rapel ki Zezi ti konpar lanmor avek ler en dimoun pe dormi e i ti konpar rezireksyon avek ler en dimoun i leve dan son sonmey. (Mat. 9:18, 24; Zan 11:11-13) Ler en dimoun i leve dan son sonmey, i ankor parey i ti ete e i ankor annan bann menm souvenir ki i ti annan avan i dormi. Annou vwar sa ki ti arive avek Lazar. I ti’n mor pour plis ki kat zour e son lekor ti’n konmans pouri. Malgre sa, ler Zezi ti resisit li, deswit son bann ser ti rekonnet li e Lazar ti rapel zot.​—Zan 11:38-44; 12:1, 2.

9. Akoz bann ki resisite pa pou ganny resisite avek en lespri ek lekor parfe?

⁹ Zeova in promet ki dan Paradi personn pa pou dir: “Mon malad!” (Iza. 33:24; Rom. 6:7) Alor, bann ki resisite pou annan en lekor an bonn sante. Par kont, zot pa pou vin parfe deswit. Si non, zot fanmir ek zanmi pa pou rekonnet zot. I paret ki pandan Renny Mil an Kris, bann imen pou ptitapti vin parfe. A lafen sa mil an, Zezi pou redonn son Papa sa Rwayonm. Sa letan, sa Rwayonm pou’n fini fer tou sa ki Zeova i anvi i fer e sa i enkli fer bann imen vin parfe.​—1 Kor. 15:24-28; Rev. 20:1-3.

10. Ki mannyer nou pou santi ler nou bann defen i resisite?

¹⁰ Imazinen ki mannyer i pou ete pour akeyir nou bann defen. Eski sa lazwa ki ou pou santi pou fer ou riye oubyen plere? Eski ou pou sitan zwaye ki ou pou sant bann kantik pour loue Zeova? Nou  kapab asire ki nou leker pou deborde avek lanmour pour Zeova ek Zezi parski zot in fer li posib pour nou bann defen reviv ankor.

11. Dapre sa ki Zezi ti dir dan Zan 5:28, 29, ki pou arive avek bann ki viv dapre bann standar Bondye?

¹¹ Imazin sa lazwa ki bann ki’n resisite pou santi anmezir ki zot fer bann sanzman pour obei Bondye e viv dapre Son bann standar. Bann ki fer sa bann sanzman pou ganny lavi eternel. De lot kote, Bondye pa pou permet bann ki refize sanze pour fer dezord dan Paradi.​—Iza. 65:20; lir Zan 5:28, 29.

12. Ki mannyer bann ki pou lo later pou ganny benediksyon Zeova?

¹² Ler Rwayonm Bondye pou diriz later, pep Bondye pou vwar ki sa parol dan Proverb 10:22 (NWT) i vre. Sa verse i dir: “I benediksyon Zeova ki fer en dimoun ris e i pa azout okenn douler avek.” Avek led lespri sen Zeova, pep Bondye pou vin ris spirityelman, setadir zot pou vin deplizanpli parey Kris e avek letan, zot pou vin parfe. (Zan 13:15-17; Efe. 4:23, 24) Osi, de zour an zour zot lekor pou vin pli for e zot pou vin bann pli bon dimoun. Pa lavi pou gou sa letan! (Zob 33:25) Alor, ler ou reflesir lo rezireksyon, ki mannyer sa i kapab ed ou la konmela?

13. Dapre Psonm 139:1-4, ki degre Zeova i konn nou e ki mannyer rezireksyon pou montre sa?

¹³ Parey nou’n diskite pli boner, ler Zeova i resisit bann dimoun, i pou resisit zot avek zot bann menm souvenir e avek personnalite ki zot ti annan avan zot mor. Reflesir lo ki sa i montre. Zeova i sitan kontan ou ki i gard tou sa ki ou mazinen, santi, dir e fer dan son memwar. Koumsa, i kapab fasilman resisit ou avek ou bann menm souvenir, latitid e lafason ki ou ti ete avan. Lerwa David ti konnen ki Zeova i konn sakenn ant nou byen. (Lir Psonm 139:1-4.) Ki mannyer nou santi ler nou konpran ki degre Zeova i konn nou?

14. Ki mannyer nou devret santi ler nou mazin lo ki degre Zeova i konn nou?

¹⁴ Ler nou mazin lo ki degre Zeova i konn nou, nou pa devret enkyet. Akoz non? Rapel ki Zeova i vreman kontan nou. Nou tou nou presye pour li. I mazin tou sa ki nou’n pas ladan. Pa sa i reasir nou! Nou pa devret zanmen santi ki nou tousel. Zeova i avek nou sak minit dan nou lazournen e i pe rode ki mannyer i kapab ed nou.​—2 Kron. 16:9.

15. Ki mannyer sa lespwar rezireksyon i montre ki Zeova i vreman saz?

¹⁵ En dimoun ki per pour mor, i kapab ganny forse pour fer bann keksoz ki normalman i pa pou fer. Bann dimoun ki ganny kontrole par Satan i servi sa lafreyer pour fors sa dimoun pour trai son zanmi oubyen pour fer en keksoz ki i konnen i mal. Me zot pa kapab fer sa avek nou, parski nou konnen ki si nou bann lennmi i touy nou, Zeova pou redonn nou lavi. (Rev. 2:10) Nou konvenki ki napa nanryen ki kapab fer nou aret servi Zeova. (Rom. 8:35-39) Pa sa lespwar rezireksyon i montre ki Zeova i vreman saz! Nou lespwar i fer nou pa per si nou bann lennmi i menase pour touy nou ler nou pa fer sa ki zot dir. Osi, i donn nou sa kouraz pour reste fidel avek Zeova.

16. Ki kestyon ou bezwen demann ou lekor e ki mannyer ou larepons i ed ou konnen ki degre ou annan konfyans dan Zeova?

 ¹⁶ Si bann lennmi Zeova i menase pour touy ou, eski ou pou annan konfyans ki Zeova pou resisit ou? Ki mannyer ou kapab fer sir ki ou annan konfyans dan Zeova si sa i arive? En fason ki ou kapab fer sa, i par demann ou lekor: ‘Eski bann pti desizyon ki mon fer toulezour i montre ki mon annan konfyans dan Zeova?’ (Lik 16:10) En lot kestyon ou kapab demande i: ‘Eski lafason ki mon servi mon letan ek larzan i montre ki mon annan konfyans ki Zeova pou pran swen avek mon bann bezwen materyel si mon met Rwayonm premye?’ (Mat. 6:31-33) Si ou larepons pour sa bann kestyon i wi, sa i montre ki ou annan konfyans dan Zeova e ou pou pare pour fer fas avek nenport difikilte ki ou pou rankontre.​—Prov. 3:5, 6.

17. (a) Ki mannyer rezireksyon i montre ki Zeova i annan pasyans? (b) Ki mannyer nou kapab montre ki nou apresye pasyans Zeova?

¹⁷ Zeova in fini deside kan ki i pou detri sa move lemonn. (Mat. 24:36) I pa pou enpasyan e azir avan son ler. I vreman anvi resisit bann mor me i annan pasyans. (Zob 14:14, 15, NWT) I pe esper sa letan kot i pou resisit bann mor. (Zan 5:28) Nou annan bon rezon pour apresye pasyans Zeova. Zis mazin sa: Vi ki Zeova i annan pasyans, en kantite dimoun in ganny letan “repantir.” Sa i enkli nou osi. (2 Pyer 3:9) Zeova i anvi lamazorite dimoun i ganny sa loportinite pour viv pour touzour. Alor, annou montre ki nou apresye pasyans Zeova. Ki mannyer nou kapab fer sa? Par fer nou mye pour rod bann ki “annan sa bon kondisyon leker pour ganny lavi eternel” e pour ed zot kontan Zeova e servi li. (Akt 13:48) Koumsa, zot osi zot kapab apresye pasyans Zeova, zis parey nou.

18. Akoz nou devret demontre pasyans anver lezot?

¹⁸ Zeova pou demontre pasyans e i pou espere ziska ki nou vin parfe a lafen sa mil an. Antretan, i pare pour pardonn nou bann pese. Alors, nou devret swiv son legzanp par konsantre lo bann bon kalite ki lezot i annan e demontre pasyans anver zot. Annou vwar legzanp en ser ki son msye ti konmans ganny bann  anxiety attacks e sa ti fer son msye aret al renyon. Sa ser i dir: “Sa ti vreman difisil pour mwan. En sel kou keksoz ti sanze e nou ti nepli kapab fer bann keksoz ki nou ti anvi fer.” Kantmenm sa, i ti kontinyen demontre pasyans anver son msye. I ti depan lo Zeova e i pa ti zanmen abandonnen. Zis parey Zeova, i ti konsantre lo bann bon kalite ki son msye ti annan. Sa ser i dir: “Mon msye i annan bann zoli kalite e i pe fer bokou zefor pour ptitapti sirmont son maladi.” I vreman enportan pour nou demontre pasyans anver nou fanmir oubyen bann frer ek ser ki pe esey sirmont zot bann problenm.

19. Ki nou devret determinen pour fer?

¹⁹ Zezi ek bann lanz ti vreman kontan ler later ti ganny kree. Zis mazinen ki mannyer zot pou vreman kontan ler later pou ranpli avek dimoun parfe ki kontan Zeova e ki servi Li. Osi, zis mazinen ki mannyer bann ki pou al dan lesyel pou kontan ler zot vwar bann byenfe ki imen pe gannyen akoz zot bon travay. (Rev. 4:4, 9-11; 5:9, 10) Imazinen ki mannyer i pou ete ler maladi, sagrinasyon ek lanmor pou nepli egziste e nou pou nepli plere akoz soufrans. Sa letan, nou pou plere akoz nou dan lazwa. (Rev. 21:4) Ziska sa letan i arive, annou determinen pour swiv legzanp nou Papa ki kontan nou, ki saz e ki annan pasyans. Si ou fer sa, ou pou gard ou lazwa malgre nenport difikilte ki ou fer fas avek. (Zak 1:2-4) Pa nou vreman rekonesan ki Zeova in promet ki “dimoun bon konman move pou resisite”!​—Akt 24:15.