1. Dapre 1 Tesalonisyen 5:11, ki travay nou tou nou fer?

 ESKI ou kongregasyon in deza konstri oubyen fer renovasyon lo en Lasal Rwayonm? Si wi, i bezwen ki ou rapel premye fwa ki ou ti asiste renyon dan sa nouvo Lasal Rwayonm. Ou ti vreman rekonesan anver Zeova. I kapab ki ou ti sitan kontan ki ou ti pros pour plere e ou pa ti kapab sant sa premye kantik. Bann Lasal Rwayonm ki’n fek konstri i anmenn louanz pour Zeova. Me nou loue Zeova plis ler nou partisip dan en lot kalite travay konstriksyon. Sa travay i enplik en keksoz pli enportan ki konstri batiman. I enplik batir bann dimoun ki vin dan sa bann landrwa ladorasyon. I sanmenm ki zapot Pol ti pe mazinen ler i ti pe ekri sa bann parol ki dan 1 Tesalonisyen 5:11 ki verse tenm pour sa lartik.​—Lir.

2. Ki nou pou vwar dan sa lartik?

² Zapot Pol ti konnen ki mannyer i pou batir son bann frer ek ser. I ti konpran zot santiman. Dan sa lartik nou pou vwar ki mannyer i ti ed son bann frer ek ser (1) pour fer fas avek zot bann problenm, (2) pour viv anpe avek kanmarad e (3) pour ranforsi zot lafwa dan Zeova. Annou vwar ki mannyer nou kapab swiv son legzanp e batir nou bann frer ek ser.​—1 Kor. 11:1.

3. Ki bon pwennvi Pol ti annan?

³ Pol ti kontan son bann frer ek ser en kantite. I ti demontre konpasyon e i ti konpran santiman son bann frer ek ser ler zot ti pe fer fas avek problenm parski li menm li in fer fas avek en kantite problenm. En fwa, larzan Pol ti’n fini e i ti bezwen travay pour siport son lekor ek bann ki ti avek li. (Akt 20:34) Pol ti konn fer latant. Ler i ti ariv Korent,  i ti travay ansanm avek Akila ek Prisil pour fer latant. Me “tou le saba” i ti anons sa bon nouvel avek bann Zwif ek bann Grek. Pli tar ler Silas ek Timote ti arive, “Pol ti konmans pas tou son letan pe anons parol Bondye.” (Akt 18:2-5) Pol pa ti zanmen oubliy sa ki ti pli enportan pour li e sa ti pour servi Zeova. Pol ti travay dir dan predikasyon e i ti travay dir pour ganny sa ki i ti bezwen pour viv. Sa i fer ki i ti dan sa pli bon pozisyon pour ankouraz son bann frer ek ser. I ti fer zot rapel ki zot pa devret les problenm ek lefet ki zot bezwen pran swen avek zot fanmir, fer zot negliz “sa ki pli enportan” setadir bann keksoz ki nou fer pour ador Zeova.​—Fili. 1:10.

4. Ki mannyer Pol ek Timote ti ed zot bann frer ek ser pour andire ler zot ti ganny persekite?

⁴ Pa bokou letan apre ki kongregasyon Tesalonik ti’n ganny formen, bann dimoun dan sa lavil ti opoz sa bann Kretyen. Ler en group dimoun ki ti pe opoz bann Kretyen pa ti trouv Pol ek Silas, zot ti trenn “serten frer devan bann sef lavil” e zot ti kriye: “Sa bann zonm pe fer bann keksoz kont lalwa Sezar.” (Akt 17:6, 7) Sirman sa bann nouvo Kretyen ti per ler zot ti vwar ki bann dimoun dan sa lavil ti’n vir kont zot. Zot ti’n kapab perdi zot devouman dan zot servis pour Zeova me Pol pa ti anvi ki sa i arive. Menm si Pol ek Silas ti bezwen ale, zot ti fer sir ki sa nouvo kongregasyon i ganny pran byen swen avek. Pol ti dir bann Tesalonisyen: “Nou anvoy Timote nou frer . . . , pour fortifye e rekonfort zot an rapor avek zot lafwa, pour ki personn pa ganny dekouraze par sa bann leprev.” (1 Tesa. 3:2, 3) I tre probab ki Timote ti’n ganny persekite ler i ti dan lavil Lis, sa lavil kot i ti’n grandi. I’n vwar ki mannyer Pol ti ankouraz bann frer ek ser laba. I ti osi vwar lafason ki Zeova ti ed bann frer ek ser dan lavil Lis. Alor i ti kapab asir bann frer ek ser Tesalonik ki tou keksoz ti pou al byen pour zot.​—Akt 14:8, 19-22; Ebr. 12:2.

5. Ki byenfe en frer ki apel Bryant ti gannyen avek led ki en ansyen ti donn li?

⁵ Ki lezot fason Pol ti ankouraz son bann frer ek ser? Ler Pol ek Barnabas ti retourn dan lavil Lis, Ikonyonm ek Antyos, zot ti “apwent bann ansyen dan sak kongregasyon pour ed zot.” (Akt 14:21-23) San dout sa bann ansyen ti vin en sours rekonfor pour bann kongregasyon zis parey bann ansyen i fer ozordi. Remark sa ki en frer ki apel Bryant i dir: “Ler mon ti annan 15 an, mon papa ti kit lakour e mon manman ti ganny ekskli dan kongregasyon. Mon ti santi ki mon ti’n ganny abandonnen e sa ti fer mwan dekouraze.” Kwa ki ti ed Bryant pandan sa moman difisil? I dir: “En ansyen ki apel Tony ti koz avek mwan kot Lasal Rwayonm e dan lezot moman. I ti koz avek mwan lo bann serviter Zeova ki ti’n fer fas avek problenm me kantmenm sa zot zwaye. I ti montre mwan Psonm 27:10 e koz avek mwan lo Ezekya ki ti servi Zeova fidelman menm si son papa pa ti en bon legzanp.” Ki mannyer sa ti ed Bryant? Bryant i dir: “Sa lankourazman ki Tony ti donn mwan, ti fer mwan pran servis a plen tan e sa in fer mwan annan en lavi zwaye.” Bann ansyen, obzerv byen pour vwar lekel ki bezwen en parol lankourazman parey Bryant.​—Prov. 12:25.

6. Ki mannyer Pol ti servi legzanp bann serviter dan lepase pour ankouraz bann frer ek ser?

⁶ Pol ti fer bann Kretyen rapel ki dan lepase en “gran lafoul temwen” ti andir  zot bann problenm parski Zeova ti donn zot lafors. (Ebr. 12:1) Pol ti konpran ki legzanp bann serviter dan lepase ki’n andir bann problenm, ti pou donn bann frer ek ser kouraz e ed zot reste konsantre lo “lavil sa Bondye vivan.” (Ebr. 12:22) Sa i osi leka pour nou ozordi. Lekel parmi nou ki pa’n ganny ankouraze ler nou’n lir lo lafason ki Zeova in ed Gideonn, Barak, David, Samyel ek lezot ankor? (Ebr. 11:32-35) Petet ou’n osi ganny ankouraze avek legzanp bann frer ek ser dan nou letan. Bann frer kot Biro prensipal Temwen Zeova i souvan ganny let sorti kot bann frer ek ser ki’n ganny ankouraze apre ki zot in lir biografi bann serviter Zeova dan nou letan.

7. Ki ou aprann avek sa konsey ki Pol ti donnen dan Romen 14:19-21?

⁷ Nou batir nou bann frer ek ser ler nou dir e fer bann keksoz ki promot lape dan kongregasyon. Menm si nou annan diferan lopinyon, nou pa les sa kree divizyon parmi nou. Si en prensip pa pe ganny kase, nou pa ensiste lo nou drwa. Annou vwar en legzanp. Dan kongregasyon Ronm, i ti annan bann Kretyen ki ti Zwif e bann ki pa ti Zwif. Ler Lalwa Moiz ti ganny aboli, bann serviter Zeova pa ti bezwen obei lalwa konsernan serten kalite manze ki zot ti kapab manze. (Mark 7:19) Depi sa letan, serten Kretyen Zwif ti santi zot lib pour manz tou sort kalite manze. Me lezot Kretyen Zwif ti santi ki i mal pour zot manz sa bann manze. Sa ti kree divizyon dan kongregasyon. Pol ti montre ki degre i enportan pour gard lape ler i ti dir: “I pli byen pour pa manz lavyann, pa bwar diven ouswa fer okenn keksoz ki kapab fer ou frer tonbe.” (Lir Romen 14:19-21.) Dan sa fason, Pol ti ed son bann frer ek ser pour vwar ki bann problenm koumsa i annan en move lefe lo sak dimoun e lo kongregasyon antye. I ti osi pare pour sanz son prop latitid pour evite fer lezot tonbe. (1 Kor. 9:19-22) Nou osi nou kapab batir lezot e gard lape si nou evite ensiste lo nou drwa personnel.

8. Ki Pol ti fer ler i ti annan en dezakor ki ti kapab anpes annan lape dan kongregasyon?

⁸ Pol ti gard lape avek bann ki pa ti tonm dakor konsernan bann size enportan e sa ti en bon legzanp pour bann Kretyen. Par egzanp, serten dan kongregasyon dan premye syek ti dir ki bann Kretyen ki pa ti Zwif ti devret ganny sirkonsi. (Gal. 6:12) Petet zot ti fer sa pour ki bann Zwif pa kritik zot. Pol pa ti dakor avek sa pwennvi me olye ensiste ki zot aksepte son pwennvi, i ti demontre limilite e demann konsey avek bann zapot ek bann ansyen Zerizalenm. (Akt 15:1, 2) Sa ki Pol ti fer ti ed bann frer ek ser dan kongregasyon pour reste zwaye e anpe avek kanmarad.​—Akt 15:30, 31.

9. Ki mannyer nou kapab swiv legzanp Pol?

⁹ Si i annan en dezakor dan kongregasyon, nou promot lape par rod gidans avek bann ki Zeova in apwente pour pran swen avek kongregasyon. Souvandfwa, nou kapab ganny konsey dan bann piblikasyon baze lo Labib oubyen atraver bann lenstriksyon ki lorganizasyon Temwen Zeova i donnen. Si nou konsantre lo swiv sa bann lenstriksyon olye promot nou prop pwennvi, nou pou ede fer lape dan kongregasyon.

10. Kwa ankor ki Pol ti fer pour promot lape dan kongregasyon?

 ¹⁰ Pol ti promot lape par koz lo bann bon kalite ki son bann frer ek ser ti annan non pa lo zot bann move tre. Par egzanp, a lafen son let pour bann Romen, Pol ti mansyonn plizyer dimoun par zot non e dan laplipar ka i ti dir bann bon keksoz lo zot oubyen mansyonn en detay personnel lo zot. Nou kapab swiv legzanp Pol par mansyonn bann bon kalite ki nou bann frer ek ser i annan. Ler nou fer sa, nou ed nou bann frer ek ser pour vin pli pros avek kanmarad e nou ranforsi sa lanmour ki i annan dan kongregasyon.

11. Ki mannyer nou kapab fer lape ler i annan en problenm?

¹¹ Parfwa menm bann Kretyen matir i kapab ganny bann dezakor oubyen argimante antre zot. Sanmenm sa ki ti arive avek Pol ek son bon zanmi Barnabas. Sa de zonm pa ti tonm dakor lo si pour anmenn Mark avek zot lo zot vwayaz misyonner. Zot ti pran “en gran lakoler” e zot ti deside pour pa voyaz ansanm ankor. (Akt 15:37-39) Me Pol, Barnabas ek Mark ti fer lape avek kanmarad e zot ti montre ki pour zot i enportan ki i annan lape ek linite dan kongregasyon. Pli tar Pol ti koz an byen lo Barnabas ek Mark. (1 Kor. 9:6; Kol. 4:10) Nou osi nou bezwen rezourd nenport problenm ki nou kapab gannyen avek lezot dan kongregasyon e konsantre lo zot bon kalite. Dan sa fason nou pou promot lape ek linite dan kongregasyon.​—Efe. 4:3.

12. Ki serten problenm bann frer ek ser i fer fas avek?

¹² Nou batir nou bann frer ek ser ler nou ed zot ranforsi zot lafwa dan Zeova. Serten i ganny sikannen avek bann manm fanmir, par bann koleg travay oubyen avek bann kanmarad lekol. Lezot i annan problenm lasante oubyen zot pe vwar li difisil pour pardonn lezot akoz zot in ganny ofanse. I annan lezot ankor ki’n batize pour en kantite lannen e zot ankor pe esper lafen sa lemonn arive. Sa bann sityasyon i kapab fer li difisil pour bann Kretyen reste fidel. Bann Kretyen dan premye syek ti fer fas avek bann problenm en pe parey. Ki Pol ti fer pour ankouraz son bann frer ek ser?

13. Ki mannyer Pol ti ed bann ki ti ganny sikannen akoz zot krwayans?

¹³ Pol ti servi Lekritir pour ranforsi lafwa son bann frer ek ser. Par egzanp, i kapab ki bann Kretyen Zwif pa ti konnen ki pour dir avek bann manm fanmir ki ti Zwif ki ti dir ki larelizyon Zwif ti pli siperyer ki larelizyon Kretyen. San dout sa let ki Pol ti anvoy pour bann Ebre ti vreman ankouraz sa bann Kretyen. (Ebr. 1:5, 6; 2:2, 3; 9:24, 25) Sa ki Pol ti dir dan sa let, ti kapab ed zot pour konnen ki pour dir avek sa bann ki ti pe opoz zot. Nou osi nou kapab ed nou bann frer ek ser pour servi nou bann piblikasyon ki baze lo Labib pour eksplik zot krwayans. Si nou bann zenn i ganny sikannen kot lekol akoz zot krwar ki i annan en Kreater, nou kapab ed zot trouv lenformasyon dan brosir Was Life Created? ek The Origin of Life​—Five Questions Worth Asking. Sa de brosir pour ed zot montre akoz zot krwar ki i annan en Kreater.

14. Ki Pol ti fer menm si i ti okipe dan sa travay predikasyon?

¹⁴ Pol ti ankouraz son bann frer ek ser pour demontre lanmour par fer “bann bon aksyon.” (Ebr. 10:24) I ti ed son bann  frer ek ser par sa ki i ti dir e osi par sa ki i ti fer. Par egzanp, ler i ti annan en lafanmin Zide, Pol ti ede pour anmenn serten keksoz ki bann frer ek ser ti bezwen. (Akt 11:27-30) Menm si Pol ti okipe dan sa travay predikasyon, i ti toultan rod fason pour ed bann ki ti bezwen led pour ganny bann keksoz materyel. (Gal. 2:10) Par fer sa, i ti ed son bann frer ek ser pour annan plis konfyans ki Zeova ti pou pran swen avek zot. Ozordi ler nou pe donn nou letan, zefor ek abilite pour ede dan bann travay led sekour, nou osi nou pe ranforsi lafwa nou bann frer ek ser. Nou osi fer sa ler nou regilyerman fer kontribisyon pour sa travay predikasyon ki pe ganny fer partou dan lemonn. Dan sa bann fason, nou ed nou bann frer ek ser pour annan konfyans ki Zeova pa pou zanmen abandonn zot.

15-16. Ki mannyer nou devret azir anver bann ki zot lafwa in afebli?

¹⁵ Pol ti kontinyen ankouraz bann ki zot lafwa ti’n afebli. I ti demontre konpasyon anver zot. I ti koz dan en bon fason avek zot e dir zot bann bon keksoz. (Ebr. 6:9; 10:39) Par egzanp, dan sa let ki i ti ekri pour bann Ebre, souvan i ti servi sa mo “nou” pour montre ki i ti rekonnet ki li osi i ti bezwen aplik sa konsey ki i ti’n donnen. (Ebr. 2:1, 3) Parey Pol, nou kontinyen ankouraz bann ki zot lafwa in afebli. Nou ankouraz zot par demontre en lentere senser dan zot. Dan sa fason, nou montre ki nou kontan zot. Zis parey nou parol i kapab ankouraz lezot, lafason ki nou dir sa parol i kapab osi ankouraz zot.

¹⁶ Pol ti asir son bann frer ek ser ki Zeova i konn bann bon travay ki zot in fer. (Ebr. 10:32-34) Nou kapab fer en keksoz en pe parey ler nou pe ed en frer oubyen  en ser ki son lafwa in afebli. Nou kapab demann li pour rakont nou ki mannyer in vin dan laverite ouswa ankouraz li pour mazin bann moman kot in santi ki Zeova in ed li. Nou kapab servi sa loportinite pour asir li ki Zeova pa’n oubliy lafason ki i’n demontre lanmour pour li dan lepase e ki dan lavenir Zeova pa pou abandonn li. (Ebr. 6:10; 13:5, 6) Bann konversasyon koumsa, i kapab ankouraz nou bann frer ek ser pour kontinyen servi Zeova.

17. Ki bann abilite ki nou kapab kontinyen devlope?

¹⁷ Zis parey en mason i amelyor son abilite avek letan, nou osi nou kapab amelyore dan lafason ki nou batir kanmarad. Nou kapab ed lezot pour ganny kouraz pour andir zot bann problenm par koz avek zot lo legzanp bann serviter dan lepase ki’n andire. Nou kapab promot lape par koz lo bann bon kalite ki nou vwar dan lezot, gard lape ler i annan en dezakor e fer lape ler i annan en problenm. Nou kapab kontinyen batir lafwa nou bann frer ek ser par koz avek zot lo bann laverite ki dan Labib, par donn zot led ki zot bezwen e par siport bann ki zot lafwa in afebli.

18. Ki ou determinen pour fer?

¹⁸ Bann frer ek ser ki travay lo bann proze konstriksyon ki pour Temwen Zeova, i santi zot zwaye e satisfe pour sa ki zot in fer. Ler nou ede pour batir nou bann frer ek ser dan kongregasyon, nou osi nou kapab zwaye e satisfe. Konpare avek bann batiman ki ganny konstrir e ki avek letan i degrade, sa travay ki nou fer pour batir nou bann frer ek ser dan kongregasyon, i anmenn bon rezilta ki dire pour touzour. Alor annan determinen pour “kontinyen ankouraz kanmarad e batir kanmarad.”​—1 Tesa. 5:11.