1. Akoz Zezi ti demann Zeova pour vey lo son bann disip?

 SA ZOUR swar avan Zezi ti mor, i ti demann son Papa ki dan lesyel pour fer en keksoz spesyal. I ti demann Zeova pour vey lo son bann disip. (Zan 17:15, 20) Byensir, Zeova in toultan vey lo son pep, setadir i’n toultan pran swen avek zot e protez zot. Me Zezi ti konnen ki Satan ti pou persekit son bann disip plis ki oparavan. Zezi ti osi konnen ki zot ti pou bezwen led Zeova pour reziste bann latak Dyab.

2. Dapre Psonm 33:18-20, akoz nou pa devret per ler nou annan problenm?

² Sa lemonn ki pe ganny kontrole par Satan, i fer en kantite problenm pour bann vre Kretyen ozordi. Nou fer fas avek bann problenm ki kapab dekouraz nou e menm fer li difisil pour nou reste fidel avek Zeova. Me parey nou pou vwar dan sa lartik, i napa nanryen pour nou per. Zeova pe vey lo nou. Sa i vedir ki Zeova i vwar nou problenm e i anvi ed nou. Aprezan annou vwar de legzanp dan Labib ki montre ki mannyer Zeova i “vey lo tou bann ki annan en gran respe pour li.”​—Lir Psonm 33:18-20.

3. Kan ki nou kapab santi nou tousel?

³ Menm si nou annan en kantite frer ek ser dan kongregasyon, parfwa nou kapab santi nou tousel. Par egzanp, bann zenn i kapab santi zot tousel ler zot pe koz lo zot krwayans kot lekol oubyen ler zot al dan en nouvo kongregasyon. Serten parmi nou i kapab sagren oubyen dan depresyon e petet nou mazinen ki nou bezwen fer fas avek sa bann santiman nou tousel. I kapab ki nou ezite pour koz avek lezot konsernan sa ki nou pe santi parski nou per ki zot pa pou konpran nou. Parfwa nou kapab mazinen si lezot i vreman kontan nou. Nenport rezon ki nou santi nou tousel, sa santiman i kapab fer nou enkyet e santi ki nou  pa kapab fer nanryen. Zeova pa anvi ki nou santi koumsa. Akoz nou kapab dir sa?

4. Akoz profet Eliya ti dir: “Zis mon tousel ki reste”?

⁴ Annou vwar legzanp Eliya ki ti en zonm fidel. Pour plis ki 40 zour, Eliya ti pe taye pour sov son lavi parski Zezabel ti’n fer serman ki i ti pou touy li. (1 Rwa. 19:1-9) Ler i ti tousel dan en kavern, i ti dir Zeova: “Zis mon tousel ki reste.” (1 Rwa. 19:10) I ti annan lezot profet dan sa pei. Par egzanp, Obadya ti’n protez 100 profet pour anpes Zezabel touy zot. (1 Rwa. 18:7, 13) Me akoz Eliya ti santi li tousel? Eski i ti krwar ki sa bann profet ki Obadya ti’n proteze, zot tou zot ti’n fini mor? Eski petet i ti santi li tousel parski personn pa ti konmans servi Zeova apre ki Zeova ti’n montre ki i sa vre Bondye, lo Montanny Karmel? Eski i ti krwar ki personn pa ti konnen ki son bann lennmi ti pe esey touy li e ki personn pa ti enterese avek li? Sa resi pa dir nou akoz Eliya ti santi koumsa. Me nou konnen ki Zeova ti konpran akoz Eliya ti santi li tousel e i ti konnen ki mannyer pour ed Eliya.

5. Ki mannyer Zeova ti asir Eliya ki i pa ti tousel?

⁵ Zeova ti ed Eliya dan diferan fason. I ti ankouraz Eliya pour koze. De fwa, Zeova ti demann Eliya: “Ki ou pe fer la Eliya?” (1 Rwa. 19:9, 13) Tou le de fwa Zeova ti ekoute ler Eliya ti dir li sa ki i ti pe santi. Zeova ti reponn Eliya par montre li ki i la e ki i vreman pwisan e i ti osi asir Eliya ki en kantite lezot Izraelit ti ankor pe ador Li. (1 Rwa. 19:11, 12, 18) San dout Eliya ti santi li soulaze apre ki i ti’n dir Zeova ki mannyer i santi e apre ki Zeova ti’n reponn li. Zeova ti donn Eliya diferan responsabilite enportan. I ti demann li pour apwent Azael konman lerwa Siri, Zeou konman lerwa Izrael e Elisa konman en profet. (1 Rwa. 19:15, 16) Zeova ti donn Eliya sa bann responsabilite pour ed li konsantre lo bann keksoz pozitif. I ti osi donn Eliya en konpanyon ki apel Elisa. Ki ou kapab fer pour ganny led Zeova ler ou santi ou tousel?

6. Ki ou kapab priy lo la ler ou santi ou tousel? (Psonm 62:8)

 ⁶ Zeova i demann ou pour koz avek li dan lapriyer. I vwar bann problenm ki ou pe fer fas avek e i asir ou ki nenport ler i pou ekout ou bann lapriyer. (1 Tesa. 5:17) I kontan ekout lapriyer son bann serviter. (Prov. 15:8) Me ki ou kapab priy lo la ler ou santi ou tousel? Dir Zeova ki mannyer ou santi parey Eliya ti fer. (Lir Psonm 62:8.) Koz avek li konsernan ou bann problenm e lafason ki ou pe santi. Demann Zeova pour ed ou konnen ki ou pou fer ler ou santi ou tousel oubyen ler ou santi ou sagren. Par egzanp, si ou santi ou tousel e per ler ou pe donn en temwannyaz kot lekol, demann Zeova pour donn ou sa kouraz ki ou bezwen pour ou koze. Ou kapab osi demann li lasazes pour ou kapab eksplik ou krwayans dan en fason ki demontre respe pour lezot. (Lik 21:14, 15) Si ou dekouraze oubyen dan depresyon, demann Zeova pour ed ou koz avek en Kretyen matir konsernan ou bann santiman. Ou kapab demann Zeova pour ed sa dimoun ki ou pe koz avek pour li kapab konpran ki mannyer ou pe santi. Dir Zeova ki mannyer ou pe santi, vwar ki mannyer i reponn ou lapriyer e aksepte led lezot. Si ou fer sa, ou pa pou santi ou tro tousel.

7. Ki ou aprann avek leksperyans Mauricio?

⁷ Zeova in donn nou tou en travay enportan pour fer. Ou kapab asire ki i vwar e i apresye tou sa ki ou fer dan kongregasyon e dan predikasyon. (Ps. 110:3) Ki mannyer ler ou reste bizi dan sa travay, sa i ed ou ler ou santi ou tousel? Annou vwar legzanp en zenn frer ki apel Mauricio. b Pa bokou letan apre ki Mauricio ti’n batize, enn son bon zanmi ti konmans elwanye avek laverite. Mauricio i dir: “Ler mon ti vwar li kit Zeova, mon ti konmans dout mon lekor. Mon ti mazinen si mon ti pou kapab gard mon ve pour servi Zeova e reste dan fanmir Zeova. Mon ti santi mwan tousel e mon ti mazinen ki personn pa ti pou konpran ki mannyer mon ti pe santi.” Kwa ki ti ed Mauricio? Mauricio i dir: “Mon ti fer plis dan predikasyon. Sa ti ed mwan pour aret mazin zis mon lekor ek mon bann santiman. Ler mon ti travay avek lezot dan predikasyon, mon ti zwaye e mon pa ti santi mwan tro tousel.” Menm si nou pa pe kapab travay avek lezot dan predikasyon an personn, nou ganny ankouraze ler nou travay avek zot dan lezot form predikasyon parey ekri let ek predikasyon par telefonn. Kwa ankor ki ti ed Mauricio? I dir: “Mon ti osi fer plis  dan kongregasyon. Mon ti fer bokou zefor pour prepar e fer bann prezantasyon ki mon ti ganny demande pour fer pandan renyon. Sa bann prezantasyon ti fer mwan santi ki Zeova ek bann frer ek ser i apresye mwan.”

8. Ki lefe bann problenm i kapab annan lo nou?

⁸ Nou ekspekte ki nou pou ganny problenm dan bann dernyen zour. (2 Tim. 3:1) Me i kapab ki nou pa ekspekte ki serten problenm i arive avek nou oubyen nou sirprann avek sa moman ki en problenm i arive. Petet nou ganny problenm larzan san ekspekte, dokter i dir nou ki nou annan en maladi grav oubyen en dimoun ki nou kontan i mor. I kapab ki sa i fer nou enkyet e dekouraze, sirtou si nou pe fer fas avek en problenm apre lot oubyen nou annan diferan problenm an menm tan. Me gard antet ki Zeova pe vey lo nou e avek son led, nou kapab fer fas avek nou problenm.

9. Ki serten problenm Zob ti pas ladan?

⁹ Mazin lafason ki Zeova ti ed Zob. Zob ti en zonm fidel e i ti pas dan plizyer problenm dan en ptigin letan. Dan en zour, Zob ti ganny dir ki tou son zannimo ti’n ganny vole oubyen touye e ki son bann serviter ek zanfan ti’n ganny touye. (Zob 1:13-19) Pa bokou letan apre, Zob ti ganny en maladi ki ti fer li soufer en kantite e ki ti sanz son laparans. (Zob 2:7) Son sityasyon ti sitan grav ki Zob ti dir: “Mon’n degout mon lavi, mon anvi mor.”​—Zob 7:16.

10. Ki mannyer Zeova ti donn Zob sa ki i ti bezwen pour andir son bann problenm? (Vwar portre lo kouvertir.)

¹⁰ Zeova ti pe vey lo Zob. I ti kontan Zob. Alor i ti donn li sa ki i ti bezwen pour andir son bann problenm e reste fidel. Zeova ti koz avek Zob e fer li rapel ki I vreman saz e ki i pran swen avek tou sa ki I’n kree. I ti koz lo plizyer zannimo enpresyonan. (Zob 38:1, 2; 39:9, 13, 19, 27; 40:15; 41:1, 2) Zeova ti osi servi en zenn garson ki ti apel Eliou pour ankouraz e rekonfort Zob. Eliou ti asir Zob ki Zeova i toultan rekonpans son bann serviter ki andire. Me Zeova ti osi servi Eliou pour donn Zob serten konsey. Eliou ti fer Zob rapel ki nou vreman pti konpare avek Zeova ki Kreater liniver. Sa ti ed Zob pour aret mazin son prop lekor. (Zob 37:14) Zeova ti osi donn Zob en keksoz pour fer. I ti dir li priy pour son trwa zanmi ki ti’n fer pese. (Zob 42:8-10) Ki mannyer Zeova i ed nou ozordi ler nou fer fas avek problenm?

11. Ki mannyer Labib i rekonfort nou ler nou pe fer fas avek problenm?

¹¹ Zeova pa koz avek nou direkteman parey i ti fer avek Zob. Me i koz avek nou atraver son Parol, Labib. (Rom. 15:4) I rekonfort nou par donn nou en lespwar pour lavenir. Annou vwar serten verse dan Labib ki rekonfort nou ler nou fer fas avek problenm. Dan Labib, Zeova i asir nou ki napa nanryen, enkli nenport problenm ki “pou kapab anpes [li] . . . kontan nou.” (Rom. 8:38, 39) I osi asir nou ki “i pros avek tou sa ki apel li,” setadir bann ki koz avek li dan lapriyer. (Ps. 145:18) Zeova i dir nou ki si nou depan lo li, nou pou kapab andir nenport problenm e nou kapab zwaye menm si nou soufer. (1 Kor. 10:13; Zak 1:2, 12) Parol Bondye i osi fer nou rapel ki nou bann problenm i tanporer konpare avek lavi eternel ki Bondye i ofer nou. (2 Kor. 4:16-18) Zeova i asir nou ki i pou detri tou sa bann ki pe fer  nou annan sa bann problenm, setadir Satan ek tou bann ki fer bann move keksoz parey li. (Ps. 37:10) Eski ou’n aprann serten verse rekonfortan parker? Sa bann verse pou kapab ed ou fer fas avek bann problenm ki ou pou gannyen dan lavenir.

12. Ki Zeova i ekspekte nou fer pour nou ganny led avek son Parol?

¹² Zeova i ekspekte ki nou met letan dekote pour etidye Labib regilyerman e pour medit lo sa ki nou lir. Ler nou aplik sa ki nou aprann, nou lafwa pou vin pli for e nou pou vin pli pros avek nou Papa ki dan lesyel. Sa i fer nou annan lafors pour fer fas avek nenport problenm. Zeova i osi donn son lespri sen tou bann ki aplik sa ki dan son Parol. Lespri sen i kapab donn nou “lafors ki sorti kot Bondye ki pli pwisan ki nou prop lafors” e sa pou ed nou andir nenport problenm.​—2 Kor. 4:7-10.

13. Ki mannyer sa manze spirityel ki “sa lesklav fidel e pridan” i donn nou i ed nou fer fas avek nou problenm?

¹³ Avek led Zeova, “sa lesklav fidel e pridan” pe donn nou en kantite lartik, video ek lanmizik ki pe ed nou fer nou lafwa vin pli for e reste pros avek Zeova. (Mat. 24:45) Nou bezwen servi byen tou bann provizyon ki Zeova i donn nou. Pa bokou letan pase, en ser ki reste Leta-z-ini ti dir ki i vreman apresye tou bann manze spirityel ki nou gannyen. Sa ser ti dir: “Pandan sa 40 an ki mon pe servi Zeova, mon’n fer fas avek plizyer problenm ki’n fer li difisil pour mwan reste fidel avek Zeova.” Sa ser ti fer fas avek bann gro problenm. En drayver ki ti sou ti tap avek transpor son granpapa e touy li, son paran ti tonm malad e apre sa zot ti mor e de fwa, sa ser ti ganny kanser. Kwa ki’n ed li pour andire? I dir: “Zeova in toultan pran swen avek mwan. Sa manze spirityel ki Zeova i donn nou atraver sa lesklav fidel e pridan in ed mwan pour andire. Sa i fer mwan santi parey Zob ki ti dir: ‘Ziska mon lanmor, mon pou reste fidel!’”​—Zob 27:5.

14. Ki mannyer Zeova i servi nou bann frer ek ser pour siport nou ler nou dan problenm? (1 Tesalonisyen 4:9)

¹⁴ Zeova in ansenny son pep pour kontan e rekonfort kanmarad pandan bann moman difisil. (2 Kor. 1:3, 4; lir 1 Tesalonisyen 4:9.) Nou bann frer ek ser i swiv legzanp Eliou. Zot vreman anvi ed nou reste fidel ler nou pas dan problenm.  (Akt 14:22) Par egzanp, annou vwar ki mannyer bann frer ek ser dan kongregasyon Diane ti ankouraz li e ed li pour reste pros avek Zeova apre ki son msye ti ganny en maladi grav. Diane ti dir: “I ti difisil. Me pandan sa bann mwan, nou ti santi ki Zeova i kontan nou e i pe ed nou. Nou kongregasyon ti fer en kantite keksoz pour siport nou. Nou bann frer ek ser ti vizit nou, telefonn nou e anmay nou e tousala ti ed nou pour andire. Vi ki mon pa konn dray, zot ti fer sir ki mon ti al renyon ek predikasyon ler mon ti kapab.” Nou vreman kontan ki nou annan bann frer ek ser dan kongregasyon ki kontan nou!

15. Akoz nou asire ki nou kapab fer fas avek problenm?

¹⁵ Nou tou nou pou fer fas avek problenm. Me parey nou’n aprann, nou pa pou zanmen bezwen fer fas avek nou problenm nou tousel. Zeova i nou Papa ki kontan nou e i pou toultan vey lo nou. I pros avek nou e i pare pour ekout nou ler nou demann li led. I vreman anvi ed nou. (Iza. 43:2) Nou asire ki nou pou kapab fer fas avek nenport problenm parski Zeova i donn nou tou sa ki nou bezwen pour andire. I’n donn nou en zoli kado, setadir pour koz avek li dan lapriyer. I’n osi donn nou Labib, en kantite manze spirityel ek bann frer ek ser ki kontan pour ed nou ler nou dan bezwen.

16. Ki nou bezwen fer pour ki Zeova i kontinyen pran swen avek nou?

¹⁶ Nou vreman rekonesan ki nou Papa ki dan lesyel i vey lo nou. “Nou leker i dan lazwa akoz li.” (Ps. 33:21) Nou kapab montre Zeova ki nou apresye lafason ki i pran swen avek nou par servi bann provizyon ki i donnen pour ed nou. Nou osi bezwen fer nou par pour ki Zeova i kapab kontinyen pran swen avek nou. Andotmo si nou kontinyen fer nou mye pour obei Zeova e fer sa ki byen dan son lizye, Zeova pou vey lo nou pour touzour!​—1 Pyer 3:12.